Ezekeli
23 Nupya kwene Yeova wanenyile ati: 2 “We mwana wa muntu, kwali anaci yaili aavilwe muli nyina wenga. 3 Izile iyaya aacizelele umu Ijipti; ukufuma uku wance wao yaali acizelele. Nupya kuuku kwene akuno yaponzizye unacisungu. 4 Mazina yao a Ohola,* uwali u mukalambapo na Oholiba* kaci wakwe. Izile iyaya aakwane nupya yaviile ana onsi na akazyana. Ohola wimililangako Samaliya na Oholiba wimililangako Yelusalemu.
5 “Ohola watandike ukucita uzelele ala acili uwakwane. Walondesyanga antu aamutemilwe sana, kuli kuti ainamupalamano yakwe Aina Asilya. 6 Yaali intunguluzi izyazwalanga ivyakuzwala vyakwe bulu na alasi, kuli kuti aonsi yonsi alolekanga ningo aakwelanga apa mfwalasi zyao. 7 Watwalilile ukucita uzelele na aonsi yonsi Aina Asilya alolekanga ningo nupya waikowezyanga uku vilubi vya winyi vya yantu yano walondesyanga. 8 Ataatiile ukucita uzelele uno wacitanga umu Ijipti, pano ukufuma lino wali anacisungu yalaalanga nawe, nupya yacitanga nawe uzelele. 9 Fwandi namupeezile uku yantu aamutemilwe sana, kuli kuti Aina Asilya yano walondesyanga. 10 Yamuzuuzile nu kusenda ana yakwe aonsi na anaci, nupya yamukomile uku lupanga. Wizile amanyikwa apa yanaci pa mulandu ni viipe vino wacitanga nupya wapingwilwe.
11 “Lino Oholiba kaci wakwe waweni ivyacitike, watandike ukulondesya sana aamutemilwe nupya watandike nu kucita sana uzelele ukucila na kaci wakwe. 12 Watandike ukulondesya Aina Asilya ainamupalamano yakwe, intunguluzi na alasi azwalanga ivyakuzwala iviyembe nupya aakwelanga pa mfwalasi, kuli kuti aonsi yonsi alolekanga ningo. 13 Lino waikowizye, naweni ukuti wali wakwe kaci muze. 14 Watwalilile ukucita sana uzelele. Waweni ivikope iviyenzu vino yapensile ivya yonsi ivyalenzilwe pa ciumba, ivya Ina Kalideya, 15 vyazwite imisipi umu misana ni vitambala uku mitwe, vyalolekanga wa yasilika, nupya vyonsi kwene vyalangililanga Aina Babiloni aavyalilwe umu Kalideya. 16 Lino waweni ivikope vyao watandike ukuyalondesya, nupya watumile antu uku Kalideya. 17 Nupya Aina Babiloni yayanga kuli aliwe nu kucita nawe uzelele, pa cisila cakuti yamukowezya, watiile ukuvwana nayo pano watandike ukuyalola ukuti aawinyi.
18 “Vino watandike ukucita uzelele apaswe ukwaula ukuvwa insonyi nu kuizuula, namukanyile nu kumulola ukuti uwa winyi, wakwe vino nacisile kuli kaci muze. 19 Watwalilile ukucita sana uzelele nu kwiusya manda ya ku wance wakwe yano wacitanga uzelele umu mpanga ya Ijipti. 20 Wali sana ni nsuna wa yanaci akwata aonsi aya ni vyanzwalo kwati ivyakwe ya punda nanti ivya mfwalasi. 21 Walondesyanga ukucita ivya winyi vino wacitanga lino wali umwance umu Ijipti, lino yacitanga nawe uzelele.
22 “Fwandi we Oholiba, Yeova Umwene wa Papelapela walanda wati: ‘Namaleta antu yano watemwa ukufuma umu ntunga zyonsi, yano watiile ukuvwana nayo pa mulandu wakuti izile iyaya aawinyi kuli wewe, 23 kuli kuti Aina Babiloni na Ina Kalideya yonsi, aonsi Aina Pekodi, Aina Syoa, na Ina Koa, kumwi na aonsi Aina Asilya yonsi. Yonsi kwene aaonsi aakaloleka ningo, i ntunguluzi nupya aalasi, aasilika nupya aonsi asoololwa, yonsi kwene yakakwela pa mfwalasi. 24 Yalakuzanza na maceleta aingi amu nkondo ni umba lya yasilika ilikalamba ale yali ni visyangu ivikalamba ni vinono, nupya ala yazwite ivisote. Yalakuzinguluka nupya ndayanena ukuti yakupingule, yalakupingula ukulingana na vino yakulola ukuti icilinga. 25 Ndaleta ukali pali wewe, yalakufulula ala yali ni cipyu. Yalakuputula impuno na matwi, yauze nayo yalakomwa nu lupanga. Yalasenda ana yako aonsi na anaci, na asyala yalapya umu moto. 26 Yalakuzuula ivyakuzwala vyako nu kusenda iviyembelo vyako ivisuma. 27 Ndaleka ukuti ute ukucita ivya winyi nu uzelele uno watandikile ukucita umu Ijipti. Ulata ukuyalolekesya* nupya utalaiusya impanga ya Ijipti.’
28 “Yeova Umwene wa Papelapela walanda wati: ‘Nimakupeela uku yantu yano wapata, yano watiile ukuvwana nayo. 29 Yalakupata nu kukufulula, nupya yalasenda ivintu vyonsi vino waculile nu kukusya tupu. Antu yonsi yalakutambila nu kulola ivya winyi vino ukacita, nu uzelele wako ulasokololwa. 30 Vii vyonsi vilakucitikila pa mulandu wakuti walondelelanga inko kwati a cizelele, nupya waikowezyanga uku vilubi vyao ivya winyi. 31 Ukacita wakwe vino kaci wako wacitanga, nupya ndakupeela kapu wino namupeezile.’
32 “Yeova Umwene wa Papelapela walanda wati:
‘Ulamwa ivyaya muli kapu wakwe kaci wako umuzike nupya umusaalale,
Yalaakuseka nu kukutumfya, pano vivyo kwene i vyaya muli kapu.
33 Ulamwa ivyaya muli kapu wakwe Samaliya, kaci wako,
Ulakoleka nu kuya nu ulanda,
Ulaya ica kuzunguka nupya ulazuukilwa.
34 Ulamwa vyonsi ivyaya muli kapu iyapangilwa ni ivu nu kumyantilila umukasi
Kapu ilatamika nupya ulakokota iviinga vyakwe kapu iiyo, nupya ulaputula maele yako.
“Pano avino indanda,” avino Yeova Umwene wa Papelapela walanda.’
35 “Fwandi Yeova Umwene wa Papelapela walanda wati: ‘Pa mulandu wakuti wanjilila nupya wamfutatila, ulafululwa pa mulandu ni vya winyi nu uzelele uno ukacita.’”
36 Lyene Yeova wanenyile ati: “We mwana wa muntu, uzye umalanda mazwi ya upinguzi kuli Ohola na Oholiba nu kuyakalipila pa vintu ivya winyi vino yakacita? 37 Yacisile ucende ukupitila umu kupepa ivilubi vyao ivya winyi nupya yakwata umulandu wa wazi. Kulunda pa kucita ucende ukupitila umu kupepa ivilubi vya winyi, yoca na ana yano yaviile kuli nene pakuti yaye ivyakulya ivya vilubi vyao. 38 Cintu cuze cino yacisile kuli nene i cakuti: Pa nsita ili imwi kwene yakowizye incende yane iya muzilo nu kusaalula masabata yane. 39 Pa cisila ca kukoma ana yao nu kuyapeela nga malambo uku vilubi vyao ivya winyi, izile umu ncende yane iya muzilo nu kuikowezya pa wanda kwene uuwa. Vikwene avino yacisile umu ng’anda yane. 40 Yatumile nu wa kuyaama aonsi ukufuma ukutali. Lino iizanga wafuliile nu kuipenta umu manso nupya waiyemvizye ni viyembelo. 41 Nupya wikazile pa cilimba icicindame na pa nkoleelo yako paali tebo pano wisile ivintu vyane ivinunkile na mafuta yane. 42 Nupya puvwisile icongo ca yonsi aatemilwe ivyakuizanzya, paali na ya cakolwa yano yaleesile ukufuma umu lwanga. Yazwikanga anaci vibango uku makasa ni viyembelo ivisuma uku mitwe.
43 “Lyene nalanzile pa mwanaci uwatonsile pa mulandu nu kucita ucende inti: ‘Alatwalilila ukucita uzelele.’ 44 Fwandi aonsi yatwalilile ukuya kuli aliwe kwati avino umuntu akaya kuli cizelele. Vikwene avino yayanga uku yanaci acitanga ivya winyi, kuli kuti kuli Ohola na Oholiba. 45 Lelo aonsi alungame yalamupingula ukulingana nu ucende uno akacita nu wazi uno akazwisya; pano anaci yaa acende, nupya yakwata umulandu wa wazi.
46 “Yeova Umwene wa Papelapela walanda wati: ‘Asilika yalaizila nu kuyalenga ukuya icintu ica kuseka nupya ivintu vyao vilapokwa. 47 Yalayatama na mawe nu kuyakoma nu lupanga. Yalakoma ana yao aonsi na akazyana nu koca mang’anda yao. 48 Ndafumya ivintu vya winyi umu mpanga, na anaci yonsi yalasambilila kuli vino vilacitika nupya yatalaacita ivya winyi vino anaci yayo yacitanga. 49 Yalamufulula pa vicitwa vinu ivya winyi na pa membu zino mwacitanga lino mwapepanga ivilubi vinu ivya winyi; nupya mulamanya ukuti nene Yeova Umwene wa Papelapela.’”