Ezekeli

27 Nupya kwene Yeova wanenyile ati: 2 “Naawe we mwana wa muntu, imba ulwimbo lwa kuloosya Tuli, 3 unene Tuli uti,

‘Wemuno ukaikala umupiipi ni mpongolo ya kuli yemba,

Wemuno ukacita uculuzi na antu ya mu vilila ivingi,

Yeova Umwene wa Papelapela walanda wati:

“We Tuli ukainena uti, ‘Nayemba sana.’

 4 Incende zyako zyaya pakasi kakwe yemba,

Aakupanzile yakuyemvya sana.

 5 Imbao zyonsi zino yaomvizye pa kukupanga i zya miti ya yunipa iya ku Senili,

Yasenzile imikedali ya ku Lebanoni nu kwizakupangila umulongoti.

 6 Yapanzile inkafi zyako ukuomvya umuti uwa muoaki uwa ku Basyani,

Nupya ica ku nkoleelo cako yacipanzile ukuomvya imbao zya milemo iikako na mino ya nzovu aafumile uku vilila vya ku Kitimu.

 7 Insalu izisuma izyafumile uku Ijipti ali zino yapangiileko itanga lyako,

Nupya ivya kuvimba papela yavipangiile na kotoni wakwe bulu nu muyenzu uwafumile uku vilila vyakwe Elisya.

 8 Aikazi ya mu Sidoni na amu Alivadi aliyo yakufiyanga.

Aonsi yako aamanyikisye ivya kufiya aliyo yakufiyanga we Tuli.

 9 Aonsi ya ku Gebali aamanyikisye ivya kusilila aliyo yakusililanga pakuti utaingizya manzi.

Mawato yonsi aapali yemba na ayafiyanga iizanga umu kucita uculuzi naawe.

10 Aonsi ya ku Pesya, uku Ludi nu ku Puti yaali umwi umba lyako ilya yasilika aalwanga inkondo.

Yakowekanga ivisyangu vyao ni visote vyao muli wewe, nupya yakuletelanga ululumbi.

11 Aonsi ya ku Alivadi aali umwi umba lyako ilya yasilika iimilile pa viumba uku kuzinguluka,

Nupya aonsi asipe iimilile pa mpungu zyako ala iyaipekanya.

Yakowike ivisyangu uku viumba vyako vyonsi

Nu kukuyemvya sana.

12 “‘“Antu ya ku Tasyisyi yacitanga uculuzi naawe pa mulandu wakuti wakweti sana ivyuma. Yakupeelanga siuva, icela, mutovwe unyome nu wangupale pakuti uyapeele ivintu vyako. 13 Yavani, Tubali na Misyeki yacitanga uculuzi naawe, yakupeelanga azya ni vintu ivyapangilwa na koopa pakuti naawe uyapeele ivintu vyako. 14 Amu ng’anda yakwe Togama yakupeelanga imfwalasi na ya punda, naawe uyapeela ivintu vyako. 15 Antu ya ku Dedani yacitanga uculuzi naawe; wakweti aculuzi aakuombelanga pa vilila ivingi; yakupeelanga amino ya nzovu ni miti itifi isuma. 16 Aina Edomu yacitanga uculuzi naawe pa mulandu wakuti wakweti ivintu ivingi. Yakupeelanga tokwasi, kotoni umuyenzulukile, ivyakuzwala vya makaala asuma, insalu izisuma, mawe ya mutengo aamuli yemba, na mawe yakwe lubi pakuti naawe uyapeele ivintu vyako.

17 “‘“Antu ya mu mpanga ya Yuda ni ya Izlaeli yacitanga uculuzi naawe, yakupeelanga ingaano izya ku Miniti, ivyakulya ivisuma, uci, mafuta na basamu pakuti uyapeele ivintu vyako.

18 “‘“Damasika wacitanga uculuzi naawe pa mulandu ni vyuma vyako ivingi, wakukazyanga waini wa ku Heliboni na mavumbu ya ku Zahali. 19 Vedani na Yavani aku Uzali yakupeelanga ivyela, imiti ya kasya,* ni vinunkile pakuti uyapeele ivintu vyako. 20 Antu ya ku Dedani yakukazyanga insalu izya kwika pa nyama zino yakwelangapo. 21 Aina Alabya ni ntunguluzi zyonsi izya ku Kedali yakuombelanga, yakalanga nu kukazya imfwele, ya suuku ni imbuzi. 22 Aculuzi ya ku Syeba nu ku Laama yakazyanyanga naawe; yakupeelanga ivintu vyonsi ivinunkile ningo, mawe ya mutengo na goldi pakuti naawe uyapeele ivintu vyako. 23 Antu ya ku Halani, uku Kane, uku Edeni, aculuzi ya ku Syeba, Asyuli nu ku Kilimadi yakazyanyanga ivintu naawe. 24 Pa ncende yako iya uculuzi yakazyangapo ivyakuzwala ivisuma, vyakuzwala vya kunzi vyakwe bulu, ni vyakuzwala vya makaala asuma iviyembe, na ya kapeti, vyonsi kwene yavinyepanga ningo ni myando.

25 Mawato ya ku Tasyisyi yasendanga ivintu vyako vino wakazyanga,

Icakuti wakweti ivyuma ivingi pali yemba.

26 Aakakufiya iiyakutwala pali yemba wa mayimbi;

Umuza wa ku ufumondaka iiukononela pali yemba.

27 Ivyuma vyako, vintu vino wakwata, vintu vino ukakazya, antu aakaomba umu mawato yako,

Antu aakakusilila pakuti utaingizya manzi, aakakazya ivintu vyako, na asilika yako yonsi,

Kuli kuti antu yonsi yano uli nayo,

Yalamwela uwanda uno ulononwa.

28 Lino antu yako aakaomba umu mawato yalapunda, incende ya mu mbali yakwe yemba ilasunkaana.

29 Antu yonsi aakaomba umu mawato na akaomba pali yemba

Yalafuma umu mawato yao nu kwimilila uku cituntu.

30 Yalapunda nu kulila sana pa mulandu naawe

Ala yakuisansa ulukungu uku mitwe yao nu kukunkuluka umwi twi.

31 Yalapela mapala nu kuzwala ivyakuzwala ivya kulangilamo ulanda;

Yalalila sana pa mulandu naawe.

32 Yalakulilila ulanda nu kwimba ulwimbo lwa kuloosya pali wewe iyati:

‘A weni uwaya wakwe Tuli uwataya mya pali yemba?

33 Lino ivintu vizile ukufuma pali yemba, walenzile antu aingi ukusansamuka.

Ivyuma vyako ivingi ni vintu vino wakazyanga vyalenzile ya mwene ya pano nsi ukuya akankala.

34 Nomba lyene watuononekela pali yemba apazike,

Ni vintu vyako vyonsi vino ukakazya na antu yako, iivimwela pamwi naawe.

35 Antu yonsi aakaikala umu vilila yalazunguka lino yalakulolekesya,

Nupya ya mwene yao yalazakaza pa mulandu ni ntete, yalaya nu ulanda.

36 Aculuzi ya mu nko yalazunguka pali vino vilakucitikila.

Impela yako iliza umu kupumikizya nupya ilaya iipisye,

Ulononwa manda pe.’”’”