Ezekeli
35 Nupya kwene Yeova wanenyile ati: 2 “We mwana wa muntu, lozya icinso cako uku ncende ya myamba ya Seili, nu kusesema pa vilaicitikila. 3 Uyinene uti, ‘Yeova Umwene wa Papelapela walanda wati: “Inja umulwani wako we ncende ya myamba ya Seili, nupya ndakonzolwela ikasa lyane pali wewe nu kukulenga usyale umwaula icili consi. 4 Ndonona imisumba yako, nupya ulasyala umwaula icili consi; lyene ulamanya ukuti nene Yeova. 5 Pano wali sana nu lupato, nupya walenzile ukuti Aina Izlaeli yakomwe nu lupanga pa nsita ino yaali ni ntazi lino yafululwanga ukufululwa kwa kusyalikizya.”’
6 “Fwandi Yeova Umwene wa Papelapela walanda wati, ‘Nkulapa ukuti nakupekanyizizya imfwa nupya ilakuzinganya. Pa mulandu wakuti wapasile imfwa utalaipuuka. 7 Ndalenga incende ya myamba ya Seili ukusyala umwaula icili consi, nupya ndakoma wensi akupitamo. 8 Mu myamba ya mu ncende iyo ndazuuzyamo ivitumbi vya yantu alakomwa nupya ivitumbi vya yantu alakomwa nu lupanga vilaya pa tumyamba twako, mu mikonko yako nu mu nguzi zyako zyonsi. 9 Ndalenga uononeke sana, nupya umu misumba yako mutalikala ali wensi; lyene ulamanya ukuti nene Yeova.’
10 “Pa mulandu wakuti walanzile uti, ‘Inko zii ziili ni mpanga zii ziili zilaya i zyane, nupya tulikala muli zyoili kwene,’ nanti cakuti ne Yeova naali umu nko zizyo, 11 ‘nkulapa ukuti ndalandula pali vino wali nu ukali nu uzuwa nu lupato kuli aliyo nupya ndailenga ukumanyikwa kuli aliyo lino ndakupingula,’ avino Yeova Umwene wa Papelapela walanda. 12 ‘Lyene ulamanya ukuti ne Yeova, nuvwa ivintu vyonsi viipe vino walanzile pa myamba ya mu Izlaeli lino watile, “Yasyala umwaula icili consi nupya yapeelwa kuli sweswe kuti tuyonone.” 13 Walanzile cilumba cilumba pali nene nu kulanda iviipe ivingi pali nene nupya nuvwile vyonsi.’
14 “Yeova Umwene wa Papelapela walanda wati: ‘Insi yonsi ilasansamuka lino ndakonona nu kukulenga ukusyala umwaula icili consi. 15 Wakwe viivi kwene vino wasansamwike lino impanga ya yantu ya mu ng’anda yakwe Izlaeli yononyilwe, nawe kwene avino ndakucita. Ulononwa we ncende ya myamba yakwe Seili, ee Edomu wensi alononwa; nupya yalamanya ukuti nene Yeova.’”