Ezekeli
39 “We mwana wa muntu, sesema ivilacitikila Gogi, nupya umunene uti, ‘Yeova Umwene wa Papelapela walanda wati: “Inja umulwani wako we Gogi, we ntunguluzi ikalamba yakwe Misyeki na Tubali. 2 Ndalenga ukuti ulungame uku ntunga yuze nu kulenga ukuti ufume uku mpanga ya kutali sana iya ku katutu nupya ndakuleta pa myamba iya mu Izlaeli. 3 Nduma ulapwa uuli ukwi kasa lyako ilya kuli cimani ni nceto izili ukwi kasa lyako ilya kwi lunji nupya vilapona. 4 Wemo na asilika yako yonsi na antu yano ulaya nayo mulafwila umu myamba iya mu Izlaeli. Ndakupeela uku vyunyi vipusanepusane nu ku vilyanyi vya mu mpanga kuti uye icakulya.”’
5 “‘Mulafwila umu mpanga pano nene indanda,’ avino Yeova Umwene wa Papelapela walanda.
6 “‘Nupya ndoca Magogi na aakaikala umu vilila muno yacingililwa, lyene yalamanya ukuti nene Yeova. 7 Ndalenga izina lyane ilya muzilo ukumanyikwa umu yantu yane Aina Izlaeli, ntalaleka izina lyane ilya muzilo ukutwalilila ukusaalulwa; nupya inko zilamanya ukuti nene Yeova Uwa Muzilo umu Izlaeli.
8 “‘Ivyasesimwe vilacitika nupya vilafikiliziwa,’ avino Yeova Umwene wa Papelapela walanda. ‘Ukwene ali wanda uno nalandangapo. 9 Aakaikala umu misumba ya mu Izlaeli yalafuma nu kuyaoca ivyanzo, kuli kuti visyangu vinono ni vikalamba, maulapwa ni nceto, intuwa zya mu nkondo na masumo. Nupya yalaaviomvya uku kupembela umoto pa myaka 7. 10 Yatalaatiiya inkwi umu mpanga nanti umu mitengo pa mulandu wakuti yalaaomvya ivyanzo pa kupemba umoto.’
“‘Yalasampa iviya kuli yano yayasampanga, nu kupokolola ivyuma kuli yano yayapokololanga,’ avino Yeova Umwene wa Papelapela walanda.
11 “‘Mu wanda uuwa ndapeela Gogi incende iya kumuziikamo umu Izlaeli umu mukonko wa yantu aakapita uku ufumondaka wakwe yemba, nupya ilacilika inzila ya yantu aakapitamo. Kuuku kwene akuno yalaziika Gogi na asilika yakwe yonsi, nupya yalaama incende iiya ukuti Mukonko Wakwe Hamoni-Gogi.* 12 Amu ng’anda yakwe Izlaeli yalamala imyezi 7 ala yakuyaziika pakuti yazifye impanga. 13 Antu yonsi amu mpanga yalaomba umulimo wa kuyaziika nupya cii cilalenga ukuti yamanyikwe sana umu wanda uno ndaicindamika,’ avino Yeova Umwene wa Papelapela walanda.
14 “‘Aonsi yalapeelwa umulimo uwa kulapitana umu mpanga lyonsi nu kuziika ivitumbi ivyasyala, pakuti yazifye impanga. Yalaomba umulimo uuwo pa myezi 7. 15 Aakupita umu mpanga ndi cakuti yazana ifupa lya muntu, yalaikapo icimanyililo. Lyene aapeelwa umulimo wa kuziika nayo yalaaya yakuliziika umu mukonko wa Hamoni Gogi. 16 Kulaya nu musumba uulaamwa ukuti Hamona.* Nupya vikwene avino yalazifya impanga.’
17 “Yeova Umwene wa Papelapela walanda wati: ‘Naawe we mwana wa muntu, nena ivyunyi vya misango yonsi ni vilyanyi vyonsi ivya mu mpanga uti, “Kolonganini pamwi nu kwiza. Mwensi kolonganini nu kuzinguluka ilambo lino nkumupekanyizizya, ilambo ilikalamba ilili pa myamba iya mu Izlaeli. Mulalya imili nu kumwa uwazi. 18 Mulalya imili ya yantu ya maka nu kumwa uwazi wa ntunguluzi zya mu nsi, kuli kuti ya suuku, imfwele, imbuzi na ya cipambasi, inyama zyonsi iziine izya mu Basyani. 19 Mulalya ivya mafuta nu kumwa uwazi kufikila muce mukoleke ilambo lino nkumupekanyizizya.”’
20 “‘Pali tebo ino ndamupekanyizizya palazuula imfwalasi, na aakakwela umu maceleta, aonsi ya maka na asilika yonsi,’ avino Yeova Umwene wa Papelapela walanda.
21 “‘Ndaleka ululumbi lwane luloleke umu nko, nupya inko zyonsi zilalola upinguzi na maka yane vino ndaleta pali aliyo. 22 Ukufuma pa wanda uwo nu kuya inkoleelo amu ng’anda yakwe Izlaeli yalamanya ukuti nene Yeova Leza wao. 23 Nupya inko zilamanya ukuti amu ng’anda yakwe Izlaeli yasenzilwe umu uzya pa mulandu nu kuluvyanya kwao, pano yataali ni cisinka kuli nene, fwandi nafisile icinso cane kuli aliyo nu kuyapeela uku yalwani yao, nupya yonsi yakomilwe uku lupanga. 24 Nayafulwile ukulingana nu kukowela kwao nu kuluvyanya kwao, nupya nafisile icinso cane kuli aliyo.’
25 “Fwandi Yeova Umwene wa Papelapela walanda wati: ‘Ndawezya amu ng’anda yakwe Yakobo aasendwa umu uzya nupya yonsi kwene ndayuvwila uluse; ndacingilila izina lyane ilya muzilo. 26 Lino ukuzewana kwao pali vino yatiile ukuya ni cisinka kuli nene kulasila, yalikala umutende umu mpanga yao ukwaula nanti aumwi uwa kuyuvwisya intete. 27 Lino ndayawezya ukufuma umu yantu muno yasalanganila nu kuyakolonganika ukufuma umu mpanga zya yalwani yao, ndaicindamika ale ni nko izingi zikulolako.’
28 “‘Yalamanya ukuti nene Yeova Leza wao lino ndayatwala umu nko umu uzya nu kuyawezya umu mpanga yao nupya, ukwaula ukusya nanti aumwi. 29 Ntalatwalilila ukufisa icinso cane kuli aliyo nupya, pano ndapongolwela umupasi wane pa ya mu ng’anda yakwe Izlaeli,’ avino Yeova Umwene wa Papelapela walanda.”