Ezekeli

42 Lyene wantwazile umu musolo wa panzi uwalozizye uku katutu. Nupya wanjingizye umu cikuulwa ca kuliilamo icali umupiipi na kacende akazingulwike itempele uku katutu ka cikuulwa icali ukwi tundu li tempele. 2 Utali wa cikuulwa cico ukufuma uku wingililo wa ku katutu cali mamita 52, mu wipi namo mamita 26. 3 Cikuulwa cico cali pakasi ka musolo wa mukasi uwali mamita 10 umu wipi nu musolo wa kunzi uwakuuzilwe na mawe. Miputule ya kuliilamo yayelile umu vikuulwa viili ivyakweti intunti zitatu nu tuzila, nupya ivikuulwa vii vyalozyanyizye. 4 Pakasi ka vikuulwa vii viili ivya kuliilamo pali inzila iyaali mamita 5 umu wipi na mamita 52 umu utali, nupya imilyango ya ku vikuulwa yayelile uku katutu. 5 Miputule ya kuliilamo iya papela yaali ifyenkane ukucila iya pansi ni ya pakasi pano utuzila twamazile incende ya miputule iiyo. 6 Miputule yii iya kuliilamo yaali pa ntunti yakwe citatu nomba itaakweti incesi wa ncesi izyali umu misolo. Ali mulandu kwene uno incende ino yayelilepo yacepiile kucila iya pansi ni ya pakasi.

7 Ciumba ca kunzi icakuuzilwe na mawe icali umupiipi ni miputule ya kuliilamo iyalozizye uku musolo wa kunzi nupya icalozyanyizye ni miputule yuze iya kuliilamo cali mamita 26 umu utali. 8 Miputule ya kuliilamo iyalozizye uku musolo wa kunzi yaali mamita 26 umu utali, lelo iyalozizye uku ncende ya muzilo yaali mamita 52. 9 Miputule ya kuliilamo yakweti umulyango uwayelile uku ufumondaka uwa kwingililamo ukufuma pa musolo wa panzi.

10 Kwali ni miputule ya kuliilamo ukwi tundu lya ciumba icakuuzilwe na mawe ica ku ufumondaka, mupiipi ni ncende itaakweti icili consi nu mupiipi ni cikuulwa. 11 Kwali na kazila ka kupitamo wakwe akali uku miputule ya kuliilamo iya ku katutu. Miputule yii yalingine umu utali nu mu wipi nupya yakweti ukwa kufumila ukuli kumwi, ni mipangilwe ili imwi. Milyango ya miputule yii 12 yaali wa milyango ya miputule ya kuliilamo iyalozizye uku kaeya. Apatandikile inzila iya kuya uku miputule ya kuliilamo iyalozizye uku ufumondaka paali umulyango umupiipi ni ciumba icakuuzilwe na mawe pano umuntu angingilila.

13 Lyene wanenyile ati: “Miputule ya kuliilamo iya ku katutu ni miputule ya kuliilamo iya ku kaeya iili umupiipi ni ncende apataaya icili consi i ya muzilo muno ya simapepo aakaomba pa nkoleelo yakwe Yeova yakaliila malambo ya muzilo sana. Amuno yakaika malambo ya muzilo sana, malambo ya vyakulya, malambo ya pa luyembu na malambo ya pa mulandu, pano u mwa muzilo. 14 Lino ya simapepo ingila umu ncende ya muzilo yatalinzile ukufuma uku musolo wa kunzi ukwaula ukuzuula ivyakuzwala vino yakaombelamo, pano i vya muzilo. Yalinzile ukuzwala ivyakuzwala vyuze lino yakuya uku ncende ukuli antu.”

15 Lino wamazile ukupima incende ya mwi tempele, twafumiile uku mpongolo iyalozizye uku ufumondaka nupya waile apima incende yonsi.

16 Wapimile ulusansa lwa ku ufumondaka ukuomvya kamuti ka kupimilako, nupya lwali mamita 1,555 umu utali ukufika uku lusansa luze.

17 Wapimile ulusansa lwa ku katutu, nupya lwali mamita 1,555 umu utali.

18 Wapimile ulusansa lwa ku kaeya, nupya lwali mamita 1,555 umu utali.

19 Wapisile azinguluka ukuya uku lusansa lwa ku uwondaka. Nupya waile apima nu kuzana ukuti lwali mamita 1,555 umu utali.

20 Wapimile itempele umu mbali zyonsi 4. Lyakweti iciumba ukulizinguluka icali mamita 1,555 umu utali na mamita 1,555 umu wipi, ciumba cii capatukinye incende ya muzilo ni ncende itaali iya muzilo.