Ezekeli
13 Nupya kwene Yeova wanenyile ati: 2 “We mwana wa muntu, sesema pali ya kasesema ya mu Izlaeli na aakasesema ivya mu myenzo yao uti, ‘Uvwini mazwi yakwe Yeova. 3 Yeova Umwene wa Papelapela walanda wati: “Kalanda kuli ya kasesema awelewele akalondela imyenzo yao lino yataweni cili consi! 4 We Izlaeli ya kasesema yako yali wakwe ya nkusa umu ncende izyononeke. 5 Mutalaya uku viumba ivyakuulilwa na mawe ivyononeka pakuti muce muvikuule cipya cipya nu kucingilila amu ng’anda yakwe Izlaeli umu ulwi, pa wanda wakwe Yeova.” 6 “Yakalola ivilolwa vya ufi nu kusesema ivya ufi, aakalanda iyati ‘Yeova watalanda wati,’ lino Yeova umwineco atayatumile, nupya yakaloleela ukuti amazwi yao yafikiliziwe. 7 Uzye ivilolwa vino mukalola na vino mukasesema asi vya ufi vino mukalanda imuti, ‘Yeova watalanda ati,’ lino ntalanzile icili consi?”’
8 “‘Fwandi Yeova Umwene wa Papelapela walanda wati: “‘Pa mulandu wakuti mukalanda ivya ufi nu kulola ivilolwa vya ufi, inja umulwani winu,’ avino Yeova Umwene wa Papelapela walanda.” 9 Ndaomvya ikasa lyane ukufulula aakalola ivilolwa ivya ufi na akasesema ivya ufi. Yatalaya pali ya cuza yane; nanti ukulembwa pamwi na mu ng’anda yakwe Izlaeli; nupya yatalaswilila uku mpanga yakwe Izlaeli; lyene mulamanya ukuti nene Yeova Umwene wa Papelapela. 10 Vii vyonsi vilacitika pa mulandu wakuti yakaponzya antu yane lino yakulanda iyati, “Kuli umutende!” lino kusi mutende. Ndi cakuti ciumba cakuulwa yakapentako ivitiswe.’*
11 “Nena aakupentako ivitiswe uti ciumba cilapona. Kulaya imvula iipisye ni mvula ya mawe nupya icimuza icikalamba cilalenga iciumba ukupona. 12 Nupya lino iciumba cilapona antu yalamuzya yati, ‘Uzye vino mwapentanga vyaomba cani?’
13 “Fwandi Yeova Umwene wa Papelapela walanda wati: ‘Ndaleta icimuza icikalamba ni mvula iipisye pa mulandu wakuti insoka, nupya ndaleta imvula ya mawe iya konona iciumba pa mulandu wakuti indi sana nu ukali. 14 Ndawisya iciumba cino mwapensileko ivitiswe nu mufula ulaloleka. Lino umusumba ulononwa, mulononelwa pamwi nao, nupya mulamanya ukuti nene Yeova.’
15 “‘Lino ndaleta ukali uwipisye pa ciumba na pali yano yacipentanga ni vitiswe, ndamunena inti: “Iciumba icononeka na acipentanga yaafwa. 16 Ya kasesema ya mu Izlaeli yaafwa, aasesemanga pa musumba wa Yelusalemu nu kulolela Yelusalemu ivilolwa vya mutende lino kusi mutende,”’ avino Yeova Umwene wa Papelapela walanda.
17 “Lelo wemo we mwana wa muntu, lozya icinso cako uku yana akazyana amu yantu yako aakasesema ivya mu myenzo yao nu kusesema pali aliyo. 18 Uyanene uti ‘Yeova Umwene wa Papelapela walanda wati: “Kalanda uku yanaci aakapanga utwa kunyepa pa tunkonci* nu tusalu twa kuzwala antu aamitwe ipusanepusane pakuti yalema antu! Uzye mukwika maumi ya yantu yane umu uzanzo nu kwezya ukupususya maumi inu? 19 Mukanzewanya umu yantu yane ukuomvya tu baale twa pi kufi nu tumukate tunono, nupya ukupitila umu kubepa antu yane aakauvwa uku ufi winu mukakoma aatalinzile ukufwa nu kusya alinzile kukomwa.”’
20 “Fwandi Yeova Umwene wa Papelapela walanda wati: ‘Mwe yanaci napata ivintu vino mukapanga ivya kunyepelela ukwi kasa, vino mukaomvya ukulemelako antu wa vyunyi nupya ndaviputoola uku makasa inu nu kusapula antu yano mukalunga wa vyunyi. 21 Ndafumya nu tusalu twinu utwa kuvimba uku mitwe nu kupususya antu, nupya mutalaayalema umu citeyo; lyene mulamanya ukuti nene Yeova. 22 Pano imulenga umulungami ukuya nu ulanda pa mulandu nu ufi winu lino nemo ntalenzile aye nu ulanda, nupya mukutungilila kacita wa viipe pakuti ataleka ukucita iviipe nu kuya nu umi. 23 Fwandi mwe yanaci mutalatala mulolepo ivilolwa ivya ufi nupya mutalaasapoola nupya; ndapususya antu yane mu minwe inu, lyene mulamanya ukuti nene Yeova.’”