Ezekeli

16 Nupya kwene Yeova wanenyile ati: 2 “We mwana wa muntu, leka antu ya mu Yelusalemu yamanye iviipe vino yakacita. 3 Uyanene uti, ‘Yeova Umwene wa Papelapela walanda kuli Yelusalemu wati: “Wafuma umu mpanga iya Ina Kenani nupya amuno wavyalilwe. Tata wako wali u Mwina Amoli, na mayo wako wali u Mwina Hiti. 4 Lelo wemo lino waviilwe, umutoto wako utaputwilwe, yataakufuzile, yataakupasile umusilya nupya yataakupomvile umu nsalu. 5 Kusi uwakuvwilile uluse kuti akucitile ivintu vii. Kusi uwali ni cikuuku kuli wewe. Lelo yakusiile sile umu mpanga pa mulandu wakuti antu yakupasile pa wanda uno wavilwe.

6 “‘“Lino napitanga, nakuweni ukusanta ala uizi umu wazi wako, nupya nakunenyile inti: ‘Twalilila ukuya nu umi!’ Ee nakunenyile ala uizi umu wazi wako inti: ‘Twalilila ukuya nu umi!’ 7 Nakulenzile ukuya iumba ilikalamba sana wakwe vino imiti ya mu mpanga ikavulilako, wakuzile nu kutandika ukuzwala iviyembelo ivisuma. Nupya wamezile maele ni nyele zyako izikula; lelo utaakweti vyakuzwala.”’

8 “‘Lino napitanga nakuweni, nupya naweni ukuti watulinga ukutwalwa. Fwandi nakonzolwile icakuzwala cane nu ku kuvimba pakuti utaya tupu nupya nalafile nu kupangana naawe upangano nupya wizile uya uwane,’ avino Yeova Umwene wa Papelapela walanda. 9 ‘Nupya natozile manzi inkufula uwazi uno wali nao nu ku kupaka mafuta. 10 Lyene nakuzwisile ivyakuzwala iviyembe ni ndyatu zya mpapa isuma, nupya nakuzwisile icitambala icisuma ni vyakuzwala vya mutengo. 11 Nakuyemvizye ni viyembelo inkuzwika ni vibango ni ciyembelo ca mu nsingo. 12 Nakuzwisile ni yelena pa mpuno nu ku matwi nupya nakuzwisile icisote cakwe unamwene uku mutwe. 13 Waiyemvyanga nu tuyembelo twakwe goldi na siuva, nupya wazwalanga ivyakuzwala ivisuma ivya mutengo nupya iviyembe. Walyanga fulaulo umusuma, uci, na mafuta, wizile uya umuyembe sana nupya walinzile ukuya namwene.’”

14 “‘Watandike ukumanyikwa umu nko pa mulandu nu kuyemba kwako pano kwali ukwa cumi cumi pa mulandu wakuti nene nakulenzile ukuya umuyembe,’ avino Yeova Umwene wa Papelapela walanda.”

15 “‘Lelo watandike ukutaila umu kuyemba kwako, nupya wizile uya cizelele pa mulandu nu kumanyikwa. Wacitanga uzelele nu muntu wensi aakupita, waipeelanga kuli aliwe. 16 Watozile ivyakuzwala vyako vimwi uyemvezyako incende izya kupepelapo zino wacitilangapo uzelele, ivya musango uwo vitalinzile ukucitika nanti kuswililapo nupya. 17 Nupya watozile viyembelo vyako ivisuma ivyapangiilwe na goldi na siuva vino nakupeezile, upanga ni vilubi ivyalolekanga wa yonsi vino wacitanga navyo uzelele. 18 Watozile ivyakuzwala vyako iviyembe nu kuvivimba, nupya wavipeezile mafuta yane ni vinunkile. 19 Nu mukate uno nakupeezile ukuti ulye uwapangiilwe na fulaulo umusuma, mafuta nu uci, nao kwene waupeezile uku vilubi vivyo wa vinunkile. Vivyo kwene i vyacitike,’ avino Yeova Umwene wa Papelapela walanda.”

20 “‘Watozile ana yako aonsi na anaci yano waviile kuli nene nu kuyapeela uku vilubi vivyo nga malambo, uzye uzelele wako utakumiine icakuti uwapeela na ana yako nga malambo? 21 Wakomile ana yane nu kuyapeela nga malambo uku vilubi ukupitila umu kuyoca umu moto. 22 Lino wacitanga ivya winyi vyonsi nu uzelele, utiwisye manda ya ku wance wako lino wali tupu ala ukusanta umu wazi wako. 23 Kalanda kuli wewe pa mulandu ni viipe vyonsi vino wacita,’ avino Yeova Umwene wa Papelapela walanda. 24 ‘Wapanzile incende izitumpuke pa kupepela ya leza yauze umu ncende zyonsi umukazanwa antu aingi. 25 Wapanzile apa kupepela ya leza ya ufi pa ncende izyalolekanga sana umu miseo yonsi, walenzile ukuyemba kwako ukuya icintu ca winyi ukupitila umu kuipeela kuli yonsi aapitanga, nupya watandike ukucita sana uzelele. 26 Wacitanga uzelele na Ina Ijipti ainamupalamano yako aali sana ni nsuna nupya wansosyanga pa mulandu na vino wacitanga sana uzelele. 27 Lyene ndaleta ikasa lyane pali wewe nu kuta ukukupeela ivyakulya ivilinge nupya ndakupeela uku yanaci aakupata, ana akazyana Aina Filisti auvwanga uyi pa mulandu ni vya winyi vino wacitanga.

28 “‘Pa mulandu wakuti insuna itaasizile, waile umu kucita uzelele na Ina Asilya, lelo na pa cisila ca kucita uzelele nayo, nalyo kwene utuuvwile ukuti calinga. 29 Fwandi watandike ukucita sana uzelele ni mpanga ya yaculuzi* na Ina Kalideya, lelo nalyo kwene utuuvwile ukuti calinga. 30 Umwenzo wako wali ulwale* lino wacitanga vintu vii vyonsi wakwe cizelele umupame,’ avino Yeova Umwene wa Papelapela walanda. 31 ‘Lelo lino wapanzile incende izitumpuke apa kupepela ya leza yauze umu ncende izyalolekanga sana umu miseo, nu mu ncende zyonsi umwazanwanga antu aingi, utaali wakwe cizelele pano wakananga malipilo. 32 Wewe umwanaci umucende uwatemwa aonsi yauze ukucila uwakwe! 33 Antu yakapeela ya cizelele yonsi ivya upe, lelo wemo wewe ukapeela ivya upe kuli yonsi aakakulonda nupya ukalipila antu yonsi pakuti yacite naawe uzelele. 34 Wapusanako na anaci yauze aakacita uzelele. Kusi aakacita uzelele wakwe wewe! Ukalipila yauze, lelo wemo yasikulipila. Wemo wapusanako.’

35 “Fwandi we cizelele, uvwa mazwi yakwe Yeova. 36 Yeova Umwene wa Papelapela walanda wati: ‘Pa mulandu wakuti waya sana ni nsuna nupya yakutambiile lino wacitanga uzelele na antu aakutemwa ni vilubi vyonsi iviipe nupya ivya winyi* vino wapeelanga uwazi wa yana yako, 37 namakolonganika antu yonsi aakutemwa yano ukalenga ukuya ni nsansa, pamwi na yonsi yano wapata. Ndayakolonganika yonsi pakuti yakulwisye, nupya ndakuzuula nayo yalakutambila.

38 “‘Ndakufulula wakwe vino anaci aacende na anaci aakazwisya uwazi yalinzile ukufululwa, nupya ndaleka ukuti ukomwe ala indi ni cipyu nu uzuwa. 39 Ndakupeela umu minwe yao, nayo yalonona incence zyako izitumpuke zino ukapepelapo ya leza yauze; ni ncende zyuze zino ukalola ukuti izya muzilo nupya yalakuzuula nu kusenda iviyembelo vyako iviyembe nupya yalakusya tupu. 40 Yalaleta iumba kuti likulwisye nu kukutama na mawe nu kukukoma na ya panga. 41 Yaloca mang’anda yako nu kukupingwila pa nkoleelo ya yanaci aingi, ndaleka ukuti ute ukucita uzelele, nupya ulata ukulipila antu aakutemwa. 42 Icipyu cane nu ukali vino ndaleta pali wewe vilasila, nupya ndateeka umwenzo nu kuta ukukusokela.’

43 “‘Pa mulandu wakuti utiwisye manda yako aaku wance nupya wansosizye ukupitila umu kucita ivintu vii vyonsi, ndakufulula pa mulandu na vino ukacita,’ avino Yeova Umwene wa Papelapela walanda, ‘nupya ulata ukucita ivintu vya nsonyi ni vya winyi.

44 “‘Antu yonsi aakaomvya mapinda yalaaomvya ipinda lyakuti: “Mwana umukazyana ali sile wakwe nyina!” ukulozya kuli wewe. 45 Waya sile wakwe mayo wako, uwapasile iya na ana yakwe. Nupya waya wakwe ya kaci yako aapasile ya iya na ana yao. Mayo wako wali Umwina Hiti na tata wako wali Umwina Amoli.’”

46 “‘Nyokolenzi a Samaliya, aakaikala uku katutu pamwi na ana yakwe akazyana, nupya umutowako umwanaci aakaikala uku kaeya pamwi na ana yakwe akazyana, a Sodoma. 47 Wakolanyanga imiyele yao nu kucita ivya winyi vino yacitanga nupya umu nsita sile inono wizile uwipisya ukuyacila. 48 Ne Yeova, Umwene wa Papelapela nkulapa ukuti Sodoma kaci wako na ana yakwe akazyana yatatala yacita wakwe vino wemo na ana yako akazyana imucita. 49 Vii avino Sodoma kaci wako waluvyanyizye: Wene pamwi na ana yakwe akazyana yaakweti icilumba ni vyakulya vingi nupya yatasakamikwanga icili consi; lelo yatazwilizyanga aaculanga na apiina. 50 Yatwalilile ukuya ni cilumba nupya yacitanga ivintu vya winyi pa nkoleelo yane, fwandi naweni ukuti icilinga ukuyonona.

51 “‘Uwingi wa viipe vino Samaliya wacisile utanga ufike na pakasi ka membu zino wacita. Lelo watwalilile ukucita ivya winyi ukucila vino yene yacisile icakuti ya kaci yako yatandike ukuloleka aalungame pa mulandu ni vya winyi vyonsi vino wacitanga. 52 Ulinzile ukuzewana pano ukatungilila iviipe vino ya kaci yako yakacita. Pa mulandu wakuti imembu zyako zyaya izya winyi ukucila imembu zyao calenga ukuti yaye alungame ukukucila. Fwandi lyene insonyi kazikuleme nupya kuzewane pano walenga ya kaci yako ukuloleka alungame.’

53 “‘We Yelusalemu ndakolonganika antu yako aasendwa umu uzya kumwi na antu ya mu Sodoma nu mu Samaliya; na amu mizi iyayamo nu kuyafumya umu uzya, 54 pakuti uzewane; nupya ulazewana pa mulandu na vino wayateekezya. 55 Ya kaci yako, kuli kuti Sodoma na Samaliya kumwi na ana yao akazyana, yalaya wakwe vino yaali, naawe kwene kumwi na ana yako akazyana mulaya wakwe vino mwali. 56 Sodoma kaci wako ataali umulinge ukulumbula lino wali ni cilumba, 57 ala iviipe vino ukacita vitatala vyamanyikwa. Nomba lyene ana akazyana yakwe Silya na inamupalamano yakwe yakakutumfya, na ana akazyana yakwe Filisti aakuzinguluka yakusuula. 58 Ulafululwa pa viipe ni vintu vya winyi vino wacita,’ avino Yeova walanda.”

59 “Yeova Umwene wa Papelapela walanda wati: ‘Ndacita kuli wewe wakwe vino wacita, pano wasuula umulapo wako ukupitila umu kutama upangano wane. 60 Lelo ndiusya upangano uno napangine naawe lino wali umwance, nupya ndapangana naawe upangano uwa manda pe. 61 Uliusya vino wacitanga nu kuzewana lino ulapokelela ya kaci yako aikolo na ance pali wewe, nupya ndayapeela kuli wewe wa yana yako akazyana, lelo asi pa mulandu nu upangano wako.’

62 “‘Nupya ndapangana naawe upangano; lyene ulamanya ukuti nene Yeova. 63 Uliusya vino wacisile nupya ulaya ni nsonyi nu kufilwa ukulanda icili consi lino ndakwelela asi umulandu na vyonsi vino wacisile,’ avino Yeova Umwene wa Papelapela walanda.”