Zekaliya
9 Yaa ali mazwi yakwe Leza:
“Upinguzi wakwe Yeova uliza pali Hadalaki,
Nupya ulaponela pali Damasika
—Pano Yeova akalola antu
Ni mitundu ya Ina Izlaeli yonsi—
2 Nupya uliza pali Hamati wino wapakana nawe,
Na pali Tuli na Sidoni pano yaaya sana na mano.
3 Tuli waikuulile ilinga ilikome.
Watuulike siuva kwati ulukungu
Na goldi kwati vikoona vya mu miseo.
4 Lolini! Yeova alamupokolola ivyuma vyakwe,
Alakomela asilika yakwe muli yemba;
Nupya Tuli alapya umu moto.
5 Ashikeloni alalola ivilacitika nu kuvwa intete
Gaza alasakamikwa sana,
Ashikeloni nawe kwene alasakamikwa pano wino wataile alazewana.
Mu Gaza mutalaya umwene,
Nupya Ashikeloni atalikalwamo.
6 Muntu wa ku mpanga yuze alikala umu Ashidodi,
Nupya ndamala icilumba ca Ina Filisti.
7 Ndafumya ivintu ivyakandana nu wazi mu kanwa kakwe,
Ni vintu vya winyi pakasi ka mino yakwe,
Nupya aalashalako muli aliyo alaya u wakwe Leza witu;
Nupya alaya wa ntunguluzi umu Yuda,
Na Ina Ekiloni yalaya wa Ina Yebusi.
8 Ndapangila inkambi pa nkoleelo ya ng’anda yane pakuti nailinda
Pakuti kutaca kuye uwa kupitapo nu kuweluluka;
Nupya kusi aakapeela imilimo* alapitapo nupya,
Pano lyene injilolela vino antu yane yakucula.
9 Sansamuka sana we mwana umwanaci wa ku Zioni.
Punda kupunda kwa kucimvya we mwana umwanaci wa ku Yelusalemu.
Lola! Umwene wako akwiza kuli wewe.
U mulungami, alalenga antu ukupusuka,
Waicefya nupya watakwela pali punda,
Pa mwana wakwe punda.
10 Ndapoka iceleta lya nkondo ukufuma kuli Efulemu
Ni mfwalasi ukufuma ku Yelusalemu.
Ulapwa wa mu nkondo ulapokwa.
Nupya alalenga mu nko muye umutende;
Ukateeka wakwe ulafuma kuli yemba kufika kuli yemba
Nu kufuma uku Luzi* kufika kuno insi yapelela.
11 Naawe we mwanaci, ndafumya aafungwa yako mu ciwina umutaya manzi,
Kuomvya uwazi wa upangano wako.
12 Mwe yafungwa aaya nu upaalilo swililini uku ncende iicingililwe.
We mwanaci ilelo nkukunena ukuti,
‘Ndakupeela mapaalo aingi.
13 Ndapeteka Yuda wa ulapwa wane.
Ndika Efulemu mu ulapwa*
Nupya ndakatusha ana yako we Zioni,
Pakuti yalwishe ana yako we Gilisi,
Nupya ndalenga kuti uye wa lupanga lwa musilika.’
14 Yeova alalolekela papela yao,
Uluceto lwakwe lulapita wa kumyantula kwa nkuwa.
Yeova Umwene wa Papelapela alalizya ipenga,
Nupya alaya umu kulwisha alwani yakwe wa cimuza cikalamba ca ku kaeya.
15 Yeova wa maumba alayacingilila,
Yalacimvya nu konona ivya kuvwintilako mawe.
Yalamwa nu kupanga sana icongo kwati yakumwa waini;
Yalaya wa mbale iyatizuulamo waini,
Nupya wa makoona ya ku ulambo atiyaomba nu wazi.
16 Mu wanda uuwa Yeova Leza wao alayapususha
Pa mulandu wakuti i mfwele zyakwe;
Pano yalaya wa mawe ya mutengo aku cisote ca wene aakuyengesa pa musili wakwe.
17 Pano waya sana nu usuma,
Nupya wayemba sana!
Vyakulya vilalenga alumendo ukuya na maka,
Na waini umupya alalenga ya nacisungu ukuyemba.”