Leza Waumvile Umonsi nu Mwanaci Aakutandikilako

Yeova wapanzile icalo, mu Edeni. Mu calo cico mwali maluwa, imiti, ni inyama. Lyene Leza waumvile umonsi wa kutandikilako, Adamu, kufuma uku lukungu. Nu mu mpuno zyakwe wapuusilemo umuza. Uzye watumanya ivyacitike? Umuntu wiyo wizile aya nu umi. Yeova wapeezile Adamu umulimo wa kusakamala icalo ca Edeni, nupya wamunenyile nu kutemela inyama zyonsi mazina.

Yeova wapeezile Adamu isunde ilicindame. Wamunenyile ati: ‘Ungalya iviseekwa ivya ku miti yonsi ya mu calo, lelo utakalye ku muti ukapeela mano. Pano uwanda kwene uno ulalyako, ulafwa.’

Lyene Yeova walanzile ati: ‘Nimaumba uwa kwazwa Adamu.’ Leza walenzile ukuti Adamu akasule sana, lyene watoozile ulumbazo longa apangilamo umuci wakwe Adamu. Izina lyakwe wali a Eva. Adamu na Eva lwali ali lupwa lwa kutandikilako. Uzye Adamu uvwile uli lino yamupangiile muci? Adamu watemilwe sana icakuti walanzile nu kuti: ‘Lolini wino Yeova ataumba kufuma uku lumbazo lwane! Wii akoline nani.’

Yeova wanenyile Adamu na Eva ukulakwata ana pakuti yakumane insi yonsi. Walondanga ukuti yaipakizya ukuombela pamwi pakuti yalenge insi yonsi ukuya paladaise, nanti ncende isuma wakwe vino icalo ca Edeni cali. Nomba ivintu asi vino vyali. U mulandu ci? Tulasambilila ivingi mu cipande cilondelilepo.