Kalinda wa Cifungo Wasambilila Icumi

Mu Filipi, mwali muomvi umwi umukazyana uwali ni ciwa. Iciwa cico camulenganga ukusapoola, nupya walenganga asambazi yakwe ukukwata ivyuma ivingi. Lino Paulo na Sailasi yaile uku Filipi, mukazyana wiyo watandike ukuyalondela pa manda aingi. Iciwa calenzile apunde ukuti: “Aonsi yaa, aaomvi yakwe Leza wa Papelapela.” Lyene Paulo wanenyile iciwa ukuti: ‘Nkukunena umwi zina lyakwe Yesu nkuti fuma muli aliwe!’ Iciwa cafumile umu mukazyana.

Lino asambazi yakwe ilwike ukuti yatakulakwata impiya ukupitila umu mukazyana wiyo, yasosile sana. Yatwazile Paulo na Sailasi kuli yakapingula ya milandu nu kuyanena iyati: ‘Antu yaa yakutama masunde nu kuleta icivulunganya mu musumba.’ Yakapingula ya milandu yanenyile antu ukuti yume Paulo na Sailasi nu kuika umu cifungo. Kalinda wa cifungo waisile umu cifungo icali umukasi sana nu kuyanyepa umu makoli.

Paulo na Sailasi imbile inyimbo zya kulumbanya Yeova ala na afungwa yauze yakuvwako. Lyene usiku pakasi, ukwaula nu kwenekela, kwacitike icilundumusi cikalamba sana icatensizye icifungo. Visaasa vyonsi ivya cifungo vyayulike nupya maceni na makoli vino yanyepiile afungwa vyasapwike. Kalinda wa cifungo wasimwilile umu cifungo ca mukasi nupya waweni ukuti visaasa iviyulike. Welenginye ukuti afungwa yonsi iyutuka, fwandi watoozile ulupanga kuti aikome.

Papo kwene sile, Paulo wamupundilile ati: ‘Utaikoma, swensi amuno tuli!’ Kalinda wa cifungo wasimwile nu kuyafukamila Paulo na Sailasi. Lyene wayuzizye ati: “Uzye i vyani vino ndinzile ukucita pakuti nkapusuke?” Nayo yamunenyile iyati: ‘Wemo na aa mu ng’anda yako mulinzile ukutaila muli Yesu.’ Lyene Paulo na Sailasi yasambilizye kalinda wa cifungo na aa mu ng’anda yakwe amazwi yakwe Yeova nupya yonsi yabatiziwe.