SAMBILILO 80
Yesu Wasoolola Atumwa 12
Pa cisila icakuti Yesu wasimikila pa mwaka onga na afu, kwali icintu cimwi icicindame cino walondekwanga ukupingulapo. Aaweni yano wali nu kusoola ukuti yaombela pamwi nawe? Aaweni yano wali nu kusambilizya pakuti yatungulula umu cilongano ca Ina Klistu? Pakuti Yesu apingulepo pali vii, walondekwanga ukutungululwa na Yeova. Fwandi waile uku mwamba kuno wali nu kuya wenga, nupya wapefile usiku onsi. Katondo, Yesu wamile asambi yamwi nu kusoololamo atumwa 12. Aaweni pa yatumwa yakwe Yesu yano ukaiusya mazina? Mazina yao yali a Petulo, Andeleya, Yakobo, Yoani, Filipi, Batolomeo, Tomasi, Mateo, Yakobo mwana Alufeo, Tandeo, Simoni, na Yuda Iskalyoti.
Andeleya, Petulo, Filipi, Yakobo
Atumwa yaa 12 yali nu kulapita na Yesu. Pa cisila icakuti wayasambilizya, wayatumile umu kusimikila. Nupya Yeova wayapeezile amaka akufumya iviwa nu kupozya alwale.
Yoani, Mateo, Batolomeo, Tomasi
Yesu wamanga atumwa yaa 12 ukuti ya cuza, nupya wayataile. Lelo Afaliseo yene yelenganyanga ukuti atumwa yataali asambilile nupya yataali acindame. Nomba Yesu wayasambilizye ivyakuomba umulimo uno wayapeezile. Kwali insita icindamisye ino Yesu wali nu kuya na atumwa yakwe, wakwe lino acili ukufwa na lino watuutulwilwe. Wakwe vino cali kuli Yesu, atumwa yakwe aingi yaafumile umu Galili. Nupya yamwi pali yayo yatwazile.
Yakobo mwana Alufeo, Yuda Iskalyoti, Tandeo, Simoni
Atumwa yataali amalilike nupya yaluvyanyanga. Insita zimwi yalandanga ukwaula ukwelenganya nu kukanapingula ningo pa vintu. Limwi limwi yatayanga ateekele. Nupya yapazyanyanga pali wino wali umucindame. Nomba yali antu asuma aatemilwe Yeova. Alino aliyo yali nu kutandika icilongano ca Ina Klistu ndi cakuti Yesu waswilila ukwi yulu.
“Nakulamwama ukuti ya cuza pano namunena vyonsi vino nuvwile kuli Tata.”—Yoani 15:15