Ciwa Watunka Yesu

Pa cisila icakuti Yesu wabatiziwa, umupasi wa muzilo wamutungulwile uku lwanga. Wikazile amanda 40 ukwaula ukulya icili consi, fwandi calenzile auvwe sana inzala. Lyene Ciwa wezizye Yesu lino wamuneenyile ati: ‘Ndi cakuti umu cumi wewe Umwana wakwe Leza, neena mawe yaa yasanguke umukate.’ Lelo Yesu waswike ukuomvya malembo ati: ‘Calembwa cati asi vyakulya sile ivingalenga umuntu ukuya nu umi. Ulinzile ukulakutika nu ku mazwi yonsi yano Yeova walanda.’

Nupya kwene Ciwa wezizye Yesu nu kumuneena ati: ‘Ndi cakuti umu cumi wewe Umwana wakwe Leza, toloka ukufuma papela pa ciumba ici tempele. Calembwa cati Leza alatuma ya malaika yakwe kuti yakwanke.’ Nomba nalyo kwene Yesu walanzile ati: ‘Calembwa cati utalinzile ukwezya Yeova.’

Lyene Satana walangizye Yesu mawene ya pano nsi, ivyuma nu ucindami uwayamo nu kumuneena ati: ‘Nimakupeela mawene yonsi yaa nu ucindami wayako ndi cakuti wampepa umuku sile onga.’ Nomba Yesu waswiike ati: ‘Fuma pano Satana! Calembwa cati ulinzile ukupepa Yeova wenga sile.’

Ciwa wafumilepo, nupya ya malaika iizile kuli Yesu nu kumupeela ivyakulya. Kufuma papa kwene, Yesu watwalilile ukusimikila ilyasi lisuma ilya Wene. Ukwene ali mulimo uno watumiilwe pano nsi. Antu yatemilwe vino Yesu wasambilizyanga, nupya yamulondelanga konsi kuno wayanga.