Uzye Vii Ali Vino Leza Walondanga?

LYONSI lino mwawelenga nyunzipepa, mwatamba TV nanti ukukutika kuli ledyo, ala yamalandapo iviipe ivikucitika umu nsi, ivili wa upondo, unkalwe, alino ni nkondo! Nupya mutale mwelenganye pa ntazi zinu. Limwi ukulwala, nanti ukufwilwa, kukalenga muye nu ulanda sana. Manye namwe kwene mungauvwa wakwe vino Yobo uvwile lino walanzile ati: “Nemo lyene insi mutende nanti kwikala ku matwi cele.”—Yobo 3:26.

Muyuzye mweineco muti:

• Uzye vii ali vino Leza walondanga ukuti swe yantu twaikala?

• Uzye aukwi kuno ningazana uwazwilizyo wa kucimvya intazi?

• Uzye tungataila ukuti tulikala umutende uku nkoleelo?

Baibo ika-asuka ningo sana amauzyo yaa.

BAIBO IKASAMBILIZYA UKUTI LEZA ALASENULA IVINTU PANO NSI VIKAYE WAKWE VII.

“Wene alayakumbula aminsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vyampiti vyati vipita.”—Umbwilo 21:4

‘Ivilema vilatolooka wa nswela.’—Ezaya 35:6

‘Amanso ya mpafu yalalola.’—Ezaya 35:5

“Antu yonsi ali mu malindi yaluvwa izwi lyakwe, nu kufumamo.”—Yoane 5:28, 29

“Patalaya nanti wenga alailizyanya apakulwala.”—Ezaya 33:24

‘Mulavula ivyakulya umu mpanga yakwe.’—Masamu 72:16

LEKINI VINO BAIBO IKASAMBILIZYA VYAMWAZWA

Mutelenganya ukuti malayo aali pa mafwa 4 na 5 i vyakwelenganya sile. Leza walaya ukuti alafikilizya vyonsi kwene, nupya Baibo ikatuneena navino alacita pa kufikilizya.

Lelo muli Baibo mwaya navyuze ivingi. Ikalanda navino mungaya ni nsansa ndakai. Tale elenganyini pa ntazi ni vintu ivingi ivikamusakamika. Manye u kukana kwata impiya, intazi zya mu lupwa, kulwalilila, nanti sile ukufwilwa. Baibo ingamwazwa ukumanya ivyakucita ndi muli ni ntazi, nupya ingalenga muye ni nsansa lino mwalola vino ika-asuka amauzyo aingi wakwe yaa apisika:

• U mulandu ci uno tukaculila?

• Uzye tungacita uli ndi twaya ni ntazi?

• Uzye tungacita uli pakuti twaya ni nsansa umu lupwa?

• Uzye i cani icikacitika umuntu ndi wafwa?

• Uzye yacuza iitu aafwa tulayalola nupya?

• Tungasininkizya uli ukuti Leza alafikilizya vino walaya ukuti alatucitila uku nkoleelo?

Cumi kwene vino mukuwelenga ibuku lii, cikulangilila ukuti mukulondesya ukumanya vino Baibo ikasambilizya. Ibuku lii lilamwazwa ukumanya ningo Baibo. Mumazana ukuti mapalagalafu yatiyakwata amauzyo apisika. Antu aingi cuze yakauvwa ningo sana ukuomvya inzila iyangupale pa kusambilila Baibo na ya Nte yakwe Yeova. Inzila iyo, u kuuzya mauzyo alino imwasuka. Tukutaila ukuti namwe kwene mulaitemwa inzila iyo. Leza alukumupolelela lino mukuipakizya ukusambilila ivintu ivisuma vino Baibo ikasambilizya!