Mwaelezya Ukusunga Insita
1. Uzye tungacita uli pakuti twakolanya vino Yeova akasunga insita?
1 Yeova akasunga insita lyonsi. Ali cino wene akatwazwilizya ‘apa nsita ino tukulonda uwazwilizyo.’ (Ayeb. 4:16) Nupya akatupeela ivyakulya ivyaya umwizwi lyakwe “pa nsita ilinge.” (Mate. 24:45) Fwandi twataila sana ukuti uwanda wakwe ukalamba uliza “kwaula kuzimba.” (Haba. 2:3) I cumicumi vino Yeova akasunga insita, cikatwavwa sana! (Masa. 70:5) Nomba, swe yantunze aatamalilika, nupya aakwata ivyakucita ivingi, citangupala ukusunga insita. Uzye u mulandu ci uno tulinzile ukuelezya ukusunga insita?
2. U mulandu ci uno ukusunga insita kukaletela umucinzi kuli Yeova?
2 Antu aingi yasisunga insita ndakai pano yaitemwa, nupya yasiikaanya mu vicitwa. (2 Tim. 3:1-3) Fwandi, Aina Klistu ndi yakufika zuwa uku milimo, nanti kuno yuvwanyile ukukomaana na yamwi, nanti ku kulongana, antu yauze yakalolako, na cii cikalenga Yeova acindikwa. (2 Pet. 2:12) Uzye cikatucitikila icakuti uku ncito zitu tusicelwa, lelo kuli vyakwe Leza kwene tukacelwa? Nga tusikucelwa uku kulongana, pakuti ituzanwako uku lwimbo ni pepo lya kutandikilako, ala tukulangizya ukuti tukalonda ukukolanya Tata witu wa mwiyulu aasilonda icimvulunganya.—1 Kol. 14:33, 40.
3. U mulandu ci uno ukusunga insita kukalangilila ukuti tukalangulukilako anji?
3 Nakapya, ukusunga insita, kukalangizya ukuti tukalangulukilako anji. (Filipi 2:3, 4) Pano ndi tukufika zuwa apa kulongana, nanti apa kukomaana kwa kuya umu mulimo, tutanga twapumvyanya ya kapepa yanji. Lelo ndi cakuti twaya ni cielezyo ca kucelwa, ala tukulangizya ukuti insita itu aliyo yacindama ukucila iya anji. Ukusunga insita kukalangilila ukuti umuntu wasintililwapo, akaombesya, nupya watailwa. Imiyele iiyo, ikalenga antu yauze ukututemwa sana.
4. Ngi cakuti swemo lyonsi kwene tukacelwa, tungacita uli pakuti tute ukucelwa?
4 Ndi cakuti mwemo mukacelwa lyonsi, mwelenganye umulandu uno mukacelelwa. Limwi icingamwavwa i cakuti mwaipekanya ningo, nu kutantika vino mufwile ukuomba umu nsita ino mufwile ukuviombelapo. (Kasa. 3:1; Filipi 1:10) Mwalenga kuli Yeova pakuti amwavwa. (1 Yoa. 5:14) Ukusunga insita iinzila imwi ino mungalangilamo ukuti mukataizya pa masunde yaili yano Yesu watiile ali yakalamba ukuluta, akuti uwatemwa Leza nga na antu yauze.—Mate. 22:37-39.