IUZYO 7
Ningacita Uli Ndi Umwi Akumpatikizya Ukulala Nawe?
I VYANI VINO UNGACITA?
Elenganya ukuti vii vikucitika: Patipapita sile imyezi iili ukufuma pano Heather watandike ukuzanwa na Mike, nomba Heather akauvwa kwati wamanyile Mike mpiti sana. Yakatumizyanya mameseji lyonsi, yakalanda pa foni limwi maawala yaili ala yakulanda sile, nupya umuze nga akulonda ukulanda cimwi ala umuze amamalila amazwi yano umuze akulonda ukulanda. Nomba Mike wene asilonda kuti yacita sile vivyo, kuli na vyuze vino akalonda.
Mu myezi iili iyatipita, Heather na Mike yatatala yacitapo vyuze ukuluta pa kulemana makasa nanti ukutonsolana panono sile. Heather asilonda kuti vikacile papo. Nomba Heather asikulonda nupya ukuta ukuvwana na Mike. Kutaya muze akamunena ukuti u musuma nanti ukuti wacindama sana. ‘Alino,’ akainena umwineco ukuti ‘twatemwana sana na Mike. . . ’
Ndi cakuti watufika pa musiku wakwizizyanya nupya vino vikucitikila Heather nawe ivikukucitikila, ivyani vino ungacita?
TALA ELENGANYA PALI VII!
Ukupanga icupo i ca upe cino Leza wapeela sile antu atwalane. Nga wacita ulalelale, ala usikutaizya pa upe uwo uno Leza watupeela. Ala wacita kwati aviivi vino ungacita ndi cakuti umuntu umwi wakupeela icakuzwala cisuma nomba wakana ukulazwala watandika ukukolopelako
Ndi cakuti wakana ukuvwila amasunde yano ya sayansi yalanda, wi sunde lino yalanda pa maka aakatinta aaya pansi ale utange uwombe ningo. Avino caya na lino wakana ukuvwila masunde akalanda pa ulalelale, wi isunde ilikati: “Fumini uku ulalelale.”—1 Tesalonika 4:3, NWT.
I vyani vilacitika ndi wakana ukuvwila isunde lilyo? Baibo ikati: “Umuntu wino akacita uzelele akaifya ku mwili wakwe umwisikulu.” (1 Kolinto 6:18) Tungasininkizya uli vivyo?
Aakalondelezya yazana ukuti alumendo na akazyana yonsi akacita ulalelale yakaiza mukuya ni ntanzi yonga nanti ziili pali zii zili apisika.
UKUSAKAMIKWA SANA UMU MWENZO. Alumendo na akazyana aingi akacita ulalelale yakati yakalanguluka sana ukuti fwandi ndi yatacisile vivyo.
UKUTA UKUTAILANA. Lino yacita ulalelale cila muntu akatandika ukusakamala ati: ‘Ale aweni na muze uno wacitapo nawe ulalelale?’
UKULANGULUKA. Akazyana aingi yakatemwa sana umuntu angamucingilila ukuluta wino akulonda sile ukumuomvya nu kumusya. Alino alumendo nayo yatatemwa akazyana akazumila vyonsi vino yayanena ukucita.
Vino caya aevi: Ndi cakuti wacita sile ulalelale, ala waisausya wemwineco pano waponzya icintu cimwi icicindame sana. (Loma 1:24) Umwili wako ucindame sana uno utafwile ukupeela ku vintu iviipe!
Walanga ukuti wakwata amaka ‘akufuma uku ulalelale.’ (1 Tesalonika 4:3) Lino ulatwala nanti ukutwalwa mulapanga icupo nu wako. Nupya ulaipakizya pano utalasakamala mu mwenzo, utalalanguluka nanti ukukwata intazi zyuze izikayako ndi cakuti mwacita ulalelale.—Mapinda 7:22, 23; 1 Kolinto 7:3.
UKWELENGANYAPO ULI?
Uzye umuntu uwakutemwa angakucitila vimwi ivingakuletela uzanzo?
Uzye umuntu aakakusakamala sana angalenga kuti ucuza wako na Leza uye pa uzanzo?—Ayebulai 13:4.