Iuzyo Lino Antu Yavilwa Kumanya Ningo

VINO antu yakalanda pa umi ni mfwa, i vingi nupya vyapusana pusana. Yamwi yamanya ukuti ndi yafwa yalatwalilila ukuya nu umi, limwi kusanguka mu cintu cimwi nanti kuya ku cifulo cuze. Yauze yamanya ukuti ndi yafwa yalavyalwa cipya cipya ku cifulo cimwi. Lelo yauze yene yamanya sile kuti ndi yafwa, ala casila.

Namwe kwene mufwile mwazumila muli vimwi api lyasi lii, kulingana na kuno mwakulila na vino mwasambilila. Apa mulandu wakuti antu yazumila ivipusane pusane pa vikacitika muntu ndi wafwa, uzye kwaya umwi nanti kumwi kuno tungazana amasuko ya cumi api uzyo lino antu yavilwa kumanya ningo icumi?

Pa myaka ingi sana, ya simapepo yakasambilizya antu icisambilizyo ca ufi icakuti mu mwili mwaya cimwi icisifwa umuntu ndi wafwa. Antu aingi aya umu mipepele ikalamba wakwe Aina Klistu, Ahindu, Ayuda, ya Mozilemu, na yauze; yazumila ukuti kwaya cimwi mu mwili icisifwa umuntu ndi wafwa, cino aeneco yakati cikatwalilila kuya nu umi umu mupasi. Abuda nayo yazumila ukuti ukuvyalwa cipya cipya na maka akaomba mu mwili, vingatwalilila kusenuka suka ivifika ukucifulo icisuma cuze nupya ciyembe cino aeneco yaka-ama ukuti Nivana.

Icisambilizyo kwene cii cakuti kwaya cimwi mu mwili icisifwa, calenga antu aingi umu nsi kuzumila ukuti fwandi imfwa ika-avwa muntu uwatafwa ukuya nu umi ku mpanga yuze. Acino antu aingi, yakalola ukuti imfwa icintu cimwi cicindame cakulenga muntu kuya nu umi cipya cipya nupya calenga yaelenganya ukuti imfwa u kulonda kwakwe Leza. Nomba, uzye Baibo yene ikalandapo uli api lyasi lii? Mukwai welengini cipande cilondeliilepo. Limwi ndi muvwa icasuko, mumazunguka sana.