Yesu Klistu—Ali Mesiya Uwalavilwe

PA KUTWAVWA ukumanya wino wali ali Mesiya, Yeova watumile umupasi wakwe pali ya kasema aalemvile Baibo kuti yalondolole ningo sana pa kuvyalwa kwakwe Katuula uwalavilwe, nu umulimo wakwe, alino ni imfwa yakwe. Masesemo yonsi yaayo yafikiliziwe muli Yesu Klistu. Alino masesemo yaayo yalondolwile tonsi ukwaula ni mpuso. Lekini tulole masesemo yamwi-yamwi aasowile ivintu ivyali nu kucitika pa kuvyalwa kwakwe Mesiya na vino wakuzile.

Kasema Ezaya wasoowile ukuti Mesiya wali nu kuya uwa mu mupanda wa Mwene Davidi. (Ezaya 9:7) Yesu wavyalilwe umu mupanda wakwe Davidi.—Mateo 1:1, 6-17.

Kasema namuze, uwizina lyakuti Mika, wasoowile ukuti umwana wiyo wali nu kwizaya kateeka, nu kuti wali nu kuvyalilwa umu “Betelemu waku Efulata.” (Mika 5:2) Apa nsita ino Yesu wavilwe, kwali imizi yili umu Izlaeli iyali ni zina lyakuti Betelemu. Umuzi onga waeliile apiipi na Nazaleti ku kaeya ka mpanga iiya, lyene uze nao wali apipi na Yelusalemu umu Yuda. Umuzi wa Betelemu uwayeliile apipi na Yelusalemu, mpiti yawamanga yakuti Efulata. Nupya, umu muzi uuwa, ali muno Yesu wavyaliilwe, wakwe vivi kwene vino yaasoowile!—Mateo 2:1.

Usesemo nauze wasoowile ukuti Umwana wakwe Leza “wafumile mu Eguputo.” Lino Yesu wali umwance, yamutwazile uku Eguputo. Yamuwezizye lino Helodi wafwile, avino nu usoowelo wafikiliziwe.—Oseya 11:1; Mateo 2:15.

Mu kambokosi akali apifwa 201, amalembelo aali apisika lya kamutwe kaakuti “Usesemo” yakulanga amazwi aalanzilwe pali Mesiya. Mukwai mulinganye malembelo yaayo uku malembelo aali pisika lya kamutwe kakuti “Kufikiliziwa.” Ukucita vivyo kulamwavwa ukutaila sana ukuti Izwi lyakwe Leza i lyacumi.

Lino mukupituluka umu malembelo yaa, mwaiusya ukuti malembelo yaayo aakulanda pa usesemo, yaalemvilwe imyaka iingi sana ala Yesu atatala wavyalwa. Yesu walanzile ati: “Vintu vyonsi vino vyalemvilwe pamulandu wane mu mpapulo zyakwe Mose na zyakwe yakasema, nga nu mu Masamu vilinzile kufikiliziwa.” (Luka 24:44) Namwe kwene mungasininkizya icisinka cakuti masesemo yonsi pyu yafikiliziwe!