Uzye Aina Klistu Yafwile Ukuya Uku Kupepa Uku Cifulo Cimwi Cino Antu Yacindikisya?

CILA mwaka, antu kucila pali 6 milyoni yakaaya uku ncende imwi (Shima Peninsula) uku Japan; yakaaya uku cifulo cimwi ku kupepa leza mwanaci (Amaterasu Omikami) uwa mipepele ya Cishinto. Nupya pano yatandikile ukupepela leza kwene wii ipapita imyaka apiipi na 2,000. Lino yataatala yatandika ukupepa yakatandikilapo ukufulala ku makasa alino iyafulala na pa kanwa. Lyene yakaimilila apa nkoleelo mu cikulwa cino yakapepelamo, iyafukama, iyatoota nu kupepa kuli leza kwene wiyo.a A mipepele ya Cishinto yakazumilizya antu yao ukupepa konsi kuno yangatemwa, nupya aamipepele ya Cibuda, alino na antu akaitaka ukuti Aina Klistu nayo kwene yakalola ukuti caya sile ningo ukuya umu kupepa kuuku.

Imipepele iingi umu nsi yakwata icifulo cino yakalola ukuti i ca muzilo,b napya antu aingi cuze yakaaya uku kulola ivifulo kwene vivyo. Umu mpanga umwaya antu akaitunga ukuti a Ina Klistu, mwaya macalici ni vifulo vino yacindikisya vino yakaati i vyakwe Yesu, Maliya na atakatifu. Yauze nayo yakwatila ivifulo ivya muzilo umu ncende muno mwacitikilanga ivyalembwa muli Baibo nanti muno yakaelenganya ukuti mwacitikila ivizungusyo vimwi umu manda itu kwene yaa nanti umu vifulo muno macalici yasungila ivintu vya mpiti vino yakaiusya. Antu aingi sana yakaya uku vifulo kwene vii vino yakaati ivya muzilo, pano yakaelenganya ukuti ndi yaaya kuuko alino Leza angasuka amapepo yao yano yapepela apa ncende kwene iiyo. Lyene yauze nayo, yakaati ukuya uku vifulo vivyo vino yasoolola, aali cintu cicindame cino yaacita pakuti yaalanga vino yaipeelesya uku upefi wao.

Uzye Leza anguvwa sile amapepo itu ndi cakuti tukuya uku kupepela uku vifulo vino vyacindikwa ukuti ivya muzilo? Uzye ale Leza akatemwa vino antu yakailanga ukuti yakapepa umu cumi lino yakuya uku vifulo kwene vii? Nalyuze iuzyo i lyakuti, uzye Aina Klistu nayo yangaya uku vifulo kwene vivyo umu kupepa? Ndi twamanya amasuko uku mauzyo yaa, cimatwavwa ukumanya ningo-ningo upefi wa cumi uukazanzya Leza.

KUPEPA LEZA “MU MUPASI NU MU CUMI”

Ilyasi lino Yesu nu mwanaci umwina Samaliya yalanzyanyizye, likalangilila apaswe vino Leza akaelenganya apa kupepa ku vifulo vino antu yakaati ivya muzilo. Lino Yesu wapitanga umu Samaliya waile aimilila apa cifula icali apiipi nu musumba wa Sika. Lino umwanaci umwi wizile umu kutapa amanzi, yatandike ukulanzyanya na Yesu. Lino yalanzyanyanga, umwanaci walanzile apa upusano ukalamba uwalenzile ukuti imipepele ya Ciyuda ipusane ni ya Asamaliya. Walanzile ati: “Vikolwe vitu vyapepanga Leza pa mwamba uu, lelo mwe Ayuda mukalanda ukuti, Yelusalemu ali cifulo sile ukwa kupepela Leza.”—Yoane 4:5-9, 20.

Umwamba uno umwanaci walandangapo, u Mwamba wa Gelizimu, uwayeliile uku katutu ka Yelusalemu apali amakilomita 50. Apa mwamba kwene uwo apano Asamaliya yakuliile itempele, nupya aali kuno yayaanga uku kuzevya vimulo ivipusane-pusane kumwi sile na Ucilo. Yesu ataatandike ukulanda pali cino calenzile ukuti imipepele ya Ayuda na Asamaliya ipusane, lelo wene walanzile ati: “Kaciwe, taila vino nkukunena ukuti kasita kaliza lino mutalapepa Tata pa mwamba uu, nanti mu Yelusalemu kwene.” (Yoane 4:21) I cumi cumi amazwi yaa, aakuzungusya, pano uwalanzile wali u Muyuda! U mulandu ci vwilini uno ukupepa apa ng’anda ikulu yakwe Leza iyali umu Yelusalemu kwali nu kusilila?

Nupya kwene Yesu walanzile ati: “Lelo kasita kakwiza, nupya kati kafika, lilyo lino yakapepa acumi yalapepa Tata mu mupasi nu mu cumi, pano aali ndi yaa, ayano Tata watemwa kuti yamupepa.” (Yoane 4:23) Pa myaka ingi Ayuda yalolanga ukuti ing’anda yakupepelapo iyali umu Yelusalemu, aali pa cifulo sile ica mapepo pano yangaya. Fwandi akuno yaayanga maila yatatu pa mwaka ku kupeela impolelwa kuli Leza wao, Yeova. (Kufuma 23:14-17) Nomba Yesu walanzile ukuti vyonsi vii vyali nu kusenuka nupya “ya kapepa acumi” yaali nu kulapepa sile “mu mupasi nu mu cumi.”

Ing’anda ikulu iya kupepelapo iya Yayuda iyali mu Yelusalemu yalolekanga, na antu yonsi yailolanga. Lelo umupasi ni cumi vyene aasi vino vyaaya. Fwandi ali cino, Yesu walondolwile ukuti upefi wa Ina Klistu ya cumi utaali nu kulayela sile uku cifulo cimwi, icili wa Mwamba wa Gelizimu nanti ku ng’anda ikulu iya kupepelapo iyali mu Yelusalemu nanti kuze kuno antu yangasoolola ukuti u kwa muzilo.

Lino Yesu yalanzyanyanga nu mwanaci umwina Samaliya, walumbwile nu kuti ‘insita ikwiza’ lino antu yalata ukupepa Leza umu musango uu. Uzye caali nu kucitika nsita ci? Insita iiyo yafisile lino Yesu wizile atufwila pakuti asisye ukupepa kwa Ayuda kuno yalondelanga Masunde Yakwe Mose. (Loma 10:4) Nomba Yesu walanzile nu kuti: ‘Kasita kati kafika.’ U mulandu ci? Vino Yesu wali aali Mesiya, watandike mpiti ukukonganika asambi yano yaali nu kuvwila isunde lyakuti: “Leza u mupasi, na yano akamupepa, yalinzile kumupepela mu mupasi nu mu cumi.” (Yoane 4:24) Uzye lyene cikapiliula cani ukupepela Leza umu mupasi nu mu cumi?

Lino Yesu walanzile apa kupepa Leza mu mupasi, walandanga apa kutungululwa nu mupasi wa muzilo, uno ukatwavwa mu vintu ivingi, kumwi nu kuvwikisya Malembelo. (1 Kolinto 2:9-12) Nupya icumi cino Yesu walanzilepo, u kumanya ningo vino Baibo ikasambilizya. Fwandi Leza alazumila upefi witu ndi cakuti ukuvwana na vino Baibo ikasambilizya nupya ukutungululwa nu mupasi wa muzilo.

VINO AINA KLISTU YAKAELENGANYA PA VIFULO VINO ANTU YACINDIKA

Uzye lyene Aina Klistu yafwile ukwelenganya uli apa kuipeelesya ukuya uku vifulo vino antu yakaati i vya muzilo nu kuya umu kupepa uku vifulo kwene vivyo? Ndi twelenganya pali vino Yesu wapeezile isunde lyakuti, ya kapepa ya cumi yafwile ukupepa Leza umu mupasi nu mu cumi, tungalanda sile tuti ukucita ica musango uwo kutacindama kuli Tata witu uwa kwi yulu. Nupya Baibo yatunena vino Leza akaelenganya apa kupepa utuluwi. Ikati: “Leukini ku kupepa tuluwi” nupya yatunena nu kuti, “mwaisunga ningo mutapepa tuluwi.” (1 Kolinto 10:14; 1 Yoane 5:21) Fwandi Aina Klistu ya cumi, yasiiya uku vifulo vimwi vino antu yakati i vya muzilo ku kupepa nanti ivifulo ivingalenga Umwina Klistu kupepa utuluwi. Acino yene yakasenka uku misango ii ya kupepelamo Leza.

Nomba cisikusenula ukuti Baibo yalesya ukukwata icifulo cimwi cino umwi angatemwa ukuyako nga akasi apepe, kusambilila, nanti ukwelenganya pali vyakwe Leza. Ivifulo vya kupepelapo ivya usaka nupya ivya mucinzi, i vyalinga ukuyako uku kusambilila nu kulanzyanyizizyapo ivya muli Baibo. Nupya citiipa ukwika iciliwe api lindi, pakuti mwaiusizyako pano mwaziika umuntu. Pano ala mukulanga sile ukuti mukulonda mukaiusya pano mwamuziika nanti limwi ala mukulanga vino mwamutemilwe. Lelo ndi cakuti mwatandika ukulola icifulo ciico ukuti i ca muzilo nanti mwatandika ukupepa icintu kwene ciico, ala lyene visikuvwana na amazwi yano Yesu walanzile.

Fwandi mutalinzile ukuya uku cifulo cimwi cino antu yakati i ca muzilo nu kwelenganya ukuti Leza alino anguvwa mapepo iinu yano mwapepela ku vifulo vivyo. Nupya Leza asizanga ndi mwaipeelesya ukuya uku cifulo cino antu yakati i ca muzilo. Baibo ikatunena ukuti, Leza “ali mwine wi yulu ni nsi, nupya asyaikala mu ng’anda yakulwa na antu.” Nomba, cisikusenula ukuti Leza atanga aye cuza witu. Tungapepa kuli aliwe nupya angatuvwa konsi kuno tuli, pano ‘ataaya kutali naswe.’—Milimo 17:24-27.