Uzye mwatala mwelenganyapo ukutandika ukuwelenga Baibo nomba muvilwa pa mulandu wakuti muvwanga wa yantu yano twalanda papela? Antu aingi yakauvwa ukasu ukuwelenga Baibo. Nomba cingaya uli ndi cakuti mwasambilile ukuti Baibo ingamwavwa ukuya ni nsansa alino nu kuya nu umi usuma? Nupya mungacita uli ndi cakuti mwazanyile ukuti kwaya inzila zimwi zisuma zino mungaomvya pakuti mwaipakizya ukuwelenga Baibo? Uzye mungatemwa ukuwelenga Baibo nu kuvwa vino ikalanda?

Uvwiniko vino yamwi yalanda azana ukuti Baibo yayazwa ukufuma pano yatandikiile ukuiwelenga.

Ezekiel, aali ni myaka pakasi kakwe 20 na 25, watiile: “Mpiti nali kwati umuntu akupisya motoka aatamanyile kuno akuya. Lelo ukuwelenga Baibo kwangavwa ukuya nu umi wa mpomvu. Muli Baibo mwaya ukusunda ukusuma kuno ningaomvya cila wanda.”

Frida, nawe kwene ali ni myaka pakasi kakwe 20 na 25, walanzile ukuti: “Natemilwe sana ukupazyanya na yauze. Nomba ukuwelenga Baibo kwangavwa ukumanya vino ningacita pakuti tutaapazyanya na anji. Ukucita vii kwangavwa ukuti twauvwana sana na yauze, nupya ndakai nakwata sana ivyuza.”

Ya Eunice aali ni myaka pakasi kakwe 50 na 55 yalanzile pali Baibo ukuti: “Ikangavwa ukuya umuntu umusuma, ukusenula imiyele yane iipe.”

Wakwe yano itulandapo alino na vino yauze aingi yasambilila, ukuwelenga Baibo kungamwavwa ukuipakizya umi. (Ezaya 48:17, 18) Nupya ingamwavwa na (1) ukupingulapo ningo ivya kucita, (2) ivya kucita pakuti mupange ya cuza asuma, (3) ivya kucita ndi mukusakamala sana, alino ni cicindamisye (4) u kusambilila icumi pali Leza. Kusunda ukwaya muli Baibo kukafuma kuli Leza, fwandi mutanga mwacita iviipe ndi mukulondela vino ikasunda. Leza asisunda antu ukucita iviipe.

Icintu icicindamisye cino mulinzile ukucita u kutandika ukuwelenga Baibo. I vyani vingamwavwa ukutandika ukuwelenga Baibo nu kuipakizya lino mukuwelenga?

Inzila ci ino mungaomvya ingamwavwa ukuipakizya vino mukuwelenga muli Baibo nu kusambililako ivingi? Uvwini vintu 5, ivyazwa sana antu aingi.

Mwasoolola incende isuma. Mwaya kuno kusi icongo. Mwacefyako ivintu ivingamipumvyanya pakuti mwaikako sana amano kuli vino mukuwelenga. Ndi cakuti mwaya apali uluswepo ulusuma na kamuza kasuma, cingalenga muvwikisye vino mukuwelenga.

Mwalondesya ukusambilila. Pa mulandu wakuti Baibo yafuma kuli Tata witu uwa kwi yuli, mulaipakizya vino mukuwelenga ndi cakuti muli wa mwana umunono aakulondesya ukusambilila kuli vino avyazi yakwe yakumusambilizya. Ndi cakuti mwaasula ivyeo ivyaya muli Baibo, mwaezya ukuya nu mwenzo wa kusambiliziwa na Leza.—Masamu 25:4.

Mwapepa lino mutatala mwatandika. Muli Baibo mwaya amelenganyo yakwe Leza, fwandi tukalondekwa uwazwilizyo ukufuma kuli aliwe pakuti tuvwikisye. Leza walaya ukuti alapeela “umupasi wamuzilo kuli yao akamulenga.” (Luka 11:13) Umupasi wa muzilo ulamwavwa ukumanya vino Leza akaelenganya. Lyene ulalenga muvwikisye “ivizike vya mapange yakwe Leza.”—1 Kolinto 2:10.

Mwalondesya ukuvwikisya vino mukuwelenga. Mutalinzile sile ukuwelenga pakuti mumale. Mwaelenganya sana pali vino mukuwelenga. Mwayuzya mweineco mauzyo wakwe yaa: ‘I miyele ci ino nalola mu muntu uno nkuwelengapo? Ningaomvya uli ivyeo vii umu umi wane?’

Mwamanyila limwi vino mukulonda musambilileko. Ndi cakuti mukulonda ukuipakizya vino mukuwelenga muli Baibo mulinzile ukumanyila limwi ivingamwazwa. Mungimika mauyo wakwe yaa: ‘Nkulonda ukusambilila ivingi pali Leza.’ ‘Nkulonda ukuya umuntu musuma, iya umusuma nanti umuci umusuma.’ Lyene mwasoolola iviputulwa ivya muli Baibo ivingamwavwa ukufikilizya mauyo yayo.a

Ivintu vii 5 vilamwavwa ukutandika ukuwelenga Baibo. Nomba mungacita uli pakuti mwaipakizya vino mukuwelenga? Icipande icilondelilepo cati cilanda pali vimwi ivingamwavwa.

Uzye mukauvwa uli ndi mukuwelenga Baibo? Uzye mukauvwa ukasu? Nanti uzye ikamutekezya ndi mwawelenga? Ilingi cikaya ni nzila ino mukuomvya pa kuwelenga. Lekini tulande pa vintu ivingalenga mwalondesya ukuwelenga Baibo nu kuipakizya.

Mwaomvya Baibo isuma iyasenulwa umu lulimi luno munguvwikisya. Ndi cakuti muli vino mukuwelenga muli mazwi aingi akome ukuvwa nanti ampiti yano mutamanya, cingalenga mutaipakizya lino mukuwelenga. Fwandi mulinzile ukulonda Baibo iyasenulwa umu lulimi ulwanguke ukuvwa nupya ingamufika pa mwenzo. Nomba ilinzile ukusenulwa umu nzila ya kuti vikulandwapo vikuvwika nupya ivikonkana ningo ukulingana ni nsita ino vyacitikilepo.a

Mwaomvya iviombelo ivipya. Ndakai Baibo waya na pa intaneti. Mabaibo yamwi mungayawelenga pa intaneti nanti ukuyakopela pa compyuta, tabuleti nanti pa foni. Iviombelo vimwi vyakwata inzila zimwi inzingalenga umuntu ukulonda Baibo muze pakuti alole vino namo yasenula api lyasi kwene lino akuwelengapo muli Baibo wino akuomvya. Ndi cakuti mwatemwa sile ukukutika ku mazwi akopelwe limwi, pa intaneti pakazanwa Baibo ino yawelenga. Antu aingi yakaipakizya ukukutikako lino yali muli motoka yakuya kumwi, lino yakufula ivyakuzwala, nanti sile lino yakuomba imilimo yuze ingayazumilizya ukukutikako. Nga mwemo mutanga mwezyeko inzila ingamizipila?

Mwaomvya iviombelo ivingamwavwa ukusambilila Baibo. Iviombelo ivingamwavwa ukusambilila Baibo vingalenga mwauvwikisya lino mukuwelenga. Kwaya yamapu akalangilila impanga izyalembwa muli Baibo, angamwazwa ukumanya ningo pano impanga zizyo zyayelile pakuti lino mukuwelenga ale mukwelenganya pano vyacitikile. Ivipande vimwi ivikazanwa muli ya magazine nanti pa webusaiti ya jw.org, vingamwazwa ukumanya ningo upiliulo wa malyasi yamwi alembwa muli Baibo.

Mwaomvya inzila zya kuwelengelamo izipusane-pusane. Ndi cakuti mukalola kwati ukuwelenga Baibo kufuma ku nkupo kufika ku nkupo kukamuvwisya ukasu, limwi mungezyako ukulawelenga ilyasi lyonga-lyonga lino mwatemwa sana pakuti mwaipakizya. Ndi cakuti mukulonda ukumanya antu amanyikwa sana aalembwa muli Baibo, mungaawelenga pa muntu wenga na wenga. Inzila yonga ino mungaomvya lino mukuwelenga Baibo yatilandwapo umu kambokosi akakuti: “Ukumanya Antu Aaya Muli Baibo Kungamwazwa Ukuvwikisya.” Nanti limwi mukulonda ukuwelenga Baibo, api lyasi lyonga na lyonga nanti ukulingana na vino malyasi yayo yakonkine. Uzye mutanga mutemwe ukwezyako inzila kwene zii?

Baibo itaya wa mabuku yauze. Pano mwaya mano afuma kuli Kaumba witu. (2 Timoti 3:16) Ingalenga tuye ni miyele isuma sana. Baibo kwene, yalanda ukuti: ‘Izwi Lyakwe Leza ilya umi nupya likaomba.’ (Ayebulai 4:12) Baibo ikatutungulula cila wanda alino nu kutwavwa kumanya Leza na malayo yakwe.—1 Timoti 4:8; Yakobo 4:8.

Baibo ingamwavwa na ndakai. Baibo ingamwazwa umu umi winu. Ingamupanda amano pali vii apisika.

• Vino mungauvwana na yauze.—Efeso 4:31, 32; 5:22, 25, 28, 33.

• Vino mungaya nu umi usuma.—Masamu 37:8; Mapinda 17:22.

• Vino mungaya ni miyele isuma.—1 Kolinto 6:9, 10.

• Vino mungacita ndi mutakweti impiya.—Mapinda 10:4; 28:19; Efeso 4:28.a

Atwalane yamwi acance aakaikala uku Asia yataizye pa mano asuma aaya muli Baibo. Wakwe vino cikaya uku yatwalane aingi, aacance yaa cayatalilanga ukumanya vino cila muntu angacita pakuti yauvwana ningo. Nomba yatandike ukuomvya vino yawelenganga muli Baibo. I cani cacitike? Iya, Vicent, watiile: “Vino nawelenganga muli Baibo vyangazwile ukumanya vino ningamala intazi zya mu cupo mu nzila isuma. Kuomvya vino Baibo ikalanda kwatwazwa ukuya ni nsansa umu cupo citu.” Umuci nawe (Annalou), wazumilizye nu kulanda ati: “Ukuwelenga pali vino yamwi alembwa muli Baibo yacisile kwatwazwa sana. Ndakai naya ni nsansa mu cupo nupya twakwata mauyo umu cupo citu.”

Baibo ingamwazwa ukumanya Leza. Vicent walanzile navyuze, watiile: “Ukuwelenga Baibo kukangavwa ukupalama sana kuli Yeova ukucila vino cali mpiti.” Vino Vicent walanzile vyacindama sana, pano Baibo ingamwazwa ukumanya sana vino Leza waya. Kucita vivyo kutalamwazwa sile ukuzifya umi winu lelo kulalenga mumanye sana Leza nu kuya cuza wakwe. Nupya mulamanya nu kuti walanda na pa visuma ivyasya vicitike likwene, pa nsita lino mulaipakizya “umi wape uwa cumi.” (1 Timoti 6:19) Kutaya ibuku lyuze ilyalanda pa vintu vii.

Ndi cakuti mwatandika ukuwelenga Baibo nu kuomvya vino mukuwelenga, namwe kwene ilamwazwa umu umi winu nupya mulamanya na vino Leza waya. Nomba lino mukuwelenga Baibo mulaakwata mauzyo aingi. Ndi caya vivyo, mwaiusya ivyacitikile cilolo umwi umwina Etiopia uwaliko imyaka 2,000 iyatipita. Wakweti mauzyo aingi sana pali Baibo. Lino yamuzizye ndi cakuti uvwanga vino wawelenganga, watiile: “Uzye ningamanya uli, suka umwi wandondolwela?”b Lyene wazumile ukuti Filipi umusambi wakwe Yesu uwaliko mpiti uwamanyile sana ukusambilizya, amwazwe. (Milimo 8:30, 31, 34) Namwe kwene ndi cakuti mukulonda ukumanyilapo na vyuze pali Baibo, muce mulembe muli fomu iyaya pa intaneti pa www.jw.org nanti mukalembele kuli adelesi yonga pali yano yali muli magazini ii. Nanti limwi mungalanda na ya Nte Yakwe Yeova akaikala kuuko kwene ku mwinu nanti mukaye apa Ng’anda ya Wene iyayela kuno mwikala. U mulandu ci uno mutange mutandike ukuwelenga Baibo nu kuleka ukuti iliyo yamutungulula?