Twalililini Ukuya Aacincile Lino “Manda Akusyalikizya” Yakuya Yakusila

1. I cani icalenga tusininkizye ukuti tukwikala mu “manda akusyalikizya”?

UZYE mwavilwe pa cisila ca mwaka wakwe 1914? Nga avino cili, ale mwemo mwikala mu “manda akusyalikizya” umi winu onsi. (2 Tim. 3:1) Swensi tuvwapo pa vintu vino Yesu walanzile ukuti ivilacitika mu manda yaa. Pali vii paya inkondo, ivipowe, ivilundumusi, amalwale aipisye, uunkalwe alino nu kuzunyiwa kwa yantu yakwe Yeova. (Mate. 24:3, 7-9, 12; Luka 21:10-12) Nupya twalola kuno antu yakacita vino umutumwa Paulo walanzilepo. (Lolini akambokosi akakuti “Vino Antu Yali Ndakai.”) Pa mulandu wakuti sweswe yaomvi yakwe Yeova, twasininkizya ukuti tukwikala ku mpela ya “manda” akusyalikizya.—Mika 4:1.

2. A mauzyo cii yano tukulondekwa ukumanya amasuko?

² Pa mulandu wakuti ipapita insita itali kufuma mu mwaka wakwe 1914, tulinzile ukumanya ukuti tukwikala ku mpela ya “manda akusyalikizya.” Vino impelelekezyo ya nsi ii yatipalamisya, tukulondekwa ukumanya ivyasuko ku mauzyo yamwi acindame sana wakwe yaa: I vyani ivilacitika ku mpela ya “manda akusyalikizya”? Nupya i vyani vino Yeova akalonda twacita lino tukulolela vintu vivyo?

I VYANI IVILACITIKA KU MPELA YA “MANDA AKUSYALIKIZYA”?

3. Ukulingana na amazwi aya pali 1 Tesalonika 5:1-3, i vyani vino intunguluzi zya mu nsi zilamanyisya antu?

³ Welengini 1 Tesalonika 5:1-3. Paulo walanzile pa “wanda” wakwe Yeova. Umwi lembelo lii, uwanda uu ukalozya ku nsita lino ukuzanza kwakwe “Babiloni Mukulu,” ali kuti mipepele yonsi iya ufi kulatandika, kufika lino Alamagedoni ilasila. (Umbw. 16:14, 16; 17:5) Lino uwanda uwo utatala watandika, intunguluzi zya mu nsi zilapunda ziti: “Umutende!” Na ndakai kwene intunguluzi zya mu nsi zikaomvya amazwi kwene yaa ndi cakuti zikulanda pa kulemanya impanga zyonsi.b Nomba, ukupunda kwa “mutende” kuno Baibo yalandapo kwene kulapusanako. U mulandu ci? Lino icintu cii cilacitika, antu aingi yalaelenganya ukuti intunguluzi zya mu nsi iziombesya ukucingilila insi. Nomba ‘ucuzi ukulu cuze’ ulatandika “lyene ulovyo ulayaponela.”—Mate. 24:21.

4. (a) I vyani vino tukalonda ukumanya pa kumanyisya kwakuti kuli “mutende”? (b) I vyani vino twamanyapo mpiti?

⁴ Twamanya vimwi vimwi pa vintu ivilacitika lino yalapunda “mutende.” Nomba nanti ciye vivyo, kwaya vimwi vino tutamanya. Tutamanya icilalenga ukuti ya kateeka yapunde vivyo, nanti vino yalacita pa kumanyisya. Nupya tutamanya ndi cakuti yalapunda sile umuku onga nanti yalamanyisya pa miku iingi. Asi mulandu ni vilacitika, cino twamanya sile i cakuti: Tutalinzile tukasombwe nu kutandika ukwelenganya ukuti ya kateeka yayo yangaleta mutende mu nsi. Lelo, ukupunda kwene kuko akuno Baibo ikatunena ukuti tulinzile ukucenjela nako sana. Cilaya icimanyililo cakuti uwanda wakwe Yeova watiwatandika!

5. Uzye ilembelo lyakwe 1 Tesalonika 5:4-6 likatwazwa uli ukuipekanyizizya ku wanda wakwe Yeova?

⁵ Welengini 1 Tesalonika 5:4-6. Paulo watunenyile vino tungacita pakuti tulange ukuti ituipekanyizizya ku “wanda” wakwe Yeova. Tutalinzile “kukasula wa antu yauze.” Tulinzile “kulola” nu kuya apempule. Tulinzile ukuya apempule pakuti tutaika mu vikanza vya miteekele nu mu milandu ya mu nsi. Ndi cakuti twaika mu vintu vii, tungaya “amu nsi.” (Yoa. 15:19) Twamanya ukuti Uwene Wakwe Leza sile ali uno ulaleta mutende pano nsi.

6. I vyani vino tukulonda ukwazwa antu yauze ukucita, nupya u mulandu ci?

⁶ Tusilonda sile ukutwalilila apempule swenga, lelo tukalonda ukwazwa na yauze ukumanya vino Baibo yasoowile ukuti i vilacitika muno nsi. Lekini twaiusya ukuti ndi cakuti ucuzi ukulu cuze watandika sile, ale insita yasila iyakuti antu yapalame kuli Yeova. Ali mulandu kwene uno icicindamila ukuti twasimikila sana likwene.c

TWALILILINI UKUYA AACINCILE MU MULIMO WA KUSIMIKILA

7. I vyani vino Yeova akulonda twacita likwene?

⁷ Umu nsita inono iyatisyala kuti “uwanda” wakwe Yeova utandike, Yeova akulonda ukuti tuye acincile mu mulimo wa kusimikila. Tulinzile ukusininkizya ukuti sweswe ‘yacincile lyonsi lino tukutumikila Umwene.’ (1 Kol. 15:58) Yesu walanzile vino tulinzile ukucita. Lino walandanga pa vintu vino vyali nu kucitika mu manda akusyalikizya, walanzile nu kuti: “Lelo Ilandwe Lisuma lilinzile likosoolwe ku nko zyonsi.” (Mako 13:4, 8, 10; Mate. 24:14) Mutale mwelenganye: Lyonsi lino mwaya mu mulimo wa kusimikila ala mukwazwilizyako ukufikilizya usoowelo uwo uwa muli Baibo!

8. Uzye twamanya uli ukuti mulimo wa kusimikila ucili ukulunduluka?

⁸ Uzye umulimo wa kusimikila ukulunduluka uli? Cila mwaka, umulimo uu ukailako sile pa nkoleelo. Mutale mwelenganye vino impendwa yakwe ya kasimikila ali mu nsi yonsi mu manda yaa akusyalikizya yakula. Umu 1914, mu mpanga 43 mwali ya kasimikila 5,155. Nomba ndakai, ya kasimikila yali 8.5 milyoni mu mpanga 240! Lelo nanti ciye vivyo, umulimo utatala wasila. Tulinzile ukutwalilila ukunena antu yauze ukuti Uwene Wakwe Leza sile uulasisyapo intazi zyonsi zino antu yakwata.—Masa. 145:11-13.

9. U mulandu ci uno tulinzile ukutwalilila ukukosoola ilandwe lya Wene?

⁹ Umulimo witu uwa kusimikila utalasila suka sile Yeova ace alande ati casila. Uzye u kufika lilaci lino tulata ukunena antu ukuti yalinzile ukumanya Yeova Leza na Yesu Klistu? (Yoa. 17:3) Tutamanya. Twamanya sile ukuti ukufika lino ucuzi ukulu cuze ulatandika, “yaayo yonsi aaya nu mwenzo wakulondesya ukuya nu umi wa pe” yangalonda ukuvwa kwi landwe lisuma nupya yangasoololapo ukutandika ukuombela Yeova. (Mili. 13:48) Uzye tungavwa uli antu ya musango uu lino kucili insita?

10. I vyani vino Yeova akatupeela ivikatwazwa ukusambilizya antu icumi?

¹⁰ Yeova akatupeela vyonsi vino tukalondekwa pa kusambilizya antu icumi, ukupitila mwi uvi lyakwe. Cila mulungu tukasambilila ivyakusambilizya pa kulongana kwa mukasi ka mulungu. Ukulongana kuu kukatwazwa ukumanya ivya kulanda pa muku wa kutandikilako lino twazana muntu alino ni vya kuswililila kuli yano twasimikile. Nupya tukasambilila ni vya kutungulula amasambililo ya Baibo. Iuvi lyakwe lyatupekanizizya ni Viombelo Vino Tukaomvya pa Kusambilizya. Iviombelo vii vikatwazwa . . .

• ukutandika ukulanzyanya,

• ukuomvya mitandikile isuma,

• ukuleka antu yalondesya ukusambilililapo na vyuze,

• ukusambilizya icumi kuli yano tukasambilizya Baibo, alino

• nu kutungulula antu akalondesya ukuvwa kuli webusaiti itu alino nu kuyama ku Ng’anda ya Wene.

Nomba, tutalinzile sile ukupeelela pa kukwata iviombelo vii. Tulinzile ukulaviomvya.d Wakwe ndi cakuti mwalanzyanya nu muntu akulondesya kusambilila, mwamusiila na kapepala kilandwe nanti magazini, alatwalilila kuwelenga mpaka mukaswilileko. Fwandi tulinzile ukulaombesya mu mulimo wa kusimikila cila mwezi.

11. U mulandu ci uno iikilako Kusambilila Baibo pa Intaneti?

¹¹ Ndi cakuti mukulonda ukumanya na vyuze pali vino Yeova akaazwa antu ukumanya icumi, yangini apa jw.org apakuti Kusambilila Baibo pa Intaneti. U mulandu ci uno iikilako masambililo yaa? Cila mwezi, antu aingi cuze mu nsi yonsi yakalonda ivyeo ivikalanda pali Baibo pa Intaneti. Amasambililo aya pali webusaiti itu yangazwa antu yaa ukusambilila icumi icaya mwi Izwi Lyakwe Leza. Nupya antu yamwi yano mukasimikila yangalezyoka ukutandika ukusambilila Baibo namwe. Fwandi mwayalanga ivipande ivyaya pa webusaiti nanti ukuyatumila icakuyazwa ukuzana zuwa amasambililo yaayo.e

12. I vyani vino umuntu angasambilila pa cipande cakuti Kusambilila Baibo pa Intaneti?

¹² Pa cipande cakuti Kusambilila Baibo pa Intaneti paya imitwe ii: “Baibo Alino nu Mwineco,” “Antu Yano Baibo Yalandapo Sana” alino nu wakuti “Amazwi Amuli Baibo Aakatupeela Upaalilo.” Ndi cakuti umuntu akusambilila masambililo yaa, angamanya:

• Vino Baibo ingazwa umuntu

• Vino Yeova, Yesu na angeli yaya

• Umulandu uno Leza waumbiile antu

• Umulandu uno kwayela ukucula ni viipe

Nupya masambililo yaa yakalanda na pali vino Yeova . . .

• alafumyapo ukucula ni mfwa,

• alatuutulula afwe, alino

• nu kufumyapo amauteeko ya untunze nu kupyanikapo Uwene wakwe.

13. Ndi cakuti umuntu wamala ukusambilila Baibo pa intaneti, uzye alinzile kutwalilila ukusambilila Baibo na Nte umwi? Londololini.

¹³ Amasambililo ya pa intaneti yatapyanikizya pi sambililo lya Baibo. Yesu watupeela isyuko lya kupanga asambi. Amasambililo yayo yapangwa mu nzila yakuti yalenga akulondesya ukumanya icumi ukuyawelenga, ukutemwa vino yakusambilila, alino nu kulondesya ukusambilililapo na vyuze. Limwi nga caya vivyo, yangalonda ukutandika ukusambilila Baibo na Nte umwi. Apa mpela yi sambililo lyonga na lyonga yakanena akuwelenga ukuti angalenga ukuti umwi akatandike ukumusambilizya Baibo. Cila wanda, tukapokelela mazwi akuleenga ukusambilila Baibo ukufuma ku yantu ukucila pali 230 mu nsi yonsi pa webusaiti itu! Fwandi ali mulandu uno cacindamila ukuti umuntu wenga na wenga pali yayo akwate uwa kumusambilizya Baibo!

TWALILILINI UKWEZYA UKUPANGA ASAMBI

14. Ukulingana na mazwi yakwe Yesu alembwa pali Mateo 28:19, 20, i vyani vino tulinzile ukwezya na maka ukucita, nupya u mulandu ci?

¹⁴ Welengini Mateo 28:19, 20. Lino tukutungulula amasambililo ya Baibo, tulinzile ukwezya na maka itu yonsi ukucita “antu amu nko zyonsi kuya alondezi . . . , nu kuyasambilizya kucita vyonsi vino [Yesu walanzile].” Tulinzile ukwazwa antu ukumanya umulandu uno cacindamila ukuisoolwela aineco ukuombela Yeova nu kutungilila Uwene wakwe. Cii cikupiliula ukuti tulinzile ukwezya ukwazwa antu ukulaomvya vino yakusambilila, ukupeela umi wao kuli Yeova, alino nu kuwatiziwa. Nga yacita vivyo, alino yalapusuka pa wanda wakwe Yeova.—1 Pet. 3:21.

15. I nsita ya kucita vyani ino tutakweti, nupya u mulandu ci?

¹⁵ Wakwe vino itulandapo mpiti, insita inono sile i yatisyala kuti amanda yaa akusyalikizya yasile. Fwandi ali mulandu kwene uno tutakwatile insita iyakutungulula amasambililo ya Baibo ku yantu asilonda ukusenuka kuti yaye asambi yakwe Klistu. (1 Kol. 9:26) Umulimo witu watiupamvya sana! Kucili antu aingi cuze atatala yuvwapo ilandwe lya Wene lino insita itatala yasila.

MWATALUKA KULI VYONSI IVIKAUVWANA NI MIPEPELE YA UFI

16. Ukulingana na amazwi aya pali Umbwilo 18:2, 4, 5, 8, i vyani vino tulinzile ukucita? (Loliniko na futunoti.)

¹⁶ Welengini Umbwilo 18:2, 4, 5, 8. Ivikomo vii vikalangilila icintu na cuze cino Yeova akalonda ya kapepa yakwe ukucita. Aina Klistu yonsi acumi yalinzile ukusininkizya ukuti yata ukucitako vyonsi ivikauvwana ni mipepele ya ufi. Lino umusambi wa Baibo atatala wasambilila icumi, limwi angaya ale wali mu mipepele ya ufi. Limwi wayanga ku calici nu kucitako vyonsi ivya mwi calici lilyo. Nanti limwi wasangulanga impiya kwi calici lilyo. Fwandi lino umusambi wiyo atatala walinga ukuya kasimikila aatatala wawatiziwa, alinzile ukusininkizya ukuti watata ukucitako ivili vyonsi ivya mu kaungwe kako aka mapepo. Alinzile ukulemba kalata wa kulanga ukuti watafumako ku mipepele iyo iya ufi nanti akaungwe akali konsi akakauvwana ni mipepele iyo, nu kuyanena ukuti wata ukuya umuntu wao.f

17. Iincito zya musango cii zino Aina Klistu yalinzile ukutalukako, nupya u mulandu cii?

¹⁷ Umwina Klistu wa cumi wensi alinzile ukusininkizya ukuti incito ino akaomba isiuvwana ni mipepele ya ufi mu nzila iliyonsi. (2 Kol. 6:14-17) Atalinzile ukulembwa incito iya kuomba mu calici. Nupya, Umwina Klistu uwalembwa incito ku yantu yauze sile, atalinzile ukuzumila ukuya mukuomba pa vikuulwa ivikaomviwa ku kutungilila imipepele ya ufi. Nupya ndi cakuti akaiombela, atalinzile ukuzumila ukuomba mulimo uli onsi ukutungilila Babiloni Mukulu. U mulandu ci uno tusilondela ukucitako ivintu vya musango uwo? A pa mulandu wakuti tusilonda ukuikamo mu visambilizyo vya ufi alino nu mu vicitwa iviipe vyonsi ivya mipepele ya ufi, ivisizanzya Leza.—Eza. 52:11.g

18. Uzye umwina umwi uvwilile uli ivisinte vya muli Baibo ukulozya ku mulimo uno waombanga?

¹⁸ Imyaka imwi iyapitapo, umuntu umwi wino yapeezile umulimo wa kwangalila makuule wanenyile eluda aakaiombela ukuti akaombe mulimo unono uwa kuwaza api calici limwi ilyayela mu musumba kwene uno umwina akaikalamo. Umuntu wiyo wamanyile ukuti lyonsi umwina akakana ukuomba pa macalici. Nomba camutalile ukuzana umwi angaomba mulimo uwa. Lelo nanti ciye vivyo, umwina walondiile ivisinte vya muli Baibo nupya wakanyile mulimo uwo. Umulungu uwalondelilepo, kwafumile nyunzipepa apaali icikope ca muntu uwaomvile umulimo uno umwina wali nu kuomba uwa kwika musalawa pa calici. Ndi cakuti umwina akana ukuvwila ivisinte vya muli Baibo, nga aliwe wali pa cikope ciici icali pali nyunzipepa. Mutale mwelenganye vino wali nu kuleta umuzewanya pa ina na ya nkazi! Nupya elenganyini, vino Yeova wali nu kuvwa nga acita vivyo.

I VYANI VINO TWASAMBILILA?

19-20. (a) Uzye ukufika paa i vyani vino twasambilila? (b) I vyani na vyuze vino tukulondekwa ukusambilila?

¹⁹ Baibo ikalanda ukuti usoowelo na uze ucindame sana wasya ufikiliziwe likwene lino ya kateeka ya muno nsi yalapunda ukuti kuli “mutende.” Pa mulandu na vino Yeova watusambilizya, twamanya ukuti ya kateeka yaa yatalatala yalete mutende wa cumi cumi. I vyani vino tulinzile ukucita lino icintu cii citatala cacitika na lino ulovyo utatala wiza? Yeova akalonda ukuti twaya acincile lyonsi mu mulimo wa kusimikila pa Wene nu kulaezya ukupanga asambi. Nupya, tulinzile ukutaluka ku mipepele ya ufi. Cii cikupiliula ukuti tulinzile ukuta ukucitako ivilivyonsi ivikauvwana na Babiloni Mukulu kumwi ni ncito kwene izikamutungilila.

²⁰ Kwaya na vyuze ivilalondelelapo ukucitika mu kusila kwa “manda akusyalikizya.” Nupya kwaya ivintu na vyuze kwene vino Yeova akalonda ukuti twacita. Uzye i vyani vivyo kwene, nupya tungacita uli pakuti tuipekanye ku ciliconsi icili nu kucitika ku nkoleelo? Tulasambilila mu cipande icilondelilepo.