Icakulya ca Manguzi Ica Mwene Cikalanga Umucinzi Kuli Leza

AINA Klistu yayanena ukuti yafwile ukwiusya imfwa yakwe Klistu. Iciusyo cico cika-amwa nu kuti “Cakulya ca manguzi ica mwene.” (1 Kolinto 11:20, NW) Uzye Iciusyo cico cacindama uli? U mu nzila ci, nupya alilaci lino cifwile ukuyako?

Yesu Klistu aliwe watandike ukuzevya kuu apa wanda wa Ucilo wa Ayuda umu 33 C.E. Ucilo wali u kuzevya ukwayangako umuku onga cila-mwaka apa wanda walenga 14 mu mwezi uno Ayuda yatangi Nisani. Pa kupenda nu kuzana uwanda uuwo, Ayuda yatalanga iyaloleela uwanda uno usiku walingananga nu musanya mu nsita ya cisiku. Kulikuti uwanda uno umusanya ukakwata maawazi 12 nu usiku maawazi 12. Apa nsita iiyo, ala uwanda uuli onsi uno yamatandikilapo ukulola umwezi upya ala ali pano umwezi wakwe Nisani umatandikila. Apa wanda walenga 14 kufuma pano Nisani watandikiile ali pano yakwatanga Ucilo.

Yesu wazevizye Ucilo pamwi na atumwa yakwe, nga alino wazinzile Yuda Isikalyoti, nu kutandika ukuzevya Icakulya ca Manguzi Ica Mwene. Kuzevya kuu kwapyanyile ukuzevya kwa Ucilo, fwandi nako kwene kufwile ukucitika umuku onga pa mwaka.

Ilandwe lyakwe Mateo likati: “Yesu atoola umukate ataizya Leza, aumokoola, alino aupela ku alondezi yakwe avwanga ati, ‘Tolini mulye, uu uli mwili wane.’ Lyene atoola ulwako, ataizya Leza, ayapeela nga avwanga ati, ‘mwinimo mwensi kwene. Uu uwazi wane, . . . uno wapongololwa pamulandu wa antu aingi, kuti maifyo yao yelelwe.’”—Mateo 26:26-28.

Antu yamwi yakaelenganya yati Yesu wasenwile umukate ukuya umunyefu wakwe na waini ukuya uwazi wakwe. Lelo, apa nsita ino wapeelanga umukate, umwili wakwe wali upuma, uwaula nanti kamwi akasusuleko. Uzye tungati atumwa yakwe Yesu yalyanga umunyefu wakwe Yesu nu kumwa uwazi wakwe? Afwe foo, pano ukucita vivyo u kutama masunde yakwe Leza. (Utandiko 9:3, 4; Aina Levi 17:10) Kulingana na Luka 22:20, Yesu walanzile ati: “Lwako luu ulwa upangano upya uno Leza watamapo insimbi nu wazi wane, uo wapongololwa pa mulandu winu.” Uzye ulwako lulo lwasenwike iluya “upangano upya?” Cico citanga cicitike, pano upangano asi cintu cimwi cino ungalema, lelo cikupiliula ukuti icuvwano nanti ukuzumilizyanya.

Fwandi umukate na waini i vinkolanya sile. Umukate ukaimililako umwili wakwe Klistu umalilike. Yesu waomvizye umukate uwasiileko lino yamazile ukuzevya Ucilo. Umukate uuwo utaakwetimo icitutumusi. (Kufuma 12:8) Baibo ikaomvya izwi lyakuti citutumusi kupiliula iifyo nanti kuola. Fwandi umukate ukaimililako umwili umalilike uno Yesu watuuzile. Utaakwetimo uluyembu.—Mateo 16:11, 12; 1 Kolinto 5:6, 7; 1 Petulo 2:22; 1 Yoane 2:1, 2.

Waini umuyenzu akaimililako uwazi wakwe Yesu. Uwazi uuwa, uukalenga ukuti upangano uombe. Yesu walanzile ukuti uwazi wapongolwilwe “pamulandu wa antu aingi kuti maifyo yao yelelwe.” Ali uno ukalenga ukuti Leza aalola antu ukuti yaswefiwa ku maifyo, nu kuti yangaya umu cipangano na Yeova. (Ayebulai 9:14; 10:16, 17) Cipangano cico, nanti tuti icuvwano, i cikalenga ukuti aina Klistu yacuvwila 144,000 yace yaye ukwiyulu. Ukwiyulu kuuku yalaya yakaye ya kateeka nupya yasimapepo ku kwavwa antunze.—Utandiko 22:18; Yelemiya 31:31-33; 1 Petulo 2:9; Umbwilo 5:9, 10; 14:1-3.

Uzye aaweni alinzile ukulyako ivinkolanya vivyo? A yaaya aaya umu cipangano cipya, kulikuti yaayo aalaya ukwiyulu, aliyo yafwile ukulyako umukate na waini. Umupasi wakwe Leza uwamuzilo ulio ukayalenga ukuti yaasininkizya ukuti yaasoololwa ukuya uku kuteeka ukwiyulu. (Loma 8:16) Yene yaaya nu mu cipangano ca Wene pamwi na Yesu.—Luka 22:29.

Nga antu yauze yene aalikala umu Paladaise pano nsi, yene yafwile ukucita uli? Nayo kwene yakauvwila isunde lyakwe Yesu nu kuzanwako uku Ciusyo ca mfwa yakwe ku kulanga umucinzi pali vino Yesu watantiike, lelo yene yasiilyako ivinkolanya. Cila-mwaka, apa Nisani 14, lino ilanzi lyawa, ya Nte yakwe Yeova yakakongana pamwi ku kwiusya imfwa yakwe Yesu. Nanti cakuti antu anono sile aliyo yakati yalaya ukwiyulu, ukuzevya Iciusyo kwene kwacindama sana uku ina Klistu yonsi. Ali kuno yonsi kwene yakaelenganya sana pa kutemwa ukukulu kuno Yeova na Yesu Klistu yatulangizya.—Yoane 3:16.