Watchtower LAIBULALE UWA PA INTANETI
Watchtower
LAIBULALE UWA PA INTANETI
Cimambwe-Lungu
  • BAIBO
  • MPAPULO
  • KULONGANA
  • mwbr17 Dizemba mafwa 1-6
  • Ivyeo Vya Kuomvya Umu Kabuku Kakuti Swe Ina Klistu nu Mulimo Witu

Kutaaya vidyo pali vino mwasoolola

Awe icumi catala, vidyo wakaana ukuloleka

  • Ivyeo Vya Kuomvya Umu Kabuku Kakuti Swe Ina Klistu nu Mulimo Witu
  • Ivyeo Vya Kuomvya Umu Kabuku Kakuti Swe Ina Klistu nu Mulimo Witu (2017)
  • Utumitwe
  • DIZEMBA 4-10
  • w01 2/15 mafwa 18-19 mapa. 5-7
  • DIZEMBA 11-17
  • DIZEMBA 18-24
  • w13 2/15 ifwa 20 pala. 15
  • Ikalini mu Cifoloma ca Ucingo
  • Ukuvwikisya Sana Ivyaya Umu Malembelo
  • w07 12/15 mafwa 22-23 mapa. 9-10
  • w07 12/15 ifwa 25 pala. 13
  • Kuwelenga Baibo
  • DIZEMBA 25-31
Ivyeo Vya Kuomvya Umu Kabuku Kakuti Swe Ina Klistu nu Mulimo Witu (2017)
mwbr17 Dizemba mafwa 1-6

Ivyeo Vya Kuomvya Umu Kabuku Kakuti Swe Ina Klistu nu Mulimo Witu

DIZEMBA 4-10

IVYUMA IVYAYA UMWI ZWI LYAKWE LEZA | ZEFANIYA 1–HAGAI 2

“Londini Yeova Lino Uwanda wa Ukali Wakwe Utacili Wize”

(Zefaniya 2:2, 3) Lino anisi inu yatali yize yamusende ndi vino umuza ukaululula cungu, lino ukali wakwe Yeova utali umuponele, lino uwanda wa ukali wakwe utacili wize. 3 Zenzukini nu kwiza kuli Yeova, mwensi mwe ikazi ya mpanga, yano yakayela amalamulo yakwe. Citini ivyaololoke nu kuicefya pa manso yakwe Yeova. Limwi muluutuka ukuvunukwa apa wanda uno Yeova alasokolola ukali wakwe.

w01 2/15 mafwa 18-19 mapa. 5-7

Londini Yeova Lino Uwanda wa Ukali Wakwe Utacili Wize

5 Limwi mungalanda ukuti: ‘Nemo naipeela kuli Leza nupya nawatiziwa nu kuya Inte Yakwe Yeova. Uzye ntakumanizya vyonsi ivikalondekwa? Kuya kwene asi kuipeela kutupu ukukalondekwa. Aina Izlaeli yali uluko ulwaipeezile kuli Yeova, lelo umu manda yakwe Zefaniya Ayuda yatacitanga ivintu ivyalangililanga ukuti yaipeezile kuli Yeova. Lyene uluko lwizile iluya sile cuze cuze. Ndakai ukulonda Yeova kukapiliula ukuya na ucuza usuma nu kupalama sana kuli aliwe alino nu kwi uvi lyakwe ilyaya pano nsi. Nupya cikapiliula ukumanya ningo sana Leza na vino akalola ivintu. Tukalonda Yeova nga tukusambilila Izwi lyakwe, kwelenganya pali vino tukusambilila nu kucita vino tukusambilila, mu umi witu. Lino tukulonda utunguluzi wakwe Yeova kupitila mu kupepa kuli aliwe alino nu kulondela vino umupasi ukututungulula, tulapalama sana kuli Yeova nupya tulatemwa sana ukumuombela ‘nu mwenzo witu onsi, umi witu na maka itu yonsi.’—Malango 6:5; Galatiya 5:22-25; Filipi 4:6, 7; Umbwilo 4:11.

6 Cakwe ciili icikalondekwa icaya pali Zefaniya 2:3, u “kucita ivyawololoke.” Swe ingi twasenwike muli vimwi pakuti tulinge ukuwatiziwa, lelo tulinzile ukutwalilila ukulondela masunde yakwe Leza mu umi witu onsi. Yamwi atandike sile ningo ukuombela Yeova yasendwa ni vintu ivyaya mu nsi. Citangupala ukucita ivyawololoke pa mulandu wakuti tukaikala umu nsi umwaya antu akalola ukuti ukutumpoka, uzelele na maifyo yauze vyaya sile ningo. Lelo ndi tukulondesya ukuzanzya Yeova tungacimvya intazi zyonsi kwene zi. Ayuda yaponzizye ucuza wao na Yeova pa mulandu wa kukolanya aina masi. Tutafwile ukukolanya amu nsi, lelo tulinzile “kukolanya Leza” nu kuzwala ‘untu upya uno waumvilwe mu mwata wakwe Leza lyene tulaya amuzilo.’—Efeso 4:24; 5:1.

7 Cisinka cakwe citatu icaya pali Zefaniya 2:3, i cakuti pakuti tukafisame pa wanda wa ukali wakwe Yeova, tulinzile “kuicefya.” Cila wanda tukaya na antu apusane pusane ataicefya. Yene yakalola kwati ukufuuka ukwipe. Yakalola umuntu akalondela vyonsi ukuti watonta. Yene yaitemwa yasilonda umuntu ukuyanena ivyakucita, yakalola ukuti ali wensi alinzile ukucita vino yene yakulonda. Cingipa sana ndi cakuti naswe twakwata imiyele ya musango uu! Ii ali nsita yakulonda “ukuicefya”. Tungacita uli vivyo? Tungacita vivyo ndi cakuti tukuicefya pa manso yakwe Leza, kulondela vino akutusunda nu kutwalilila ukucita ukulonda kwakwe.

Ukuvwikisya Sana Ivyaya Umu Malembelo

(Zefaniya 1:8) Yeova akuti, “Pa wanda kwene uo uwa mpolelwa yane indavunuka intunguluzi na ana ya mwene na yayo yonsi akalondela intambi zya inamasi.”

w07 11/15 ifwa 11 pala. 3

Ivyeo Ivyaya Umwi Buku Lyakwe Naumi, Habakuku na Zefaniya

1:8. Aina Izlaeli aingi mu manda yakwe Zefaniya yatemilwe ukucita vino aina masi yacitanga kuli kuti yalondelanga “intambi zya ina masi.” Cingaya uwelewele ndi cakuti kapepa wakwe Yeova watandika ukulondela intambi zya ina masi.

(Hagai 2:9) “‘Ululumbi lwa Ng’anda ii yakwe ciili lulaluta pa lulumbi lwa Ng’anda ya pakutandika iyaliko’ ivyavwanga Yeova Wamaka yonsi. “‘ndaleta umutende pano nsi ponsi,’ ivyalanda Yeova wa maka yonsi.”

w07 12/1 ifwa 9 pala. 3

Ivyeo Ivyaya Umwi Buku Lyakwe Hagai na Zakaliya

2:9—U munzila ci muno lulumbi lwa ng’anda yakwe ciili lwalusile lulumbi lwa ng’anda ya pakutandika? Tungalanda umu nzila zitatu; imyaka ino ing’anda iya yatenzi, aasambilizyanga mu ng’anda iya, alino na antu ayanga mu kupepa Yeova mu ng’anda iya. Nanti icakuti ing’anda yakwe Solomoni iikazile imyaka 420 kufuma mu 1027 B.C.E. kufika mu 607 B.C.E., ing’anda yakwe ciili yene yaiomvyanga pa myaka 580 kufuma pano yamazile ukukuula mu 515 B.C.E. kufika na lino yononyilwe umu 70 C.E. Nupya Mesiya kuli kuti Yesu Klistu wasambilizizyanga umu ng’anda yakwe ciili, na antu aingi iizanga, ukuluta ayanga mukupepa Leza mu ng’anda iyali pa kutandika.—Milimo 2:1-11.

Kuwelenga Baibo

(Hagai 2:1-14) Pa wanda walenga ikumi na onga, umu mwezi wakwe cinimbali uwa kuteeka kwakwe Dalyusi, umwene waku Pesya, Yeova wapile izwi kuli kasema Hagai. 2 Ni izwi lyalungime Zelubabeli umwana umonsi wakwe Syeatieli, musika mukulu uwa ku Yuda, na kuli Yoswa umwana umonsi wakwe Yeozadaki, Simapepo Mukulu nga na kuli yauze yonsi ukuti, 3 “uzye pangayako yamwi pano muli atazile yalolako ululumbi ulwakweti Ng’anda ikulu ii yakwe Yeova? Uzye icumi kwene mutakuilolela ukuti lyene umucinzi nu lulumbi vyati visila? 4 Lelo nanti cingaya vivyo kwene ne Yeova nkuti, uposye mwine Zelubabeli, uposye mwine Yoswa we mwana monsi wakwe Yeozadaki, we simapepo mukalamba, muposye mwe antu mwensi kwene, mwe ikazi amu mpanga. Acino tandikini umulimo pano nene ne Yeova namayanga namwe lyonsi pe. 5 Mutuvwa intete awe, pano umupasi wane uli pano muli kuti umwazwe muli vyonsi vino mukucita ndi vino nalavile lino namufumizye umu Eguputo.” 6 Vino nkumunena ne Yeova Wamaka Onsi aivi, “Pasyala sile panono ale natensya iyulu ni nsi yonsi, yemba ni cituntu kwene nga na vyonsi ivyaya mwenemo. 7 Indi nu kusunkanya imitundu ya antu yonsi iyaya muno nsi alino ni cuma cao cilaletwa kunondi, icakuti nupya kwene Ng’anda yane ikulu ilazulamo ululumbi lukulu. Nene nkuvwanga ne Yeova Wamaka Onsi. 8 Siluva na zaabu vyonsi ivyakwane. 9 Ali cino ululumbi lwa Ng’anda ii yakwe ciili lulaluta pa lulumbi lwa Ng’anda ya pakutandika iyaliko. Nupya indaleta untungwa nu mutende panonsi ponsi. Ivyavwanga Yeova Wamaka yonsi.” 10 Pa wanda walenga amakumi yaili na yani, umu mwezi wakwe fundimbali uwamu mwaka wakwe ciili, uwa kuteeka kwakwe Dalyusi, umwene waku Pesya, nupya kwene Yeova wapile izwi kuli kasema Hagai ilyakuti, 11 “Vino nkulanda nene ne Yeova Wamaka Onsi aivi: Londini yasimapepo kuti yaputule umulandu uu: 12 Ndi cakuti umuntu umwi wafundila inyama iziliziwe, iyo iyatuzilwe ngi mpolelwa umu nsalu yakwe, alino insalu yakwe yakumya ku nsima nanti uku musunyi nanti kuli waini nanti uku mafuta ya miolivi nanti uku cakulya icili consi sile, uzye ivyakulya vyonsi ale vyaya ivikowele?” Yasimapepo nayo ali pakwasuka yati, “Awe.” 13 Papo kwene Hagai ayuzya nupya ati, “Ndi cakuti umuntu wakweyowezya pa kukumya uku cala ca muntu alino waya walema ivyakulya, uzye vyonsi kwene vingaya ivikowele?” Ya simapepo apali pakwasuka yati, “Ee navyo kwene ala vyakowela.” 14 Lyene Hagai avwanga ati, “Vino Yeova akuvwanga aivi: Icili cimwi na antu kwene yaa, nupya icili cimwi nu mutundu kwene onsi uu apa manso yane. Ivicitwa vyao vyonsi kumwi ni mpolelwa zyao zyonsi izikowele nupya izya mifitalila ku mulola wane.

DIZEMBA 11-17

IVYUMA IVYAYA UMWI ZWI LYAKWE LEZA | ZAKALIYA 1-8

“Yalalema ku Cisempe ca Muyuda”

(Zakaliya 8:20-22) “Nupya Yeova wa maka yonsi wavwanzile ati, “Insita ikwiza lino antu amu mitundu ikalamba yalaiza kuno ku Yelusalemu, pamwi na antu alafuma mu misumba yuze ikalamba. 21 Amu musumba onga yalanena amu musumba uze yati, ‘Yame, twapita ku kupepa Yeova wa maka yonsi, tukamupapate pakuti atupolelele. Si aleni, twapita! 22 Fwandi antu amu mitundu ikalamba nupya yamaka, yalaiza kuno ku Yelusalemu ku kupepa ne Yeova wa maka yonsi nu ku kumpapata pakuti ince nayapolelela.”

w14 11/15 ifwa 27 pala. 14

“Ndakai Mwemwe Antu Yakwe Leza”

14 Ya kasema aliko mpiti yasoowile ukuti mu manda ya ku mpela antu aingi yalaiza mu kupepa Yeova. Kasema Ezaya wasoowile ukuti: “Na antu ya mitundu yuze ali kuno yalaomokela.” Yalavwanga nu kuti, “Tuyini twapita tutumbele umwamba wakwe Yeova, apakuti aye akatusunde vino tuli nu kucita, apakuti twalondela mwi kula lyakwe.” Umu cumi amasunde yakwe Yeova yakafuma mu Yelusalemu, pano umu Zioni ali muno akapeelela antu yakwe amalango.” (Eza. 2:2, 3) Kasema Zakaliya nawe wasoowile ukuti “Antu amu mitundu ikalamba nupya iya maka, yalaiza kuno ku Yelusalemu ku kupepa Yeova wa Maka yonsi nu ku kumupapata pakuti ace ayapolelela.” Walanzile pa antu yaa ukuti, ainamasi ikumi yalalema ku cisempe ca Muyuda wenga, nu kumunena yati, “Tukulonda tuye nawe, pano swemo tuvwa ukuti Leza waya kunomuli.”—Zaka. 8:20-23.

(Zakaliya 8:23) “Yeova Wamaka yonsi wavwanga wati, “Mu manda yalya apa inamasi yonsi akaalanda indimi zipusane pusane, ainamasi ikumi yalaiza ku Muyuda wenga, nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’””

w16.01 ifwa 23 pala. 4

“Tukulonda Tuye Nawe”

4 Pa mulandu wakuti citangupala ukumanya mazina yako yao aaya muli Izlaeli wakwe Leza, uzye a mumfwele nazyuze “yangaaya” uli nayo? Lolini vino usoowelo wakwe Zakaliya ukalanda pa antu ikumi. Antu yaa “yalalema ku cisempe ca Muyuda wenga nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’” Nanti icakuti Muyuda wenga aliwe walumbulwa paa, izwi lyakuti kunomuli likalozya uku antu aingi. Tungalanda tuti Muyunda akulozya ukwiumba lya yantu asi umuntu sile wenga! Fwandi citangupala ukumanya Ayuda yakwe Leza wenga wenga alino nu kuya nayo. Lelo tulinzile ukumanya iumba lya antu kwene yaa nu kulayazwilizya. Kutaya nanti apamwi pano malembelo yakatunena ukuti twalondela antu. Yesu sile ali ntunguluzi itu.—Mate. 23:10.

w09 2/15 ifwa 27 pala. 14

Yene “Yakatwalilila Ukulondela Umwana Wa Mfwele”

14 Yesu akalola vino tukaazwilizya aina yakwe ukuti tukaazwilizya aliwe. (Welengini Mateo 25:40.) Uzye lyene Aina Klistu akwata upalilo wa kwikala manda pee pano nsi yangavwilizya uli apakwe? Yangacita vivyo ndi cakuti yakuombesya mu mulimo wa kusimikila. (Mate. 24:14; Yoa. 14:12) Lino impendwa ya Ina Klistu apakwe ikuya ikucepa, amu mfwele nazyuze yene yakuya yakuvulilako sile. Fwandi akwata upalilo wa kwikala pano nsi ndi yakuomba mulimo wa kukosoola, nga cingacitika yakuombako umu mulimo wa nsita yonsi, ala yakwazwilizya apakwe ukufikilizya mulimo wa kupanga asambi. (Mate. 28:19, 20) Tutalinzile nu kwilila ukuti ndi tukusangwilako ale tukwazwilizya mulimo uu.

Ukuvwikisya Sana Ivyaya Umu Malembelo

(Zakaliya 5:6-11) Nga nani imuzya inti, “Uzye icani?” Nawe angasuka ati, “A cimpokoso cakupimilako uyi onsi uwazula insi yonsi.” 7 Pa cimpokoso kwene pali ni ntupiko ya mutovwe, nga lino nkulolekesya indola inkupiko yaitupula, nga ndola umwanaci atenzi mwenemo. 8 Umungeli avwanga ati, “Umwanaci wii, ali cimanyililo ca uyi kwene.” Alino umungeli atininkizya umwanaci kwene wilya muli cimpokoso, akupikapo ni ntupiko, nayo yali inyome wakwe cimwi. 9 Lyene indingamila mupela, nga ndola anaci nayauze yaili yakwiza, yakupapukila lwa panondi, ale yali na maapa kwati amaapa yakwe yanamakungwe, nga yatumpula cimpokoso pakasi ki yulu ni nsi. 10 Alino nani nuzya umungeli wino twalandanga nawe inti, “Uzye aukwi kuno yakutwala cimpokoso?” 11Nawe aasuka ati, “Yaya ku kucikuulila ng’anda ikulu mu mpanga ya Babiloni. Lino ng’anda iyo ikulu ilasila yalakuula iciimbili cakuteekapo cimpokoso.”

w17.10 ifwa 25 pala. 18

Uzye Vilolwa Vino Ezekelo Waweni Vingamwazwa Uli?

18 Kwene, icilolwa ciusyangako Ayuda ukuti yalinzile ukutwalilila kuya mu kupepa kwa cumi kusanguluke. Uyi uli onsi utaalinzile ukuya pakasi ka antu yakwe Yeova. Vino Yeova watuleta umwi uvi lyakwe ilya usaka muno twacingililwa ningo, tulinzile ukutwalilila ukulalizifya. Uzye tukazifya “ing’anda” kuti iyaloleka iya usaka? Muli paladaise wakwe Leza uwa unkolanya mutalinzile ukuya uyi uli onsi.

(Zakaliya 6:1) “Ne Zakaliya indola icilolwa nacuze. Iila lii lyene indola amaceleta yakufuma pakasi ka myamba iili ya cela ca mukuwa.”

w17.10 ifwa 27-28 mapa. 7-8

Vino Ivilolwa Vyakwe Zakaliya Vingamwazwa

7 Muli Baibo, imyamba insita zimwi ikaimililako mawene, nanti mauteeko. Imyamba iyalumbulwa umwi lyasi lyakwe Zakaliya yakolana ni myamba iili iyalumbulwa umu usoowelo wakwe Danieli. Umwamba onga ukaimililako ukateeka wa papela pela wakwe Yeova uwa manda pe. Umwamba uze ukaimililako Uwene wa Umesiya uno Yesu ali kateeka. (Dan. 2:35, 45) Ukufuma pano Yesu watesilwe pa cilimba ca wene umu 1914, imyamba yonsi yoili yatwalilila ukuyako nupya yacindama sana umu kufikilizya ukulonda kwakwe Leza pano nsi.

8 U mulandu ci uno imyamba yapangilwa nu mukuwa? Wakwe vino goldi waya, umukuwa nao kwene i cela camuteengo sana. Yeova walanzile ukuti icela kwene cii icayengesa sana ciomviwe umu kukuula itenti lya kupepelamo alino na pa kukuula ing’anda ya kupepelamo umu Yelusalemu. (Kufu. 27:1-3; 1 Yamw. 7:13-16) Fwandi icilinga ukulanda ukuti umukuwa wa myamba iili ukatwiusya imiyele isuma sana yakwe Yeova kateeka wa papela pela alino nu Wene wakwe Mesiya, ulaleta ivintu ivisuma sana uku yantu yonsi.

Kuwelenga Baibo

(Zakaliya 8:14-23) “Nupya Yeova wa maka yonsi wavwanga wati, “Lino ivikolwe vinu vyansosizye umwenzo, nemo napanzile ukuviponyezya isyamo, nu kuwezya ntalawezya umwenzo foo. 15 Lelo ndakai nimpanga ukupolelela Aina Izlaeli na Ayuda. Caleka mutuuvwa intete. 16 Vino mwemo mungacita sile aivi, mwalanzyanya ivyacumi. Mu matengo ya milandu mwaputula imilandu nu ulungami apakuleta [mutende.] 17 Mutapanga ukucuzyanya. Mutalapa ufi pano vii vyonsi navisoka. Ivyavwanga ne Yeova wa maka yonsi.” 18 Nupya Yeova wa maka yonsi wizile kunondi. Wanenyile wati, 19 “Kuizilizya ukulya kuno mwemo mukacita mu mwezi wakwe cini, wakwe cisano, wakwe cinimbali nga nu walenga ikumi, kulaya amanda makulu akuzevya mwenemo nu kuzanga ku antu amu Yuda. Fwandi mwemo mwatemwa sile ivyacumi nu kwikala umutende.” 20 Nupya Yeova wa maka yonsi wavwanzile ati, “Insita ikwiza lino antu amu mitundu ikalamba yalaiza kuno ku Yelusalemu, pamwi na antu alafuma mu misumba yuze ikalamba. 21 Amu musumba onga yalanena amu musumba uze yati, ‘Yame, twapita ku kupepa Yeova wa maka yonsi, tukamupapate pakuti atupolelele. Si aleni, twapita!’ 22 “Fwandi antu amu mitundu ikalamba nupya yamaka, yalaiza kuno ku Yelusalemu ku kupepa ne Yeova wa maka yonsi nu ku kumpapata pakuti ince nayapolelela.” 23 Yeova wa maka yonsi wavwanga wati, “Mu manda yalya apa inamasi yonsi akaalanda indimi zipusanepusane, ainamasi ikumi yalaiza ku Muyuda wenga, nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.”’”

DIZEMBA 18-24

IVYUMA IVYAYA UMWI ZWI LYAKWE LEZA | ZAKALIYA 9-14

“Ikalini mu ‘Cifoloma ca Mwamba’”

(Zakaliya 14:3, 4) “Lyene Yeova nawe alakatuka, nu kuyalwisya antu yayo, ndi vino wacitanga na pa mpiti. 4 Pa nsita iyo wene alimilila pa Mwamba wa Miolivi, uwa uwalungatana nu musumba wa Yelusalemu lwaku ufumondaka. Nu Mwamba wa Miolivi ulalepuka pakasi, ukutandikila ku ufumondaka mpaka nu ku uwondaka. Fwandi palaya cifoloma wakwe cimwi. Icipande conga ca mwamba cilaya uku katutu ni cuze naco uku kayeya.”

w13 2/15 ifwa 19 pala. 10

Ikalini mu Cifoloma ca Ucingo

10 Lino umwamba wa unkolanya walepuka pakasi, uze ku katutu nu uze ku kaeya lyene Yeova alimilila pa myamba yonsi yoili. Lyene kulaya cifoloma pano Yeova alimilila pakasi ka myamba yoili. Cifoloma ca unkolanya cii cikaimililako ucingo uno Yeova akacingilila ya kapepa yakwe ukupitila mu Wene wakwe Mesiya. Yeova atalatala alenge kuti upefi wakwe uwa cumi ononwe. Alilaci lino umwamba wa Miolivi walepwike pakasi? U mu 1914 lino Uwene wakwe Mesiya watandike ukuteeka lino nsita ya ina masi yasizile. Alilaci lino ya kapepa yakwe Yeova yatandike ukwiza ku cifoloma ca unkolanya?

(Zakaliya 14:5) Pakuutuka mwemo mulafyonsya mu cifoloma kwene cico ukufika ku lusansa longa mpaka ukulambila ku lusansa luze lwa mwamba ulya. Mulutuka ndi vino ivikolwe vinu vyutwike lino pizile cilundumusi, pa nsita ino umwene Uziya wateekanga mpanga yaku Yuda. Yeova witu aliza aloleke pamwi na angeli yakwe yonsi.

w13 2/15 ifwa 20 pala. 13

Ikalini mu Cifoloma ca Ucingo

13 Ndi twapalama sana kuli Yeova nu kutwalilila ukwikalilila mu cumi, wene pamwi nu mwanakwe, Yesu Klistu yalatwazwa nupya Leza atalatala aleke muntu nanti umwi kutusompola mwi kasa lyakwe. (Yoane 10:28, 29) Yeova waipeelesya ukutwazwa pakuti tutwalilile ukulamuvwila alino nu kutungilila Uwene wakwe Mesiya. Icacindama sana u kwikalilila mu cifoloma ca ucingo, ndi twacita vivyo cilatwazwa ukutwalilila ukuya mu kupepa kwa cumi nu mu manda kwene yaa akusyalikizya lino tukupalamila ku ucuzi ukulu cuze.

(Zakaliya 14:6, 7 NWT) “Kutalaya luswepo—ivintu vilakambantana. 7 Nupya ulaya uwanda ulamanyikwa ukuti uwakwe Yeova, utalaya umusanya nanti usiku nupya manguzi kulaya uluswepo.”

(Zakaliya 14:12) “Ii, ilaya ili mpungo ino Yeova alaponyezya imitundu yonsi iyalwisizye Yelusalemu. Imili yao ilaola lino yacili apuma, amanso yao yalaelela mu vimfonka vyao ni ndimi zyao zilaolela mu tunwa twao.”

(Zakaliya 14:15) “Impungo ili yonga kwene ilaponela imfwalasi na yakawalwe kwene, ingamila, yapunda nga ni viteekwa vyonsi ivikazanwa mu nkambi iyo.

w13 2/15 ifwa 20 pala. 15

Ikalini mu Cifoloma ca Ucingo

15 Uzye i vyani vilacitikila antu aaya kunzi ya ‘cifoloma’ ca ucingo apa wanda wa nkondo yakwe Leza? “Yatalakwata uluswepo” lwa kuyakozezya. Pa wanda uwa uwa ulwi, imfwalasi, ya kawalwe, ingamila, ya punda nga ni viteekwa vyonsi vikazanwa umu nkambi iyo”—ivikaimililako ivyanzo vya ulwi—vitalaavwa nanti acimwi. Vintu vii “vilakambantana” vitalaomba nanti acimwi pano vilakatwa ni mpepo. Lyene Yeova alaleta “impungo.” Cikacitike nanti foo, impungo ilafumyapo vyonsi ivikatinya. Pa wanda uwa amanso ya antu. . . ni ndimi zyao zilaolela mu tunwa twao lyene ya kazanza yalazanza yonsi alaya mu mfinzi yatalatala yavwange na mazwi ya cilumba. (Zaka. 14:6, 7, 12, 15) Kusi alafisama uwononesi uu. Ivita vino vilimilila ku lusansa lwakwe Satana vilacimviwa. (Umbw. 19:19-21) “Uwanda ulya yano yalakomwa kuli Yeova yalasalangana ntangali ntangali ukufuma ku mpela ya mpanga ukufika nu ku mpanga yuze.”—Yele. 25:32, 33.

Ukuvwikisya Sana Ivyaya Umu Malembelo

(Zakaliya 12:3) Pa wanda kwene ulya umusumba wa Yelusalemu ndaucita wa ciliwe cinyome wakwe cimwi ku mitundu yonsi ya antu. Na antu yonsi alezya kucikatusya imisana yao ilavunika.

w07 12/15 mafwa 22-23 mapa. 9-10

Icanzo Consi Cino Yasuzile Apa Kukulwisya Cilaposiwa Ukuomba

9 Usesemo wakwe Zakaliya ukalanda umulandu uno inko zilakatukila Aina Klistu. Pali Zakaliya 12:3 pakati: “Pa wanda kwene ulya umusumba wa Yelusalemu ndaucita wa ciliwe cinyome wakwe cimwi ku mitundu yonsi ya antu.” Uzye lyene a Yelusalemu ci walandwa pa usemo uu? Yelusalemu walandwa apa usowelo wakwe Zakaliya a “Yelusalemu uwa kwi yulu,” kuli kuti Uwene wa kwi yulu umwaya na Ina Klistu apakwe alaya ya kateeka. (Ayebulai 12:22) Yamwi aalateeka umu Wene wa Umesiya yacili pano nsi. Yakaombela pamwi na “amfwele na zyuze,” ukuneena antu apa wene lino kucili insita. (Yoane 10:16; Umbwilo 11:15) Uzye antu yakacita uli ndi yayaneena pa wene? Nupya Yeova akatungilila uli ya kapepa yakwe acumi ndakai? Lekini tusambilile ivingi umwi buku lyakwe Zakaliya icipande 12. Kusambilila pali vii kumatwazwa ukusininkizya ukuti, ‘canzo consi cino yasula uku kulwisya antu yakwe Leza citalaomba.’

10 Pali Zakaliya 12:3 pakalangilila ukuti misana yao ilavuneka. Uzye cii cilacitika uli? Leza wapeela isunde lyakuti ilandwe lisuma lilinzile ukukosoolwa. Ya Nte Yakwe Yeova ika sana mano ku mulimo uu wakukosoola. Lelo upalilo wakuti Uwene wakwe Leza ukasisyepo ivikacuzya antunze waya wa “ciliwe icinyome” ku antu aaya umu nsi ii. Yakaezya ukunyemula iciliwe cii icinyome lino yakukanya ya kasimikila. Ukucita vivyo kwalenga “yavuneke imisana.” Yazewana pa mulandu wakuvilwa ukucita vino aisikulu yakalonda. Yafilwa ukulesya ya kapepa ya cumi aakazangila mu kukosoola ilandwe lisuma lya manda pe ilya pa wene wakwe Leza uno Mesiya ali Kateeka lino impela itatala iza. (Umbwilo 14:6) Kalinda umwi uwa afungwa mu calo cimwi ica mu Africa lino waweni vino yacuzyanga Ya Nte Yakwe Yeova, walanzile ukuti: ‘Mukuisumbila sile insita ukucuzya antu yaa, yatalatala yate. Alino yakulavulilako sile.’

(Zakaliya 12:7) “Ne Yeova ndaleka ivita vyaku Yuda vikatale vikacimvye anisi, apali pakuti umucinzi uno ana yakwe Davidi yalakwata pamwi na ikazi amu Yelusalemu, utakacile umucinzi uno Ayuda yauze yonsi yalakwata.

w07 12/15 ifwa 25 pala. 13

Icanzo Consi Cino Yasuzile Apa Kukulwisya Cilaposiwa Ukuomba

13 Welengini Zakaliya 12:7, 8 NWT. Mu Izlaeli, matenti yavuzile, insita zimwi ya kacema na alimi yayaomvyanga sana. Antu aikalanga mu matenti aliyo yatandikilangapo kucula nupya yalondekwanga ukucingililwa ndi cakuti alwani yazanza musumba wa Yelusalemu. Fwandi mazwi aakuti “matenti ya Ayuda” yakalangilila ukuti Aina Klistu apakwe acili pano nsi yataya mu musumba ucingililwe. Yene yakatwalilila ukutungilila Uwene wakwe Klistu. Yeova wa maumba alatala aleke kuti ‘Ayuda yacimvye’ pano Satana angayazanza zuwa.

Kuwelenga Baibo

(Zakaliya 12:1-14) Ii imbila ya mazwi yakwe Yeova akumile Izlaeli. Yeova, wino uwanzika amayulu, uwaumba insi, aliwe akapeela umi ku muntu. Wene wavwanga wati, 2 Nemo ndasangula Yelusalemu wa lwako lwakumwelako waini wino akalenga kuti antu ya mitundu yuze iyazinguluka Yelusalemu yapempezyoke. Anisi yayo yalaponya inkondo mu mpanga ya Yuda nga nu musumba wa Yelusalemu. 3 Pa wanda kwene ulya umusumba wa Yelusalemu ndaucita wa ciliwe cinyome wakwe cimwi ku mitundu yonsi ya antu. Na antu yonsi alezya kucikatusya imisana yao ilavunika. 4 Yeova wavwanga wati, “Pa wanda kwene ulya nemo ndapupanya imfwalasi zya anisi yao zyene ndazipafuzya amanso. 5 Alino intunguluzi zya Ayuda zilanenana iziti, ‘Ala swemo a Yeova Leza wa maka yonsi aliwe akatukomya swe antu yakwe, swemuno twikala mu Yelusalemu.’ 6 “Pa nsita iyo ndaleka inko zyaku Yuda ziye wa moto ukwaka mu mutengo onga nanti mu calo conga umuli ingano zikupya. Inko zizyo izilalovya antu amu mitundu yonsi iya mupipi. Aikazi amu Yelusalemu yalaikalila ku matwi cele mu musumba wao. 7 “Ne Yeova ndaleka ivita vyaku Yuda vikatale vikacimvye anisi, apali pakuti umucinzi uno ana yakwe Davidi yalakwata pamwi na ikazi amu Yelusalemu, utakacile umucinzi uno Ayuda yauze yonsi yalakwata. 8 Pa nsita iyo ne Yeova ndacingilila aina Yelusalemu cakuti nu tupopo twao kwene tulakwata amaka ali yamwi kwene na yano umwene Davidi wakweti. Ana yakwe Davidi ali yano yalayatungulula wa mungeli wane ne Yeova. 9 Pa nsita iyo ndatandika ukulovya antu amu mitundu yonsi alawilila ku mutundu wakwe Yelusalemu. 10 “Ana yakwe Davidi na ina Yelusalemu nemo ndayapeelesya amano akukwatisya uluse, na mano akumpepesya wakwe cimwi. Yalatamba umwi wino yatulinkinye icanzo, yalamulosya vivi kwene ndi vino yakalosya umwana umonsi uwavyalwa wenga mpo. Yalamulosya kwati antu afwililwe umwana wao umonsi uwi yeli. 11 Pa wanda uo umusumba wa Yelusalemu mulaya impooma ikalamba, wakwe iya kwene iyuvwikike mu nyika ya Megido, lino antu yalosizye Hadadi Limoni. 12 Inko zyao zyonsi mu mpanga zilaalosya ntalentale. Aluko lwakwe Davidi aonsi yalalosya yonga, aci yao nayo yonga. Aluko lwakwe Natani yalalosya yonga, aci yao nayo yonga. 13 Aluko lwakwe Levi yalalosya yonga, aci yao nayo yonga. Aluko lwakwe Syimei aonsi yalalosya yonga, aci yao nayo yonga. 14 Nga nu mu nko zyonsi zyuze zyasyala cilaya icili cimwi kwene, aonsi yalalosya yonga, nga aci yao nayo yonga.

DIZEMBA 25-31

IVYUMA IVYAYA UMWI ZWI LYAKWE LEZA | MALAKI 1-4

“Uzye Icupo Cinu Cikazanzya Yeova?”

(Malaki 2:13, 14) “Nacuze cino mukacita aici: Mukasambezya kavuwa kakwe Yeova na minsozi inu. Mukalila nu kulosya pamulandu wakuti ndakai wene asisakamala nanti kupokelela amawila inu ni nsansa ukufuma mu minwe inu. 14 Namwe imuzya muti, “Uzye pacani cino akucita vivyo?” Apa mulandu wakuti Yeova ali kambone wakukusinila pa kuntaya wacumi ku muci wino watwite mu ulumendo wako.

jd mafwa 125-126 mapa. 4-5

Mwaleka Ukuti mu Lupwa Lwinu Mwaya Insansa

4 Mu manda yakwe Malaki Ayuda yatemilwe sana ukutaana. Malaki wayanenyile ati: “Yeova ali kambone wakukusinila pa kuntaya wacumi ku muci wino watwite mu ulumendo wako.” Pa mulandu wakuti aonsi yatali acumi ku yaci yao, kavuwa kakwe Yeova kazuzilepo minsozi ya aci yao “nu kulila nu kulosya.” Ya simapepo nayo yazumilizyanga lufyengo lwa musango kwene uu.—Malaki 2:13, 14.

5 Uzye Yeova walolanga uli miyele ii ipe iyacitikanga ku vyupo mu manda yakwe Malaki? Malaki walemvile ati napata ukutaana “avino Yeova Leza wa ina Izlaeli wavwanga.” Walanzile nu kuti Yeova ‘asisenuka awe.’ (Malaki 2:16; 3:6) Uzye imuvwa icisinka icili paa? Kufuma sile na mpiti Leza wapata ukutaana. (Utandiko 2:18, 24) Wakupasile mu manda yakwe Malaki. Na ndakai kwene wakupata. Yamwi yakapingulapo ukusya ya wao pa mulandu wakuti vino yenekelanga ya wao ukuya asi vino yaya. Nanti umuntu angaya nu ucenjezi uli, Yeova wene akalola mu mwenzo. (Yelemiya 17:9, 10) Akamanya vyonsi vino umuntu angezya ukucita pakuti sile yataane nu wakwe, nanti icakuti muntu wiyo angakwata umwakusombekezya. Fwandi, “Vintu vyonsi mu uumbo onsi vili paswe nupya wene akavilola. Swensi kwene tulinzile kuilondolwela kunoli.”—Ayebulai 4:13.

(Malaki 2:15, 16) Uzye Yeova atakuumvile kuti uye umwili nu mupasi onga nu muci wako? Uzye wene wakweti ipange cii pa kucita cico? Umulandu uno wene wacitile cico, a pakuti ana yano ulakwata yakaye ana yakwe Leza. Acino uisunge, nga utavuna upangano uno wacisile nu muci wako wino watwite mu ulumendo wako. 16 Yeova, Leza wa ina Izlaeli wavwanga wati, “Napata ukutaana. Napata umuntu umwi wino wacita icintu ca unkalwe wakwe cii ku muci. Musininkizye ukuti kutaya nanti wenga uwakuvuna upangano wakwe uwakuya uwa cumi ku muci.

w02 5/1 ifwa 18 pala. 19

Yeova Wapata Kukanaya Uwa Cumi

19 Malaki atalanzile sile pa antu ataali ni cisinka kuli ya wao, lelo walanzile ukuti aonsi yamwi yene yali acumi ku yaci yao. ‘Yali nu mupasi wakwe Leza.’ (Cikomo 15) Na ndakai kwene mwi uvi litu mwaya aonsi aingi atwalilila ukuya acumi nupya ‘yakacindika aci yao.’ (1 Petulo 3:7) Yasiuma aci yao nanti ukuyaneena amazwi aipe, yasiyapatikizya ukupanga nayo icupo umu nzila itazifile, yasilanga icintemwa kuli ya mama yauze pano yamanya ukuti ukucita vivyo ala yakusaalula aci yao nanti sile ukutamba ivikope vya uzelele. Mwi uvi lyakwe Yeova mwaya na aci aya acisinka kuli Leza nupya yakatwalilila ukulondela masunde yakwe. Aonsi na anaci ya musango uu yamanya vino Leza wapata nupya yakaelenganyapo nu kusenka ku vintu kwene vii. Twalililini ukuyakolanya, mwayela Leza nupya alamupolelela.—Milimo 5:29.

Ukuvwikisya Sana Ivyaya Umu Malembelo

(Malaki 1:10) “Si cangecizipe wenga uwamuno muli ayale ivisasa vya mu Ng’anda ikulu yakwe Leza, kuti muposiwe ukupemba umoto wasilesile apa kavuwa kane! Nemo ntakuzangila muno muli, nupya ntalapokelela uwila uli onsi ukufuma kuno muli.”

w07 12/15 ifwa 27 pala. 1

Ivyeo Ivyaya Umwi Buku Lyakwe Malaki

1:10 Yeova atazangilanga muli vino ya simapepo yacitanga, yene yasonkisyanga nu tuntu twasile sile wakwe kuyula ivisasa vya mu ng’anda ikulu yakwe Leza nu kupemba umoto pa kavuwa. Fwandi cacindama sana ukuti imilimo yakwe Leza ino tukaomba nanti sile lino tukusimikila iyalangilila ukuti twatemwa Leza na antu, asi kulondesya ukukwata malipilo.—Mateo 22:37-39; 2 Kolinto 11:7.

(Malaki 3:1) “Yeova wa maka yonsi wavwanga wati, “Lolini ndatuma inkombe yane, ino ilanteyanyizizya umwakupita. Lyene mu nsita ino mutenekile umwene wino mukalonda aliza ku Ng’anda yakwe ikulu. Inkombe ya upangano, ino mwalukisya ukulola, iliiza nu kukosoola upangano wane.”

w13 7/15 mafwa 10-11 mapa. 5-6

“Namayanga Pamwi Namwe Lyonsi”

5 Imyaka ingi ku cisila ala Yesu atatala walanda pa cilangililo ca ngano na kalolo, Yeova walesile Malaki ukulemba ivyali nu kucitika kulingana ni cilangililo cino Yesu walanzilepo. (Welengini Malaki 3:1-4.) Yoane kawatizya ali ‘nkombe iyateinye inzila.’ (Mate. 11:10, 11) Lino wizile umu 29 C.E., insita ya kupingula aina Izlaeli yayanga ikupalama. Yesu wali ali nkombe yakwe ciili. Wasangulwile ing’anda ikulu iyali umu Yelusalemu imiku iili, kuli kuti lino watandike umulimo wa kusimikila alino nu ku mpela ya umi wakwe. (Mate. 21:12, 13; Yoa. 2:14-17) Fwandi pa kusangulula ing’anda ikulu yakwe Leza pali nu kupita insita.

6 Uusoowelo ci ukalamba uno Malaki wasoowile uwafikiliziwe? Imyaka iingi ku cisila iyapalamilanga kuli ya 1914, C. T. Russell na yano waombanga nayo yaomvile umulimo uno Yoane kawatizya waomvileko. Mulimo ukalamba wali uwa kusambilizya icumi ca muli Baibo. Asambi Yakwe Baibo yasambilizye antu ukumanya vino imfwa yakwe Yesu yapiliulanga, umoto wa pee alino yamanyisizye antu na vino insita ya ina masi yali nu kusila. Yakweti umulimo wa kwasuka mauzyo akome yano antu yuzyanga. Uzye aaweni pa antu yaya ali wa ngano? Pa kwasuka iuzyo lii, Yesu watandike ukuceceta ing’anda ikulu yakwe Leza umu 1914. Fwandi pali nu kupita insita pa kuceceta ningo, kutandika umu 1914 kufika ku kutandika kwakwe 1919.

Kuwelenga Baibo

(Malaki 1:1-10) “Ii imbila ya mazwi yakwe Yeova yano wavwanzile kuli Malaki kuti anene aina Izlaeli. 2 Yeova akuti, “Nemo natemwa mwemwe.” Lelo mwemo mukati, “Uzye mwatutemwa uli?” Yeova wavwanga wati “Uzye Esau atali umwina wakwe Yakobo? Nemo nasola Yakobo. 3 Lelo nakana Esau kumwi na amu mupanda wakwe, nga naleka kuti impanga yao ya myamba iye itongwa. Nupya kusi umwi akaikala mwenemo, suka sile yankusa.” 4 Limwi amu mupanda wakwe Edomu yangaiwanzya yati, “Si lolini vino imisumba itu yononwa! Lelo tulaikuululula nupya.” Lyene wa maka yonsi wavwanga wati, “Yatini yakuululule imisumba yao, lelo ndayonona nupya kwene. Antu yayo yalaamwa ukuti impanga yankota, iya antu yano insita zyonsi yaponelwa nu ukali wakwe Yeova.” 5 Mwemwe, mwe ina Izlaeli mulailolela na manso inu ntontonto. Alino mulavwanga muti, “Endi, ukulu wakwe Yeova wafika ukupuzya nu mu mipaka ya mpanga ya Izlaeli kwene!” 6 Yeova wa maka yonsi wavwanga wati, “Umwana umonsi akacindika isi, nga umuomvi akaoopa umusambazi wakwe. Ndi cakuti nene so, lyene pacani cino musincindikila? Ndi nene musambazi winu, lyene pacani cino musyangopa? Mwe yasimapepo mwemwe mukansuula. Lelo mukauzya muti, ‘Uzye tukakusuula umu nzila cii?’ 7 Mukansuula pakupeela impolelwa zikowele pa kavuwa kane. Lelo mukauzya muti, ‘Uzye twaposiwa uli uku kucindika?’ Mukansuula apa kwelenganya ukuti kavuwa kakwe Yeova akasaluke. 8 Yeova wa maka yonsi wavwanga wati, ‘Lino mukaleta inyama impafu nu kuzipela wa mpolelwa, uzye mukacita icisuma? Lino mukaleta inyama zilemale ni zilwale imuzipela impolelwa, uzye mukacita icisuma? Mwezye ukupeela inyama zizyo ku mulasi! Uzye mungamuzanzya pa kucita cico? Uzye wene angamucitila cimwi icisuma?’” 9 Lyene mwe yasimapepo ezyini kupapata kuli Leza kuti aye nu luse kunotuli. Lino mukupeela amawila yamusango uo, uzye anguvwa uli amapepo inu? Acino Yeova wa maka yonsi wavwanga wati, 10 “Si cangecizipe wenga uwamuno muli ayale ivisasa vya mu Ng’anda ikulu yakwe Leza, kuti muposiwe ukupemba umoto wasilesile apa kavuwa kane! Nemo ntakuzangila muno muli, nupya ntalapokelela uwila uli onsi ukufuma kuno muli.”

    Impapulo Zya Cimambwe-Lungu (2009-2025)
    Fumini
    Ingilini
    • Cimambwe-Lungu
    • Tumiliniko Yamwi
    • Vino mukulonda ukucita
    • Copyright © 2025 Watch Tower Bible and Tract Society of Pennsylvania
    • Masunde pa Miomvezye
    • Kusunga Inkaama
    • Privacy Settings
    • JW.ORG
    • Ingilini
    Tumiliniko Yamwi