Cikasenula Cani Ukupita Mutale Mukalanzyanye nu Mwina Wako?

Elenganyini ukuti mukwikala mu musumba wa Galile umu nsita yakwe Yesu. Iimupita ukufuma ku Galile kuya uku Yelusalemu uku kuzevya. Mu musumba muzuzile sile ya kapepa yauzo ati iza ukufuma ku mpanga zya kutali. Mukulondesya ukupeela uwila kuli Yeova. Imusenda ni mbuzi, mwatandika ukupita umu antu aingi ati yatantama ukupalamila uku ng’anda ikulu yakwe Leza. Lino mwafika, mwazana antu aingi yonsi kwene yakulonda ukupeela mawila. Lyene camufikila kuti mupeele imbuzi kuli simapepo. Nupya papo kwene, mwiusya ukuti umwi, nampo nga ali mwi umba nanti kuze sile ali ni cikonko kuli mwemwe. Yesu walondolwile vino mungacita. (Welengini Mateo 5:24.) Uzye mwemo na wino mwaluvyanyako mungacita uli pakuti paye umutende wakwe vino Yesu walanzile? Pa masuko atiyatantikwa apisika, muconge pa casuko cino mukulola ukuti ali ca cumi.

MUFWILE . . .

• ukulanzyanya sile nu munyonko ndi cakuti pali umulandu wampomvu watiulenga kuti asoke

• ukwezya ukulungika umunyonko ndi cakuti mwalola kwati watemwa sile ukusoka zuwa nanti limwi akumupeela umulandu

• ukuvwikisya lino munyonko akulondolola, nanti icakuti mutuvwikisye vino walondolola, nu kulenga uwelelo pali vino vyacitike ivyalenzile asoke na pali vino mwamusosizye

UMUNYONKO AFWILE . . .

• ukulenga uwazwilizyo kuli yauze mu cilongano pa kuyanena vino mwamuluvyanyizye

• kukalipa sana, nu kupituluka muli vyonsi vino mwamuluvyanyizye pakuti sile muzumile ukuti mwaluvyanyizye

• kwelenganya vino mwaicefizye pakuti mukalande nawe pali vino mwamuluvyanyizye, nu kumyelela kufuma pa nsi ya mwenzo

▸ Nanti icakuti ndakai tusyapeela impolelwa zya nyama, uzye tungasambililako vyani kuli vino Yesu wasambilizye apa kupanga mutende na ina itu pakuti Leza apokelela mapepo itu?