U Mulandu ci Uno Leza Wakwatila Antu Akaombela Pamwi?

1. I cani calenzile kuti Leza akolonganike aina Izlaeli ukuya aomvi yakwe?

Leza wakolonganike uluko lwa antu afumile mu cikolwe Ablahamu ayapeela na masunde. Uluko lulo walwiniike ati “Izlaeli.” Aina Izlaeli ayano Leza wapiile amaka ya kwangalila upefi wa cumi ni izwi lyakwe. (Masamu 147:19, 20) Fwandi, pa mulandu wakwe Izlaeli, antu a mu nko zyonsi yali nu kupolelelwa.—Welengini Utandiko 22:18.

Leza wasolwile aina Izlaeli kuti yaye yakamboni yakwe. Ndi twalola vino aina Izlaeli yikazile, tungamanya usuma waya mu kuvwila masunde yakwe Leza. (Malango 4:6) Acino fwandi, antu yonsi aalondanga ukumanya Leza wa cumi, yaalinzile ukusambilila ku ina Izlaeli.—Welengini Ezaya 43:10, 12.

2. Uzye icani cino Leza akalondela aomvi yakwe ilelo ukulawombela pamwi?

Lino papisile imyaka, aina Izlaeli yatiile ukutontela Leza; nawe Yeova wayasiile nu kuletelapo icilongano ca Ina Klistu. (Mateo 21:43; 23:37, 38) Ndakayi, Aina Klistu a cumi ali yano yakacita ukamboni pali Yeova, pano aliyo yapyana aina Izlaeli.—Welengini Milimo 15:14, 17.

Yesu wakonganike alondezi yakwe nu kuyapeela umulimo wa kusimikila nu kusambizya antu amu nko zyonsi. (Mateo 10:7, 11; 24:14; 28:19, 20) Mu manda itu, amuno umulimo uu ukuombwa sana, pano lyene tuli umu manda ya kusyalikizya. Kufuma pano umuntu wayela apa mpanga ya pansi, kutatala kwaya antu imintapendwa kufuma umu nko zyonsi yano Yeova walemanya mu kupepa kwa cumi ndi vino cili ndakayi. (Umbwilo 7:9, 10) Aina Klistu a cumi yaaya umwi uvi lya yantu yano yakaombela pamwi nu kukomelezyanya. Pa kukongana kwawo mu vilongano vya mu nsi yonsi, yakasambilila ivili-vimwi kufuma muli Baibolo.—Welengini Ayebulai 10:24, 25.

3. Uzye ya Nte Yakwe Yeova a ndakayi yatandike uli?

Mu ma 1870, kaliumba kanono aka yantu yano yasambililanga Baibolo, katandike ukuzana icumi cino caya muli Baibolo. Yamanyile ukuti Yesu wakonganike Aina Klistu kuti yakosoola; acino nayo kwene yatandike umulimo wa kusimikila umu nsi yonsi. Lino umwaka wa 1931 wafisile, alino yaitemiile izina lya mu Baibolo lya kuti Inte Zyakwe Yeova.—Welengini Milimo 1:8; 2:1, 4; 5:42.

4. Uzye umulimo wa kusimikila uwa Nte Zyakwe Yeova ukatungululwa uli?

Mu nsita ya atumwa kwali umba lyakwe yakangalila atungululanga ivilongano vyonsi ivya Ina Klistu. Iumba lili, lyalondelanga utunguluzi wakwe Yesu, pano lyamanyile ukuti ali Mutwe wa cilongano. (Milimo 16:4, 5) Mu manda itu namo, aakatungulula Inte Zyakwe Yeova i umba lyakwe yakangalila aamanya ningo sana ukuomba umulimo wakwe Leza. Iumba lii, i lika-angalila maofesi yonsi a Nte Zyakwe Yeova kuno yakasenwila impapulo umu ndimi ukuluta pali 600 nu kuzipulinta alino nu kuzituma uku yantu. Acino fwandi vikwene ali vino iumba ilikatungulula Inte Zyakwe Yeova likasambilizya antu aaya umu vilongano ukucila pali 100,000 mu nsi yonsi. Mu cilongano conga na conga, mwaya ya eluda nanti yakangalila. Aonsi yaa, aakasakamala ufyo wakwe Leza ni cikuuku.—Welengini 1 Petulo 5:2, 3.

Swe ya Nte Yakwe Yeova tukaombela pamwi lino tukusimikila ilyasi lisuma nu kupanga asambi. Tukakolanya atumwa aasimikilanga antu mu mang’anda. (Milimo 20:20) Nupya, yano yakulonda ukusambilila icumi ca muli Baibolo, tukasambilila nayo. Nakupya, swe Nte Zyakwe Yeova tusiombela sile pamwi mu cilongano. Fwefwe lupwa, kapya tukweti na Tata uwatutemwa. Twaya umu lupwa lwa ina aatemwana. (2 Tesalonika 1:3) Kutaya ulupwa luze apa mpanga ya pansi ulwaya ni nsansa wa antu yakwe Yeova, pano mu lupwa luu, tukaombela pamwi pa kuti twazanzya Leza nu kwazwa antu.—Welengini Masamu 33:12; Milimo 20:35.