Ivyeo Vya Kuomvya Umu Kabuku Kakuti Swe Ina Klistu nu Mulimo Witu
NOVEMBA 4-10
IVYUMA IVYAYA UMWI IZWI LYAKWE LEZA | 1 YOANE 1-5
“Mutatemwa Insi Nanti Cintu Cili Consi Ica mu Nsi”
(1 Yoane 2:15, 16) Mutatemwa insi nanti cintu cili consi ica mu nsi. Umwi ndi watemwa insi, ale atatemwa Tata. 16 Pano vintu vyonsi vya mu nsi, kutandika pa vilondwa viipe vino imiili ikalonda, ni vintu vya lunkumbwa lwa manso nu kuituumika uku vya mu nsi, vyonsi vii visyafuma kuli Tata, lelo ku wikalo uwipe uwa mu nsi.
w05 1/1 ifwa 10 pala. 13
Mwalondela vino Yesu Wacitanga
13 Yamwi yangaelenganya ukuti asi vyonsi ivyaya umu nsi iviipa. Nanti ciye vivyo, insi ni vintu ivyayamo vingalenga tute ukuombela Yeova. Nupya ivintu ivyaya umu nsi vitanga vitwazwe ukupalama kuli Leza. Acino, ndi twatemwisya ivintu ivyaya umu nsi, nanti sile ivintu ivikaloleka ukuti vitiipa, tungaya umu uzanzo. (1 Timoti 6:9, 10) Cisinka i cakuti, ivingi ivyaya umu nsi vitaziipa nupya vingatuletelela. Ndi tukutamba ma fyumu na ma puloglamu ya pa TV umuli unkalwe, ukulondesya ivyuma ni vikwatwa, nanti uzelele, tungatandika ukutemwa ivintu vivyo nu kutunkwa ukuvicita. Ndi tukuzanwa na antu aika sana amano uku kuya ni mikalile isuma nanti ukulundulula uculuzi, naswe kwene ali vino tungatandika ukucindamika sana.—Mateo 6:24; 1 Kolinto 15:33.
(1 Yoane 2:17) Caleka insi ii ya pansi ikupita, pamwi nu lunkumbwa ululi mwenemo. Lelo umuntu wino akacita kulonda kwakwe Leza akaikalilila manda pe.
w13 8/15 ifwa 27 pala. 18
Mwaelenganya Pali Vino Mulinzile Ukuya
18 Icintu cuze icikatwazwa ukukaana “ivintu vya mu nsi” u kwiusya amazwi yano Yoane walanzile akuti: “insi ii ya pansi ikupita, pamwi nu lunkumbwa ululi mwenemo. Lelo umuntu wino akacita kulonda kwakwe Leza akaikalilila manda pe.” (1 Yoane 2:17) Ivintu vyakwe Satana vikaloleka kwati i vyacumicumi nupya vilikalilila manda pe. Nomba, vili nu kufumiziwapo. Vyonsi ivyaya umu nsi yakwe Satana vitalikalilila manda pe. Ukwiusya icisinka cico kulatwazwa kukanapumbulwa uku viteyo vyakwe Satana.
Ukuvwikisya Sana Ivyaya Umu Malembelo
(1 Yoane 2:7, 8) Mwe yacuza yane akundwe, ntakumulembela isunde lipya. Lelo nkumulembela isunde lyampiti lino mwapilwe pa kutandika. Isunde lyampiti amazwi yano muvwa mpiti. 8 Lelo isunde lino nkumulembela ndakai, lyene ilipya, pamulandu wakuti cumi caliko cikaloleka muli Klistu nga na munoli. Pano mwati mulola ukuti mfinzi ikupita, nga nu luswepo lwa cumi nalo lwati lutandika mpiti kuyengesa.
w13 9/15 ifwa 10 pala. 14
Vino Yeova Akatusambilizya Vyatailwa Wakwe Cimwi
14 Mu malembelo ya Wina Klistu a Cigiliki mwaya ivyeo ivingi ivikatusambilizya vino tulinzile ukutemwana. Yesu walanzile ukuti isunde lyakwe ciili ilikalamba pa masunde i lyakuti: “uwatemwa umuzo ndi vino waitemwa.” (Mate. 22:39) Na Yakobo kwene umwina wakwe Yesu, walanzile pa kutemwa ukuti ‘isunde lya mwene.’ (Yako. 2:8) Mutumwa Yoane nawe walemvile ukuti: “Mwe yacuza yane akundwe, ntakumulembela isunde lipya. Lelo nkumulembela isunde lyampiti lino mwapilwe pa kutandika.” (1 Yoane 2:7, 8) Uzye isunde ci lino Yoane wamile ukuti “isunde lyampiti”? Walozyanga ukwi sunde lya kutemwa. Lyali ilya “mpiti” pano Yesu walilanzilepo imyaka ingi ukucisila, “pakutandika.” Nupya lyali ilipya pano mwali kutemwa kwa kuipeelesya, kuno asambi yalondekwanga ukukwata lino ivintu vyasenuka. Vino sweswe asambi yakwe Yesu, uzye tusitaizya pa kucelula ukukatwazwa ukukanaya nu mupasi wa muno nsi uwa ukaitemwe, ungalenga tute ukutemwa anji?
(1 Yoane 5:16, 17) Ndi walola umunyonko akwifya, lifyo lino lisyatungulula ku mfwa, ulinzile kupepa kuli Leza, wino akamupeela umi. Cii cikumile yao yano maifyo yao yasyatungulula ku mfwa. Lelo kwaya iifyo lino likatungulula ku mfwa, nga nani nsyakuti mulinzile kupepa kuli Leza pi iifyo lilyo. 17 Kuluvyanya konsi ukwifya. Lelo kwaya iifyo lino ilisyatungulula ku mfwa.
it-1 ifwa 862 pala. 5
Ukwelela
I cisuma sana ukupepelako yauze kuli Leza, nanti sile amu cilongano ukuti ayelele pa maifyo yano yakacita. Avino na Mose wacisile uku luko lwa ina Izlaeli, wayalandiileko pa maifyo yao nu kuyalengelako ukuti Leza ayelele, nupya Yeova waswike ipepo lyakwe. (Mpe. 14:19, 20) Na Solomoni kwene, lino wapeelanga ing’anda ikulu yakwe Leza, wapefile ukuti Yeova aelele antu yakwe aalapiile. (1 Yamw. 8:30, 33-40, 46-52) Ezila wapepiileko Ayuda pa maifyo yao lino yafumile mu uzya. Ipepo lino wapefile ukufuma pansi ya mwenzo na vino wayakomelizye vyalenzile ukuti Ayuda yacitepo vimwi pakuti Yeova aelele maifyo yao. (Ezila 9:13–10:4, 10-19, 44) Yakobo wakomelizye wensi uwatalwala lwa ku mupasi ukwama aikolo umu cilongano ukuti yamupepeleko nupya ndi cakuti muntu wiyo wataifya, ala maifyo yakwe yamaelelwa. (Yako. 5:14-16) Nanti ciye vivyo kwaya iifyo “ilikatungulula ku mfwa,” kupontela umupasi wa muzilo ku mufulo sile, i ifyo ilitanga lyelelwe. Umwina Klistu atalinzile ukupepela antu aakapontela umupasi wa muzilo.—1 Yoa. 5:16; Mate. 12:31; Ayeb. 10:26, 27.
Kuwelenga Baibo
(1 Yoane 1:1–2:6) Twamulembela pali wiyo akaamwa ukuti Izwi likapeela umi, wiyo uwaliko kufuma ku utandiko, wino tuvwile, nupya wino twaweni na manso itu. Endi twamulolekisye, nupya twamukumizye ni minwe itu. 2 Umi uu walolike, nga naswe twauweni. Tukapela umboni wa pa umi kwene uu. Nupya tukumunena vya pa umi wape uno wali na Tata. Wene wasokololwilwe kunotuli. 3 Cino twalola nu kuvwa cili cino tukumunena, kuti namwe kwene muilundanye pamwi naswe ku utandano uno twakwata na Tata pamwi na Yesu Klistu mwana wakwe. 4 Twamulembela cii pakuti luzango lwitu luye ulumalilike. 5 Ilandwe lino tuvwa kufuma ku Mwana wakwe nupya lino tukumunena kuti Leza ali luswepo, nga munoli mutaya mfinzi nanti panono. 6 Lyene ndi twati tuli mu utandano na aliwe, lelo pa nsita ili imwi tukwikala mu mfinzi, ale tukutumpoka nga ni vicitwa vitu visyakulemana ni cumi. 7 Lelo ndi tukwikala mu luswepo ndi vino wene ali mu luswepo, ale lyene tuli mu utandano pakasi kitu. Nu wazi wakwe Klistu mwana wakwe ulatuswefya kufuma ku maifyo onsi. 8 Ndi twati tusi na maifyo, ale twaisomba sweisikulu, nga ni cumi cisi munotuli. 9 Lelo ndi twailongwela maifyo itu kuli Leza, wene uwakutailwa nupya uwa cumi ku ulayo wakwe. Alatwelela maifyo itu nu kutusangulula ku kuluvyanya kwitu konsi. 10 Ndi twati tutatala twifya, ale lyene tukuti Leza uwa ntumpu, nga ni zwi lyakwe lisi munotuli.
2 Mwe ana yane, nkumulembela cii pakuti mutaifya. Lelo ndi umwi wifya, tukweti kaazwa akatuvwangila kuli Tata, ali Yesu Klistu umololoke. 2 Klistu ali mpolelwa yapa maifyo itu, nga na maifyo ya antu yonsi amu nsi. 3 Ndi tukayela masunde yakwe Leza, ale lyene tukusininkizya vino twamumanya. 4 Umwi ndi wavwanga ukuti wamumanya, lelo asyayela masunde yakwe, ala wene uwa ntumpu ni cumi citaya munoli. 5 Lelo mu cumi wino wensi akayela mazwi yakwe, wiyo kwene awino kutemwa kuno watemwa Leza kwaya ukufumaluke. Vii, avino swemo tungasininkizya ukuti tuli muli Leza. 6 Wino wensi akalanda ukuti wikala muli Leza wene alinzile kucita vino Klistu wacitanga.
NOVEMBA 11-17
IVYUMA IVYAYA UMWI IZWI LYAKWE LEZA| 2 YOANE 1–YUDA
“Tulinzile Ukulwisya Pakuti Tutwalilile Ukuya Umu Cumi”
(Yuda 3) Mwe yacuza yane akundwe, nalondesyanga kumulembela pa vya ufyusi uno swensi twakumako. Lelo pandakai calondekwa kuti mulembele kuti mukomelezye kutwalilila mu ulwi wa kucingilila utailo uno Leza wapela ku antu yakwe.
w04 9/15 mafwa 11-12 mapa. 8-9
“Lekini Maka ya Mwene Yamukomelezya”
8 Tutanga tusombwe ni vintu vino Satana akaleeta pano Amalembelo yasokolola imicenjelo yakwe. (2 Kolinto 2:11) Satana wezizye utailo wakwe Yobo ukuomvya intazi zya mu umi, ukufwilwa atemwikwa, kuzunyiwa kuli ya lupwa, ukulwala, nu kusombwa na yacuza yaufi. Yobo uvwile uyi nu kuvwa ukuti Leza watamutazyela. (Yobo 10:1, 2) Nanti cakuti ndakai Satana atanga alete intazi zii umu kulungatika, intazi zya musango uu zikacitikila Aina Klistu aingi, nupya Ciwa angaziomvya ukulingana na vino akulonda.
9 Ivintu ivingonona ukapepa witu vikuya vikuvulilako sile umu manda ya akusyalikizya. Twikala umu nsi muno antu yacindamika sana ivikwatwa ukucila vyakwe Leza. Vino yakalanga pa intaneti na pa TV vikalenga ulalelale waloleka kwati i cintu icingalenga antu ukuya ni nsansa, lelo vikalenga sile iyaya nu ulanda. Nupya antu aingi “yatemwa vyakuizanzya kuluta kutemwa Leza.” (2 Timoti 3:1-5) Ukwelenganya wa antu yaa kungonona ukapepa witu, fwandi tulinzile “kutwalilila mu ulwi wa kucingilila utailo.”—Yuda 3.
Ukuvwikisya Sana Ivyaya Umu Malembelo
(Yuda 4, NWT) Namulembela pa mulandu wakuti kuli antu yamwi atiyasookelela muli mwemwe yano uku cisila Malembelo yalanzile ukuti yali nu kupingulwa; antu yaa yasitiina Leza yakaomvya icikuuku cikulu cakwe Leza pakuti yacita ivya winyi nupya yataaya acumi uku Mwene witu wenga sile Yesu Klistu uwatukazile.
(Yuda 12, NWT) Antu yaa, i vimawe ivyafisama mu manzi lino yakuliila pamwi namwe, aacemi aakailisya kwaula intete; amakumbi atakwata manzi akasendwa cisendwesendwe nu muza; imiti isiseeka ivizao na pa nsita ino ilinzile ukuseeka; iyafwililikila nupya yatukulwa kumwi na masinte;
it-2 ifwa 279
Cimulo ca Kulanga Kutemwa
Baibo italondolola vino vimulo vya kulanga kutemwa vikapiliula nanti imiku ino vya yangako. (Yuda 12) Yesu Klistu na asambi yakwe yatisileko isunde pa kuzevya kuu, nupya citamanyikwa ndi cakuti kwali nu kutwalilila ukuyako. Yamwi yakalanda ukuti insita zimwi Aina Klistu akama yamanga Aina Klistu yauze apiina kwiza zevezya pamwi cimulo ca kulanga kutemwa. Ana atakwata ya isi, ya mukamfwilwa, akama na apiina yapekanyanga ivya kulya ivingi nu kuliila capamwi wa ina.
it-2 ifwa 816
Ciliwe
Izwi lyuze ilya Cigiliki lya kuti, spi·lasʹ, likapiliula ukuti ciliwe icafisama mu manzi. Yuda waomvizye izwi lii pa kulondolola aonsi asokelelanga mu cilongano ca Ina Klistu pakuti yaponzye antu. Wakwe vivi kwe vino vimawe vifisame vingalenga uwato kuunda, avino na onsi yaa yalenganga ukapepa waya antu auze umu cilongano ukuya mu uzanzo. Yuda walanzile pa onsi yaa ukuti: “Antu yaa, i vimawe ivyafisama mu manzi lino yakuliila pamwi namwe.”—Yuda 12, NWT.
(Yuda 14, 15) Enoki, cikolwe calenga cinimbali kufuma pali Adamu, awino apa mpiti wasowile pamulandu wao ati, “Cumi Mwene aliza pali pamwi na angeli yakwe amuzilo mazimbi na mazimbi. 15 Alaleta upinguzi pali yonsi nu kuvunuka yakaifya pa vicitwa vino yacitanga na pa mazwi aipe amiponto kunoli!
“Wazanzizye Leza”
I vyani vino Enoki wasoowile? Watiile: “Cumi Mwene [Yeova] aliza pali pamwi na angeli yakwe amuzilo mazimbi na mazimbi. Alaleta upinguzi pali yonsi nu kuvunuka ya kaifya pa vicitwa vino yacitanga na pa mazwi aipe amiponto kunoli!” (Yuda 14, 15) Enoki wali sana nu utailo icakuti wataile nu kuti Leza wali nu kufikilizya vino walavile. Fwandi wene cali kwati Leza atafikilizya mpiti vino usoowelo walandangapo. Icikulandwapo icakuti: Usoowelo ukulanda pa cintu icisininkiziwe ukuti cili nu kucitika, icakuti ungalondololwa kwati wacitika nu kucitika!—Ezaya 46:10.
“Wazanzizye Leza”
Utailo wakwe Enoki ungalenga tuyuzye sweineco ndi cakuti tukalola insi ii ndi vino Yeova akailola. Upinguzi uno Enoki wakosozile ucili ukaomba na ndakai kwene; ukalozya kuli vino insi ii ili ndakai wakwe vino cali umu manda yakwe Enoki. Vivi kwene vino Enoki wacelwile antu ivizile vicitika, Yeova waleesile Mulamba mukalamba nu kukoma ya kaifya yonsi ali umu manda yakwe Nowa. Nomba uwononesi uno Yeova waleesile ukalangilila uononesi ulaya uku nkoleelo. (Mateo 24:38, 39; 2 Petulo 2:4-6) Wakwe vino cali lili, Leza na angeli ya muzilo mazimbi na mazimbi yaipekanya ukupingula ya kaifya yonsi aya umu nsi ii. Swensi tulinzile ukukonka ukucelula kwakwe Enoki nu kunenako antu yauze. Ya lupwa itu ni vyuza yangatutaluka. Nupya insita zimwi, limwi tungauvwa ukuzukilwa. Nomba Yeova atatazile atazyele Enoki; nupya na ndakai kwene atalatala atazyele aomvi yakwe acisinka!
Kuwelenga Baibo
(2 Yoane 1-13) Kufuma kuli ne Wikolo. Nkumulembela Mangu mukundwe nga na ana yakwe, yao yano natemwa mu cumi. Asi nene nenga nemuno namutemwa. Lelo na yonsi yano amanya icumi nao kwene yamutemwa, 2 pano icumi cili mu myenzo itu nupya cimayangamo manda pe. 3 Leza Tata na Yesu Klistu Mwana wakwe yatupele cikuku, yaye na mizu nu kutupela mutende mu cumi nu mukutemwa. 4 Nali nu luzango cuze pa kuzana ukuti ana yako yamwi yakayela nu kulondela cumi wakwe vino Tata watupeela ilamulo. 5 Acino we Mangu mukundwe, nkukulenga nkuti twatemwana. Ilamulo lii lino nkumulembela lisi lipya. Lyene ilamulo lino twapilwe kufuma ku utandiko. 6 Kutemwa kuno nkulanda kukusenula ukuti tulinzile kuyela malamulo yakwe Leza. Ilamulo lino muvwile kufuma ku utandiko ilyakuti mwensi mwatemwana. 7 Asomvi aingi yasalangana konsi mu nsi. Yene yasyazumila ukuti Yesu Klistu wizile avyalwa wa muntu. Muntu uwaya vivyo wene umusomvi nupya umwanisi wakwe Klistu. 8 Cenjelini kuti mutaponzya cino mwaombela. Lelo mwezye na maka kuti mukapoke icilambu icipuma. 9 Muntu asyakulondela usambilizyo wakwe Klistu, nda kapuzya mwenemo wene asi na Leza. Wino wensi akayela usambilizyo wakwe wene ali na Tata nu Mwana kwene. 10 Acino lyene ndi umwi wiza kunomuli kwaula kuleta usambilizyo uu, mutamupokelela mu ng’anda inu nanti ukumulamuka. 11 Pano umuntu ali wensi akumulamuka ala nawe kwene wakumako ku viipe vino akacita. 12 Nkweti vingi ivyakuti munene, lelo ntakulonda kumulembela. Nkulonda kwiza landana namwe nemwisikulu, pano cico mucumi cilatulenga kuya nu luzango. 13 Ana yakwe kaci winu mukundwe asolwa yamulamuka.
NOVEMBA 18-24
IVYUMA IVYAYA UMWI IZWI LYAKWE LEZA | UMBWILO 1-3
“Namanya Milimo Yako”
(Umbwilo 1:20) Kuu kuli kulondolola kwa nkama ya ntanda cinimbali zino walola mwi kasa lyane lilunji, nga ni vyakutekapo inyali cinimbali vyakwe zaabu. Ntanda cinimbali ali ntunguluzi zya mauvi cinimbali, nga ni vyakutekapo inyali cinimbali amauvi cinimbali.
w12 10/15 ifwa 14 pala. 8
I Miyele ci Ino Mwakwata?
8 Pakuti tusenke uku miyele ya musango uu, tulinzile ukulaiusya ukuti Yesu walondololwa muli Baibo ukuti walema “intanda cinimbali mwi kasa lyakwe lilunji.” “Intanda” zikaimililako ya eluda apakwe na ya eluda yauze umu vilongano. Yesu angatungulula “intanda” izyaya umwi kasa lyakwe ukulingana na vino akulonda. (Umbw. 1:16, 20) Fwandi, vino Yesu ali Mutwe wa Cilongano ca Ina Klistu, wakwata amaka aakutungulula ya eluda. Ndi cakuti umwi uwa mwi umba lyakwe ya eluda akulondekwa ukulungikwa, Yesu uwakwata ‘amanso aaya wa cimbilimbili ca moto’ akaombelapo pa nsita ilinge nupya umu nzila isuma. (Umbw. 1:14) Uli mulandu kwene uno tulinzile ukucindika yayo aasontwa nu mupasi wa muzilo, pano Paulo walemvile ati: “Mwayela intunguluzi zinu nu kulondela malamulo yao. Yene yakasopa umi winu kwaula kupuza, pasi pano yalalondolola kuli Leza pa kutumikila kwao. Ndi mukuyayela lyene yamaombanga milimo yao ni nsansa. Lelo ndi musyakuyayela, yamaombanga milimo yao nu ulanda nga namwe citangaya cakumwazwa.”—Ayeb. 13:17.
(Umbwilo 2:1, 2) Lemba ku ntunguluzi yakwi uvi ku Efeso uti, “Lii ilandwe kufuma kuli wino alemile ntanda cinimbali mwi kasa lyakwe lilunji nupya wene akapita pakasi ka vyakutekapo inyali cinimbali. 2 Namanya vino ukacita. Namanya kuomba kuno waombisye nga nu kuteeka umwenzo. Namanya ukuti wemo utangazumilizya yakaifya nga nupya wemo wezizye yao akati yene atumwa lino yasivyo. Lelo wayezya wazana ukuti yene antumpu.
w12 4/15 ifwa 29 pala. 11
Yeova Akatucingilila Pano Akalonda Ukuti Tukapusuke
11 Umu cilolwa icalembwa muli Umbwilo ivipandwa 2 na 3, Yesu Klistu wacecesile ivilongano 7 ivya mu Asia Minor. Cilolwa cii cikatulanga ukuti Klistu asyalola sile ivikucitika umu vilongano, lelo akasakamala vyonsi ivikacitika muli cila cilongano. Insita zimwi, walumbulanga na mazina ya antu wenga na wenga, nu kuyataizya nanti ukuyasunda cila muntu. Uzye cii cikulangilila cani? Kufikiliziwa kwa cilolwa cii, ivilongano 7 vikaimililako Aina Klistu apakwe aliko pa cisila cakwe 1914, nupya ukusunda kuno Yesu wasunzile amu vilongano 7 kukalozya kuli vino Leza akatungulula ivilongano vya Ina Klistu umu nsi yonsi ndakai. Fwandi, uli mulandu uno tungalandila ukuti Yeova akaomvya Umwana wakwe ukutungulula antu yakwe. Uzye i visuma ci ivya umu kulondela utunguluzi uu?
w01 1/15 mafwa 20-21 pala. 20
Mwapitila Pamwi ni Uvi Lyakwe Yeova
20 Pakuti twapitila pamwi ni uvi lyakwe Yeova ilyatwalilila ukulunduluka, tulinzile ukumanya umulimo uno Leza wapeela Yesu Klistu ngu ‘mutwe wa cilongano.’ (Efeso 5:22, 23) Vikwene ali vino ni lembelo lyakwe Ezaya 55:4 likalanda ukuti: ‘Lola! Nemo ne [Yeova] nimucita ukuya kambone wa mitundu, intunguluzi na kateeka wa mitundu.’ Umu cumi Yesu wamanya sana ukutungulula. Nupya wamanya ningo imfwele zyakwe na vino zikacita. Lino wacecesile ivilongano 7 ivya mu Asia Minor, walanzile imiku 5 ukuti: “Namanya vino ukacita.” (Umbwilo 2:2, 19; 3:1, 8, 15) Nupya Yesu wamanya vino tukalondekwa, ndi vino Yeova wamanya. Lino Yesu atali apepe ipepo lino wasambilizye asambi, walanzile ukuti: “Pano So wene wamanya vino mukulonda lino mutali mumulenge.”—Mateo 6:8-13.
Ukuvwikisya Sana Ivyaya Umu Malembelo
(Umbwilo 1:7) Lolini, wene akwiza mu makumbi! Antu yonsi yalamulola, pamwi na yao kwene amutosile mu mbazo. Antu yonsi pano nsi yalalosya pamulandu na aliwe. Vii avino cilaya.
kr ifwa 226 pala. 10
Uwene Wakwe Leza Ulasisyapo Alwani
10 Wanda wa Upinguzi. Alwani ya Wene wakwe Leza yalaisininkizizya pali vino vilayacitikila ivilalenga yaye sana ni ntete. Yesu walanzile ukuti: “Mwana wa Muntu alaloleka, akwiza mu makumbi na maka akulu nu lulumbi.” (Mako 13:26) Ukwiza kwakwe Yesu na maka ya lulumbi, kulalanga ukuti wiza umu kuleta upinguzi. Mu usowelo uu uwalanda pa manda akusyalikizya, Yesu walandapo navyuze ivilacitika pa wanda wa upinguzi. Tukazana ivyeo vivyo umu mulumbe ukalanda pa mfwele ni mbuzi. (Welengini Mateo 25:31-33, 46.) Yayo aaya na ucisinka umu kutungilila Uwene Wakwe Leza, yalapingulwa ukuya “imfwele” nupya ‘yalinula imitwe yao,’ pano yaliluka ukuti ‘kutuulwa kwao kwati kupalama.’ (Luka 21:28) Lyene yayo aasyatungilila Uwene yalapingulwa ukuya “imbuzi” nupya “yalaloosya” pano yaliluka ukuti ukuvunukwa kwao manda pee ku kuyaloleela.—Mate. 24:30; Umbw. 1:7
(Umbwilo 2:7, NWT) Aakweti amatwi yakuuvwa, auvwe cino Umupasi Wamuzilo ukulanda ku mauvi! Yao alacimvya ndayapeela nsambu yakulya vizao vya ku muti uno ukapeela umi, uwaya ku Paladaise yakwe Leza mwiyulu.
w09 1/15 ifwa 31 pala. 1
Visinka Ivyaya Mwi Buku Lya Umbwilo—I
2:7—Uzye “Paladaise yakwe Leza” I cani? Vino amazwi yaa yakalanda pa Ina Klistu aapakwe, paladaise iyalandwapo paa, a paladaise ya kwi yulu—ukuyapo kwakwe Leza umwineco. Apakwe aaya na ucisinka yalapeelwa icilambu ca kulya “vizao vya ku muti uno ukapeela umi.” Yalaya nu umi usifwa.—1 Kol. 15:53
Kuwelenga Baibo
(Umbwilo 1:1-11, NWT) Mu lupapulo luu mwalembwa vicitwa vino Yesu Klistu waumbwile. Leza wamupile umbwilo pakuti alange aomvi yakwe vintu ivili nu kucitika zuwa. Klistu watumile mungeli wakwe ni landwe lya kuumbula kuli Yoane muomvi wakwe. 2 Yoane nawe walondolwile vyonsi vino waweni. Nupya akupeela umboni pi landwe ilyafumile kuli Leza na pali vyonsi vino Yesu Klistu wamunenyile. 3 Walongo umuntu wiyo akawelenga lupapulo luu, walongo umuntu wino akauvwa ku mazwi yaa ausemo nu kuyela vino vyalembwa mu lupapulo luu! Pano insita yatipalama lino vintu vii vyonsi vilacitika. 4 Ne Yoane nalemba kalata ku mauvi cinimbali amu muputule wa mpanga ya Asiya. Cikuku nu mutende viye namwe kufuma kuli Leza, wino alipo, wino uwalipo, wino alayapo. Cikuku nu mutende viye namwe kufuma ku mipasi cinimbali ili ku nkolelo ya cilimba cakwe Leza. 5 Cikuku nu mutende viye namwe kufuma kuli Yesu Klistu kambone uwakutailwa, uwali wankolelo kuzyukuka kufuma ku mfwa, nupya wene ali kateeka wakwe yakateeka yonsi amu nsi. Wene watutemwa nupya waipile kuti atukulule ku maifyo itu 6 nupya watucita kuya yakateeka na yasimapepo mu kutumikila Leza Isi wakwe. Lulumbi na maka vipelwe kuli Yesu Klistu manda pe! Ameni. 7 Lolini, wene akwiza mu makumbi! Antu yonsi yalamulola, pamwi na yao kwene amutosile mu mbazo. Antu yonsi pano nsi yalalosya pamulandu na aliwe. Vii avino cilaya. 8 “Nene Alufa na Omega,” kuli kuti, uwakutandika nupya uwakusyalikizya,” vii avino Mwene Leza wa maka yonsi walanda. Wene alipo, wino uwaliko, nupya wino alayako. 9 Nene Yoane mwina winu, nupya mulondezi wakwe Yesu. Nkakuma pamwi namwe mu wene wakwe Leza nu kuposya mu macuzi. Nemo nasumvilwe pa cilila ca Patimosi pamulandu wa kukosola mazwi yakwe Leza nga ni cumi cino Yesu waumbwile. 10 Pa wanda wa Mwene Umupasi Wamuzilo wikila panondi nga nuvwa izwi likulu, lino ilyuvwikike kwati lya ntandala, ala likulanda ku cisila cane. 11 Lyene liti “Lemba vino walola nu kutuma lupapulo ku mauvi amu misumba cinimbali, ku Efeso, ku Similina, ku Pegamu, ku Tiatila, ku Sadisi, ku Filadefia, nu ku Lodesiya.
NOVEMBA 25–DIZEMBA 1
IVYUMA IVYAYA UMWI IZWI LYAKWE LEZA | UMBWILO 4-6
“Aonsi Yani Akwela pa Mfwalasi”
(Umbwilo 6:2, NWT) Lyene ndola imfwalasi itiswe. Wino uwakwezilepo walemile ulapwa, nupya yamupile icisote ca wene. Wene wapisile wakwe kacimvya kuti akacimvye.
Aonsi Yani Akwela pa Mfwalasi—Aaweni?
A weni uwakwela pa mfwalasi itiswe? Tungazana icasuko umwi buku kwene ilya muli Baibo, lya Umbwilo, ilyalondolola uwakwelapo ukuti “Izwi Lyakwe Leza.” (Umbwilo 19:11-13) Ilumbo lyakuti, Izwi, likalozya kuli Yesu Klistu, pano akaomba wakwe kavwangila wakwe Leza. (Yoane 1:1, 14) Nupya, aka-amwa ukuti “Kateeka wakwe ya kateeka nu Mwene wakwe yamwene” nupya walondololwa nu kuti “uwakutailwa nu wa Cumi.” (Umbwilo 19:11, 16) Fwandi kwaula ukutwisika cikulangilila ukuti, wakwata amaka akuya kacimvya, nupya akaomvya amaka yakwe ningo sana. Nomba, kwayako mauzyo na yauze.
wp17.3 ifwa 4 pala. 5
Aonsi Yani Akwela pa Mfwalasi—Aaweni?
A lilaci lino aonsi yaa yakwezile pa mfwalasi? Mumalola ukuti umonsi uwatandikilepo ukukwela, a Yesu, wakwezile lino wapezilwe ingala nanti cisote ca wene. (Umbwilo 6:2) A lilaci lino Yesu wapezilwe cisote ca wene? Asi sile lino waswilile kwi yulu pacisila ca mfwa yakwe. Baibo ikalanda ukuti watazile aalolela pa nsita imwi. (Ayebulai 10:12, 13) Yesu wanenyile alondezi yakwe vino yali nu kumanyilako insita ino wali nu kuleka ukuloleela na lino wali nu kutandika ukuteeka umwi yulu. Walanzile ukuti nga watandika sile ukuteeka, ivintu umu nsi vyali nu kwipilako. Kwali nu kuya inkondo, inzala, ni mpungo. (Mateo 24:3, 7; Luka 21:10, 11) Lino papisile sile insita inono pano inkondo ya mu nsi yonsi iyakutandikilapo yatandike umu 1914, camanyikwe ukuti antu yafisile pa nsita ino Yesu walanzile; insita itale ino Baibo ikaati, “manda akusyalikizya.”—2 Timoti 3:1-5.
(Umbwilo 6:4-6) Alino kwiza imfwalasi yuze iyenzu. Wino uwakwezilepo wapilwe amaka akuleta ulwi mu nsi, pakuti antu yakomane. Wene wapilwe lupanga lukulu. 5 Alino Mwana wa mfwele alematula cimanyililo cakwe citatu, nga nuvwa ciumbwa caumi cakwe citatu citi, “Iza!” Lyene ndola imfwalasi itifi. Wino uwakwezilepo walemile cipimilo mwi kasa lyakwe. 6 Alino nuvwa cimwi kwati izwi ala likufuma mu viumbwa vyaumi vini, liti, “Cipimo conga ca ngano cakulingana na malipilo ya muntu a wanda onga, nga ni vipimo vitatu vya malezi vyakulingana na malipilo ya muntu a wanda onga. Lelo mutonona miolivi nanti calo ca matingi!
Aonsi Yani Akwela pa Mfwalasi—Aaweni?
Umonsi wii akaimililako inkondo. Mumalola ukuti akufumyapo umutende umu nsi yonsi asi umu mpanga zimwi sile. Mu 1914, ali lino kwali inkondo umu nsi umuku wakutandikilapo. Inkondo yakwe cili nayo izile iyonona sana ivintu umu nsi. Yamwi yakatunganya ukuti antu afwa umu nkondo izikacitika ukufuma mu 1914 yaluta pali 100 milyoni! Nupya, impendwa ya antu aingi wakwe cimwi nayo yakacula sana ku mazanzo.
wp17.3 ifwa 5 mapa. 4-5
Aonsi Yani Akwela pa Mfwalasi—Aaweni?
“Lyene ndola imfwalasi itifi. Wino uwakwezilepo walemile cipimilo mwi kasa lyakwe. Alino nuvwa cimwi kwati izwi ala likufuma mu viumbwa vya umi vini, liti: ‘Cipimo conga ca ngano cakulingana na malipilo ya muntu awanda onga, nga ni vipimo vitatu vya malezi vyakulingana na malipilo ya muntu awanda onga. Lelo mutonona miolivi nanti calo ca matingi!’”—Umbwilo 6:5, 6.
Umonsi wii, akaimililako inzala. Wene akalangilila vino akupimila antu ivyakulya vinono sana icakuti malipilo ya pa wanda onga uku mpiti yangakala ingano kucepako pali keji wenga. (Mateo 20:2) Nupya malipilo kwene ya awanda onga yangakala malezi makeji yaili nu kucilapo, pano malezi yasulwa pa ngano. Uzye kwene ivyakulya vivyo vingakumana ulupwa? Antu yakasambiliziwa na pali vino yangaomvya ivyakulya vyakwe cila wanda, wako vino yanenyile uwa pa mfwalasi ukuti atonona mafuta ya miolivi na matingi.
(Umbwilo 6:8) Lyene ndola imfwalasi iswepuluke. Wino uwakwezilepo watemilwe izina lyakuti Imfwa, nga ni cifulo ca antu afwe camulondile pipi. Oili yapilwe maka pa ciputulwa ca mu viputulwa vini ivya nsi, kuti yakome antu mukuomvya inkondo, cipowe, ndwala, nga ni vilyanyi vya mpanga.
wp17.3 ifwa 5 mapa. 8-10
Aonsi Yani Akwela pa Mfwalasi—Aaweni?
Umonsi wakwe cini, akaimililako imfwa na vyuze ivingalenga imfwa. Pacisila cakwe 1914, cifine iciipisye cino yaatangi Spanish cakomile sana antu. Limwi antu ukufika kuli 500 milyoni yalwile, nupya umuntu wenga pali yatatu ala aali mupuma!
Ulwale wa cifine kwene ci yali intandikilo sile iya ndwala izipisye. Asambilila sana yazana ukuti antu na yauze aingi wakwe cimwi yafwa ku ulwalwe wakuti kampasa pa myaka ukuluta pali 100 iyapitapo. Ndakai, nanti icakuti kwaya ya dokota asambilila sana, antu yakafwa pa mulandu na AIDS, cifuwa cakwe TB, ni mpepo.
Inkondo, inzala ni ndwala, vyonsi vikalenga ukuti kuye imfwa. Fwandi ilindi lyatwalilila sile kusenda antu aingi cuze.
Ukuvwikisya Sana Ivyaya Umu Malembelo
(Umbwilo 4:4, NWT) Kuzinguluka cilimba kwali vilimba vyuze makumi yaili na vini, pano patenzi aikolo makumi yaili na yani yala yazwite nsalu zitiswe nga ni visote vyakwe zaabu.
(Umbwilo 4:6) Nupya inkolelo ya cilimba ca wene kwali viumbwa vyaumi vini, nupya vyali na manso ingi nkolelo ni cisila caviko.
re mafwa 76-77 pala. 8
Ucindami wa Cilimba ca Wene Cakwe Yeova
8 Yoane wamanyile ukuti ya simapepo yasontwanga kuti yaombela umwi Itenti lya kupepelamo ilyaliko mpiti. Fwandi afwile wazungwike lino waweni vino walandapo ukuti: “Kuzinguluka cilimba kwali vilimba vyuze makumi yaili na vini, pano patenzi aikolo makumi yaili na yani ala yazwite insalu zitiswe nga ni visote vyakwe zaabu.” (Umbwilo 4:4, NWT) Mu nsita yakuti kuye ya simapepo, kwali aikolo makumi yaili na yani, ala yatenzi pa vilimba vya wene iyazwala ni visote vya wene. Uzye aikolo yaa, aaweni? A onsi apakwe aaya umu vilongano vya Ina Klistu, yano Yeova walaya ukupeela amaka ya wene ukwi yulu pacisila cakutuutululwa. Uzye twamanya uli vivyo?
re ifwa 80 pala. 19
Ucindami wa Cilimba ca Wene Cakwe Yeova
19 Uzye ivyaumi vii vikalangilila cani? Icilolwa cino kasema Ezekelo waweni, cikatwazwa ukuzana icasuko. Ezekelo waweni iceleta lino Yeova watungululanga, ilyakonkine ni vya umi ivyakolineko na vino Yoane walanzilepo. (Ezekelo 1:5-11, 22-28) Pa cisila, Ezekelo waweni iceleta ala ilikonkana ni vya umi. Umuku uu, ivya umi vimililangako yakelubi. (Ezekelo 10:9-15) Ivya umi vini vino Yoane waweni vifwile vimililangako yakelubi yakwe Leza—iviumbwa ivyakwata ivifulo vikalamba umwi uvi lya kwi yulu. Yoane atelenginye ukuti citanga cicitike ukulola yakelubi yali apipi ni cinso cakwe Yeova, pano umwi tenti lya kupepelamo ilyaliko mpiti, yakelubi yaili aapangilwa na zaabu yayikanga pa nkupiko ya pa mbokosi ya upangano, imililangako ukateeka wakwe Yeova. Pakasi kakwe yakelubi yaa, paali izwi lyakwe Yeova umwali amasunde a luko lwa Ina Izlaeli.—Kufuma 25:22; Masamu 80:1
(Umbwilo 5:5) Lyene wenga uwamu ikolo anena ati, “Utalila. Lola! Cisama uwamu mutundu wakwe Yuda, umukulu uwamu mupanda wakwe Davidi, wene watacimvya nupya angalematula vimanyililo cinimbali nu kuyula lupapulo.”
cf ifwa 36 mapa. 5-6
“Lola! Cisama Uwamu Mutundu Wakwe Yuda”
5 Ilingi cisama wamanyikwa ukuti wasipa. Uzye mwatala mwakomenkana na cisama uwa kalume? Ndi mwatala mwakomenkanapo, ale mwali ukucingililwe, limwi kuno yakasungila ya cisama ukwapindililwa. Nalyo kwene, mufwile muvwile sana intete. Lino mwalola icinso ca cinyama cii icikulu cuze nupya ica maka alino naco icimilolekesya, mungelenganya ukuti kusi nanti acimwi cino cisama angatiina. Baibo yalanda pali “cisama uwakwatisya amaka ukuluta inyama zyonsi, wiyo asioopa icintu icili consi.” (Mapinda 30:30) Vikwene ali vino Klistu wasipa.
6 Lekini tulande pa nzila zitatu muno Yesu walangilile ukuti wali umusipe wakwe cisama: umu kutungilila icumi, umu kuleeta umulinganya, nu mu kuzizimizya ukuzunyiwa. Tumalola nu kuti swensi kwene—limwi twaya nu kusipa kwa civyalilwa nanti foo—tungaya asipe wakwe vino Yesu wali.
Kuwelenga Baibo
(Umbwilo 4:1-11, NWT) Pacisila cakwe vii nakweti cilolwa na cuze nga ndola mulyango uyulike mwiyulu. Alino izwi lyuvwika wa ntandala, liti “Iza kuno kupela nani namakulanga vintu ivilacitika pacisila cakwe cii.” 2 Lilyo kwene Mupasi Wamuzilo iuntungulula. Alino kuku kwiyulu indola cilimba ca wene na umwi atenzi penepo. 3 Wino uwatenzipo cinso cakwe cayengise cuze wa mawe acindame amutengo wakwe yaspele na kaleli. Lyene umulalamfuti nao uzinguluka cilimba ca wene, nupya wayengise wi we lino likayengesa. 4 Kuzinguluka cilimba kwali vilimba vyuze makumi yaili na vini, pano patenzi aikolo makumi yaili na yani ala yazwite insalu zitiswe nga ni visote vyakwe zaabu. 5 Kufuma mu cilimba ca wene inkuwa yamyansyanga, ni ciunda cakupangalansya. Inkolelo ya cilimba ca wene pakanga inyali cinimbali. Zyene ili mipasi cinimbali yakwe Leza. 6 Nupya inkolelo ya cilimba ca wene kwali viumbwa vyaumi vini, nupya vyali na manso ingi nkolelo ni cisila caviko. 7 Ciumbwa cakwe conga calolike wakwe cisama, cakwe ciili wakwe cipambasi, cakwe citatu cakweti cinso wa cinso ca muntu, nga na cakwe cini calolike wakwe lyang’anda wino akupapuka. 8 Mu viumbwa vii vini cila ciumbwa cakweti amapa mutanda nayo yalimviwe na manso mukasi nu kunzi yakweyo. Musanya nu usiku vyene visyata kwimba lwimbo viti, “Wamuzilo, wamuzilo, wamuzilo Mwene Leza wa maka yonsi wino uwaliko, alipo, nupya wino alayako.” 9 Viumbwa vyaumi vini vyapelanga lulumbi, mucinzi nga nu kutaizya wino uwatenzi pa cilimba ca wene, wino uwaya nu umi manda pe. 10 Lino vyacita vii, aikolo makumi yaili na yani nayo yafukamila wino atenzi pa cilimba ca wene, nu kupepa wino uwaya nu umi manda pe. Pa kucita vii yene iyasumba ivisote vyao pansi inkolelo ya cilimba ca wene yati, 11 “We Mwene Leza witu! Wemo wazipilwa kupelwa lulumbi, mucinzi na maka, pano wewe waumvile vintu vyonsi. Kulonda kwako u kwalenzile kuti vyonsi viyeko, nupya wewe waviumvile.”