ISAMBILILO 2

Imilandile Isuma

2 Kolinto 2:17

IVILI UMWI SAMBILILO LII: Mwavwanga vino mukavwanga lyonsi, nupya mwalanda nu ufumacumi ukulingana na vino mukuyuvwa api lyasi lino mukulanda nu kwika mano kuli ya kakutika.

IVYA KUCITA:

Mwapepa kuli Yeova pakuti amwazwe. Mwapepa kuli Yeova pakuti amwavwa ukwika mano kuli vino mukupekanya asi ukwika mano kuli mweineco. Manyini ningo ivisinka vikalamba vino muli nu kulanda. Mwalanda ivyeo umu mazwi inu; mutawelenga sile amazwi wakwe vino yalemvilwe api pepala.

Ndi mukupekanya ukwiza welenga Baibo nanti ulupapulo luze, manyini ningo amazwi pakuti lino mukuwelenga mwawelenga ukwaula ukuluvyanya. Ndi cakuti kuli amazwi yano antu yamwi yalanzile, yawelengini ukulingana na vino antu yayo yaayuvwanga, ukwaula ukucila umu cipimo.
Mutaatwisika pa kulanda. Elenganyini pa mulandu uno ya kakutika yalinzile ukuvwila ivyeo ivili umwi lyasi linu. Mwalanga ukuti imuyasakamala. Lyene mulinzile ukwimilila ningo, ukuomvya ningo umwili, nupya imilolekele inu iya pa manso ilinzile ukuya ningo nu kulanga ucuza.

Mutalinzile ukulola kwati ukuvwanga umu civyalilwa i cilicimwi nu kulanda sile icilandelande ukwaula ukwelenganya. Mwalanda ivyeo umu nzila ingalenga aakukutika ukuvicindika. Mwalanda ivyuvwike, nupya mutaluvyanya umu mivwangile.
Mwalola yano mukulandako. Mwalola yano mukulandako ndi cakuti mutanga muyasosye. Lino mukulanda ilyasi, mwalola pa muntu wenga na wenga pa kasita ukucila ukupisya sile amanso umwi umba.