Ivyeo Vya Kuomvya Umu Kabuku Kakuti Swe Ina Klistu nu Mulimo Witu
© 2022 Christian Congregation of Jehovah’s Witnesses
JANUWALE 2-8
IVYUMA IVYAYA UMWI IZWI LYAKWE LEZA | 2 YAMWENE 22-23
“U Mulandu ci Uno Tulinzile Ukuyela Aicefye?”
w00 9/15 mafwa 29-30
Pa Mulandu Wakuti Yosiya Wali Umuicefye, Yeova Wamwazwilizyanga
Cila wanda ukutandika katondo, aombelanga pi tempele yaombesyanga. Yosiya wataizye Yeova pali vino aombelanga pi tempele yaombesyanga ukuzifya vino ivikolwe vyao vyononyile pa ng’anda yakwe Leza. Lino yaombanga umulimo, Syafani watwazile lipoti uku mwene. Nomba u mulandu ci uno wasendiile ulupapulo ulupombwe? Walondolwile ukuti Simapepo mukalamba Hilikiya wazanyile “ulupapulo lwa Masunde yakwe Yawe yano Yawe wapile Mose.” (2 Milandu 34:12-18) Lupapulo luno Hilikiya wazanyile lwali alulukwene luno Mose walemvile.
Yosiya walondesyanga ukuvwa amazwi aali umu lupapulo luu. Lino Syafani wabelenganga, umwene welenganyanga pali vino masunde yamukumile nu kukuma antu yakwe. Watemilwe pali vino ulupapulo lwalanzile sana apa kupepa kwa cumi na vino lwasoowile ukuti antu yali nu kusendwa umuuzya ndi cakuti yatandika ukupepa kwa ufi. Lino Yosiya wizile amanya ukuti aasi masunde yonsi yakwe Leza yano yalondelanga, walepwile ivyakuzwala vyakwe nu kunena Hilikiya, Syafani, na yauze ukuti: ‘Kanguzizyini kuli Yawe apa mulandu na masunde yano yali umu lupapulo luu; icumi kwene Yawe watusokela sana apa mulandu wakuti ivikolwe vitu vino vyatukolelela vitacitanga ivikalondekwa ukulingana ndi vino twazana umu lupapulo luu.’—2 Yamwene 22:11-13; 2 Milandu 34:19-21.
w00 9/15 ifwa 30 pala. 2
Pa Mulandu Wakuti Yosiya Wali Umuicefye, Yeova Wamwazwilizyanga
Inkombe zyakwe Yosiya, zyaile kuli kasesema mwanaci Hulida umu Yelusalemu nupya zyawezile nu kumunena vino kasesema walanzile. Kasesema Hulida wayanenyile amazwi yano Yeova wamunenyile, aalangililanga ukuti iviipe ivyalemvilwe umu lupapulo luulu vyali nu kucitikila uluko ulwapondokiile Leza. Pa mulandu wa kuti Yosiya waicefizye kuli Yeova Leza, ataali nu kulola kuno iviipe vii vyali nu kucitikila uluko. Wali nu kufwa imfwa iya mutende nu kuzikwa ukwalala ivikolwe vyakwe.—2 Yamwene 22:14-20; 2 Milandu 34:22-28.
Ukuvwikisya Sana Ivyaya Umu Malembo
w01 4/15 ifwa 26 mapa. 3-4
Mungatwalilila Ukucita Ivisuma Asi Mulandu na Vino Vintu Vyali Lino Mwakulanga
Asi mulandu ni viipe ivyacitikilanga Yosiya lino wakulanga, watwalilile ukucita ivintu ivyazanzyanga Yeova. Wateekanga ningo sana icakuti na Baibo ikati: “Pali yamwene yonsi atandikile penepo ukuteeka, patali nanti wenga wino tungalinganya na Yosiya, pano wene watumikilanga Yawe nu mwenzo wakwe onsi, na mano yakwe yonsi, na maka yakwe yonsi. Walondelanga na masunde yakwe Mose yonsi, nupya kutatala kwaya umwene angalingana na Yosiya.”—2 Yamwene 23:19-25.
Yano ivintu vitaali ningo lino yakulanga, yangasambilila ivingi kuli vino Yosiya wacisile! I vyani vino tukusambililako? I vyani ivyazwilizye Yosiya ukusoolola ukucita ivisuma nu kutwalilila ukulacita vivyo kwene?
JANUWALE 9-15
IVYUMA IVYAYA UMWI IZWI LYAKWE LEZA | 2 YAMWENE 24-25
“Twalililini Ukuya Aiteyanye”
w01 2/15 ifwa 12 pala. 2
Uwanda Wakwe Yeova Uwa Upinguzi Watiupalama!
2 Ukwaula nu kutwisika vino Sefaniya wasesiime vyalenzile ukuti Yosiya uwali umwance aalondesya sana ukusisya ukupepa kwa ufi umu Yuda. Lelo vino umwene waombisye ukusisya ukupepa kwa ufi umu mpanga kutaalenzile ukuti iviipe vyonsi vino antu yacitanga visile, nanti sile kusisya iviipe vino Umwene Manase isikulu wakwe Yosiya wacisile, uwakomile “antu akaele umu Yelusalemu.” (2 Yamwene 24:3, 4; 2 Milandu 34:3) Uwanda wakwe Yeova uwa upinguzi wali nu kwiza.
w07 3/15 ifwa 11 pala. 10
Visinka Ivyaya Mwi Buku Lyakwe Yelemiya
Umu 607 B.C.E. wali umwaka uwalenga 11 uwa kuteeka kwa mwene Zedekiya. Pa nsita ii ala Umwene Nebukadineza uwa ku Babiloni wazinguluka umusumba uwa Yelusalemu pa myezi 18. Pa wanda uwalenga 7 umu mwezi uwalenga 5 umu mwaka uwalenga 19 uwa kuteeka kwakwe Nebukadineza, Nebuzaladani, musika mukulu uwa vita, waile uku Yelusalemu. (2 Yamwene 25:8) Lino Nebuzaladani wali ukunzi ya musumba afwile waceecesile incende nu kulola pano angaca aingilile apa kuzanza umusumba. Pa cisila ica manda yatatu pa wanda uwalenga 10, wizile azanza umusumba uwa Yelusalemu nu kuoca.—Yelemiya 52:12, 13.
Ukuvwikisya Sana Ivyaya Umu Malembo
w05 8/1 ifwa 12 pala. 1
Visinka Ivyaya Mwi Buku Lyakwe 2 Yamwene
24:3, 4. Kulozya kuli vino Manase wali nu mulandu wa wazi, Yeova “atalondaga nanti panono” ukuvwila aa Yuda uluse. Leza wacindika uwazi uwakaele. Tungasininkizya ukuti Yeova alonona antu aakazwisya uwazi uwakaele.—Masamu 37:9-11; 145:20.
JANUWALE 16-22
IVYUMA IVYAYA UMWI IZWI LYAKWE LEZA | 1 MILANDU 1-3
“Baibo I Buku Umwaya Malyasi Acumi, Asi Akwelenganya Sile”
w09 9/1 ifwa 14 pala. 1
Uzye Adamu na Eva Yali Antu aa Cumi Cumi?
Elenganyini pa vikolwe ivya Yayuda ivyalembwa umwi buku lyakwe 1 Milandu vipande 1 ukufika uku 9 nu mwi buku ili Landwe lyakwe Luka icipande 3. Ulondolozi uwaya umu vipande vii wakonkana ukulingana na vino inkulo zyakonkananga. Luka walanzile ulupwa muno Yesu Klisitu wafumiliile, alino ibuku lya Milandu nalyo lyalanda pa aene ateekanga umu Izlaeli na pali ya simapepo. Mabuku yonsi yoili yalanda pa yantu aamanyikwa sana wakwe Solomoni, Davidi, Yakobo, Isaki, Abulahamu, Nowa, nu mu kusyalikizya yalanda pali Adamu. Amazina yonsi aalembwa umu mabuku yaa yakaimililako antu aa cumi cumi, nupya Adamu wali u muntu wa cumi cumi uwalumbwilwa pamwi na antu aalembwa umu mabuku yaa.
w08 6/1 ifwa 3 pala. 4
Lyasi Ilikalanda Pali Nowa na Mulamba Mukalamba I Lya Cumi
Amalyasi yaili aa muli Baibo aakalanda pa vyacitike yakalangilila ukuti Nowa wali u muntu wa cumi cumi. (1 Milandu 1:4; Luka 3:36) Ezila na Luka, aalemvile amalyasi yaa yalondelizye sana ivyeo. Lino Luka walandanga pa lupwa umwafumile Yesu, walanzile kuti wafumile na muli Nowa.
w09 9/1 mafwa 14-15
Uzye Adamu na Eva yali Antu aa Cumi Cumi?
Cintu cino antu aingi aakaya uku maceici yazumilamo sana icalembwa muli Baibo i lambo. Kulingana ni cisambilizyo cii, Yesu wapeezile umi wakwe umalilike ilambo pakuti apususye antu aingi uku membu zyao. (Mateo 20:28; Yoani 3:16) Wakwe vino twamanya, ilambo ivintu vimwi vino umwi angalipila pa kuwezya ivyativiponga. Ali mulandu kwene uno Baibo ikalondolola Yesu ukuti “wapeezile umi wakwe nu kulipila ivyalondekwanga.” (1 Timoti 2:6) Limwi tunguzya tuti, kulipila ivyalondekwanga kuli vyani? Baibo ikalanda ukuti: “Wakwe viivi kwene vino yonsi yakafwila muli Adamu, avino yonsi yalaya nu umi muli Klistu.” (1 Kolinto 15:22) Umi umalilike uno Yesu wapeezile pa kupususya antu aacuvwila walingine nu umi umalilike uno Adamu waponzizye umu calo ca Edeni icalenzile nu kuti kuye luyembu. (Loma 5:12) Fwandi tungalanda sile ukuti ndi cakuti Adamu ataaliko, ale ni lambo lino Klisitu wapeezile litaakweti upiliulo uli onsi.
Ukuvwikisya Sana Ivyaya Umu Malembo
it-1 ifwa 911 mapa. 3-4
Malyasi ya Mpiti Aakalanda pa Ndupwa
Mazina ya Anaci. Ilingi mazina ya yanaci yalumbulwanga ndi cakuti pali umulandu ukalamba uwalenga ciye vivyo. Pa Utandiko 11:29, 30, Salai (nanti Sala) walumbulwa, pa mulandu uwakuti muli aliwe u mwali nu kufuma Umwana uwalavilwe asi umu muci muze wakwe Abulahamu. Milika nawe afwile walumbulwa umwi lyasi ilili limwi kwene pa mulandu wakuti wali anyinakulu wakwe Labeka umuci wakwe Isaki, pa kulangilila vino Labeka wafumile umu lupwa lwakwe Abulahamu pano Isaki ataali nu kutwala umuci ukufuma umu nko zyuze. (Utan. 22:20-23; 24:2-4) Pa Utandiko 25:1, izina lyakwe Ketula umuci na muze wakwe Abulahamu lyalumbulwa. Cii cikalangilila ukuti Abulahamu wizile atwala pa cisila ca mfwa yakwe Sala nupya cikalangilila ukuti walanga acili akweti amaka ya uvyazi kucila pa myaka 40 ukufuma pano Yeova wayacitiile icizungusyo. (Loma 4:19; Utan. 24:67; 25:20) Nupya cikalangilila ukuti Aina Izlaeli yuvwananga na Ina Midyani alino ni mitundu yuze ya Ina Alabya.
Leya, Lakeli, na aci yauze yakwe Yakobo apambali, pamwi na ana yao aonsi yano yakweti yalumbulwa. (Utan. 35:21-26) Cii cikatwazwa ukumanya vino Leza wizile atandika ukuomba na ana yaa aonsi. Nupya pa mulandu ni milandu ili imwi kwene anaci na yauze yalumbulwa. Ndi cakuti yapyana ica upyanyi, mazina yao yafwile yalumbulwanga. (Mpe. 26:33) Tamala, Laabu, na Luti nayo kwene yaya pa yantu alumbulwa. Lyonsi lino anaci yalumbulwa kwayanga mulandu ucindame uwalenga ukuti yalumbulwe, pano insita zimwi ala yali pa vikolwe muno Yesu Klistu wafumile. (Utan. 38; Luti 1:3-5; 4:13-15; Mate. 1:1-5) Insita zyuze zino anaci yamwi yalumbulwa muli Baibo zyaya pali 1 Milandu 2:35, 48, 49; 3:1-3, 5.
JANUWALE 23-29
IVYUMA IVYAYA UMWI IZWI LYAKWE LEZA | 1 MILANDU 4-6
“Uzye Mapepo Yane Yakalangilila Vyali Pali Nene?”
w10 10/1 ifwa 23 mapa. 3-7
‘Kuvwa wa Mapepo’
Yabezi wali u monsi uwatemilwe sana ukupepa. Amazwi yano watandikilepo ukulanda umwi pepo aakulenga ukuti Leza amupaale. Lyene walenzile ivintu vitatu ivyalangililanga ukuti wakweti sana utailo.
Ica kutandikilapo, Yabezi wanenyile Leza ati: ‘Umpeele impanga ikulu.’ (Cikomo 10) Umonsi wii uwali umucindikwe, atapokololanga impanga izyaineco uku maka. Vino walenzile ukufuma pansi ya mwenzo vyakumile sana antu ukucila ni mpanga ino walondanga. Afwile walenganga ukuti Leza amulundile impanga umu mutende pakuti ya kapepa ya cumi yangakwata incende ikulu umwa kwikala.
Cakwe ciili, Yabezi wapapasile ukuti Leza amwazwe. Leza akaomvya maka yakwe pa kwazwa ya kapepa yakwe. (1 Milandu 29:12) Pakuti Yabezi apokeleele vino umwenzo wakwe walondanga, walenzile ukuti Leza amwazwe wiyo akaazwa yayo aataila muli aliwe.—Ezaya 59:1.
Cakwe citatu, Yabezi wapefile ukuti: “Wancingilila uku viipe vyonsi ivingandetela ukuwaika.” Amazwi akuti “ivingandetela ukuwaika” limwi yakalangilila ukuti Yabezi ataapefile ukuti Leza afumyepo intazi, lelo wapefile ukuti ataaya sana nu ulanda nanti ukuti intazi zitamucimvya.
Ipepo lino Yabezi wapefile likalangilila ukuti wisile sana amano uku kupepa kwa cumi, wali nu utailo, nupya wataile Kuvwa wa mapepo. Uzye Yeova waswike uli ipepo lyakwe Yabezi? Ilyasi lii lyasila na mazwi akuti: “Nga Leza amupeela cino walenzile.”
Ukuvwikisya Sana Ivyaya Umu Malembo
w05 10/1 ifwa 9 pala. 7
Visinka Ivyaya Umwi Buku Lyakwe 1 Milandu
5:10, 18-22. Umu manda ya Mwene Saulo, aa mu mitundu ya ku ufumondaka uwa luzi lwa Yodani yacimvizye Aina Hagili nanti cakuti aa mu mitundu yii yali anono sana ngu kuyalinganya uku Ina Hagili. Yacimvizye pa mulandu wakuti aonsi aa mu mitundu yii aali asipe, yataile Yeova nupya yalenganga uwazwilizyo kuli aliwe. Lekini twatwalilila ukutaila Yeova lino tukumuombela usi mulandu ni ntazi zino tukalwisyanya nazyo.—Efeso 6:10-17.
JANUWALE 30–FEBULUWALE 5
IVYUMA IVYAYA UMWI IZWI LYAKWE LEZA | 1 MILANDU 7-9
“Mungakwanisya Ukuomba Imilimo Itale Ndi Cakuti Yeova Wamwazwa”
w05 10/1 ifwa 9 pala. 8
Visinka Ivyaya Umwi Buku Lyakwe 1 Milandu
9:26, 27. Aina Levi aapeziilwe umulimo uwakulinda impongolo yali atailwe sana. Yayapeezile amaki aakuyulila umwa muzilo api tempele. Yayataile ukuti yamaombanga umulimo uwa kuyula impongolo cila wanda. Twapeelwa umulimo uwa kusimikila antu aya umu cifulo citu nu kuyazwa ukutandika ukupepa Yeova. Naswe kwene, tulinzile ukuya atailwe wakwe vino cali uku Ina Levi aalindanga impongolo yi tempele.
w11 9/15 ifwa 32 pala. 7
Uzye Mungakolanya Fineasi Ndi Cakuti Mwakwata Intazi?
Fineasi wapeezilwe umulimo ukalamba umu manda ya Ina Izlaeli, lelo pa mulandu wakuti wali umusipe, wilukanga nupya wataile Leza, wacimvizye intazi zino wakwatanga lino waombanga umulimo uu. Nupya vino Fineasi waomvile ningo umulimo uno wapeezile umu cilongano cakwe Leza, calenzile ukuti Yeova amutemwe. Lino papisile imyaka uku ma 1,000, Ezila walemvile ukuti: “Fineasi, mwana umonsi wakwe Eleaza uwali kangalila wakwe yakalinda yapa mpongo, nga Yawe wali nawe.” (1 Mila. 9:20) Vikwene avino cilinzile ukuya uku Ina Klistu aakatungulula antu yakwe Leza ndakai, alino nu ku Ina Klistu yonsi aakamuombela na ucisinka.
Ukuvwikisya Sana Ivyaya Umu Malembo
w10 12/15 ifwa 21 pala. 6
Mwaimbila Yeova!
6 Yeova waomvizye ya kasesema yakwe pa kunena antu yakwe ukuti yalinzile ukulamulumbanya umu nyimbo. Yakiimba aafumanga umu lupwa lwakwe ya simapepo yatapeelwanga imilimo imwi ino Aina Levi yauze yapeelwanga pakuti yakwata insita ilinge iyakusika inyimbo nu kuzisambilila.—1 Mila. 9:33.
FEBULUWALE 6-12
IVYUMA IVYAYA UMWI IZWI LYAKWE LEZA | 1 MILANDU 10-12
“Mwatwalilila Ukulondesya Ukucita Ukulonda Kwakwe Leza”
w12 11/15 ifwa 6 mapa. 12-13
“Unsambilizye Ukucita Ukulonda Kwako”
12 Nupya cacindama ukukolanya vino Davidi wacindike ivisinte vya masunde na vino wavilondelanga. Elenganyini pali vino vyacitiike lino Davidi uvwile ulusala nu kulanda ukuti “si cange cizipe umwi andetela amanzi yakumwa ukufuma ku cifula icaya pipi ni mpongolo yaku Betelemu.” Aonsi yatatu yakwe Davidi yingile umu musumba uku maka nupya yapisile umwali Aina Filisti yaya yasemba manzi. Lelo “Davidi wene akana ukumwa manzi, apongolwela amanzi yaya inkoleelo yakwe Yawe.” U mulandu ci? Walanzile ukuti: “Cipelele ukutali na kuno we Yawe kuti nemo incite icintu ca musang uu! Uzye citakoline nu kumwa uwazi uwa antu yano yapusuka kwempe lino yali yaya umu kusemba manzi kwene yaa?”—1 Mila. 11:15-19.
13 Davidi wamanyile isunde ilyalandanga ukuti uwazi ulinzile ukupongolwelwa kuli Yeova nupya utalinzile ukuliwa. Nupya wamanyile umulandu uno cayelile vivyo. Davidi wamanyile ukuti “umi wa ciumbwa consi waya umu wazi.” Nomba yaa yali amazi, utaali uwazi. U mulandu cii uno Davidi wakaniile ukumwa manzi? Apa mulandu wakuti Davidi wacindiike icisinte ci sunde icikalanda pa wazi. Kuli Davidi, amanzi yaya yali acindame wa wazi uwa yonsi yaya yatatu. Fwandi citaali ningo kuli aliwe ukumwa manzi yaya. Acino umu cifulo cakuti amwe, wapingwilepo ukuitila pansi.—Levi. 17:11; Malan. 12:23, 24.
Lekini Kampingu Winu Aasambiliziwa na Masunde Yakwe Leza ni Visinte Vya Muli Baibo
5 Pakuti amasunde yakwe Leza yaatwazwa, tutalinzile sile ukuyawelenga nanti ukumanya sile vino yakalandapo. Tulinzile ukuyatemwa nu kuyacindika. Baibo ikati: “Patini iviipe, temwini ivisuma.” (Amo. 5:15) Uzye tungacita uli vivyo? Icingatwazwa sana u kusambilila ukulola ivintu ndi vino Yeova akavilola. Lekini tulangilile: Tuti cikamutalila sana ukukasula. Lyene dokota winu wamunena ivya kucita. Wati mwatukusya umwili, ukulya ivyakulya ivyaya nu mulyo, nu kusenuka muli vimwi vino mukacita. Lino mwezya ukucita vino wamunena, mwazana ukuti vikuomba ningo sana! Mungataizya sana dokota wiyo pa kumwazwa ukuzifya umi winu.
6 Vikwene avino na Kaumba witu wacita. Watupeela masunde akutucingilila uku vintu ivyayako pa mulandu nu luyembu na ci calenga umi witu uzipileko. Elenganyini vino ivintu vikatuzipila ndi tukuuvwila masunde aakalanda pa kwiya, ufi, upulumusi, unkalwe, nu kutaila imipasi. (Welengini Mapinda 6:16-19; Umbw. 21:8) Ndi twailolela vino ivintu vikatuzipila lino tukucita ivintu umu nzila ino Yeova akalonda, tukatandika ukutemwa sana Yeova na masunde yakwe.
Ukuvwikisya Sana Ivyaya Umu Malembo
it-1 ifwa 1058 mapa. 5-6
Umwenzo
Mwaomba nu “Mwenzo Onsi.” Pakuti umwenzo wa cumi cumi uombe ningo ulinzile ukuya upuma, lelo umwenzo wa mampalanya wene ungankanyiziwa. Davidi wapefile ati: “Ngazwe ukuya nu mwenzo onga pakuti natiina izina yako,” kulangilila ukuti umwenzo wa muntu ungankanyiziwa ukulingana na vino muntu watemwa alino na vino akatiina. (Masa. 86:11) Umuntu wa musango uwo angaya ni “ndimi ziili” kuli kuti ukuombela Yeova cizunzuwi. (Masa. 119:113; Kuso. 3:16) Nupya umuntu angaya ni myenzo yiili, kuli kuti ukulaombela aene yaili, nanti ukuya nu usomvi ala akulanda vimwi lelo pa nsita ili imwi kwene ala akwelenganya vyuze. (1 Mila. 12:33; Masa. 12:2) Yesu wakanyile antu ausomvi aali ni myenzo iili.—Mate. 15:7, 8.
Umuntu aakulonda ukuzanzya Leza atalinzile ukuya ni myenzo yiili lelo alinzile ukumuombela nu mwenzo wakwe onsi. (1 Mila. 28:9) Cikalondekwa ukuombesya pano umwenzo waya uwaucenjezi nupya ukalondesya ukucita iviipe. (Yele. 17:9, 10; Utan. 8:21) Ivingatwazwa pakuti tutwalilile ukuombela Yeova nu mwenzo onsi aevi: kulapepa ukufuma pansi ya mwenzo (Masa. 119:145; Ndosya 3:41), kulasambilila Izwi Lyakwe Leza lyonsi (Ezila 7:10; Mapi. 15:28), kuya acincile umu mulimo wa kusimikila ilyasi lisuma (loliniko na Yele. 20:9), alino nu kulazanwa pamwi na antu aakaombela Yeova ni myenzo yao yonsi.—Loliniko na 2 Yamwe. 10:15, 16.
FEBULUWALE 13-19
IVYUMA IVYAYA UMWI IZWI LYAKWE LEZA | 1 MILANDU 13-16
“Mukulondela Utunguluzi Mukafuma Ivisuma”
w03 5/1 mafwa 10-11
Uzye Mukayuzya Ukuti, “Yeova Ali Kwi?”
12 Lino yalesile imbokosi ya upangano umu Izlaeli nupya ala yatimala imyaka ingi umu Kilyati Yealimu, Davidi walondanga ukuitwala uku Yelusalemu. Wamile intunguluzi nu kulanda ukuti yakawezye imbokosi ya upangano ndi cakuti ‘cili ningo kuli aliyo alino na Yeova nga wazumilizya.’ Lelo atalondeliizye sana pali vino Yeova walanzile pa mbokosi ya upangano. Pano alondelezya, nga yataasendile imbokosi ya upangano umu cikocikala. Lelo Aina Levi aa mu lupwa lwakwe Koati nga aliyo yasenzile imbokosi ya upangano apa viye vyao wakwe vino Leza walanzile. Nanti cakuti ilingi Davidi uzyanga Yeova, pa nsita yii wafizilwe ukucita vivyo umu nzila isuma. Ivyafumilemo vitazifile. Pa cisila Davidi walanzile ati: “Yawe Leza witu watuponyezizye ukali pano tutamuzizye ivyakucita pa kuiwezya.”—1 Milandu 13:1-3; 15:11-13; Mpendwa 4:4-6, 15; 7:1-9.
w03 5/1 ifwa 11 pala. 13
Uzye Mukayuzya Ukuti, “Yeova Ali Kwi?”
13 Lino imbokosi ya upangano yasenzilwe na Ina Levi ukufuma uku ng’anda yakwe Obedi Edomu nu kuitwala uku Yelusalemu, antu yimvile ulwimbo luno Davidi wasisile. Mu lwimbo luu mwali amazwi akufuma pansi ya mwenzo akuti: “Lengini Yawe ukuti amwazwe, nupya mwamupepa lyonsi. Iusyini ivyakuzungusya vino Yawe wacisile ni vinjelengwe vyakwe, nga nuvunuko uno wene wacisile pa antu.”—1 Milandu 16:11, 12.
Ukuvwikisya Sana Ivyaya Umu Malembo
w14 1/15 ifwa 10 pala. 14
Mwapepa Yeova Umwene Uwa Manda Pe
14 Davidi walesile imbokosi ya upangano iyali iya muzilo uku Yelusalemu. Pa nsita yii lino antu yali ni nsansa, Aina Levi yimvile ulwimbo ulwa kulumbanya Leza umwali amazwi acindame alembwa pali 1 Milandu 16:31 akuti: “Nenini antu amu nko zyonsi muti: ‘Yeova umwene!’” Limwi yamwi yangelenganya ukuti, ‘Vino Yeova u mwene uwa manda pe, u mulandu ci uno pa nsita iya yimbiile ukuti Yeova waya umwene?’ Yeova akaya umwene ndi cakuti walanga ukateeka wakwe nanti ukusoolola umwi uwakuti amwimilileko pa nsita imwi nanti ukucita ivintu vimwi. Vino Yeova akacita vii pakulanga amaka yakwe akutungulula vyacindama sana. Lino Davidi atatala wafwa, Yeova wamulavile ukuti uwene wakwe ulatwalilila ukuyako amanda pe, watile: “Ndasonta umwana wako wenga pali yano waivyalila nu kumucita umwene.” (2 Sam. 7:12, 13) Umwana wakwe Davidi uwalumbulwa umu usoowelo uu wizile aloleka pa cisila ca myaka ukucila pali 1,000. Uzye umwana wii wali a weni, nupya alilaci lino wali nu kuya Umwene?
FEBULUWALE 20-26
IVYUMA IVYAYA UMWI IZWI LYAKWE LEZA | 1 MILANDU 17-19
“Mwatwalilila Ukuya ni Nsansa Nanti Cakuti Vintu Visi Ningo”
w06 7/15 ifwa 19 pala. 1
Mwaika Mano Kuli Vino Iuvi Lwakwe Yeova Lyaya Ilisuma
Davidi uwaliko mpiti umu Izlaeli waya pa yantu aalandwapo sana umu Malembo Aciebele. Umuntu wii uwali kacema, kiimba wa nyimbo, kasesema, nupya umwene, wataile sana Yeova Leza. Kutemwa kuno Davidi watemilwe Yeova kwalenzile ukuti alondesya uku mukuulila ing’anda. Ing’anda iyo nanti tempele, yali nu kuya incende pano Aina Izlaeli yali nu kulapepela Leza. Davidi wamanyile ukuti amapekanyo aakukuulila Leza itempele yali nu kulenga antu yakwe Leza yaye ni nsansa alino nu kupaalwa. Cii calenzile Davidi ukwimba ukuti: “Ansansa antu yano wemo [Yeova] wasoolola pakuti yangaikala umwi sano lyako ilya muzilo. Tumasekelelanga apa vintu ivizipe ivyaya umwako, apa upolelelo uwaya mung’anda yako yamuzilo!”—Masamu 65:4.
Mwaya nu Luzango Umu Milimo Ino Mukaombela Yeova
11 Naswe kwene tungaya sana nu luzango nga tukwezya na maka ukuomba papezile maka itu lino tukuomba umulimo uli onsi uno twapeelwa umu mulimo wakwe Yeova. Mwaomvya insita inu umu mulimo wa kusimikila nu kuombesya umu cilongano. (Mili. 18:5; Aeb. 10:24, 25) Mwapekanya ningo ukulongana pakuti mwaasuka ivyasuko ivisuma ivingakomelezya yauze. Mwalola malyasi yonsi ayasambi yano mwapeelwa umu kulongana kwa mukasi ka mulungu ukuti yacindama. Ndi cakuti mwapeelwa umulimo umwi umu cilongano, mwasunga insita nu kuya akutailwa. Mutaelenganya ukuti umulimo uno umupeelwa utacindime nu kuti mutalinzile ukonona insita inu pa mulimo kwene uwo. Mwaezya na maka ukwikako mano lino mukuomba umulimo uno mwapeelwa. (Mapi. 22:29) Ndi cakuti mukuombesya lino mukuombela Yeova, mulaya cuza wakwe musuma nupya mulaya sana nu luzango. (Gala. 6:4) Nupya cilamwangukila ukuya ni nsansa ndi cakuti yauze yapeelwa umulimo umwi uno mwalondanga.—Loma 12:15; Gala. 5:26.
Ukuvwikisya Sana Ivyaya Umu Malembo
w20.02 ifwa 12, kambokosi
Twatemwa Sana Tata Witu Yeova
Uzye Yeova Wanjikako Mano?
Uzye mwatala mwayuzyapo ukuti, ‘Pa yantu yonsi uwingi aya pano nsi, u mulandu ci uno Yeova angikila sile amano kuli nene? Kwaya antu aingi asuma auzyapo iuzyo kwene lii. Umwene Davidi walemvile ati: “We [Yeova], ngu muntu fwandi u wa cani wakuti uwamwiusya? Umwana wa muntu, i cani fwandi cino ungamusakamalila?” (Masa. 144:3) Davidi wasininkizye ukuti Yeova wamumanyile ningo. (1 Mila. 17:16-18) Kupitila muli Baibo nu mwi uvi lyakwe, Yeova akatunena ukuti akalola vino tukalanga ukutemwa kuli aliwe. Lolini amazwi yamwi aaya umwi Izwi lyakwe Leza aangamwazwa ukumanya cisinka cii:
• Yeova wamuweni na lino mutali muvyalwe.—Masa. 139:16.
• Yeova akaceceta umwenzo wa muntu nu kumanya vino akwelenganya.—1 Mila. 28:9.
• Yeova akauvwa mapepo yakwe cila muntu.—Masa. 65:2.
• Vino mukacita vikazanzya Yeova nanti ukumusosya.—Mapi. 27:11.
• Yeova wamupalamika cila muntu kuli aliwe.—Yoa. 6:44.
• Nangu mwafwa, Yeova wamumanya ningo icakuti alamutuutulula. Alamupeela umwili upya na melenganyo apya ivyakolana na vino mwaya ndakai. Muliusya ivyaya mu myenzo inu.—Yoa. 11:21-26, 39-44; Mili. 24:15.
FEBULUWALE 27–MAACI 5
IVYUMA IVYAYA UMWI IZWI LYAKWE LEZA | 1 MILANDU 20-22
“Mwaazwa Acance Ukuomba Ningo Imilimo”
“Ulasike Mulimo Uu ku Antu Atailwe”
8 Welengini 1 Milandu 22:5. Limwi Davidi nga welenginye ati Solomoni ataafisilepo ukutungulula umulimo uuwa uwali ucindame cuze. Pano ing’anda ya kupepelamo yali nu kuya “iya lulumbi,” nupya Solomoni pa nsita iiya wali “umwance nupya ataakweti umanyililo wa vintu.” Lelo, Davidi wamanyile ukuti Yeova wali nu kwazwa Solomoni ukuomba ningo umulimo uno wapeezilwe. Davidi wasumvile sile mano ku kwazwilizya ukupekanya iviingi vyakuomvya pa kukuula.
“Ulasike Mulimo Uu ku Antu Atailwe”
7 Davidi watwaliliile ukwazwilizya umulimo wa makuule uwali nu kutungululwa nu mwanakwe Solomoni, nupya atelenganyanga ukuti pasi aalamutaizya pa makuule aali nu kwizayako. Nupya icikuulwa cizile cimanyikwa ukuti itempele lyakwe Solomoni, antu yatayamanga yakuti ing’anda yakwe Davidi. Nanti icakuti Davidi ataakweti isyuko lya kuti akuule ing’anda ya kupepelamo, watwalilile ukutungilila umulimo wa makuule. Waitemiilwe ukupekanya maumba ya kulonganika ivyela, umukuwa, siluva, na goldi, alino ni mbao zya mikelide. Nupya, wakomelizye Solomoni, ati: “Acino mwanane, si [Yeova] aye nawe, kuti uye nu longo nga ukuulile [Yeova] Leza wako ng’anda ikulu, ndi muno wene walandile.”—1 Mila. 22:11, 14-16.
w18.03 mafwa 11-12 mapa. 14-15
Mwe Yavyazi, Uzye Mukaazwa Ana Inu Ukulunduluka Pakuti Yakawatiziwe?
14 Ya eluda yangaatungilila vino avyazi yakucita ndi yakulanda ivisuma pa kwimika mauyo umu mulimo wakwe Yeova. Nkazi umwi uwaomvile upainiya pa myaka ukucila 70 wiwisye vino ivyeo vino walanzyanyizye nu Mwina Charles T. Russell ala acili sile ni myaka 6 vyamwazwilizye. Walondolwile ukuti, “Walanzyanyizye nani pa mauyo yakuombela Leza, pa mamineti 15.” I cumi cumi, amazwi asuma nupya aakukomelezya yangazwa umwi umu umi wakwe onsi. (Mapi. 25:11) Nupya ya eluda yangaapeela imilimo uku yavyazi na ana yao lino kuli amakuule ya Mang’anda ya Wene, ukupeela acance imilimo ilingine nu musinku wao alino na maka.
15 Amu cilongano nayo yangazwilizya ndi yakulanga ukuti yasumba sana amano uku yance. Yangalanga ukuti yakasumba mano kuli vino vikulanga ukuti ance yakulunduluka muli vyakwe Leza. Uzye uwacance wataasuka ningo sana pa kulongana nanti uzye watalanda ningo ilyasi apa kulongana kwa mukasi ka mulungu? Uzye wacimvya uwezyo umwi nanti ukusyukila kasita nu kusimikila lino ali uku sukulu? Mwataizya acance ya musango uwo zuwa zuwa. Uzye mutanga mwimike uyo wakuti mwalanzyanya na acance, nu kulanga ukuti mwayasumbako mano lyonsi lino ukulongana kutali kutandike alino na pa cisila ca kulongana? Ndi mukucita vii, acance yangayuvwa ukuti nayo yaaya umwi “uvi likalamba.”—Masa. 35:18.
Ukuvwikisya Sana Ivyaya Umu Malembo
w05 10/1 ifwa 11 pala. 6
Visinka Ivyaya Umwi Buku Lyakwe 1 Milandu
21:13-15. Yeova wanenyile malaika ukuti ate ukuleta ivinkuka pa Ina Izlaeli pano akauvwa uyi ndi cakuti antu yakwe yakucula. Umu cumi, a Leza “uwakwatisya uluse.”