Misangulo Nga Yacila pa Ikulondekwa Yakaiomvya Uku Kwazilizizyako Aakweti Inono

Ya Nte Yakwe Yeova yakaomba imilimo yakwe Leza alino nu kwazwilizya antu yauze umu mpanga ukucila pali 200. Lelo aa mu mpanga sile 35 aakakwata sile imisangulo ilinge ino aa mu mpanga kwene zizyo yakasangula iingaomviwa kuli vino yakulondekwa. Uzye aa mu mpanga izisikwata imisangulo ilinge yakafumya kwi impiya izya kuomvya uku vikulondekwa?

Iumba Ilikatungulula likasakamala vino ya Nte Yakwe Yeova yakulondekwa umu nsi yonsi pakuti yatwalilile ukulapepa Yeova nu kusimikila ilyasi lisuma. Yakatantika ningo vino impiya zilinzile ukuomviwa nu kuziomvya ukulingana na vino zilinzile ukuomviwa. Ndi cakuti aa ku musambo yapokelela imisangulo iingi, yakaomvya iyatipuzyapo uku kwazwilizizyako aa mu mpanga zyuze aatakweti imisangulo iingi. Mapekanyo yaa yakolana na vino Aina Klistu yakutandikilako yacitanga, aazwilizyangako yauze ‘pakuti kuye umulinganya.’ (2 Kolinto 8:14) Ndi cakuti yakwata ivingi yaomvyanga vimwi uku kwazilizya Aina Klistu aakweti vinono.

Uzye Aina aakapokelela imisangulo ukufuma uku misambo yuze yakauvwa uli? Wakwe, uku Tanzania, kuno antu aingi aapina nupya yakaomvya impiya ukucepako pa madola yaili pa wanda onga, impiya zizyo yaziomvizye uku kuzifizyako Ing’anda ya Wene ikaomviwa ni Cilongano ca Mafinga. Aa mu cilongano yalemvile ukuti: “Kufuma pano twazifizya Ing’anda ya Wene impendwa iya kulongana yakulilako sana. Tukataizya sana iuvi lyakwe Yeova na ina na ya nkazi umu nsi yonsi pali ukapekape wao, pano calenga tukwate icifulo ca kupepelamo icisuma.”

Aina na ya nkazi yamwi uku Sri Lanka yakweti intazi ya kuulizya ivyakulya pa mulandu nu ulwale wakwe COVID-19. Ya Imara Fernando, nu mwanao Enosh, nayo kwene yali pa yantu yayo. Lelo, pa mulandu ni misangulo iyafumile uku mpanga zyuze, yapokelile uwazwilizyo. Yalemvile ukuti: “Tukumutaizya ina na ya nkazi pa wazwilizyo winu mu nsita ii itale. Twaya sana ni nsansa ukuya umu lupwa luu, nupya tukapepa lyonsi ukuti Yeova aazwa ina na ya nkazi yonsi mu manda yaa akusyalikizya.”

Usi mulandu na kuno aina na ya nkazi iikala, yakapeelako yauze vino yakwata. Wakwe, Enosh waipangile kambokosi kano wikangamo impiya izyakuti aasangwileko ukukwazwilizya indupwa izikulondekwa uwazwilizyo. Nkazi Guadalupe Álvarez nawe walangizye imiyele ili imwi kwene. Nkazi wii, akaikala uku ncende imwi umu Mexico kuno yamwi yakafola impiya izinono sana nanti sile ukukanakwata impiya zili zyonsi. Lelo nanti ciye vivyo, akasangula imisangulo. Watiile: “Nkataizya Yeova pa usuma wakwe nu kutemwa kwakwe. Namanya ukuti imisangalo yane yakaiika pamwi ni misangulo ino yauze yakasangula nu kuiomvya uku kwazwilizizyako aina na ya nkazi akulondekwa uwazwilizyo.”

Aa mu misambo iikatuma impiya izyakwazilizyako yauze yakaya ni nsansa lino yakucita vivyo. Ya Anthony Carvalho aa muli Komiti ya Musambo ku Brazil yatiile: “Pa myaka ingi, twalondekwanga uwazwilizyo wa mpiya ukufuma umu mpanga zyuze pakuti mulimo uombwe umu mpanga itu. Pa mulandu nu wazwilizyo uu, twalola ukulunduluka ukukalamba. Lyene ndakai vintu vyasenuka, nupya naswe twakwata isyuko lyakwazwilizyako yauze. Aina na ya nkazi yakalola vino umulimo wa kusimikila ukaombwa umu nsi yonsi, nupya yakalola vino yangacita pakuti yazwilizyeko uku mulimo uu pano asambi yakwe Yesu aaipeelesya.”

I nzila ci zisuma zino ya Nte Yakwe Yeova yangazwilizizyamo aina na ya nkazi akulondekwa uwazwilizyo? Yangacita vivyo kupitila umu kusangwilako uku mulimo wa mu nsi yonsi, asi kutuma impiya uku misambo ikulondekwa uwazwilizyo. Yangacita vivyo kupitila umukwika imisangulo yao mu kambokosi akaya umu ng’anda ya wene pano yalemba ukuti “Musangulo wa mu Nsi Yonsi” nanti ukuomvya donate.jw.org. Tukataizya sana pa misangulo iyo yonsi.