Nkaika Yeova pa Nkoleelo Lino Nkupingulapo Ivya Kucita

Navilwe pa 19 Mei, 1940, umwi tauni lya Amioûn, ku Lebanon. Lino papisile imyaka imwi, ulupwa lwitu lwakukiile uku musumba wa Tripoli kuno nakuliile, ulupwa lwitu lwali nu kutemwa, insansa, nupya lwatemilwe Yeova Leza. Nene nalipo umwance pa ana 5, anaci yatatu na aonsi yaili. Ukukwata impiya citaali icintu icicindame uku avyazi yane. Ivintu ivyali ivicindame sana umu lupwa lwitu, u kusambilila Baibo, ukulongana, nu kwazwa yauze ukumanya Leza.

Umu cilongano citu mwali aina Klistu aingi apakwe. Wenga wali a Michel Aboud, uwatungululanga isambililo lya citabo pa cilongano. Wasambilile icumi uku New York nupya watandike umulimo wa kusimikila uku Lebanon umu 1921. Nkaiusya sana vino yacindike acance yaili afumile ukwi sukulu lya Gilyadi ya Anne na ya Gwen Beavor na vino yayazwile. Izile yaya ya cuza itu asuma. Lino papisile imyaka iingi, nali sana ni nsansa ukulolana na ya Anne uku United States. Nupya naweni na ya Gwen, aatwazilwe kuli ya Wilfred Gooch ala yakaombela pa Betele ya ku London mu England.

UMULIMO WA KUSIMIKILA UKU LEBANON

Kwali sile ya Nte anono ku Lebanon lino nali umwance. Nomba twali acincile ukunenako yauze pali Baibo. Twasimikilanga asi mulandu na vino intunguluzi zya mapepo zimwi zyatukanyanga. Nkaiusya ivintu vimwi ivyatucitikilanga.

Wanda umwi nemo na kaci wane Sana twasimikilanga apa ng’anda imwi. Simapepo wizile papa kwene pano twasimikilanga. Umwi afwile wamile simapepo wiya. Simapepo watandike ukusaalula kaci wane. Wali nu unkalwe icakuti wasunsile kaci wane nu kumucisa. Umwi watumiile ya polisi foni, nayo yizile nupya yasininkizye ukuti umwi wazwa ya Sana. Yatwazile simapepo uku polisi kuno yayile yamuzana ni mfuti. Umukalamba wakwe ya kapokola wamuzizye ukuti: “Uzye u mulimo ci uno ukaomba? Uzye ukasambilizya antu pali Leza nanti ukayasambilizya ukucita unkalwe?

Insita yuze ino nkaiusya sana, alino icilongano calonzile motoka iya kututwala ukwi tauni ilyayelile ukutali kuno twaile umu kusimikila. Twasimikilanga sile ningo mpaka lino ya simapepo izile iyamanya vino twacitanga nu kukolonganika iumba lya antu ukuti yatuzanze. Yatucuzizye sana, iyatandika nu kututama amawe, nupya ya tata yacisike uku mutwe. Nkwiusya lino nayaweni ala pa manso pali sile uwazi. Yaswilile kuli basi na ya mayo, nupya swensi kwene twalondiilemo ala itusakamala. Nomba ntalatala nilile amazwi yano ya mayo yalanzile ala yakuzifya ya tata, yatiile: “Yeova uyeleele. Yatamanyile vino yakucita.”

Pa nsita yuze napo, twaile umu kutandalila ya lupwa ukumwitu. Lino twafisile pa ng’anda pali kuku, twazanyile simapepo mukalamba. Simapepo wamanyile ukuti avyazi yane yali a Nte Yakwe Yeova. Nanti cakuti nali ni myaka 6, walondanga sile anguvwisye insonyi pa kunguzya ukuti: ”U mulandu ci uno utabatiziwilwa?” Namwaswike ukuti nali nene mwance nupya nalondekwanga ukumanya ivingi muli Baibo pakuti mbatiziwe nu kukwata utailo ukome. Ataatemilwe vino naswike nupya wanenyile kuku ukuti ntakwata umucinzi.

Nomba, ivya musango uu ivyatucitikile vitavuzile sana. Aina Lebanon, yamanyikwa ukuti yaya na ucuza nupya yakapokelela aenyi. Fwandi twalanzyanyanga na antu aingi pali Baibo nu kusambilila nayo.

ULUPWA LWITU LWAPINGWILEPO UKUKUUKILA UKU MPANGA YUZE

Lino nali kasukulu, umwina umwi ukufuma uku Venezuela wizile umu kutandala uku Lebanon. Walonganyile umu cilongano citu nupya izile iyamanyana na kaci wane Wafa iyatandika nu kwizizyanya. Lino papisile insita yatwaline iyaya nu mu kwikala uku Venezuela. Mu makalata yano watulembelanga, Wafa watukomelezyanga ukuti tukakuukile uku Venezuela. Watulembelanga vivyo pa mulandu wakuti watuluukanga. Twasusile ituvwa kuli vino watunenanga itupingulapo nu kukuuka.

Twafisile uku Venezuela mu 1953 nupya twikazile umu Caracas, umupipi nu kwikalilanga kateeka. Pa mulandu wakuti nali umwance, nuvwanga ningo sana nga nalola kateeka yakumupisya muli motoka. Nomba cataliile avyazi yane ukuyelezya imikalile iya ku mpanga yuze, ululimi, intambi, ivyakulya, alino ni miceele. Lino yatandike sile ukwelezya imikalile yuze, icintu cimwi iciipe cizile icicitika.

ICINTU CIIPE CACITIKA

Ya tata yatandike ukulwala. Cii catuzungwisye, pano ya tata yakweti umi usuma sana. Tutiusyanga na lino yalwilepo. Izile iyalwala kansa, nupya yaile iyayalepula. Icaulanda i cakuti yafwile lino papisile umulungu onga.

Cingantalila ukulondolola ulanda uno twakweti. Nali sile ni myaka 13. Tutelenganyanga ukuti ya tata yangafwa, nupya twayuvwile ukuti tutalatala tuyepo ni nsansa nupya. Pa nsita itali, ya mayo cayatalilanga ukuvwikisya ukuti ya iya yafwa. Nanti ciye vivyo, twazizimizye nupya Yeova watwavwile. Lino nali ni myaka 16, namazile isukulu nupya nalondesyanga sana ukwazwa ulupwa lwane.

Lino papisile insita, kaci wane Sana yatwaline na ya Rubén Araujo, aamazile isukulu lya Gilyadi nu kuwela uku Venezuela. Yapingwilepo ukukuukila uku New York. Lino ya lupwa yapingwilepo ukuti inje uku yunivesiti, naile uku New York, fwandi nafumanga pa ng’anda pali kaci wane na ya mulamu. Kaci wane na ya mulamu yangazwile sana ukupalama kuli Yeova lino nikalanga nayo. Nupya, umu cilongano ca Brooklyn icaomvyanga ululimi lwa Cispanish, mwali aina aingi aisile mano kuli vyakwe Leza. Nali sana ni nsansa ukumanya ya Milton Henschel na ya Frederick Franz; yonsi kwene yaombelanga pa Betele ya ku Brooklyn.

Lino umwaka uwa kutandikilapo pa yunivesiti wali nu kusila, natandike ukwelenganya pali vino nacitanga umu umi. Nabelenzile nu kwelenganyapo sana pa vipande ivyali umu Lupungu Lwa Mulinzi ivyalandanga pa Ina Klistu aimike mauyo ya kuombela Yeova. Naweni vino ya painiya na aombelanga pa Betele aali umu cilongano citu yali sana ni nsansa, nupya nalondanga ukuya wakwe aliyo. Nomba ala ntatala nabatiziwa. Namanyile ukuti nalondekwanga ukuipeela kuli Yeova. Nacisile vivyo nupya nabatiziwe apa 30 Maaci, 1957.

IVINTU IVICINDAME VINO NAPINGWILEPO UKUCITA

Lino nabatiziwe, natandike ukwelenganya pa kutandika upainiya. Nalondesyanga sana ukuya painiya, nomba nalolanga ukuti cali nu kuntalila ukucita vivyo. Nali nu kukwanisya uli ukuomba upainiya pa nsita ili yonga kwene nu kuya uku yunivesiti? Twalembelananga makalata na ya lupwa yane pali vino nalondanga ukuta masambililo ya pa yunivesiti, nu kuswilila uku Venezuela pakuti nkatandike upainiya.

Naswilile uku Caracas umu Juni 1957. Nomba naweni ukuti imikalile yakwe ya lupwa yane itaali ningo. Yalondekwanga umwi umu lupwa uwakuyapeela impiya. Uzye nali nu kuyazwa uli? Nazanyile incito umu banki, nomba nalondesyanga ukuya painiya. Nupya cico kwene i calenzile ukuti nswilile uku Caracas. Nalondanga ukuomba vyonsi viili. Pa myaka iingi, naombanga umu banki, nupya naombanga na upainiya. Ntatazile injuvwapo ukupamviwa nanti ukuya ni nsansa wakwe vino nayuvwile.

Nupya, nizile inja sana ni nsansa lino twizile itutwalana na Sylvia nkazi umusuma sana uwa ku Germany uwatemilwe Yeova. Yakuukiile na avyazi yakwe uku Venezuela. Lino papisile insita, twizile itukwata ana yaili, umulumendo Michel (Mike) nu mukazyana Samira. Nupya natandike nu kusakamala ya mayo. Twatandike ukwikala nayo. Nanti cakuti natiile upainiya pakuti nasakamala ulupwa muli vino lwalondekwanga, natwalilile ukuya umucincile umu mulimo wa kusimikila. Sylvia nani twaombangako upainiya wa kwazwilizya lino tukupuuza.

ICINTU NA CUZE ICICINDAME CINO NAPINGWILEPO UKUCITA

Lino ivyativilumbulwa pa kutandika kwa cipande cii vyancitikile, ala ana yane yacili yakaya ukusukulu. Imikalile yane yazifile sana, nupya antu aombanga umu mabanki yancindike sana. Nanti ciye vivyo, nalondanga antu yandola sile wa muomvi wakwe Yeova. Natwalilile ukwelenganya pali vino ningacita pakuti antu yandola wa muomvi wakwe Yeova. Fwandi nemo na mamane twikazile pansi nu kulanzyanya pali vino twali nu kulaomvya impiya. Ndi cakuti nata ukuomba umu banki, yali nu kumpeela impiya izingi sana nupya yali nu kulampeela panono panono. Pa mulandu wakuti tutakweti inkongole, twapingwilepo ukuti ndi cakuti twangupazya umi, twali nu kukwata impiya izingi izyali nu kutwazwa pa nsita itali.

Citangwike ukucita vivyo, nomba mamane na ya mayo yazumilizye. Nalondanga ukutandika upainiya nupya. Nali sana ni nsansa! Naipekinye ukutandika upainiya, nomba izile iyatunena ilyasi limwi lino tutenekelanga.

ICINTU CINO TUTENEKELANGA

Wanda umwi ya dokota yatunenyile ukuti Sylvia watakwata inda. Catuzungwisye sana swensi! Catuletiile uluzango; nomba, nelenginye na pali vino napingwilepo ukutandika upainiya. Uzye nali nu kuomba upainiya nupya? Patalengile twasenwike muli vino twelenganyanga nu kucita nu kutandika ukuipekanya vino twali nu kucita nga twakwata umwana. Nomba natwalilile ukusakamala ndi cakuti nali nu kuomba upainiya.

Pa cisila ca kulanzyanya pa mauyo yano twimiike, twapingwilepo ukuti ntandike upainiya. Umwana witu umulumendo Gabriel wavilwe umu Epuleo umu 1985. Lyene nizile inta ukuomba umu banti nu kutandika upainiya wa nsita yonsi nupya umu Juni 1985. Lino papisile insita, nizile inja muli Komiti ya musambo. Nomba umusambo utayelile umu Caracas, nayanga umu kuombako amanda yaili nanti yatatu umu mulungu, nupya pali amakilomita 80.

TWAKUUKILA UKU NCENDE YUZE

Iofesi lya musambo lyayelile umwi tauni lya La Victoria, fwandi twapingwilepo ngu lupwa ukuti tukuukile ukwi tauni lya La Victoria pakuti tupalamile na pa Betele. Kwali u kusenuka ukukalamba kuli swensi. Natemwa sana ulupwa lwane nupya nkayataizya. Vino yacitanga vyangazwanga sana. Kaci wane Baha waitemiilwe ukulasakamala ya mayo. Mike watwazile, nomba Samira na Gabriel ala tucili tukaikala nayo pa ng’anda. Fwandi ukukuukila uku La Victoria kwali nu kulenga yasye ivyuza uku Caracas. Nupya na Sylvia walondekwanga ukuyelezya itauni ilinono ukucila vino welizye ilikulu. Nupya swensi kwene twalondekwanga ukuyelezya ukwikala umu ng’anda inono. Kwali ivingi ivyalondekwanga pa kukuuka ukufuma uku Caracas ukuya uku La Victoria.

Nomba, ivintu vizile ivisenuka nupya. Gabriel wizile atwala, nupya Samira nawe watandike ukuikalila. Sylvia nani yatwamile ukuya umu kuombela pa Betele umu 2007 nupya ali pano tucili tukaomba na ndakai. Mike umukalamba pali yonsi, a eluda nupya akaombako upainiya wa nsita yonsi pamwi na mamakwe Monica. Gabriel nawe kwene a eluda nupya akaombela uku Italy na mamakwe Ambra. Samira a painiya nupya akaombela milimo ya pa Betele ku ng’anda ukwakwe.

NINGASOOLOLA UKUCITA VIKWENE NUPYA

I cacumi ukuti nalondekwanga ukusenuka umu vintu ivingi umu umi wane. Nomba nsilanguluka. Ningasoolola ukucita vikwene nupya. Nkataizya sana pa milimo yonsi ino naomba umu mulimo wakwe Yeova. Pa myaka iingi, nailolela vino cacindama ukutwalilila ukuya na ucuza usuma na Yeova. Asi mulandu vino tukupingulapo i vinono nanti ivikulu, Leza angatupeela “mutende uno kusi umuntu nanti wenga angaumanyikisya.” (Filipi 4:6, 7) Sylvia nani twatemwa sana ukuombela pa Betele, nupya Yeova wapaala vino twapingwilepo ukucita pano lyonsi tukamwika pa nkoleelo umu umi witu.