Mwaya Nu Luse

Intazi Iyayapo

Ndi cakuti tukwika sile mano kukulola vino twapusana na antu yauze, tungatindika ukwelenganya iviipe pali aliyo. Cii, cingalenga tutandike ukuya na kapatulula uku yantu yano twapusana nayo. Ndi cakuti twatandika kulaelenga vivyo pa yantu yauze, cilatutalila ukuya nu uluse nupya cilalenga tuye sana na kapatulula.

Cisinte ca muli Baibo

“Muzange pamwi na yao akuzanga, losyini pamwi na yao akulosya.” —LOMA 12:15.

Uzye icikomo cii cikutusambilizya cani? Icikomo cii cikutusambilizya ukuti tulinzile ukuya nu luse. Ukuya nu Uluse kukasenula ukwelenganya pali vino vikucitikila umwi kwati wewe vikukucitikila.

Vino Ukuya nu Luse Kukaazwa

Ndi cakuti tuvwila umuntu umwi uluse, cilatwavwa kumanya vino twakolana nu muntu wiyo. Tungamanya ukuti akayuvwa vino tukayuvwa nupya limwi akacita ivintu vikolane na vino tukacita. Uluse lulatwavwa ukulola antu yonsi ukuti twaya icilicimwi asi mulandu ni nkulilo yao. Ndi cakuti tukulola antu yauze ukuti twaya icilicimwi, cilatwavwa ukuta ukwelenganya iviipe pali aliyo.

Nupya uluse lulatwavwa kucindika yauze. Ya Anne-Marie, aku Senegal, yasuuzile sana antu yano yali umwi umba limwi lino antu yalolanga ukuti yatacindama sana. Yalondolwile vino uluse lwayavwile lino yatile: “Nganalola vino aaya umwi iumba lya antu lino yatacindike ya culanga, nayuzyanga nemwineco vino ni ngayuvwa nga naculanga wakwe aliyo. Ukuyuzya vivyo kwalenzile imanye ukuti ntacindime ukucila antu yauze nupya pasi vili vyonsi vino nacita vingalenga ncindame sana.” Ndi cakuti tukuvwikwisya intazi zino anji yakupitamo, cilatwangukila ukuyuvwila uluse.

Vino Mungacita

Ndi cakuti mukaelenganya viipe pa yantu yamwi, mwaezya ukwelenganya pali vimwi vino mwakolana nayo. Wakwe, mwelenganye vino yakayuvwa ndi cakuti

Uluse lukatwavwa ukulalola antu yonsi ukuti yaya mu lupwa longa

yakuliila ivyakulya pamwi nu lupwa lwao
yamala ukuomba mulimo umwi ukome
yakwizizya pamwi ni vyuza vyao
yakukutika ku nyimbo zino yatemwa

Lyene, mwelenganya ukuti vino vikuyacitikila vikucitikila mwemwe. Muyuzye mweineco muti:

‘Uzye ningacita uli ndi cakuti umwi akulenga nayuvwa uwa silesile?’
‘Ninguvwa uli ndi cakuti yamwi yakulanda iviipe pali nene lino yatatala yamanya?’
‘Ndi cakuti nali umwi umba lino nkalola ukuti litacindama, uzye ningatemwa ukuti antu yandola uli?’

Aonsi ali yamwi kwene yakulangizyanya ivikope ivikulangilila ivintu vino yakolanamo, wakwe ulupwa, vyangalo vino yatemwa ukuteya alino ni incito.

IVYACITIKILE YAMWI IVINGATWAZWA: Ya Robert Aku Singapore

“Mpiti nelenganyanga ukuti ya cipuuli yapusine na antu yauze, yatacenjela, nupya yakasoka zuwa. Fwandi ntalondanga ukuya pamwi nayo. Nanti ciye vivyo, nalolanga ukuti vino nacitanga vyali sile ningo pano nelenganyanga ukuti ntakweti kapatulula.

“Ukuvwila ya cipuuli uluse kwalenzile inte ukuya na kapatulula. Wakwe, nalolanga kwati ya cipuuli yatacenjela pano nganalanda nayo, yandolekesyanga sile ukwaula kungasuka. Fwandi, nezizye ukwelenganya vino ningayuvwa ndi cakuti ntakuvwa vino muntu wino akuvwanga nani akulanda. Nani kwene ntanga nasuke iciliconsi! Nanti icakuti nkweti akakungazwa ukuvwa, milolekele ya pamanso yane ingalanga ukuti ‘nkucula ukuvwa vino umuntu akulanda.’”

“Lino nelenginye sana pali vino ya cipuuli yakayuvwa, natiile ukuya na kapatulula.”