Iviwa Iinkomi!
Satana ni viwa aankalwe nupya yaipa umu vicitwa. Mpiti, Satana wakomile ivitekwa na aomvi yakwe Yobo uwacumi. Alino wakomile ya mwana Yobo ikumi (10) lino wakatwisye icimuza icikalamba icaongolwile ing’anda ino yaalimo. Lyene walenzile Yobo ukuya ni ‘vipute iviipisye kufuma uku tukando kufika na pa nyele.’—Yobo 1:7-19; 2:7.
Pa nsita lino Yesu wali umu nsi, iviwa vyalenzile antu yamwi ukuya ya ciulu nanti impafu. (Mateo 9:32, 33; 12:22) Vyacuzizye umonsi umwi nu kumulenga aaicemboola na mawe. (Mako 5:5) Vyalenzile nu mulumendo umwi ukupunda, ukumuponya pansi, nu kumufumfunya icipisye.—Luka 9:42.
Mpiti, iviwa vyalenzile antu yamwi ukulwala, yauze vyayatensyanga na maka nu kuyasumba apansi
Ndakai, Satana ni viwa yacili iinkomi. Ivicitwa vyao vikaipilako sile ukufuma lino yayasumbiile umu nsi ukufuma ukwiyulu. Amalyasi yano tukauvwa umu nsi yakasininkizya ukuti Satana ni viwa aankalwe sana. Yakaalenga antu yamwi ukulwala. Yauze nayo yakayacuzya usiku, ukuyalesya ukulaala utulo nanti ukuyalenga ukulota iviloto ivipisye. Yakayapatikizya ukucita upulumusi. Nga yauze yene vikayapenya, ukuyalenga ukuya inkomi, nanti ukuikulika.
Iviwa vikalenga antu yamwi ndakai ukuya nu unkalwe; yauze nayo vikayacuzya uku tulo, ukuyalenga ukulota iviloto ivipisye
Ya Lintina, aakaikala uku mpanga ya Suriname, yasimike ukuti, iciwa cakomile antu 16 amu lupwa lwao nupya cacuziizye sana ya Lintina pa myaka 18. Ivyacitikiile ya Lintina vyalenzile yalande ukuti iviwa “ vikauvwa ningo sana ukucuzya antu kufikila iyafwa.”
Nomba, Yeova wakwata amaka yakucingilila aomvi yakwe pakuti Satana atayacisa.—Amapinda 18:10.