Uzye Uwene Wakwe Leza I Cani?

1. Iipepo ci lino antu aingi yamanya sana lino tumasambililapo?

ANTU aingi wakwe cimwi umu nsi yonsi yamanya ipepo lyakuti Tata Witu nanti lino yakati Ipepo Lya Mwene. Kuli kuti ipepo lino Yesu Klistu umweneco wasambilizye alondezi yakwe pa kuyalanga vino mapepo yafwile ukuya. Ipepo liili lyacindama sana, nupya ndi mwasambilila ivintu vitatu vino Yesu walumbwile umwipepo liili ukuti ali vya kutandikilako ukulenga, cilamwavwa ukumanya ivingi pali vino Baibo ikasambilizya.

2. I vintu ci vitatu ivya kutandikilako vino Yesu wasambilizye asambi yakwe ukupepela?

² Pa kutandika ukulanda ipepo kwene lii, Yesu wanenyile antu aakutikanga ati: “Acino mwemo mwapepa mukuti, ‘Tata witu uwa mwiyulu, izina lyako licindikwe, Uwene wako wize, kulonda kwako kucitike pansi vino kukacitika mwiyulu.’” (Mateo 6:9-13) Uzye ivintu vii vitatu vino tufwile ukulenga vyacindama uli?

3. I vyani vino tufwile ukumanya apa Wene wakwe Leza?

³ Twasambilila mpiti umwibuku kwene lii apiizina lyakwe Leza ilyakuti Yeova, alino na vino likapiliula. Nakapya, twasambililako na pali vino Leza wacitila antunze alino na vino alayacitila uku nkoleelo. Nomba uzye Yesu walozizye mwi pa kutusambilizya ukuti twapepa twati: “Uwene wako wize”? Uzye uwene wakwe Leza cili cani? U mu nzila ci muno uwene uwo ndi waca wiza ulacindika izina lyakwe Leza, nanti ukulilenga ukuya ilya muzilo? Alino uzye ukwiza kwa Wene kwene uu kulazwilizya uli ukucita ukulonda kwakwe Leza?

UZYE UWENE WAKWE LEZA KULI KUTUULI?

4. Uzye Uwene wakwe Leza kuli kutuuli, nupya Umwene wa Wene uwo a weni?

⁴ Uwene wakwe Leza kuli kuti uteeko uno Yeova Leza wimika nu kusonta Kateeka wa Wene kwene uuwo. Uzye Kateeka wa Wene wakwe Leza a weni? A Yesu Klistu. Yesu, Kateeka wa Wene wakwe Leza waluta ya kateeka yonsi auntunze, nupya wene aka-amwa ukuti “Kateeka wakwe yakateeka nupya Mwene wakwe yamwene onsi.” (1 Timoti 6:15) Wene wakwata sana amaka ya kucita ivintu vya mpomvu kucila kateeka aaliwensi wa untunze, kumwi na ya kateeka yano tungati yene yakateeka ningo.

5. Uzye aukwi ukwayela Uwene wakwe Leza, nupya ulaateeka cani?

⁵ Uzye Uwene wakwe Leza waya kwi? I cisuma, aekwi ukwaya Yesu Kateeka wa Wene kwene uuwo? Nanti ciye uli, mukwiusya vino twasambiliile ukuti Yesu umoozilwe iyamupampamila na pa mulando, nu kuti wizile atuutuluka. Kufuma papo, waile ukwiyulu. (Milimo 2:33) Fwandi kuuku kwene ukwiyulu ali kuno Uwene wakwe Leza wayela. Ali cino Baibo ika-amila Uwene uu iti ‘uwene uwa mwiyulu.’ (2 Timoti 4:18) Nanti cakuti Uwene wakwe Leza wayela ukwiyulu, uku nkoleelo ulaateeka insi.—Umbwilo 11:15.

6, 7. A muli vyani muno Yesu wayela Umwene umuiyele?

⁶ A muli vyani muno Yesu wayela Umwene umuiyele? Ca kutandikilako, wene atalatala afwe. Baibo ikatusambilizya ukuti Yesu wapusanako sana na ya kateeka auntunze, pano ikati “aliwe wenga sile asyafwa. Wene akaikala mu luswepo luno kusi nanti umwi angapalamako.” (1 Timoti 6:16) Kuli kuti ivintu vyonsi ivisuma vino Yesu akacita vilayako amanda pe. Nupya twasininkizya ukuti alacitila antu yakwe ivintu ivisuma ivingi ivilaayazanya lyonsi.

⁷ Lolini vino Baibo yasowile pali Yesu iti: ‘Alino umupasi wakwe Leza uliza wikalilile pali aliwe, umupasi wa malango nu wa kwiluka. Umupasi wa kupanda amano nu wa maka, umupasi wa kumanya ivintu nu koopa Yeova. Ukutiina Yeova ali cintu cino alimilila penepo. Atalaputula umulandu pa mulandu nu kulondelela ukuloleka kwa vintu, nanti ukuuvwilila sile uku matwi. Lelo umu ololoke amuno wene alaputula imilandu ya antu aakucula, nga nu kupingwila alanda amu nsi umu ulungami.’ (Ezaya 11:2-4) Amazwi yaayo yakalangilila ukuti Yesu walavilwe ukuti alaya Umwene umololoke nupya uwa cikuuku uku yantu. Uzye namwe mungatemwa ukukwata umwene wa musango uuwo?

8. Uzye aaweni aalaateeka na Yesu?

⁸ Icisinka na cuze apa Wene wakwe Leza aeci: Yesu atalaateeka wenga. Kwaya nayauze aalateeka pamwi na aliwe. Paulo wanenyile Timoti ati: “Ndi twatwalilila kuposya, ale lyene tulateeka pamwi nawe.” (2 Timoti 2:12) I cumicumi, Paulo, Timoti, alino na antu yauze autailo yano Leza wasoolola, yalaateeka pamwi na Yesu umu Wene wa mwiyulu. Uzye aantu yanga alakwata isyuko kwene lii?

9. Uzye a yanga alaateeka pamwi na Yesu, nupya a lilaci lino Leza watandiike ukuyasoolola?

⁹ Umu Cipande 7 umwibuku kwene lii, twasambiliile ukuti umutumwa Yoane wapeezilwe icilolwa muno waweni “Mwana wa mfwele [Yesu Klistu] aimi pa mwamba wa Zioni. Wali pamwi na antu mazimbi mwanda onga makumi yani na yani (144,000) yano pa mausyu yao palemvilwe izina lyakwe nga na lyakwe Isi.” Uzye ya 144,000 kwene yaayo aaweni? Yoane umwineco walondolola ukuti: “Yene yalondelanga Mwana wa Mfwele konsi kuno akuya. Yene yakulwilwe kufuma pa antu yonsi asyala kuti yaye ankolelo kupelwa kuli Leza nu ku Mwana wa Mfwele.” (Umbwilo 14:1, 4) Icumi kwene antu yaaya aalondezi ya cumi yakwe Yesu Klistu, asoololwa ukuteeka na Yesu umwiyulu. Ndi yatuutululwa nu kuya ukwiyulu, ‘yene yalaateeka insi’ pamwi na Yesu. (Umbwilo 5:10) Ukutandikila umu manda ya yatumwa, Leza akasoolola aina Klistu ya cumi pakuti icipendo cakwe ya 144,000 cikumanile.

10. U mulandu ci uno cilaziipila sana ukuti Yesu na ya 144,000 yace yateeka antu?

¹⁰ Vino Leza wapekanya kuti ya 144,000 yace yaateekela pamwi na Yesu, i cintu icisuma sana. Yesu wamanya vino cikauvwika ukuya umuntunze nu kucula. Paulo walanzile pali Yesu ati: “Asi umwi wino atange atuvwile luse pa utonte witu. Tukweti simapepo witu Mukulu wino weziwe mu misango yonsi ndi vino naswe tukaeziwa, lelo wene atifizye.” (Ayebulai 4:15; 5:8) Na yaayo aalateekela pamwi na Yesu nayokwene yaacuzile nupya yazizimizya. Na vyuze vino yaapitamo, u kucula uku kukanaya amaliilike nu kuzizimizya uku ndwala izipusane-pusane. I cumicumi yalaauvwikisya intazi zya yantunze!

UZYE UWENE WAKWE LEZA ULALEETA VYANI

11. U mulandu ci uno Yesu wavwangiile ukuti aina Klistu yafwile ukupepa ukuti ukulonda kwakwe Leza kucitike ukwiyulu?

¹¹ Lino Yesu walanzile ukuti tufwile ukupepa ukuti Uwene wakwe Leza wize, walanzile nu kuti tufwile ukupepa ukuti ukulonda kwakwe Leza kucitike “pansi vino kukacitika umwiyulu” Leza waya umwiyulu, nupya angeli ya cumi yakaacita ukulonda kwakwe lyonsi. Nomba umu Cipande 3 umwibuku kwene lii, twasambiliile ukuti umungeli umwi umwipe watiile ukucita ukulonda kwakwe Leza nu kuleenga Adamu na Eva ukwifya. Umu Cipande 10, tulasambilila ivingi pali vino Baibo ikaasambilizya pa mungeli kwene wiiya umwipe, wino twamanya ukuti a Satana Ciwa. Satana na angeli asoolwile ukumulondela, aaka-amwa ukuti viwa, yazumiliziiwe ukwikala ukwiyulu pa kasita kanono. Fwandi asi yonsi aali umwiyulu apa nsita iiya aacitanga ukulonda kwakwe Leza. Ivintu vyali nu kusenuka lino Uwene wakwe Leza wali nu kutandika ukuteeka. Umwene Yesu Klistu uwapeezilwe ukateeka wali nu kulwa na Satana.—Umbwilo 12:7-9.

12. Uzye i vintu ci viili ivicindame sana ivyalondololwa apa Umbwilo 12:10?

¹² Amazwi amuli Baibo ausoowelo yakalanda pali vino vyali nu kucitika ukuti: “Nupya nuvwa izwi likulu mwiyulu likuti, ‘ndakai Leza watatutuula! Leza watalanga maka yakwe nu wene wakwe! Ndakai katuula wino wasolola watalanga maka yakwe! Pano wiyo aakapeela aina itu milandu [Satana] wene wasumbwa pano nsi, wino musanya nu usiku akayapeela milandu nkolelo yakwe Leza witu.’” (Umbwilo 12:10) Uzye mwati-mulola ivintu viili ivicindame sana ivyalondololwa umu cikomo kwene cii muli Baibo? Icakutandikilako, Uwene wakwe Leza uno Yesu Klistu ali kateeka, wali nu kutandika ukuteeka. Cakwe ciili, Satana yaali nu kumuvwintila pano nsi ukufuma ukwiyulu.

13. Uzye vino yaazinga Satana ukwiyulu, ivyani ivyacitikako?

¹³ I vyani ivyacitika pa mulandu wa vintu viivi viili ivyacitiike? Amazwi amuli Baibo aakalanda pa vintu viili ivyacitiike ukwiyulu yakati: “Acino zangini mwe mayulu na mwemuno mwikalamo!” I cumicumi angeli yacumi umwiyulu yakazanga pano Satana ni viwa vyakwe yataayako ukwiyulu, lyene yonsi asyala kweneko, yaaya aacumi kuli Yeova. Ndakai, ukwiyulu kwaya sana umutende nupya yonsi aaya kweneko yakauvwana. Fwandi ukulonda kwakwe Leza kukaacitika ukwiyulu.

14. Uzye i vyani ivyacitika ukufuma pano Satana yamusumbiile pano nsi?

¹⁴ Nga pano nsi peene, i vyani ivyacitika? Baibo ikati: “Lelo kalanda ku amu nsi na yemba! Pano Ciwa watasumbwa pa nsi kunomuli, nupya ali nu ukali cuze pano amanyile ukuti watasyala sile ni nsita inono.” (Umbwilo 12:12) Satana wasoka vino yamuzinga ukufuma ukwiyulu na vino wasyala sile na kasita akanono. Lyene akalenga ukuti kuye malanda pano nsi. Umu cipande cilondeliilepo amuno tulasambilila ivingi pa malanda yayo. Nomba lyene vino Satana wasumbilwa pano nsi, cingalenga tuzye ukuti, U mu nzila ci muno Uwene ungalenga ukuti ukulonda kwakwe Leza kucitike pano nsi?

15. Uzye Leza akaalonda ukuti insi iye uli?

¹⁵ Uzye mukwiusya vino twasambilile umu Cipande 3 pali vino Leza akalonda ukuti insi ice iye? Umu calo ca Edeni Leza walangilile ukuti akaalonda insi ukuya paladaise umwakwikala antu aololoke nupya aula ukufwa. Satana walenzile ukuti Adamu na Eva yapondoke; na cii calenzile ukuti vino Leza walondanga ukuti insi iye paladaise vitacitika apa nsita iiya, lelo ukulonda kwakwe Leza kutaasenuka foo. Yeova acili akaalonda ukuti ‘antu aololoke yakikale umutende umu nsi, nu kuipyana umuyayaya.’ (Masamu 37:29) Uwene wakwe Leza ulio ulafikilizya vivyo. Uzye mumanyile vino cilaya?

16, 17. Uzye ilembelo lyakwe Danieli 2:44, likatusambilizya vyani pa Wene wakwe Leza?

¹⁶ Lolini vino Baibo yasoowela pali Danieli 2:44. Pakati: “Umu nsita zyakwe yakateeka yalya, Leza wa kwiyulu alakatusya Uwene uno utalatala wononwe. Wene utalatala ucimviwe, lelo ulonona amawene yauze yonsi nga lyene wikalilila amanda pe.” Uzye icintu cii cikutusambilizya vyani?

¹⁷ Icakutandikilako, tukusambilila ukuti Uwene wakwe Leza wimikwe “umu nsita zyakwe yakateeka yalya,” nanti tuti ala kuli amawene nayauze. Cakwe ciili, tukusambilila ukuti Uwene ulikalilila amanda pe. Uwene uuwo utalacimviwa, nupya utalapyanwa nu uteeko uze. Cakwe citatu, tukusambilila ukuti kulaya inkondo pakasi ka Wene wakwe Leza na mawene ya muno nsi. Uwene wakwe Leza ulacimvya amawene yonsi. Nga alino uwene uwo uuliwo sile ulayako nu kuteeka antunze. Lyene antu yonsi yalaateekwa ningo sana.

18. Uzye inkondo ya kusyalikizya ino Uwene ulalwa na mauteeko ya muno nsi ika-amwa ukuti uli?

¹⁸ Kwaya ivingi vino Baibo ikatusambilizya pa nkondo ya kusyalikizya ino Uwene wakwe Leza ulalwa na mauteeko ya muno nsi. Cintu conga cino ikatusambizya i cakuti lino impelelekezyo ikupalamila, imipasi yankota, kuli kuti angeli yakwe Ciwa, yalaasomba “yakateeka yonsi munsi.” Uzye mwamanya cino imipasi iyo ilaayasombela? A pakuti ice “iyakonganike ku ulwi ulacitika pa Wanda wakwe Leza wa maka onsi.” Imipasi iiyo ilakonganika “yakateeka pa ncende ino mu Ciyebulai yakati Alamagedoni.” (Umbwilo 16:14, 16) Amazwi aaya umu vikomo vii yakalangilila ukuti inkondo ya kusyalikizya ino mauteeko ya untunze yalalwa nu Wene wakwe Leza, ika-amwa ukuti Alamagedoni, nanti Amagedoni.

19, 20. Uzye i cani icalenga ukuti ukulonda kwakwe Leza kutacitika ndakai?

¹⁹ Uzye i vyani vino Uwene wakwe Leza ulacita ukuomvya inkondo yakwe Amagedoni? Iusyini vino twasambiliile ukuti ali vino Leza akaalonda. Yeova akaalonda ukuti insi iye Paladaise uwa kwikalamo antu aololoke nupya amaliilike aatemwa ukumuombela. Ngi cani cino ukulonda kuko kutaafikiliziwa ndakai? Inkoleelo, swensi kwene sweswe ya kaifya, nupya tukalwala nu kufwa. Nomba umu Cipande 5 twasambiliile ukuti Yesu watufwiliile pakuti tuce tuye nu umi wa pe. Limwi mucili mukwiusya amazwi yano twasambiliile aalembwa umwi Landwe lyakwe Yoane aakuti: “Leza watemilwe amu nsi nga apeela Mwana wakwe uwavilwe wenga, kuti wensi wino wataila munoli atakalowe, lelo aye nu umi wape.”—Yoane 3:16.

²⁰ Uwavya nauze u wakuti antu aingi ndakai yakacita ivintu iviipe. Yakasomba, nu kucita upulumusi. Yasilonda ukucita ukulonda kwakwe Leza. Antu yonsi aakacita iviiipe yalonoonwa umu nkondo yakwe Leza iya Alamagedoni. (Masamu 37:10) Nomba umulandu nauze uwalenga ukuti ivintu vino Leza akaalonda vitacitika, u wakuti amauteeko yasikomelezya antu ukucita ukulonda kwakwe Leza. Mauteeko aingi yatakwata amaka, yamwi nayo yaakalala imyenzo, nga yauze nayo yaitemwa. Fwandi ali cino Baibo ikati: “Antu yamwi aamaka yakateeka auze mu unkalwe.”—Kasambilizya 8:9.

21. Uzye Uwene ulacita vyani pakuti ukulonda kwakwe Leza kukacitike pano nsi?

²¹ Lino inkondo ya Amagedoni ilasila, kulaya sile uteeko onga uulateeka antu, kuli kuti Uwene wakwe Leza. Uwene uuwo ulacita ukulonda kwakwe Leza, nupya ulazifya ivintu wakwe cimwi. Icintu conga cino ulacita i cakuti, ulasisyapo Satana ni viwa vyakwe. (Umbwilo 20:1-3) Lyene ilambo lyakwe Yesu lilaomba ningo sana, pano lilalenga ukuti antunze yataca yaalwala nu kufwa. Pa nsita yiya lino Uwene ulateeka, antu yalikalilila amanda pe. (Umbwilo 22:1-3) Insi yonsi ilaya paladaise. Nga alino Uwene ulalenga ukuti ukulonda kwakwe Leza kukacitike pano nsi, nupya ulacindika izina lyakwe Leza. Uzye icintu cii cilozile mwi? Cilozile umukuti uku nkoleelo lino Uwene wakwe Leza ulaateeka, antu yonsi yalaacindika izina lyakwe Yeova.

A LILACI LINO UWENE WAKWE LEZA ULAZIFYA IVINTU?

22. Uzye twasininkizya uli ukuti Uwene utiizile pa nsita ino Yesu wali pano nsi, nanti apa nsita kwene ino waswiliile ukwiyulu?

²² Lino Yesu wanenyile asambi yakwe ukupepa yati, “Uwene wako wize,” cali usininkizyo wakuti apa nsita yiya Uwene wali ala utatala wiza. Uzye wizile pa nsita lino Yesu waile ukwiyulu? Awe foo, pano Petulo na Paulo yalemvile ukuti lino Yesu watuutulwike nu kuswilila ukwiyulu, usowelo wa pa Masamu 110:1 wafikiliziwe, uwakuti: “Umwene [“Yeova,” NW] wanenyile Umwene wane ati, ‘Ikala kwi kasa lilunji kufika lino ndakucimvizya anisi yako yaye wa cilimba ca ngazo zyako!’” (Milimo 2:32-34; Ayebulai 10:12, 13) Fwandi kuli kuti Yesu waile atandika ukuloleela.

23. (a) Uzye a lilaci lino Uwene wakwe Leza watandike ukuteeka? (b) I vyani vino tulasambilila umu cipande cilondeliilepo?

²³ Uzye waloleeliile pa myaka iinga? Uku ma 1870 asambi yakwe Baibo acumi yaapendulwike ningo nu kuzana ukuti Yesu wali nu kuloleela ukufika umu mwaka wa 1914. (Ivyeo Navyuze apa mwaka uu vili pa mafwa 216 kufika uku 218) Ivintu ivyatandiike ukucitika ukutandika umu 1914 vikasininkizya ukuti vino asambi yakwe Baibo yapendulwike, vyali i vya cumi. Nupya, ukufikiliziwa kwa usesemo wa muli Baibo nako kukalanga ukuti umu 1914 ali muno Klistu watandiike ukuteeka umu Wene wa mwiyulu. Acino Fwandi, tuli umu manda ya kusyalikizya muno Satana “watasyala sile ni nsita inono.” (Umbwilo 12:12; Masamu 110:2) Nakapya, tungalanda ukwaula kutwisika ukuti likwene sile Uwene wakwe Leza wasya uzifye ivintu pakuti ukulonda kwakwe Leza kukacitike pano nsi. Uzye lisi landwe lisuma sana lii? Uzye namwe mwataila ukuti i cumicumi ivintu vii vilacitika? Icipande cilondeliilepo cilamwavwa ukusininkizya ukuti Baibo ikasambilizya ukuti ivintu vii vilacitika.