Uzye Kwaya Icifulo Cimwi Kuno Afwe Yakaaya?

UMU ndimi zino Baibo yatandikiile ukulembelwamo, yaomvyamo izwi lya ciYebulai ilyakuti sheʼohlʹ ni izwi lya ciGliki ilyakuti haiʹdes maila ukucila pali 70. Amazwi yaa yoili yakalozya ukumfwa. Muli ya Baibo yamwi aasenulwa umu ndimi zipusane-pusane, yaomvya amazwi yakuti “ilindi,” “kuzimo,” nanti “ciwina” pa kupiliula sheʼohlʹ nanti haiʹdes. Lelo, umu ndimi zingi mutaaya amazwi aangalondolola ningo muno amazwi yaayo aciYebulai ni ciGliki yaalola. Uzye amazwi yaa yakapiliula cani? Lekini tulole vino amazwi yaa yaomviwa muli Baibo apa malembelo apusane-pusane.

Pali Kasambilizya 9:10 pakati: “Kuzimo [sheʼohlʹ] kutalaya ivicitwa, kutalaya amelenganyo, kutalaya ukumanya, kutalaya amano, nga kuko akuno ukuya.” Uzye cii cikupiliula ukuti izwi lyakuti sheʼohlʹ kulikuti uku malindi kuno limwi twazisile wino twatemilwe? Awe. Pa kulanda pa cifulo ca kuziikako afwe, nanti ilindi, Baibo ikaomvya mazwi yauze aa ciYebulai ni ciGliki, isiomvya sheʼohlʹ nanti haiʹdes. (Utandiko 23:7-9; Mateo 28:1) Nupya, Baibo isiomvya izwi lyakuti sheʼohlʹ ukulozya uku cifulo cino antu anono sile yakazikwako, wa cifulo ca kuziikako sile ya lupwa, nanti ilindi lyonga ilikulu muno yaziika antu aingi.—Utandiko 49:30, 31.

Nga lyene izwi lyakuti sheʼohlʹ likalozya uku cifulo ca musango ci? Izwi lyakwe Leza likatulanga ukuti amazwi yakuti sheʼohlʹ na haiʹdes, yakaalozya uku cintu cimwi icikulu sana ukuluta ni lindi ilikulu cuze muno yangaziika afwe aingi. Amazwi aaya pali Ezaya 5:14 yakalanda pali sheʼohlʹ ukuti “umukolomilo wa mfwa ukulolela, nga watiwasama akanwa apakuti uyatunkile.” Nanti cakuti sheʼohlʹ wamila mpiti antu aingi cuze aafwa, cikaloleka ukuti lyonsi acili akalondelapo na yauze. (Mapinda 30:15, 16) Ukupusanako ni cifulo cakuziikako antu ukungaziikwa afwe aanono sile, “imfwa ni lindi [sheʼohlʹ] vitatala viikuta.” (Mapinda 27:20) Sheʼohlʹ asizuula icakuti ni ncende icepa. Kutaaya icipendo ca yafwe aangayako pakuti kuzuule. Fwandi, Sheʼohlʹ, nanti haiʹdes, cisi cifulo icaya uku ncende imwi kuno antu ndi yaayako yangaya yakacita ivilivyonsi. Lelo, i lindi lya yantu yonsi aafwa, kulikuti icifulo ca unkolanya kuno afwe aingi cuze yaalaala.

Vino Baibo ikasambilizya pa kutuutuluka kwa yafwe vikatwavwa ukumanyilapo navyuze pa upiliulo wakwe sheʼohlʹ na haiʹdes. Izwi lyakwe Leza likalanda pali sheʼohlʹ na haiʹdes ukulozya ukumfwa yakwe yaayo aalatutuluka.a (Yobo 14:13; Milimo 2:31; Umbwilo 20:13) Izwi lyakwe Leza nupya likalangilila ukuti yaayo aaya uku sheʼohlʹ, nanti haiʹdes, asi sile yaayo aombelanga Yeova, lelo, na yaaya kwene akuti yatamuombelanga akuno yaaya. (Utandiko 37:35; Masamu 55:15) Acino Baibo ikasambilizizya ukuti “antu onsi asuma na aipe, yalazyukuka kufuma ku afwe.”—Milimo 24:15.