Umwiuvi litu mutaaya yasimapepo aakalipilwa. Swemo tukaomba wakwe vino icilongano ca kutandikilako ica Ina Klistu caombanga; twakwata angalizi aasontwa ‘aakacema iuvi lyakwe Leza.’ (Milimo 20:28) Ya eluda yaa, yalunduluka sana muli ukapepa, yakatungulula icilongano nu kutucema “kwaula kupatikiziwa, nupya asi pa mulandu wa kulipilwa, lelo pa mulandu wakulondesya ukutumikila.” (1 Petulo 5:1-3) Uzye mwamanya imilimo ino yakatucitila?

Yakatusakamala nu kutucingilila. Ya eluda yakaomvya Malembelo pa kutungulula icilongano nu kwavwa amu cilongano ukutwalilila ukuya yacuza yakwe Leza. Ya eluda yamanya ukuti Leza wayapeela umulimo uu ucindame, ali cino yasititikizya antu yakwe, lelo yakatwazwa ukutwalilila ukuombela Leza nu luzango. (2 Kolinto 1:24) Yaaya wakwe kacema aakasakamala imfwele yonga na yonga, pano nayo kwene yakasumbako sana amano ku muntu wenga na wenga uwa mu cilongano.—Mapinda 27:23.

Yakatusambilizya vino tungaacita ukulonda kwakwe Leza. Cila-mulungu ya eluda yakatungulula ukulongana kwa pa cilongano pa kuti yaatukomelezya. (Milimo 15:32) Aonsi yaa yaaipeelesya ukutungulula umu mulimo wa kusimikila; yakaombela pamwi naswe, nu kutusambilizya ivya kuomba umulimo kwene uu.

Yakatukomelezya fwensi. Pa kuti swensi kwene cila-muntu yaatusakamala muli vyakwe Leza, ya eluda aapa cilongano yakatutandalila uku mang’anda, nanti ukulanda naswe apa Ng’anda ya Wene kwene pakuti iyatukomelezya ukuomvya Malembelo.—Yakobo 5:14, 15.

Nanti i cakuti yakaomba vii umu cilongano, ya eluda aingi yakaomba ni ncito izingayazwa ukusunga indupwa; nazyo kwene incito zii zikalondeka insita sana nu kusumbako sana amano. I cumicumi ya eluda yakalondeka ukupeelwa umucinzi.—1 Tesalonika 5:12, 13.

• U mulimo ci uno ya eluda aapa cilongano yakaomba?

• I vyani vino ya eluda yakacita ku kulanga ukuti yatusakamala?

Baibo ikatusambilizya ukuti kwaya maumba yaili aa Ina Klistu aonsi, aapeelwa imilimo yakuomba umu cilongano—kuli kuti “angalizi na aomvi.” (Filipi 1:1, NW) Ilingi kwene aonsi yaa yakaya aingi umu cilongano. Uzye i milimo ci ino aomvi mu cilongano yakatucitila?

Yaka-azwa iumba lyakwe ya eluda. Aomvi mu cilongano a onsi akoma muli ukapepa, nupya yatailwa, alino yakaombesya, yamwi aacilumendo, nga yauze aakalamba. Yakaombesya umu milimo ipusane-pusane iikaazwilizya imiombele ya cilongano; na cii, cika-avwa ya eluda ukwika mano uku mulimo wa kucema.

Yakatucitila ivintu ivingi vya kutwavwa. Aomvi yamwi, yakaomba umulimo wa kuzengela aakwiza umu kulongana. Yauze yakaombela uku viombelo vya mazwi, ku kutupeela mabuku yano tukulonda, kupenda impiya zino tukasangula, nanti ukutupeela ivifulo ukwa kuyasimikila. Nakupya, yaka-azwilizya uku kuzifya Ing’anda ya Wene. Limwi ya eluda yanganeena aomvi yaa ukwavwilizya akoloci. Aomvi ya mu cilongano yakaitemelwa ukuomba imilimo yonsi ino yapeelwa; na cii, cikalenga amu cilongano yonsi ukupeela umucinzi uku yonsi yaa.—1 Timoti 3:13.

Yakaombesya ukutulanga vino swe Ina Klistu tufwile ukuya. Aonsi aakasontwa ukuya aomvi, yaaya ni miyele isuma iya ukapepa. Nga yakupeela malyasi apa kulongana, tukakomeleziwa cuze. Yakaombesya umu mulimo wa kusimikila, icakuti nafwe tukalonda ukuombesya vivyo kwene. Lyene vino aomvi yaa yakaombela pamwi ni umba lyakwe ya eluda, cikalenga ukuti swensi kwene umu cilongano twaya nu luzango nu kuombela pamwi. (Efeso 4:16) Kukaaya insita lino aomvi yaa nayo yakasontwa ukuya ya eluda.

• Uzye aomvi ya mu cilongano a onsi ya musango ci?

• Uzye aomvi yaka-azwa yakutuuli icilongano pa kuti caomba ningo?

Malembelo ya ciGliki aa Ina Klistu yakalanda sana pa onsi yaili, Banaba nu mutumwa Paulo. Aonsi yaa yaali aangalizi aatandalilanga ivilongano. U mulandu ci uno yatandalilanga vii? Yasumvile amano kuli vino aina yao yaombelanga Leza. Paulo walanzile ati “tuswilile tukatandalile aina itu,” kulikuti walondanga ukuyalola vino yaali. Waitemiilwe ukupita intamfu itali sana pakuti akayakomelezye. (Milimo 15:36) Vivyo kwene ali vino na angalizi aakatandalila ivilongano ndakai yakalondesya ukucita.

Yakaiza uku kutukomelezya. Umwangalizi wa ciputulwa wenga na wenga akatandalila ivilongano ukufika na kuli 20 nu kulutapo maila yaili pa mwaka, nu kwikala pa cilongano conga na conga umulungu onga. Aonsi kwene yaa yakatwazwa sana lino yakuomvya vino yaasambilila; napya ndi cakuti yatwala, yamama yao nayo yakatukomelezya sana. Yakaezya na maka ukuti yamanye ance na ikolo, nupya yakalonda sana ukuomba naswe umu mulimo wa kusimikila nu kutungulula masambililo yakwe Baibo. Angalizi kwene yaa yakaombela pamwi na ya eluda umu mulimo wa kucema nu kutukomelezya, nupya yakapeela malyasi lino tukulongana pa cilongano na lino tuli uku maukongano akalamba..​—Milimo 15:35.

Swensi kwene yatusumbako amano. Angalizi ya viputulwa yaasumbako sana amano kuli vino yonsi amu vilongano yakaomba. Yakakomaana na ya eluda na aomvi ya mu cilongano ku kupituluka muli vino icilongano cikulunduluka, alino nu kuyazwa pa kuti yaomba ningo. Nakapya, yaka-avwa ya painiya pa kuti yalunduluka umu mulimo wa kusimikila, kupya angalizi yaa yaatemwa ukumanyana na aatandike likwene ukulongana pamwi nafwe nu kuvwa vino yakulunduluka muli ukapepa. Cila-mwangalizi akaipeelesya ukuya ‘umuomvi unji kukutwazwa.’ (2 Kolinto 8:23) Tulinzile ukuyakolanya aonsi yaa pakuti nafwe tutwalilile mu utailo nu kuombela Leza.—Ayebulai 13:7.

• U mulandu ci uno angalizi ya viputulwa yakatandalila ivilongano?

• Mungacita uli pakuti mwasambilila ivingi ndi angalizi yaa yiza apa cilongano?

Ndi kwacitika uzanzo, ya Nte Yakwe Yeova yakapekanya zuwa-zuwa ivintu ku kwazwa aina yao aali umu uzanzo. Ukuombesya kuu kukalangilila vino twatemwana. (Yoane 13:34, 35; 1 Yoane 3:17, 18) I vyani vino tukacita pa kwavwa yano yaponelwa na mazanzo?

Tukasangula impiya. Lino kwali icipowe icipisye umu Yudeya, Aina Klistu akutandikilako amu Antioki yatumile impiya kuli ya kapepa yauze aku Yudeya. (Milimo 11:27-30) Naswe kwene ndi tuvwa ukuti aina itu uku ncende zimwi yali ni intazi, tukatumako imisangulo ino tukasangula umu cilongano pakuti yakakalilemo ivikulondekwa.—2 Kolinto 8:13-15.

Tukayapeela ivikalondekwa. Ya eluda a ku ncende ukwacitikila uzanzo yakaombesya ukulonda yonsi amu cilongano conga na conga pa kuti iyamanya ndi cakuti aina itu yonsi apano yali nupya yali ningo. Komiti ikasakamala aali mu mazanzo iliyo ikaangalila umulimo wa kupeela yonsi ivyakulya, manzi akumwa, ivyakuzwala, umwakulaala, ni milembo. Ya Nte aamanyako ukuomba imilimo imwi yakafuma uku mpanga zya kutali nu kuilipilila aineco ukuyafika uku ncende ukwacitika uzanzo pa kuti yakazwilizye ukuzifya mang’anda ya ina itu na Mang’anda ya Wene ati-yononeka. Ukulemana kuno twalemana umwiuvi litu u kukatwavwa ukupekanya zuwa-zuwa ivya kwazwilizya aina itu lino yali na mazanzo. Nanti cakuti tuka-avwa “yano twataila nayo,” tuka-avwa na antu kwene yano tusipepa nayo.—Galatiya 6:10, NW.

Tukayakomelezya ukuomvya amalembelo. Antu aaponelwa nu uzanzo yakalondeka ukuyakomelezya sana. Lino kwacitika amazanzo, Yeova aakatupeela amaka, pano “Leza ali ntulo ya kutekeziwa konsi.” (2 Kolinto 1:3, 4) Tukalanzyanya na aaponilwe na mazanzo pa malayo ya muli Baibo; yakateekeziwa lino tukuyaneena ukuti Uwene Wakwe Leza ulafumyapo amavya aakacuzya antu.—Umbwilo 21:4.

• I vyani ivikalenga ukuti ya Nte yazana zuwa inzila ya kwazwilamo yano yaponelwa nu uzanzo?

• U wavwilizyo ci uwa mu malembelo uno tukapeela aapusuka umu uzanzo?

Lino Yesu wali apiipi nu kufwa, walanzyanyizye na alondezi yakwe yani—Petulo, Yakobo, Yoane, na Andeleya. Lino Yesu wasoowelanga pa vintu ivyali nu kucitika ivyakumanyilako ukuti akuteeka, uzizye icuzyo icicindame sana ati: “Uzye lyene, muomvi mutailwe nu wamano aweni?” Muomvi wiyo walumbulwa ukuti “Mwene wakwe wamucita kangalila uwakulolela aomvi amu ng’anda yakwe, nu kuyapela ivyakulya vyao pa nsita ilinge.” (Mateo 24:3, 45; Mako 13:3, 4) Yesu wanenanga asambi yakwe ukuti wene ali “Mwene” uwali nu kusonta yaayo alaapeela alondezi yakwe ivyakulya ivingi ku nsita ya mpelelekezyo. Uzye a weni uwali nu kuya umuomvi wiyo?

I umba ilinono ilya yalondezi yakwe Yesu apakwa nu mupasi. “Umuomvi” wii aali Umba Ilikatungulula Ilya Nte Zyakwe Yeova. Iumba lii, likapekanyizya ya kapepa yakwe Yeova yauze ivyakulya ivyaya umwi Zwi Lyakwe Leza. Swensi kwene vino twataila i vyakuti umuomvi wii umutailwe aakatupeela ‘ivyakulya pa nsita ilinge.’—Luka 12:42.

Likasakamala amu ng’anda yakwe Leza. (1 Timoti 3:15) Yesu wapeezile umuomvi kwene wii umulimo ukome cuze uwa kutungulula umulimo wa mwiuvi lyako Yeova pano nsi—kuli kuti ukusakamala ivikulwa, impiya na vyunze ivikaomviwa, nu kutungulula umulimo wa kusimikila, alino nu kutusambilizya ukupitila umu vilongano muno twaya. Lyene, pa kutupeela ivintu vino tukalonda pa nsita ilinge, ‘umuomvi mutailwe uwa mano’ akatutumila ivyakulya vya muli Baibo kuomvya amabuku yano tukaomvya umu mulimo witu, alino nu kupitila umu kulongana kuno tukakwata pa cilongano na maukongano akalamba.

Umuomvi wii watailwa pano akalondela icumi ca muli Baibo, kapya akaomba umulimo wa kukosoola ilandwe lisuma, nakupya umuomvi kwene wii u wa mano pano akaomba ningo sana umulimo wakwe Klistu pano nsi. (Milimo 10:42) Yeova aka-avwa umuomvi wii ukulunduluka.—Ezaya 60:22; 65:13.

• A weni wino Yesu wasonsile kuti aasambilizya asambi yakwe ivya muli Baibo?

• U mu nzila ci muno umuomvi waela umutailwe nupya uwa mano?

Mu nsita ya atumwa, kwali iumba ilinono uku Yelusalemu umwali “atumwa na ikolo,” ilya tungululanga nu kupingula pali vino iuvi lya Ina Klistu apakwe lyalinzile ukuomba. (Milimo 15:2) Pa kupingula ivya kucita, yatandikilangapo ukulanzyanya vino Malembelo yakataka, nupya yuvwilanga vino umupasi wayatungululanga. (Milimo 15:25) Na ndakai kwene kwaya iumba ilikatungulula.

Leza akaomvya iumba lii ukucita vino akaalonda. Aina itu apakwe aaya umwiumba likatungulula yatemwa sana Izwi Lyakwe Leza, nupya yamanya ivingi sana pa vya mipepele. Cila-mulungu yakakomaana uku kulanzyanya vino ya Nte yonsi yakaomba ni vikalondekwa. Iumba lii likaomba ndi vino cali umu nsita ya atumwa, pano nayo kwene yakatupekanyizizya amazwi amuli Baibo ukuomvya makalata, nanti ukutuma angalizi aakatandalila ivilongano, alino ni inzila zyuze. Kuomba vii kukalenga aomvi yakwe Leza ukwelenganya nu kucita ivikolane. (Milimo 16:4, 5) Iumba Ilikatungulula, lika-angalila umulimo wa kupekanya ivya kusambilizya antu izwi lyakwe Leza, nupya lyasumba sana amano ku mulimo wa kusimikila pa Wene, alino likaangalila umulimo wa kusonta aina itu pa milimo imwi umu cilongano.

Lyasumba sana mano kuli vino umupasi wakwe Leza ukatungulula. Iumba Ilikatungulula likauvwila vino Kateeka wa Papelapela, Yeova, ni ntunguluzi ya cilongano, Yesu, yakayatungulula. (1 Kolinto 11:3; Efeso 5:23) Aonsi aaya umwiumba lii yasyailola ukuti aliyo yaaya intunguluzi zya antu yakwe Leza. Yene, pamwi na apakwe yauze, ‘yakalondela Umwana wa Mfwele [Yesu] konsi kuno akuya.’ (Umbwilo 14:4) Cumi kwene, amwiumba likatungulula yakataizya sana nga tukuyapepelako nu kupepelako umulimo uno yakaomba.

• Aaweni aali umwiumba ilyatungululanga umu nsita ya atumwa?

• Uzye Iumba Ilikatungulula ndakai likauvwila utunguluzi wakwe Leza umu nzila ci?

Izwi lyakuti Betele lyafumile ukwizwi lya ciYebulai ilikapiliula ukuti “Ng’anda Yakwe Leza.” (Utandiko 28:17, 19) Ivifulo ni vikuulwa ivikalamba vyakwe ya Nte Yakwe Yeova vino yikapo maofesi umu mpanga izipusane-pusane, ali Betele; ni zina lii lyalinga, pano apa Betele ali pano umulimo wa kusimikila ukatungulwilwa. Iumba Ilikatungulula lyayela apa maofesi yakalamba uku New York, U.S.A., kuli kuno yakaangalila imilimo iingi ikaombwa pa maofesi anono aaya umu mpanga izipusane-pusane. Yonsi aakaombela paapa yaaya ulupwa longa luno yakati ulupwa lwa Betele. Yakaikala pamwi, kuliila pamwi, nu kusambilila Baibo pamwi.—Masamu 133:1.

Pa Betele paya aomvi aipeelesya ukuomba. Pa Betele paya Aina Klistu aonsi na anaci aipeelesya ukucita vino Leza akaalonda nu kuombela ku kutungilila ivya Wene Wakwe Leza. (Mateo 6:33) Yonsi aakaombela paapa yasyafola, nomba, yakayapekanyizya umwakwikala, ivyakulya, alino na kalupiya kakukalilamo utwakuzwala nu tuntu tuze utukalondekwa. Cila-muntu wakwata vino akaomba; yamwi yakaombela umu ofesi, ku kweleka ivyakulya, nanti ukupekanya umwakuliila. Kwaya na yamwi aakaombela uku kupulinta nu kupanga mabuku, yauze nayo ku kuzifya umwakulaala, ukufula ivyakuzwala, ukulungisya ivintu, nanti sile imilimo yuze ipusane-pusane.

Antu ayapo yakaombesya umu mulimo wa kutungilila ukukosoola pa Wene. Umulandu ukalamba sana uno kwayela Betele u wakuti antu aingi sana yamanye icumi ca muli Baibo. Na kabuku kwene kaa, yaakapangiile uku Betele pakuti antu aingi yasambilile. Iumba Ilikatungulula lyapekinye ukuti kuye akabuku kaa, lyene lino kalemvilwe umu Cizungu, yakatumile apa Intaneti ku maumba apusane-pusane mu nsi yonsi pa kuti yakasenule umu ndimi zipusane-pusane, nu kukapulinta pali vimasini vikulu cuze ivyaya umu maBetele yamwi-yamwi, alino nu kukatuma uku vilongano ivingi ukuluta pali 110,000. Pa kuti ulupapulo lufike uku yantu, aomvi aapa Betele yakaombesya, pano cino yacindamika sana u kutungilila umulimo wa kukosoola ilandwe lisuma.—Mako 13:10.

• Aaweni aakaombela pa Betele, nupya yakayasakamala uli?

• U mulimo ci uulinzile ukuombwa zuwa uno aomvi ya pa Betele yakatungilila?

Aomvi ya pa Betele yakaombela umu viputulwa ivipusane-pusane ku kutungilila umulimo wa kusimikila umu mpanga yonga nanti mpanga izingi. Yamwi yakasenula mabuku, yamwi nayo yakaombela uku kupulinta ya mangazini, kupanga mabuku, nu kulonga impapulo, alino yauze nayo yakaombela uku kukopa mazwi nanti mavidyo, nanti sile ukusakamala imilimo yuze.

Komiti ya Musambo ika-angalila imilimo. Iumba Ilikatungulula lyapeela Komiti ya Musambo umulimo wa kwangalila maofesi anono; muli komiti yonga na yonga mukaya ya eluda amanya sana ukuomba yatatu nanti ukulutapo. Komiti iyo ikanena Iumba Ilikatungulula vino umulimo wa kusimikila ukuombwa, na mavya aakacitika umu mpanga ino komiti iyo ika-angalila. Lyene malyasi yaayo yaka-avwa Iumba Ilikatungulula ukusoolola amazwi yano yalalemba umu mabuku aalafuma uku nkoleelo ni vilaomviwa apa kulongana na pa maukongano akalamba. Aimilizi yi Umba Likatungulula yakayatuma ukuya uku maofesi yakwe ya Nte nu kuya-avwa Komiti ya Musambo pakuti amuli komiti yaaomba ningo. (Mapinda 11:14) Kukaya utantiko usuma cuze kuno umwimilizi wa cisinte akalanda ilyasi ukwiumba lya antu aakaikala uku ncende ino iofesi lyayelako.

Yakatungilila ivilongano. Pa ofesi paaya aina aakazumilizya ukuti ivilongano ivipya vipangwe, nu kuombela pa kusonta ya eluda na aomvi ya mu cilongano. Aonsi yaayo yakatungulula imiombele yakwe ya painiya, ya misyonali, na angalizi ya viputulwa umu mpanga ino iofesi lilyo lika-angalila. Yakapekanya maukongano anono na akalamba, nu kwangalila makuule ya Mang’anda ya Wene, alino nu kusininkizya ukuti mabuku yakutumwa uku vilongano. Imilimo yonsi iikaombwa apa maofesi yakwe ya Nte ika-azwilizya ukuomba ningo umulimo wa kusimikila..​—1 Kolinto 14:33, 40.

• Uzye Makomiti ya Misambo yaka-avwa yakutuuli Iumba Ilikatungulula?

• I milimo ci iikaombwa apa maofesi yakwe ya Nte?

Pakuti tukosoole “Landwe Lisuma” uku yantu “amisango yonsi, ni mitundu ni ndimi ni nko zyonsi,” tukapanga mabuku umu ndimi izingi ukuluta pali 750. (Umbwilo 14:6) Ngu mulimo uu ukome vii, tukauomba tukutuuli? Twakwata aomvi mu mpanga izingi aaka–azwilizya ukulemba mazwi, alino na ya kasenula aingi aipeelesya—nupya yonsi kwene yaa, aa Nte Yakwe Yeova.

Nkoleelo amazwi yakalembwa umu Cizungu. Iumba Ilikatungulula likaangalila umulimo uno Iciputulwa ca Kulemba icayela apa maofesi itu akalamba cikaomba. Iciputulwa cico cikaangalila umulimo wakulemba uukaombwa pa maofesi akalamba na pa maofesi anono yamwi-yamwi. Kukwata ya kalemba apusane-pusane kukatwavwa ukulemba malyasi yano antu amu mpanga izipusane-pusane yakatemwa.

Ndi yapekanya amazwi, yakayatuma kuli ya kasenula. Amazwi yano yalemba umu Cizungu yakayapitulukamo, kuzifyamo nu kuzumilizya ukuti yaya ningo, alino yakayatuma apa Intaneti kuli ya kasenula mu nsi yonsi, pakuti yakasenule, kupitulukamo, nu kuwelengamo ningo-ningo. Yakaombesya ukuomvya amazwi alungikwe ningo nupya “acumi” amu lulimi lwao kukulanda vivikwene ivili umu Cizungu.—Kasambilizya 12:10.

Ya Kompyuta yaka-avwa ukumala zuwa incito. Kompyuta itanga-iombe vino antu yakaomba pa kulemba nu kusenula. Nomba, imilimo ino antu yakaomba ikaombeka zuwa ndi yakuomvya ya kompyuta. Ya Nte Yakwe Yeova yaapanga utantiko wa pa kompyuta uno yakati Multilanguage Electronic Publishing System (MEPS); uuka-avwa ukulemba ivyeo umu ndimi zingi cuze nu kwikamo ivikope alino nu kupekanya ukupulinta.

U mulandu ci uno tukaombesya vii, kula nalino indimi zimwi zikavwangwa sile na antu anono? Umulandu u wakuti Yeova akalonda ukuti “muntu wensi atuulwe nu kumanya icumi.”—1 Timoti 2:3, 4.

• Uzye mabuku itu tukayalemba tukutuuli?

• U mulandu ci uno tukasenwila mabuku itu mu ndimi izingi?

Cila-mwaka, swe ya Nte Yakwe Yeova tukapanga nu kupeela antu Mabaibo na mabuku aakalanda pali Baibo aingi wakwe cimwi kwaula kuyalipilisya. Tukakuula nu kuziifya Mang’anda ya Wene ni vikulwa vyaya pa maofesi. Kupya, tukasakamala aomvi ya pa Betele na ya misyonali, alino nu kwavwilizya anji yano yaponelwa na mazanzo. Limwi mungazunguka muti, ‘Ngi mpiya zya kucitila vyonsi vii, zikafuma kwi?’

Tusyapoka imituulo, imisonko, nanti ukupisyamo akambale pakuti antu yaasumbilamo ulupiya. Nanti cakuti umulimo witu ukalondeka impiya izingi sana, tusyapitamo uku kulenga impiya. Ukuluta pa myaka 100 iyapitapo, lino yaapanzile mangazini wakwe ciili uwa Lupungu Lwa Mulinzi, yalemvilemo yati, tukataila ukuti Yeova aliwe akatutungilila, nu kuti “tutalatala tulenge nanti ukupaapatila antu ukuti yatupeeleko impiya”—mukwai ukufika na ndakai kwene, tutaatala twaleengapo impiya!—Mateo 10:8.

Milimo itu ika-azwiwa ni misangulo ya kuitemelwa. Antu aingi yakataizya sana pa mulimo witu uwa kusambilizya antu Baibo; na cii cikalenga ukuti iyasangwilako. Nupya, ya Nte kwene yakasangwilako sana; pano yakaomvya insita yao, amaka yao, impiya, ni vintu vyuze ku kwavwilizya ukucita vino Leza akalonda umu nsi yonsi. (1 Milandu 29:9) Pa Ng’anda ya Wene na pa maukongano iitu anono na akalamba, paya utumbokosi twa misangulo muno yonsi aakulonda ukusangwilako yakasumbila impiya. Nanti, aakulonda yangasangwilako ukuomvya webusaiti witu uwa jw.org. Ilingi antu aakasangula ayaaya akuti yatakwata ni vyuma; yaya wakwe mukamfwilwa uno Yesu walanzilepo uwasumbiile utumakowili twili mu cipao ca mawila apa ng’anda ya kupepelapo. (Luka 21:1-4) Kulikuti cila-muntu ‘akapaatulako impiya zimwi’ pa kuti “asangule kulingana na vino wataipingula umwisikulu.”—1 Kolinto 16:2; 2 Kolinto 9:7.

Fwemo twasininkizya ukuti Yeova alatwalilila ukwazwa antu aakalonda ‘ukumucindikila uku vyuma vyao’ pakuti yaatungilila umulimo wa Wene, kuti vino akaalonda vikacitike.—Mapinda 3:9.

• Uzye iuvi litu lyapusana uli ni mipepele yuze?

• Uzye imisangulo ino antu yakasangula ikaomviwa umu nzila ci?

Izina lyakuti Ng’anda ya Wene lyalinga, pano amazwi amuli Baibo yano tukasambilila paapa, aa Wene Wakwe Leza, uno Yesu wakosoolanga sana.—Luka 8:1.

Vili vifulo vya kupepelapo kwa cumi. Pa Ng’anda ya Wene ali pano tukapekanyizizya umulimo wa kukosoola ilandwe lisuma ilya Wene. (Mateo 24:14) Mang’anda ya Wene yataakolana umu mikuulile, nomba yonsi kwene yaaya alinge sile, kupya pa Mang’anda ya Wene aingi paya ivilongano viili nanti ukulutapo. Mu myaka inono sile iyapitapo, twakuuzile Mang’anda ya Wene aingi sana (ngu kwankanya, tungati twakuulanga aali 5 cila-wanda) pakuti ivilongano vino vikuvula vikwate umwakulonganila. Nomba uzye tukakwanisya uli vii?—Mateo 19:26.

Yakakuulwa ukuomvya imisangulo ino tukasangula. Misangulo ii yakaituma uku maofesi pakuti yangaiomvya ku kukuulila Mang’anda ya Wene nayauze nanti ukuzifya Mang’anda ya Wene.

Aakakuula Mang’anda ya Wene yakaitemelwa sile yasilipilwa. Mu mpanga izingi, mwaya Utumaumba twa Makuule ya Mang’anda ya Wene. Mu tumaumba tuto mwaya aomvi ya makuule na yakakuula yakuitemelwa aakaya uku vilongano ivipusane-pusane umu mpanga yao kwene nu ku ncende izyayela ukutali sana pakuti yakaavwilizye ivilongano vivyo ukukuula Mang’anda ya Wene. Mu mpanga zyuze, ya Nte aamanya ningo umulimo wa kukuula yaasontwa ukwangalila umulimo wa kukuula nu kuzifya Mang’anda ya Wene uku mpanga ino yaayelako. Nanti cakuti ponsi pano yakukuula pakaya antu aasambilila ivya makuule, amu cilongano cino yakukuulila aliyo yakavulapo. Umupasi wakwe Yeova, alino nu kuombesya kwa antu yakwe, i vikalenga ukuti umulimo waombeka ningo.—Masamu 127:1; Kolose 3:23.

• U mulandu ci uno tuka-amila ivifulo vya kupepelapo tuti Mang’anda ya Wene?

• Tukakwanisya tukutuuli ukukuula Mang’anda ya Wene umu nsi yonsi?

Pa Mang’anda ya Wene aa Nte Zyakwe Yeova paya izina lyakwe Leza ilya muzilo. Fwandi, tukalola ukuti ukuziifya icikulwa ciici kuti caloleka ningo, kwaziipa, pano ndi tukucita vivyo, ala tukupepa Leza. Antu yonsi yangaombako umulimo uu.

Ndi twamala ukulongana, namwe mungaaziifyako. Lyonsi lino twamala ukulongana, aina na yankazi yakaitemelwa ukuziifyako umu Ng’anda ya Wene patali-patali. Umuku onga cila-mulungu kukaaya ukuziifya sana umukasi nu kunzi. Eluda nanti umuomvi wa pa cilongano akaangalila umulimo nu kusininkizya ukuti imilimo yonsi yaombwa. Kulingana na kuno mwayela, kwaya imilimo wakwe, ukupyela, ukukolopa, ukupukuta ivintu, ukutantika ningo ivilimba, kuzifya umu vimbusu, kuzifya mawindo, kusumba ivikoona, nanti ukuzifya ukunzi na pa musolo. Lyene, umuku onga pa mwaka kukaaya uwanda wa kuziifya vyonsi ivyaya apa Ng’anda ya Wene. Nga tukusendako na ana itu kuti yakaombeko utumilimo tumwi, ala tukuyasambilizya ukucindika icifulo cino tukapepelapo.—Kasambilizya 5:1.

Mwa-azwilizyako ukuombela pano pakulondekwa ukuziifya. Cila-mwaka kukaaya ukuceeceta Ing’anda ya Wene mukasi nu kunzi. Ndi yazana ukuti pali pamwi apasi ningo, kukaya ukuzifyapo pakuti Ing’anda yaloleka ningo, na cii cika-avwa ukukanasumba impiya izingi ku vyakuziifya. (2 Milandu 24:13; 34:10) Ing’anda ya Wene ino yakasakamala, yaziipa ukupepelamo Leza witu. Lyonsi lino tukuombako umulimo wa kuziifya Ing’anda ya Wene, ala tukulanga vino twatemwa Yeova, na vino twacindika icifulo ca kupepelapo. (Masamu 122:1) Lyene aikala-muzi nayo yakamanya ukuti fwandi tukapepa Leza wa cumi.—2 Kolinto 6:3.

• U mulandu ci uno tutafwile ukutazyela icifulo ca kupepelapo?

• I vyani vino tukacita pa kuti Ing’anda ya Wene iyaaya iyausaka lyonsi?

Uzye mungatemwa ukulondelezya ivyeo ivingi pa kuti mumanye sana Baibo? Uzye mukalondesya ukumanya sana ilembelo limwi, nanti umuntu, incende, nanti icintu cimwi cino yalanda muli Baibo? Nanti uzye mukatala mwelenganyapo ndi cakuti Izwi Lyakwe Leza lingamwavwa pa ntazi imwi ino mwakwata? Nga avino caya, muce muomvye laibulale ya pa Ng’anda ya Wene.

Mukazanwa impapulo izika-avwa ukulondelezya ivyeo. Limwi, mutali mukwate impapulo zyonsi zyakwe ya Nte Yakwe Yeova izikalanda pali Baibo umu lulimi lwinu. Nomba, laibulale ya pa Ng’anda ya Wene yakwata impapulo izingi kumwi ni izipya. Limwi laibulale iyo ingakwata Mabaibo apusane-pusane, ni buku likalondolola mazwi, na mabuku asi yakwe ya Nte. Nga mukulonda, mungaaomvya laibulale lino mutatala mwatandika ukulongana nanti lino mwafuma. Ndi cakuti pa Ng’anda ya Wene paya kompyuta, limwi yikapo Watchtower Library. Uli utantiko wa pa kompyuta uwakwata impapulo izingi cuze nupya wangupala ukuomvya ndi mukulonda ukuvwikisya izwi limwi ilya muli Baibo nanti ilembelo.

Ika-azwa asambi amu kulongana kwakuti Swe Ina Klistu nu Mulimo Witu. Mungaomvya laibulale ya pa Ng’anda ya Wene lino mukupekanya amalyasi yano yamupeezile. Umwangalizi wa kulongana kwa Ina Klistu nu Mulimo aliwe aka–angalila laibulale.

Baibo ikalondolola ukuti pa “kumanya Leza” tufwile ukuitemelwa ukulondelezya ivyeo wakwe vino tungalondelezya “icuma cimwi cino yafisa.” (Mapinda 2:1-5) Laibulale ya pa Ng’anda ya Wene ilamwavwa ukulondelezya ivyeo vino mukulonda.

• I vyani ivyaya muli laibulale ya pa Ng’anda ya Wene vino mungaomvya?

• Aaweni aangamwavwa ukumanya ivya kuomvya laibulale?

Yesu Klistu wanenyile alondezi yakwe ati: “Mwaengesa wa luswepo pa antu onsi kuti yalola imilimo inu isuma, nga yalumbanye So uwa mwiyulu.” (Mateo 5:16) Fwandi, swemo tukaomvya ningo iviombelo vya ndakai ukwikako sile na Intaneti. Pa webusaiti itu, iya kuti jw.org, paya ivyeo ivingi pali vino ya Nte Yakwe Yeova yazumilamo na vino yakaomba. Uzye i vyeo ci vivyo?

Paya amasuko amuli Baibo uku mauzyo yano antu yakauzya sana. Mungazana amasuko ku mauzyo yamwi-yamwi ampomvu yano antu yakauzya. Paya utupepala twi landwe utuka– asuka mauzyo yamwi wako kaka akakuti Uzye Ukucula Kulatala Kusile? na kakuti Uzye I Cisinka Ukuti Afwe Yalaya Aumi Nupya? utwaya umu ndimi kuluta pali 600. Mungazanapo na Baibo wa New World Translation mu ndimi ukuluta pali 130, alino na mabuku aingi aangamwavwa ukusambilila Baibo, aali wi buku ilyakuti Uzye Baibo Ikasambilizya Ukuti Uli? alino na yamangazini apya akuti Lupungu Lwa Mulinzi na Loleni! Mpapulo zii izingi mungaziwelengela pa Intaneti kwene nanti ukuvwa vino yawelengela limwi, alino nga mukulonda, mungazikopa umu misango yakukopelamo iyamanyikwa sana wako MP3, PDF, nanti EPUB. Nupya nga mukulonda, mungapulintako vimwi pakuti mupeeleko umwi aakulonda umu lulimi lwakwe! Paya na mavidyo amu ndimi zya uciulu izingi cuze. Mungakopa na mazwi yano yawelenga Baibo mu mazwi atikaanye ningo, nanti vyangalo vya muli Baibo, ni njimbo izisuma cuze zino mungauvwako lino mukupuuza.

Mulazana penepo ni vyeo vya cumi pali ya Nte Yakwe Yeova. Navyuze vino tukaika apa Intaneti a malyasi na mavidyo aakalanga vino tukaomba umu nsi yonsi, ivintu ivikacitikila ya Nte Yakwe Yeova, na vino tukaavwa anji aaponelwa na mazanzo. Mulazana ni vyeo vya kumumanyisya pa maukongano, alino ni vyeo pa maofesi a Nte Zyakwe Yeova.

Vintu vii vikatwazwa ukuyengesa wa luswepo uku yantu yonsi, kumwi na ayela uku ncende zya kutali sana pakuti yamanye icumi. Antu aku mpanga zyonsi, kumwi ni mpanga izyaela uku mpela-mpela ya nsi kuno yakati ku Antarctica, yakasambilila. Cino tukapepelapo i cakuti “Izwi Lyakwe Yeova lyasalanganyiziwa zuwa” umu nsi yonsi pakuti Leza alumbanyiziwe.—2 Tesalonika 3:1, NW.

• Uzye webusaiti ya jw.org ika-avwa ikutuuli antu aingi ukumanya icumi ca muli Baibo?

• I vyani vino mungatemwa ukulonda pa webusaiti itu?