Antu aingi yata ukuya uku macalici pano yakati ndi yaya kuuku, kutaya ivikayavwa ukumanya amasuko uku mauzyo aingi yano yakwata. Nga lyene, u mulandu ci uno cingaziipila ukuti muce muye uku kulongana kwa Nte Zyakwe Yeova? Uzye, ndi mwaca mwaya kweneko, i vyani vino mulaya mukazane?

Mulaya nu luzango cuze pano mulazana antu aakasakamala antu yauze. Mu nsita ya atumwa, aina Klistu yaali umu vilongano muno yakolongananga uku kupepa Leza, ukusambilila Malembelo, nu kukomelezyanya. (Ayebulai 10:24, 25) Ndi yalongana pamwi, yuvwanga ningo sana pano yalongananga na ina yao aali ivyuza vya cumi. (2 Tesalonika 1:3; 3 Yoane 14) Naswe kwene avino tukacita, nupya tukaaya nu luzango cuze.

Cilamwavwa ukumanya ivya kulondela masunde amuli Baibo. Ya kapepa yakwe Leza aalandwapo muli Baibo yalongananga pamwi aonsi, anaci, na ana. Nafwe umu vilongano mwaya aonsi aamanya ningo ukusambilizya, aakaomvya Baibo ukutwazwa ukumanya vino tungaalondela amasunde. (Malango 31:12; Neemiya 8:8) Pa kulongana, kukaaya insita lino aali umwiumba yakalandapo, alino kukaaya nu kwimbila pamwi injimbo; vyonsi vii vikatwavwa ukulangilila vino swe Ina Klistu twaya nu utailo.—Ayebulai 10:23.

Kutaila kuno mwataila Leza kulakomelako. Mutumwa Paulo walembiile aku cilongano cimwi ati: ‘Nkulondesya kumulola kuti kuce kuye ukukomelezyanya mwemo utailo winu nu utailo wane, tuce tukomelezyanye.’ (Loma 1:11, 12) Nga tuli apa kulongana, tukaaya pamwi na yano tukapepa nayo; na cii, cikatwavwa ukuya sana nu utailo nu kulondesya ukuti tuce tutwalilile ukuya ni miyele isuma.

Si muce mwize uku kulongana pamwi naswe pakuti namwe muce muilolele vino tukaipakizya! Tulamuzengela ni nsansa. Tusilipilisya pa kwingila, nupya tusipitamo ukupoka imisangulo.

• Uzye ukulongana kuno tukakwata kwakolana nu kuli kwi?

• I visuma ci vino tulazana nga tukuya uku kulongana kwakwe ya Nte?

Swe yamwi kuno tukalonganila kwatalimpa, alino manda yamwi kukaaya sana matipa nga yatoonya, nomba vyonsi vii visyatulesya ukuya uku kulongana. Ngu, mulandu ci uno ya Nte Yakwe Yeova yakayumilizizya ukuti yakalongane pamwi na ina yao, na lino yali ni ntazi nanti lino yakuvwa ukutonta pa mulandu ni milimo?

Tukakomelezyanya na anji. Paulo walemvile ukulozya uku yantu yano tukalongana nayo ati, ‘twasakamalana nu kwazwana’. (Ayebulai 10:24) Amazwi yaa yakapiliula “ukwelenganyapo sana,” kuli kuti, ukumanyana ningo. Acino fwandi, amazwi yakwe Paulo yakatukomelezya ukuti twaikako mano uku yanji. Ndi twamanyana na yano tukalongana nayo, tuluvwikisya ukuti yamwi yacimvya amezyo aingi aakoline na yano tukapitamo, nu kuti antu yaayo yangatwavwa ukucimvya naswe kwene.

Kukatwazwa ukuya ni vyuza vya mpomvu. Pa kulongana, tukaaya pamwi ni vyuza vya mpomvu, asi antu akuti twamanyana sile nayo. Kukaaya ni nsita zimwi lino tukaizizya pamwi nu kucita ivyakutusesya. Uzye nga tukwizya vii, i visuma ci vino tukakwata? Alino tukamanyana sana ukuti fwandi swensi kwene twacindama, na cii, cikalenga twatemwana sana. Lyene ni cikacitika i cakuti lino yamwi yaponelwa ni ntazi, tukayavwa, pano ala yaaya mpiti ivyuza vitu. (Mapinda 17:17) Nga tukukwatako insita yakulanzyanya na yonsi amu cilongano, ala tukulangilila ukuti twasakamalana.—1 Kolinto 12:25, 26.

Tukumukomelezya ukuti antu aakacita vino Leza akaalonda a yano mwandane nayo icuza. Ya Nte Yakwe Yeova aali yacuza aakacita vino Leza akaalonda. Mutaca muleke iciliconsi ukumulesya ukulongana pamwi naswe.

• U mulandu ci uno cazipila ukuti twalongana pamwi na anji?

• Uzye lyene, a lilaci lino mungatemwa ukutandika ukulongana nafwe?

Apa kulongana kwa Ina Klistu akutandikilako, kwayanga ukwimba injimbo, kupepa, alino nu kuwelenga nu kulanzyanya Malembelo. (1 Kolinto 14:26) Na ndakai kwene, avino tukalongana.

Vino tukasambilila i vya muli Baibo nakupya vikatwavwa. Pa wanda wa pa Mulungu swensi kwene tukalongana umu vilongano ivipusane-pusane ku kuvwa ilyasi lya Baibo ilya mamineti 30; lyasi lilyo likalanda pali vino Amalembelo yakatusunda pa miyele ni nsita ino tufisilepo. Fwensi kwene yakatukomelezya ukuyula ya Baibo itu pakuti ituwelengela pamwi na wino akulanda ilyasi. Ilyasi lii ndi lyasila, kukaaya Isambililo lya Lupungu ilya mamineti 60; ali muno yonsi aali umwiumba yakalandapo lino tukulanzyanya icipande conga ica muli mangazini wakuti Lupungu Lwa Mulinzi. Isambililo lii ilya kulanzyanya likatwavwa ukumanya ivya kulondela masunde amuli Baibo. Ivilongano vyonsi ivyaluta pali 110,000 umu nsi yonsi vikasambilila umu cipande icili-cimwi kwene.

Tukasambiliziwa ivya kuya ya kasambilizya yasuma. Pa wanda uze mukasi ka mulungu tukalongana pamwi ukulongana kwa mbali zitatu kuno tukati Swe Ina Klistu nu Mulimo Witu, ituomvya ivyeo ivikaaya umu kabuku akakaiza cila mwezi akakuti Kabuku Kakuomvya pa Kulongana Kwa Ina Klistu nu Mulimo Witu. Ciputulwa ca kutandikilapo mu kulongana kuu, cino tukati, Ivyuma Ivyaya Umwi Zwi Lyakwe Leza, cikatwavwa ukuvwikisya ivyeo ivili umu vipande vimwi vya muli Baibo vino amu cilongano yapekanyizizye limwi uku ng’anda. Kufuma papo tukakwata iciputulwa cakuti, Sambililini Ukuomba Ningo Umulimo wa Kusimikila, muno mukaaya ivilangililo ivikatusambilizya vino tungalanzyanya ningo na antu amazwi yakwe Leza. Kukaaya kasunda wino akatwazwa ukumanya vino tungawelenga ningo nu kulanda ningo pakuti twasimikila ningo. (1 Timoti 4:13) Ciputulwa cakusyalikizyako, cino tukati, Vino Swe Ina Klistu Twaya, cikatwazwa ukuvwikisya vino tungaomvya masunde yano tukasambilila muli Baibo. Mu ciputulwa cii mukaaya nu kulanzyanya kwa mauzyo na masuko ukukatwavwa ukuvwikisya sana ivisinka vya muli Baibo.

Ndi mwaca mwiza uku kulongana, cumi kwene mulatemwa vino mulasambilila ivingi sana nupya ivisuma ivya muli Baibo.—Ezaya 54:13.

• I vyani vino muluvwa pa kulongana kwa Nte Zyakwe Yeova?

• U kulongana ci kuno mungatemwa ukwiza-zanwako pali kuu kuno twalumbula paa?

Uzye imulola apa vikope umu kabuku kaa vino ya Nte Yakwe Yeova yazwite ningo lino yali apa kulongana? Nga fwandi u mulandu ci uno tukasumbilako sana amano uku mizwalile nu kuiemvya?

Kuzwala ningo kukalanga ukuti tukacindika Leza. Ukuya kwene, Leza akalola umu mwenzo wa muntu asi sile vino umuntu akaaloleka ukunzi. (1 Samueli 16:7) Nomba, lyonsi lino twakongana umu kupepa, cino tukalondesya, u kulanga ukuti twacindika Leza alino na yano tukapepa nayo. Tuti limwi umonsi umwi umucindame sana watwama ukuti akatunene vimwi, uzye vwilini tungayako ukwaula ukusakamala pali vino tuzwite na vino tukuloleka? Vivyo kwene avino caya na lino tukulongana, imilolekele itu ifwile ukulanga ukuti twacindika sana Yeova Leza, pano aliwe wacindama ukuluta, nupya twacindika ivifulo vino tukalonganilapo.—Utandiko 18:25.

Kukalangilila imiyele ino twaya nayo. Baibo ikaneena Aina Klistu ukuzwala “vizwalo vya mucinzi vya mano nupya vilingine nu kuzwala.” (1 Timoti 2:9, 10) Vizwalo “vilingine nu kuzwala” cikupiliula ukukana-zwala ivizwalo vya kuyuvwa, nanti ivingalenga yamwi yuvwe uyi, nanti ivikalangizya umwili wa muntu. Lyene, ukusoolola ivyakuzwala “vya mano” kukapiliula ukukana-ilekelezya nanti ukuluta umu cipimo. Masunde yaa yasicuzya antu foo. Nga tukuloleka ningo, ala ‘twacindamika usambilizyo wakwe Katuula witu’ nupya ala tukalonda ukuti “Leza apeelwe mucinzi.” (Tito 2:10; 1 Petulo 2:12) Fwandi, nga tukuzwala ningo apa kulongana, antu yauze yakalola ukuti ukupepa Yeova kwaziipa.

Mutaasakamala ukuti vyakuzwala vino mwakwata vitaalinga ukuya navyo uku Ng’anda ya Wene. Vizwalo ivikalondeka asi vya mutengo sana nanti ivisuma ukuluta, vifwile sile ukuya ivifule ningo, nupya ivikuloleka ningo.

• Uzye ukuzwala ningo lino tukupepa Leza kwacindama umu nzila ci?

• A masunde ci aakatwazwa ukumanya vino tufwile ukuzwala nu kuiemvya?

Ndi cakuti mukasambilila Baibo na Nte umwi, mufwile mukapekanyizizya limwi vino muliza musambilile. Na lino mukulonda ukuya uku kulongana, cikaziipa sana ukupekanya vino mumaya mukasambilile. Icikazipisya u kupekanya lyonsi.

Mwalonda insita isuma ni ncende isuma ukwa kupekanyizizya. Iinsita ci ino mungawelenga ukwaula ivyakumuvulunganya? Uzye a katondo-tondo lino mutatala mwaya uku milimo, nanti a manguzi sana lino ana yalaala? Limwi mutanga mukwanisye ukuwelenga insita ikulu, nomba cingazipa ukuti mwasyako insita ya kuwelenga, kupya mutafwile ukuleka nanti cimwi ukumuvulunganya. Mwalondako incende kuno kusi icongo, imuzimya na ledio, nanti TV, na foni. Ukupepa kuli Leza lino mutatala mwatandika ukuwelenga, kungamwavwa ukwililako uku masakamika yamwi pakuti mwike sile amano ukwi Zwi Lyakwe Leza.—Filipi 4:6, 7.

Mwaconga apali ivisinka, nu kuipekanya ukuyalandapo apa kulongana. Pa kupekanya, mwatandikilapo ukumanya icikulandwapo. Mwatala imwelenganya pa mutwe wa cipande cino mukusambililapo, nu kulola vino utumitwe tunono tukulanda apa cisinka icili umwilyasi lilyo, nga alino mwalolekesya ivikope na mauzyo akupitulukamo aakulanga ivisinka. Lyene nga mwafika paa, mungawelenga palagalafu yonga na yonga nu kuzana masuko uku mauzyo yano yalembela limwi. Mwawelenga amalembelo aalimo, nu kwelenganya vino malembelo yaayo yakutungilila icisinka cino mukusambililapo. (Milimo 17:11) Ndi mwazana icasuko uku cuzyo, mwasilapo nanti ukucongapo pakuti apa kulongana muce mukiusye icasuko. Nga alino apa kulongana, mukakatusye ikasa nga mukulonda kuti mukalandepo mu mazwi inu.

Nga mukupituluka umu masambililo apusane-pusane cila-mulungu, mulamanya ivingi ivya muli Baibo.—Mateo 13:51, 52.

• Uzye mungatantika mutuuli pakuti mwapekanya ivya mu kulongana?

• Mungaipekanya mutuuli pa kuti muce mukalandepo apa kulongana?

Kutandika mpiti, Yeova akaalonda ukuti cila-lupwa lwasyako insita ya kukolongana pamwi, kuti yaakomelezyanya nu kwazwana pakuti yaye sana ya cuza yakwe Leza. (Malango 6:6, 7) Ali mulandu uno ya Nte Yakwe Yeova yakasiilako insita cila-mulungu pakuti yaapepela Leza pamwi umu lupwa—ali pano yakalanzyanya vyakwe Leza ivingazwa sana ulupwa. Nanti cakuti mwemo mukaikala sile mwenga, mungaomvya insita iyo uku kuwelenga sana nu kusambilila ivingi pa malyasi amuli Baibo nu kupepa kuli Leza.

Kupepa Leza umu nzila ii kuka-avwa ukuya sana ya cuza yakwe Yeova. Baibo ikati: “Mupalame kuli Leza, nga nawe amapalama kuno muli.” (Yakobo 4:8) Pa kumanya sana Yeova, tufwile ukusambilila sana Baibo pa kuti tuvwikisye ivingi pali vino waya na vino akacita ivintu. Inzila imwi iyangupale ino mungaomvya pa kutandika ukupepa kwa lupwa, u kuwelenga Baibo pamwi; limwi mungaalondela vino yakatantika cila-mulungu mu kulongana kwakuti Swe Ina Klistu nu Mulimo Witu. Munga-ankana ivikomo vya kuwelenga muli Baibo nga alino imulanzyanya vino muvwa umu Malembelo yaayo.

Kuka-avwa amu lupwa ukutemwana sana. Ya iya na aci, alino na avyazi na ana yao yakauvwana sana ndi cakuti yakusambilila pamwi Baibo. Kupepa kuu kulinzile ukuleta uluzango, nu mutende, nupya amu lupwa yalinzile ukuvwa ningo ndi uwanda wa kupepa wafika. Avyazi yangaalonda ivyeo vya kulanzyanya kulingana ni misinku ya ana yao; nga yakulonda, yangaomvya malyasi amuli ya mangazini ya Lupungu Lwa Mulinzi na Loleni! nanti pali webusaiti witu uwa jw.org. Limwi mungalanda pa ntazi izikaizila ana ndi yali uku sukulu, na vino yangacimvya intazi zizyo. Mungaatamba vino yakatambisya pa JW Broadcasting (tv.jw.org) alino imulanzyanya pali vino mwatamba. Nupya mungaaipakizya nu kwimbila pamwi injimbo zino tuliimba apa kulongana, nanti sile ukwikapo nu twakulya lino mwamala ukupepa kuko.

Ukukwata insita ii iyakupepa Yeova capamwi, kulazwa yonsi amu lupwa ukutemwa sana Izwi Lyakwe Leza, nakupya mulapolelelwa cuze.—Masamu 1:1-3.

• U mulandu ci uno tukasiilako insita ya kupepa Leza capamwi umu lupwa?

• Uzye avyazi yangacita uli pakuti yonsi umu lupwa yauvwa ningo lino yakupepa Leza capamwi?

Uzye mumanyile cino antu yaa yayeliile ni nsansa vii? Yali apa ukongano ukalamba. Vivi kwene vino aomvi yakwe Leza aaliko mpiti yaayanenyile ukuti yaakongana maila yatatu cila-mwaka, avino nafwe kwene tukakongana. (Malango 16:16) Tukakwata ukongano wa ciputulwa uwa wanda onga uukayako imiku iili mu mwaka, nu ukongano wa citungu uwa manda yatatu uukayako umuku onga umu mwaka. Uzye mumanyile ivisuma vino tukazana ndi twaya uku maukongana yaa?

Yakatwazwa ukutemwana sana na yano tukapepa nayo. Vivi kwene vino aina Izlaeli yazanganga ndi yakulumbanya Yeova umu maukongano, avino nafwe kwene tukaipakizya lino tukupepa Leza pa maukongano asuma cuze. (Masamu 26:12; 111:1) Maukongano yaayo, yakalenga itulolana, nu kulonganila pamwi na ya Nte aku vilongano vyunze nanti sile aku mpanga zyuze. Pa nsita ya kupuza, umusanya, tukaaliila pamwi na anji icakulya apa cifulo kwene pano tukulonganila, na cii, cikatuzanzya wakwe cimwi. (Milimo 2:42) Pa maukongano kwene yaa, apano tukailolela vino twatemwana na ina itu, i caleenga ukuti tulemane swensi kwene umu nsi yonsi.—1 Petulo 2:17.

Yakatwavwa ukulunduluka muli ukapepa. Nacuze cino aina Izlaeli yatemilwe i cakuti ‘yuvwikisye amazwi’ amu Malembelo yano yayalondolwelile. (Neemiya 8:8, 12) Nafwe kwene tukauvwa ningo sana vino yakatusunda ivya muli Baibo nga tuli apa maukongano. Lyasi lyonga na lyonga lino yakalanda likafuma umu Malembelo. Malyasi akulandwa nu muntu wenga, na malyasi ambali zingi, alino ni vilangililo vya kutulanga vino yamwi yasimikiile, vyonsi vii vikatusambilizya vino tungaacita ukulonda kwakwe Leza. Aina itu nga yakulanda pali vino yaapitamo nu kutwalilila ukusimikila umu nsi itale, tukakomeleziwa sana. Pa maukongano ya citungu pakaaya ivyangalo vya muli Baibo ivikatwavwa ukwiusya antu aalembwa muli Baibo na vino yacitanga, nupya vikatwazwa ukuya ni miyele isuma. Pa maukongano yonsi, pakaaya ukuwatizya yaayo aakulonda ukulangilila vino yaipeela kuli Leza.

• U mulandu ci uno maukongano yakaletela insansa?

• I visuma ci vino mungazana ndi mwaya uku ukongano?

Lino Yesu atatala wafwa, wavwanzile ati: “Landwe Lisuma lii lya Wene lilakosolwa mu nsi yonsi kuya umboni ku antu amu nko zyonsi, alino mpelelekezyo iliza.” (Mateo 24:14) Ngu mulimo uu uwa kukosoola umu nsi yonsi wali nu kuombwa umu musango ci? U kukolanya vino Yesu waombanga lino wali pa mpanga ya pa nsi.—Luka 8:1.

Tukaaya uku kusimikila antu uku mang’anda. Yesu wasambilizye alondezi yakwe ivya kusimikila ilandwe lisuma ku ng’anda ni ng’anda. (Mateo 10:11-13; Milimo 5:42; 20:20) Ya kakosoola yaaya akutandikilako yayapeezile ivifulo ukwa kusimikila. (Mateo 10:5, 6; 2 Kolinto 10:13) Na ndakai kwene, umulimo wa kusimikila ukaombwa ningo sana, nupya cila-cilongano cakwata incende ukwa kusimikila. Na cii, cikatwavwa ukuomba ningo umulimo uno Yesu watupeezile uwa ‘kukosola ilandwe uku yantu nga nu kupeela ukambone.’—Milimo 10:42.

Tukaaya konsi kwene kuno antu yangazanwa. Nupya, tukakolanya Yesu uwakosoolanga nu ku vifulo ukwali antu aingi, wa ku nkumba yakwe yemba, nanti pa cifula ca manzi. (Mako 4:1; Yoane 4:5-15) Naswe kwene tukasimikila antu konsi kuno twayazana, kuli kuti, umu miseo, vifulo vya kwizizyako, ku maliketi, nanti sile ukuyatumila foni. Nakapya, tukasimikilako na yano twapalamana nayo, yano tukaomba nayo, yano tukasambilila nayo, nanti sile yalupwa ndi pali isyuko lya kucita vivyo. Kuombesya konsi kuu kwalenga ukuti antu aingi wakwe cimwi yuvwe ‘ilandwe lisuma pa kupususya kwakwe Leza.’—Masamu 96:2.

Uzye kuliko umwi uno mungatemwa ukunenako ilandwe lisuma lya Wene Wakwe Leza, na vino ilandwe likati vilacitika uku nkoleelo? Mutaafisa vino mwasambilila! Muce mwanenako auzo pilandwe lisuma.

• Uzye i “landwe lisuma” ci lino tufwile ukukosoola?

• Uzye ya Nte yakwe Yeova, yakakolanya uli Yesu pa kusimikila?

Izwi lyakuti “painiya” lyafuma ukwizwi lya cizungu ilikapiliula ukuti ‘kapanza’ nanti wino akalanga auze umwakupita. Na Yesu kwene tungati sile wali a painiya, pano yamutumile ukwiza pano nsi ku kwiza-simikila nu kwazwa antu ukuti yace yapusuke. (Mateo 20:28) Ndakai alondezi yakwe yakamukolanya lino yakuomba umulimo wa kupanga asambi. (Mateo 28:19, 20) Pa yalondezi yaa paya yamwi aakaomba umulimo uno tukati mulimo wa upainiya.

Painiya a kakosoola aakasumba insita ikulu sana mu kusimikila. Ya Nte yakwe Yeova yonsi yakasimikila ilandwe lisuma. Nomba, kwaya ya Nte aaya ya painiya ya nsita yonsi, kuli kuti yaiteyanya ningo ukusimikila pa maawazi 70 cila-mwezi. Pakuti yaakwanisya ukuomba vii, yasisumba insita ikulu ku ncito zyunze. Lyene kwaya ya Nte asontwa ukuya ya painiya aiyele, yene yakasimikila pa maawazi 130 cila-mwezi, nupya, yakayatuma uku ncende kuno ya kasimikila yataavula. Ya painiya yasilondesya ivintu ivingi sana, pano yataila ukuti Yeova aliwe alaayapeela ivikalondekwa. (Mateo 6:31-33; 1 Timoti 6:6-8) Ya Nte yauze aatanga-yakwanisye ukuomba vii, yakaya ya painiya ansita inono, kuli kuti yakaombesya ukuti yaafisya maawazi 30 nanti 50 cila-mwezi.

Icikalenga umuntu ukuya painiya u kutemwa kuno watemwa Leza na antu. Wakwe vino cali kuli Yesu, naswe kwene ndakai twamanya ukuti antu aingi yakalondesya ukumanya Leza na vino akalonda ukucita. (Mako 6:34) Nomba, twamanya ivingavwa antu ndakai kwene, ivingayalenga ukuya sana nu utailo wakuti uku nkoleelo ivintu vilaziipa cuze. Ukutemwa sana antu, kukalenga painiya ukuomvya insita na maka yakwe uku kwavwa antu yauze. (Mateo 22:39; 1 Tesalonika 2:8) Lyene icikacitika i cakuti, na painiya kwene umwineco akatwalilila ukuya sana nu utailo, akaya sana cuza wakwe Leza, nupya akaya sana nu luzango.—Milimo 20:35.

• Uzye mungati painiya u muntu wa musango ci?

• I vyani ivikalenga ya Nte yamwi ukuomba upainiya?

Pa myaka iingi, ya Nte Yakwe Yeova yakatungulula masukulu kuno yakasambilizya vyakwe Leza. Kwaya masukulu aatantikwa uku kwavwa yonsi aakaomba umulimo wa nsita yonsi uwa kukosoola apa Wene pakuti cayavwa ukuomba ningo umulimo uwo.—2 Timoti 4:5.

Sukulu Lya Mulimo wa Upainiya. Ndi painiya wa nsita yonsi wamala umwaka onga muli upainiya, akalembesiwa ukuya ukwisukulu lya manda 6 ilikayela apa Ng’anda ya Wene iiliyonsi iyayela apiipi na kuno akaikala. Isukulu lilyo lyayelako uku kwavwa painiya ukupalamila sana kuli Yeova, nu kuti amanye ivya kuomvya inzila zyonsi izya kusimikililamo, alino nu kuti atwalilila umu mulimo wakwe.

Sukulu Lyakwe ya Kakosoola ya Wene. Isukulu lii ilya myezi iili lyayelako uku kusambilizya ya painiya aomba apa myaka iingi napya aiteyanya ukusya yalupwa, kuti yakaye konsi kuno yalatumwa. Yaaya wakwe Ezaya uwatiile, “Mukwai namayako. Ntumini nene!” nupya yakakolanya Yesu Klistu, Kakosoola mukulu. (Ezaya 6:8; Yoane 7:29) Ukuya uku kuombela uku cifulo cuze kukalondeka ukwangupazya imikalile. Limwi intambi zya ku ncende iyo, umuza, ni vyakulya, vikaya ivipusane sana na vino umuntu waelezya. Limwi umuntu wiyo angalondeka nu kuti aye akasambilile ululimi luze ulwa ku ncende kwene iyo. Isukulu lii lika-avwa aina na yankazi asimbe alino na aatwalana aamyaka ukutandikila pali 23 kufika pa 65, ukuya ni miyele iikalondekwa pa kuyaomba kuno yayatuma, nu kuyasambilizya ivingi pakuti Yeova ayaomvya sana, nu kuomviwa sana umwiuvi lyakwe Leza.

Sukulu Lya Baibo Ilya Gilyadi. Mu lulimi lwa ciYebulai, izwi lyakuti “Gilyadi” likapiliula ukuti “Umutumba wa Unte.” Kufuma umu 1943 lino isukulu lii lyatandike, ya misyonali asambilila kuuku aaluta pali 8,000, yaayatuma uku kukosoola ilandwe “na kuno insi yapela,” nupya antu aingi yasambilila icumi. (Milimo 13:47) Lino ya misyonali aafumile ukwisukulu yaafisile uku mpanga ya Peru umuku wa kutandikilapo, kutaali icilongano nanti cimwi ku mpanga iiya. Nomba ndakai kwaya ivilongano ukucila na pali 1,000. Ku Japan nako, lino yamisyonali yitu yaatandike ukuombelako, ya Nte yataafisile na 10. Nomba ndakai ya Nte yaluta na pali 200,000. Ukwisukulu lya Gilyadi ilikaayako apa myezi 5, kukaaya ukusambilila sana Izwi Lyakwe Leza. Ya painiya aiyeele na ya painiya aakaomba wakwe ya misyonali, na aomvi ya pa maofesi, nanti yaayo aaya umu mulimo wa kutandalila ivilongano ali yano yaka-ama ukuya ukwisukulu lii pakuti yakasambilile sana ivya kutungilila umulimo wa mu nsi yonsi.

• Uzye i cani cino kwayela Isukulu Lya Mulimo wa Upainiya?

• Uzye Isukulu Lyakwe ya Kakosoola ya Wene yalipanzile ukuti kwaya yaweni?