Ningacita Uli Ndi Yakuncuzya pa Sukulu?

I VYANI VINO UNGACITA?

Elenganya ukuti vii vikucitika: Thomas asikulonda ukuya uku sukulu ilelo. Akuti na mutondo kwene atalayako. Akuti atalatala ayeko. Cii catandike ukucitika imyezi itatu iyatipitapo lino yakasukulu yauze yalandanga ivipe pali aliwe. Yatandike nu kumutemela amazina yakumusoweka. Insita zimwi yamwi yaponyanga amabuku yakwe Thomas umu minwe iciloleka kwati yatacitiile sile uku mufulo, nanti insita zimwi ali umwi umba yamusunkanga uku nsizi, nupya pakuti Thomas asenuke alole uwamusunka, ala asikulola nanti umwi uwali wacita vivyo. Mutondo ivintu vyaifile sana, pano Thomas wapokelile ka meseji apa intaneti akakumutiinya . . .

Ndi wewe wali Thomas, ungacita uli?

TALA ELENGANYA PALI VII!

Cisikupiliula ukuti utakwata amaka! Nupya ukwaula nu kutwisika ungacimvya akukucuzya ukwaula ukumuma. Ungacita uli vivyo?

• UTALINZILE UKUSOKA. Baibo ikati: “Iciwelewele cikalangizya icipyu cakweco consi. Lelo umuntu wamano wene akacikanya.” (Mapinda 29:11) Ndi cakuti akukucuzya yalola ukuti watuteekela, limwi yangata ukwika amano kuli wewe.

• UTALANDULA. Baibo ikati: “Umwi ndi wamucitila ciipe, namwe mutamucitila ciipe.” (Loma 12:17) Ukulandula kungalenga sile ivintu vipileko.

• UTAITWALA UMU NTAZI. Baibo ikati: “Umuntu wamano akacevya uzanzo ungamuzana nu kuutuka autuka.” (Mapinda 22:3) Uwaezya na maka ukusenka uku yantu angakuzanza, nupya utaaya kuno yangaya yakakucuzye.

• UWAEZYA UKUCITA VINO AKUKUCUZYA ASIKWELENGANYA UKUTI UNGACITA. Baibo ikati: “Ukwasuka luse luse kukamala icipyu.” (Mapinda 15:1) Ungezya nu kucita imipulwe. Limwi ndi cakuti akukucuzya wakunena ukuti watuwina sana, ungasunsa maye nu kulanda uti, “Awe nasya nondeko panono likwene!”

• UWAFUMAPO. “Ndi wikala mya cikalanga ukuti watukwata amano nu kuti watukwata amaka ukucila akukuzanza,” avino Nora uwa myaka 19 walanzile. Walanzile nu kuti, “Cikalanga ukuti wateekela, imiyele ino akukucuzya atakwata.”—2 Timoti 2:24.

• UWASIPA. Aakacuzya auze yakamanya ndi cakuti umwi ataasipa nupya akuloleka ukuti pasi cino angacita. Lelo aakacuzya ndi walola ukuti atanga akusyukile angatiina.

• UWANENAKO UMWI. Umwi uwaomvilepo uumwalimu walanzile ukuti: “Nkukomelezya yonsi yano auze yakacuzya ukuti yalinzile ukunenako umwi. Ali cintu ca mpomvu ukucita, nupya i cingalenga ukuti umwi ataacuzya auze.”