ILYASI LYAKUTANDIKILAKO | MUNGAPALAMA KULI LEZA

Uzye Mukacita Vino Leza Akaamunena Ukucita?

“Landa consi cino ukulonda, nupya namatemwa sana uku kwazwa.” Cingamutalila sana ukulanda amazwi kwene yaa uku muntu wino mutaamanya. Nomba, citanga cimutalile ukunena cuza winu amazwi kwene yaa. Ya cuza yakatemwa sana ukwazwana.

Baibo ikalanga ukuti Yeova lyonsi akacitila antu aakamupepa ivingayazipila. Davidi uwali sana cuza wakwe Leza walanzile ati: ‘We Yeova, Leza wane, ala vino watucitila ivyakuzunguka ivivule, Vino wemo watuteyanyizizya pasi pa wingi. . . . Ngi cakuti nati nkandande vyonsi pano vyapela, awe cumi ntange nkume mwenemo, pano vyavula wakwe cimwi.’ (Masamu 40:5) Ni cacilapo icakuti, Yeova akacita ivisuma nu ku yantu atamumanya, ‘Wene akaayapeela ivyakulya nu kuzuzya myenzo yao nu luzango.’—Milimo 14:17.

Lyene vino Yeova akaitemelwa ukucitila antu ivingayaletela uluzango, fwandi na antu kwene akulonda ukuya ya cuza yakwe Leza yalinzile ukucita ivingazanzya “umwenzo” wakwe. (Mapinda 27:11) Nomba, uzye i cani cino mungacita pakuti muzanzye Leza? Baibo ika-asuka ukuti: “Mwaiusya kucita visuma nu kwazwana pano vintu vii vikoline wa mpolelwa zino zikazanzya Leza.” (Ayebulai 13:16) Uzye cii cikupiliula ukuti ukucita ivisuma nu kwazwa antu yauze i vikalondekwa sile pakuti twazanzya Yeova?

Baibo ikati: “Kusi umwi angazanzya Leza kwaula kukwata utailo.” (Ayebulai 11:6) Ukwaula nu kutwisika, “Abulaamu wataile Leza” i calenzile ukuti ‘aize aamwe ukuti a cuza wakwe Leza.’ (Yakobo 2:23) Yesu Klistu nawe walanzile sana pa ‘kutaila Leza’ ndi tukulonda kuti aatupolelela. (Yoane 14:1) Uzye lyene mungacita uli pakuti muye nu utailo uno Leza akaalonda ukuti ya cuza yakwe yaye nao? Cino mungatandikilapo ukucita, u kusambilila Baibo lyonsi. Kucita vivyo kungalenga muye nu “umanyililo wa kucita kulonda kwakwe” nu kumanya ivintu vino “vikazanzya Mwene.” Lyene, lino mukumanyilako ivintu ivingi vya cumi pali Yeova nu kucita vino mukusambilila ivyaololoke, mulaamutaila sana nupya alaya cuza winu.—Kolose 1:9, 10.

[Cikope api’fwa 6]

Antu yano twatemwa nu kucindika, tukayacitila ivisuma