Mark

13 Ke ear diwõjl̦o̦k jãn tampel̦ eo, juon iaan ri-kal̦oor ro an eba ñane: “Ri-Kaki, lale m̦õk dekã kein im m̦õkein raiboojoj!” 2 Bõtab Jesus ear ba ñane: “Kwõj ke lo aolep m̦õkein rekkillep? Naaj rupi aolep dekã kein ie im ejjel̦o̦k juon iaaer enaaj pãd ioon bar juon.”

3 Ke ear jijet ilo Tol̦ Olive ilo juon jikin emaroñ lo tampel̦ eo jãne, Piter, Jemes, Jon, im Andru rar itok ñan ippãn ke ear make iaan im ba: 4 “Kwõn kwal̦o̦k ñan kõm ñããt eo men kein renaaj wal̦o̦k, im ta kõkal̦l̦e eo enaaj kaalikkar bwe epaaktok jem̦l̦o̦kin aolep men kein?” 5 Innem Jesus ej ear ba ñan er: “Kom̦win lale bwe ejjel̦o̦k en̦ en m̦on̦e kom̦. 6 Elõñ renaaj itok ilo eta im ba, ‘Ña Christ,’ im renaaj m̦on̦e elõñ armej. 7 El̦aññe kom̦ naaj roñ ainikien tarin̦ae im ennaan in tarin̦ae ko, kom̦win jab wiwijet kõnke men kein rej aikuj in wal̦o̦k. Bõtab, ejjab mel̦el̦ein bwe eñin ej jem̦l̦o̦kin.

8 “Juon lal̦ enaaj tarin̦aeik bar juon lal̦, im aelõñ ko renaaj tarin̦aeik doon. Bareinwõt, enaaj wõr m̦akũtkũt lal̦ ilo elõñ jikin ko im enaaj wõr ñũta. Men kein rej jinoin eñtaan ko rej wal̦o̦k, ãinwõt an juon kõrã metak m̦okta jãn an kõl̦l̦otak.

9 “Ij ba ñan kom̦ bwe kom̦win kõjparok bwe armej renaaj liaakel̦o̦k kom̦ ñan im̦õn ekajet ko im m̦an kom̦ ilo im̦õn kabuñ ko aer. Renaaj bar bõkl̦o̦k kom̦ ñan im̦aan kom̦ja* ro im kiiñ ro kõn wõt ña, im kom̦ naaj kwal̦o̦k kõn ña ñan er. 10 Bareinwõt, naaj aikuj m̦okta kwal̦o̦k kõn ennaan eo em̦m̦an ilo aelõñ otemjej. 11 Innem ñe renaaj liaakel̦o̦k kom̦, kom̦win jab inepata kõn ta eo kom̦ naaj ba. Kom̦win kab kwal̦o̦k ta eo naaj kwal̦o̦ke ñan kom̦ ilo iien en̦. Ejjab kom̦ eo kom̦ naaj kõnono, bõtab jetõb kwõjarjar.* 12 Bareinwõt, armej renaaj liaakel̦o̦k l̦õm̦aro jeier im jatier ñan mej, enaaj ãindein em̦m̦aan ro ñan ro nejier, im ajri ro renaaj jum̦aik jineer im jemãer im liaakel̦o̦k er ñan mej. 13 Armej otemjej renaaj dike kom̦ kõn wõt eta, bõtab eo ej kijenmej ñan jem̦l̦o̦kin enaaj bõk lo̦mo̦o̦r.

14 “Bõtab, ñe kom̦ naaj lo an men eo ekajjõjõ me ej bõktok jorrããn pãd ijo ejjab aikuj kar pãd ie (eo ej riiti men in en kõjerbal lol̦o̦kjen̦), innem ro ilo Judia ren jino ko ñan tol̦ ko. 15 Jabdewõt eo ej pãd iraan m̦weo im̦õn, en jab del̦o̦ñ ilowaan m̦weo im ebbõk jabdewõt m̦weiuk ie. 16 Im jabdewõt eo ej pãd ilo jikin kallib, en jab ro̦o̦l im bõk kopã eo an. 17 Ejerata wõt kõrã ro rebõro̦ro im kõrã ro rej kanninnin ilo tõre en̦! 18 Kom̦win jar bwe iien en̦ en jab ilo iien m̦õl̦o.* 19 Ilo iien en̦, enaaj juon iien eñtaan el̦ap. Joñan an l̦ap, ejjañin kar wal̦o̦k jãn jinoin an kar Anij kõm̦anm̦an lal̦ tok ñan kiiõ, im eban bar wal̦o̦k tokãlik. 20 Ilo m̦ool, el̦aññe Jeova* ejjab kakadul̦o̦k iien eñtaan en̦, innem ejjel̦o̦k armej enaaj el̦l̦ã im mour. Bõtab, enaaj kakadul̦o̦k iien en̦ kõn wõt ro ear kããlõt er.

21 “Bareinwõt el̦aññe jabdewõt ej jiroñwaj kom̦ im ba, ‘Armej in ej Christ,’ ak ‘Armej iien̦ ej Christ!’ kom̦win jab tõmake. 22 Enaaj wõr ro rej riab im ba bwe er Christ im enaaj bar wõr ri-kanaan riab. Rein renaaj kõm̦m̦an kõkal̦l̦e ko im menin bwilõñ ko bwe ren kajjioñ m̦on̦e ro kar kããlõt er. 23 Kõn men in, kom̦win kõjparok. Em̦õj aõ kadede ba waj ñan kom̦ kõn aolep men kein.

24 “Ãlikin wõt naaj iien eñtaan eo ilo raan kan̦, al̦ enaaj marok im allõñ eban romaak, 25 im iju ko ilañ renaaj wõtlo̦k, im kajoor ko ilañ renaaj em̦m̦akũtkũt. 26 Innem renaaj lo an Nejin armej* itok ilo kõdo̦ ko kõn el̦ap kajoor im aiboojoj. 27 Innem Nejin armej enaaj jilkinl̦o̦k enjel̦ ro bwe ren aintok ro kar kããlõt er jãn kona ko emãn ilo lal̦ in,* jãn jabõn lal̦ in ñan jabõn lañ.

28 “Kom̦win katak jãn waanjoñak in kõn juon wõjke fig: Ñe ejino wal̦o̦k bõlõk ilo ra jiddik ko, kom̦ jel̦ã bwe epaaktok iien mããn̦ãn̦.* 29 Ilo ejja wãween in wõt, ñe kom̦ij lo an men kein wal̦o̦k, kom̦win jel̦ã bwe Nejin armej epãd iturin kõjãm ko. 30 Ij jiroñ kom̦ bwe epepen in eban jako m̦ae iien men kein aolep renaaj wal̦o̦k. 31 Lañ im lal̦ renaaj jako bõtab naan ko aõ rejjãmin jako.

32 “Ikijjeen raan eo ak awa eo, ejjel̦o̦k en̦ ejel̦ã. Enjel̦ ran̦ ilañ kab Nejin rejaje, ak Jemãn wõt ejel̦ã. 33 Kom̦win ekkõl wõt im ruj wõt kõnke kom̦ij jab jel̦ã iien eo em̦õj karõke. 34 Men in ej ãinwõt juon em̦m̦aan me ear ilo̦k ñan jikin ko rettol̦o̦k. Bõtab m̦okta jãn an etal, ear kappeik ri-karejar* ro an bwe ren lale m̦weo im̦õn. Ear lel̦o̦k eddo ko ñan er kajjojo, im ear jiroñ eo ej lale kõjãm bwe en ekkõl wõt. 35 Kõn men in, kom̦win ekkõl wõt kõnke kom̦ij jab jel̦ã ñããt eo em̦m̦aan eo m̦õn m̦weo enaaj itok. Kom̦ jaje el̦aññe enaaj itok in jota, ak lukwõn boñ, ak m̦okta jãn an joraantak,* ak in jibboñtata. 36 Ñe kom̦ij jab pojak ak ejidimkij an itok, enaaj lo ami kiki. 37 Men in ij ba ñan kom̦, ij bar ba ñan aolep: Kom̦win kanooj ekkõl wõt.”