Luk

8 Ejjabto tokãlik, ear etal jãn jikin ñan jikin im bukwõn ñan bukwõn bwe en kwal̦o̦k kõn ennaan eo em̦m̦an kõn Aelõñ eo an Anij.* Rijjilõk ro 12 rar pãd ippãn 2 im bar jet kõrã me ear kõmour er jãn nañinmej ko aer im kadiwõjl̦o̦k jetõb ko rettoon jãn er. Kõrã rein ej: Meri, eo rekõn ãñinñini im ba Magdalini, eo jimjuon jetõb ettoon* rekar diwõjl̦o̦k jãne, 3 Joanna, lio pãleen em̦m̦aan eo ej bõk eddon m̦weo im̦õn Herod etan Kuzas, im Susanna im ebar lõñ kõrã ro jet. Aolepen kõrã rein rar kõjerbale men ko m̦weieer ñan jipañ Jesus im rijjilõk ro an.

4 Ke juon jarlepju el̦ap ear kobatok ippãn ro rar itoitak ippãn Jesus jãn jikin ñan jikin, ear kwal̦o̦k juon waanjoñak ñan er im ba: 5 “Ewõr juon ri-kallib ear ilo̦k im jeor ine. Ke ear jeor ine, jet ine rar wõtlo̦k itõrerein ial̦ eo im armej ro rar jujuuri im bao ko imejatoto rar kãtem kañi. 6 Ine ko jet rar wõtlo̦k ioon dekã, im ke rar jino eddek, rar aemedl̦o̦k kõn aer m̦õrã. 7 Im ine ko jet rar wõtlo̦k ibwiljin mar kãlõklõk ko. Im ke kãlõklõk ko rar eddekl̦o̦k, rar kapañ aer eddek. 8 Ak ine ko jet rar wõtlo̦k ioon bwidej eo em̦m̦an, im ãlikin aer eddekl̦o̦k, 100 alen an kar l̦apl̦o̦k aer kalle.” Ãlikin an ba men kein, ear kõl̦l̦aaj ainikien im ba: “Eo ewõr lo̦jilñin ñan roñjake, en roñjake.”

9 Bõtab ri-kal̦oor ro an rar kajjitõk ippãn ta mel̦el̦ein waanjoñak in. 10 Innem eba: “Em̦õj kõtl̦o̦k bwe kom̦win mel̦el̦e kõn men ko rettino im rekkwõjarjar an Aelõñ eo an Anij. Bõtab ñan ro jet, ij kõmel̦el̦eik er ilo aõ kõjerbal waanjoñak ko kõnke meñe rej reito reitak ak ejjel̦o̦k tokjãn aer reito reitak, im meñe rej roñjake ak rejjab mel̦el̦e ñan jidik. 11 Eñin mel̦el̦ein waanjoñak eo: Ine eo ej jitõñl̦o̦k ñan Naanin Anij. 12 Ine ko rar wõtlo̦k itõrerein ial̦ eo rej jitõñl̦o̦k ñan armej ro me rar roñjake naan eo, bõtab Tepil̦ eo eitok im jol̦o̦k ennaan eo jãn bũrueer bwe ren jab tõmak im ren jab bõk lo̦mo̦o̦r. 13 Ine ko rar wõtlo̦k ioon dekã rej jitõñl̦o̦k ñan armej ro rej roñjake naan eo im m̦õn̦õn̦õ kake, bõtab ear ejjel̦o̦k okraer. Kõn men in, rar tõmak ium̦win jidik iien, ak ñe ej iien mãlejjoñ, rebuñ. 14 Ine ko rar wõtlo̦k ibwiljin mar kãlõklõk ko rej jitõñl̦o̦k ñan armej ro rej roñjake naan eo. Bõtab kõn aer m̦ad kõn men ko rej inepata kaki, im m̦weiuk ko, kab menin kam̦õn̦õn̦õ ko an mour in, men kein rõkapañ er im kõm̦m̦an bwe en nana aer kalle. 15 Ine ko rar wõtlo̦k ilo bwidej eo em̦m̦an rej jitõñl̦o̦k ñan armej ro em̦m̦an im em̦ool bũrueer. Ke rej roñ kõn naan eo, rej likũti ilo bũrueer, im rej kalle kõn aer kijenmej.

16 “Ejjel̦o̦k armej ej tile juon l̦aam̦ im kalbubuuki kõn juon jãpe ak likũti ium̦win peet. Armej rej likũti ilo ijo jikin l̦aam̦ bwe ro rej del̦o̦ñ ren maroñ lo an meram. 17 Jabdewõt men ko ren̦ojak renaaj wal̦o̦k, im jabdewõt men ko rettino renaaj alikkar im rejjãmin n̦ojak ñan indeeo. 18 Kõn men in, kom̦ij aikuj in lukkuun roñjake kõnke jabdewõt eo emel̦el̦e, naaj kõm̦m̦an bwe en l̦apl̦o̦k wõt an mel̦el̦e. Bõtab jabdewõt eo ejjab mel̦el̦e, meñe ej l̦õmn̦ak bwe ewõr jidik an jel̦ã ak enaaj jako jãne.”

19 Innem jinen im l̦õm̦aro jatin Jesus rar itok ñan ippãn, ak rar jab maroñ kepaake kõn an obrak ijo kõn armej. 20 Kõn men in, rar kõnnaanekl̦o̦k e im ba: “Jinõm̦ im l̦õm̦aro jatũm̦ ran̦ rej pukot eok, erran̦ rej jutak inabõj.” 21 Ak ear uwaak er im ba: “Rein me rej roñjake naanin Anij im pokake, errein ej ro jinõ im ro jatũ.”

22 Juon raan, Jesus im ri-kal̦oor ro an rar uwe ilo juon wa im ear ba ñan er: “Jen etal ñan iturãjetin lom̦al̦o in.” Innem rar jerakl̦o̦k. 23 Ilo ial̦ eo aer l̦o̦k, ear kiki. Ak kiiõ ear wal̦o̦k juon l̦añ ilo lom̦al̦o eo im ear jino del̦o̦ñ dãn ilowaan wa eo im rar pãd ilo kauwõtata. 24 Innem rar karuji im ba: “Ri-Kaki, ri-Kaki, m̦õttan jidik jemej!” Kõn men in, ear jerkak im kauwe kõto eo im n̦o ko, im ear dikl̦o̦k kõto eo im an l̦ap n̦o, innem ear lur. 25 Im eba ñan er: “Ejjel̦o̦k ami tõmak ke?” Ak rar lukkuun lõl̦ño̦ñ im bwilõñ, im rar ba ñan doon im ba: “Wõn armej in ke el̦ak kõnnaan ñan kõto ko im n̦o ko rej pokake e?”

26 Tokãlik rar pol̦o̦k ilo ijo jikin ri-Gerasa, eo ej pãd iturãjetin Galili. 27 Ke Jesus ear tol̦o̦k, juon em̦m̦aan jãn jikin in me jetõb ettoon* ear mo̦k* n̦a ippãn ear wõnm̦aiki. Eto an l̦ein jab ekkõn̦ak nuknuk, im ejjab jokwe ilo em̦ ak ej jokwe ibwiljin lõb* ko. 28 Ej lo wõt Jesus ak ear lam̦õj im buñpedo im̦aan mejãn, im ear kõl̦l̦aaj ainikien im ba: “Jesus, Nejin Anij eo Eutiejtata, ta n̦e kokõn̦aan jãn ña? Ij akwel̦ap bwe kwõn jab kaeñtaan eõ.” 29 (Ear ba men in kõnke Jesus ear jiroñ jetõb ettoon ko bwe ren diwõjl̦o̦k jãne. Elõñ alen an jetõb ettoon ko mo̦k n̦a ippãn im elõñ alen an kar armej ro lukwõje pein im neen kõn jeen, im ewõr rekõn waje, bõtab ej tũm̦wi jeen ko, im jetõb ettoon ko rej kõm̦m̦an bwe en ko ñan ijoko ejjel̦o̦k armej ie.) 30 Jesus ear kajjitõk ippãn: “Etam̦?” Im eba: “Jarin Tarin̦ae,”* kõnke elõñ jetõb ettoon rar mo̦k n̦a ippãn, 31 im rel̦akkar akwel̦ap ñane bwe en jab jilkinl̦o̦k er ñan abyss* eo. 32 Ekar lõñ piik rej m̦õñã ioon tol̦ eo, im jetõb ettoon ko rar akwel̦ap ñane bwe en kõtl̦o̦k aer etal im del̦o̦ñ ilowaan piik ko, innem ear kõtl̦o̦k aer etal. 33 Kõn men in, jetõb ettoon ko rar diwõjl̦o̦k jãn em̦m̦aan eo im etal im mo̦k n̦a ippãn piik ko, innem piik ko rar ettõrl̦o̦k im wõtlo̦k jãn itõrerein tol̦ eo* ñan lo̦jet im mal̦oñ. 34 Ke ro rar lale piik ko rar lo men in, rar ko im ilo̦k im kwal̦o̦k ñan armej ro ilo bukwõn eo im jikin ko ipel̦aakin.

35 Kõn men in, armej ro wõj rar etal bwe ren lale men eo ear wal̦o̦k. Ke rar itok ñan ippãn Jesus, rar loe em̦m̦aan eo jetõb ettoon ko rar diwõjl̦o̦k jãne. Em̦m̦aan eo ej jijet iturin neen Jesus ak ej nuknuk im ejako an wũdeakeak. Innem armej ro rar jino mijak. 36 Ro rar lo ta eo ear wal̦o̦k ñan em̦m̦aan eo rar kõnnaanek armej rein. 37 Innem elõñ iaan armej ro jãn jikin in an ri-Gerasa rar kajjitõk bwe Jesus en etal jãn ijo kõnke rar lukkuun mijak, im ear ilo̦k im uwe ilo wa eo bwe en jerak jãn jikin eo. 38 Bõtab, em̦m̦aan eo jetõb ettoon ko rar diwõjl̦o̦k jãne el̦akkar akwel̦ap bwe en kõtl̦o̦k an etal ippãnl̦o̦k, ak ear jab kõtl̦o̦ke. Ear ba: 39 “Kwõn jepl̦aak ñan ijo jikũm̦ im kwal̦o̦k kõn men eo Anij ear kõm̦m̦ane ñan kwe.” Kõn men in, ear jepl̦aak im kwal̦o̦k ñan armej ro ilo aolepen jikin eo kõn men eo Jesus ear kõm̦m̦ane ñane.

40 Ke Jesus ear jepl̦aak ñan Galili, elõñ armej rar karwaineneiki kõnke rar kõtmãne bwe enaaj etal. 41 Innem juon em̦m̦aan etan Jairõs ear jãdetok. L̦ein ej juon iaan ro rej lale im̦õn kabuñ eo ilo jikin eo. Ear bukwelõlõ im̦aan neen Jesus im akwel̦ap bwe en etal ñan m̦weo im̦õn 42 kõnke ledik eo ej make wõt nejin me 12 an iiõ eitõn mej.

Elukkuun lõñ armej rar ko̦baje Jesus ke ej etal. 43 Ak kiiõ ewõr juon kõrã ijo ear to̦o̦rl̦o̦k kõn bõtõktõk ium̦win 12 iiõ, im ejjel̦o̦k en̦ ear maroñ kõmouri. 44 Kõrã in ear etal ilikinl̦o̦k im uñũri tõrerein nuknuk eo an, im ear kajju bõjrak an to̦o̦rl̦o̦k. 45 Innem Jesus eba: “Wõn eo ear uñũr eõ?” Aolep armej ro rar ba bwe ejjab er eo, im Piter eba: “Ri-Kaki, kwõj lo wõt an armej rein kaapool̦ eok im ko̦baj eok.” 46 Ak Jesus eba: “Ewõr en̦ ear uñũr eõ kõnke iar eñjake an diwõjl̦o̦k kajoor jãn ña.” 47 Kõrã eo ear kile bwe ejjab maroñ n̦ooje ke e eo. Kõn men in, ear jãdel̦o̦k ak ear wũdiddid, im ear bukwelõlõ im̦aan Jesus im kwal̦o̦k im̦aan mejãn aolep unin an kar uñũri Jesus, im kõn an kar kajju mour jãn nañinmej eo an. 48 Innem ear ba ñan kõrã eo: “Nejũ, am̦ tõmak ear kõmour eok. Kwõn ilo̦k ilo aenõm̦m̦an.”

49 Ke ej kõnono wõt, juon em̦m̦aan jãn m̦weo im̦õn Jairõs ear itok im ba: “Em̦õj an mej ledik eo nejũm̦. Ebwe n̦e am̦ kaabn̦õn̦õik ri-Kaki n̦e.” 50 Ke Jesus ej roñ men in, eba ñan Jairõs: “Kwõn jab inepata, kwõn kwal̦o̦k wõt am̦ tõmak im ledik en̦ enaaj mour.”* 51 Innem ke ear tõparl̦o̦k m̦weo, ear jab kõtl̦o̦k an jabdewõt armej del̦o̦ñl̦o̦k ippãn ijello̦kun wõt Piter, Jemes, im Jon, kab jinen im jemãn ledik eo. 52 Armej ro rar jañ im deñdeñõte ubeer kõn aer lukkuun bũrom̦õj kõn ledik eo. Kõn men in, ear ba: “Kom̦win bõjrak jãn ami jañ bwe ledik en̦ ejjab mej, ak ej kiki.” 53 Innem armej ro rar jino kajjirere kake e kõnke rejel̦ã bwe emej ledik eo. 54 Bõtab ear jibwe pein ledik eo im ba ñane: “Ledik en̦, kwõn jerkak!” 55 Innem ledik eo ear bar mour,* im ear kajju jerkak, im Jesus ear ba ren lel̦o̦k kijen. 56 Jinen im jemãn ledik eo rar kanooj m̦õn̦õn̦õ, ak Jesus ear jiroñ erro bwe ren jab kõnnaanek jabdewõt kõn men in.