Jerbal

16 Innem ear tõparl̦o̦k Derbe, im tokãlik Listra. Ilo jikin in, ekar wõr juon ri-kal̦oor etan Timote, jinen ej juon ri-Ju im juon rũttõmak, ak jemãn ej juon ri-Grik. 2 Timote ear juon eo me ro rej lale eklejia ko ilo Listra im Aikoniõm rar nõbare ñe rej kõnono kake. 3 Paul ear kõn̦aan bõk Timote ippãnl̦o̦k. Kõn men in, ear bõke bwe en m̦wijm̦wij* kõn wõt ri-Ju ro ilo jikin kein, kõnke rar jel̦ã bwe jemãn ej juon ri-Grik. 4 Ke rar etal ilujenl̦o̦k jikin ko wõj, rar kõnnaanek rũttõmak ro kõn men ko em̦õj an rijjilõk ro im em̦m̦aan ro rej lale eklejia ilo Jerusalem kar pepe kaki bwe ren l̦oori. 5 Innem ear penl̦o̦k wõt tõmak ko an ro ilo eklejia ko, im kajjojo raan ear lõñl̦o̦k wõt uwaaer.

6 Bareinwõt, rar etal ñan Prijia im jikin ko ilo Galetia kõnke jetõb kwõjarjar* ear bõbraik er jãn aer kwal̦o̦k kõn ennaan eo ilo jikin ko ilo Eijia.* 7 Ke rar tõparl̦o̦k Misia, rar kajjioñ etal ñan Bitinia, bõtab Jesus, ikijjeen jetõb kwõjarjar,* ear jab kamãlim er. 8 Kõn men in, rar etal wõt jãn Misia im wanlal̦l̦o̦k ñan Troas. 9 Innem ke ear boñ, Paul ear lo juon pijen. Ear lo juon em̦m̦aan in Masedonia ej jutak im̦aan mejãn im akwel̦ap ñane im ba: “Itok ñan Masedonia im jipañ kõm.” 10 Ãlikin wõt an kar lo pijen eo, kõmar kajjioñ etal ñan Masedonia kõnke kõmar kile bwe Anij ear kũrl̦o̦k kõm bwe kõmin ilo̦k im kwal̦o̦k kõn ennaan eo em̦m̦an ñan er.

11 Kõn men in, kõmar jerak jãn Troas im kajjul̦o̦k ñan Samothrace, im raan eo tok juon kõmar etal ñan Niapolis, 12 im jãn ijin kõmar etal wõt ñan Pilippai, jikin in ej an ri-Rom im ej make wõt aorõktata iaan aolep jikin ko ilo Masedonia. Kõmar pãd ilo jikin in ium̦win jejjo raan. 13 Ke ear raanin Jabõt,* kõmar diwõjl̦o̦k ilo wõrwõr eo bwe kõmin ilo̦k ñan iturin juon reba, ijo kõmar roñ bwe ej jikin jar, im kõmar jijet im jino kõnnaan ñan kõrã ro rar kweilo̦kl̦o̦k ijo. 14 Juon iaan ro rar roñjake kõm ej Lidia, juon kõrã jãn Thaietaira. Kõrã in ear juon eo ej kabuñ ñan Anij im ej wia kõn nuknuk ko repiolõt,* im Jeova* ear kõpel̦l̦o̦k bũruon bwe en lukkuun roñjake men ko Paul ear ba. 15 Ãlikin an kõrã in im ro ilo m̦weo im̦õn peptaij, ear akwel̦ap ñan kõm im ba: “El̦aññe kom̦ij watõk ña bwe ij juon eo ej tiljek ñan Jeova,* kom̦win itok im pãd ilo m̦ween̦ im̦õ.” Innem ear lukkuun akwel̦ap bwe kõmin etal ippãnl̦o̦k.

16 Ke ear jejjet iien ammim etal ñan jikin jar eo, kõmar iioon juon jiroñ. Jiroñ in ej juon ri-kõm̦akoko im euwe jetõb ettoon ippãn, im jetõb eo ear kõmaroñe bwe en jel̦ã bubu. El̦ap an kar jiroñ in kõm̦m̦an elõñ jããn ñan irooj ro an kõn an jel̦ã bubu.* 17 Jiroñ in el̦akkar l̦oor kõmeañ Paul im ear kõl̦l̦aaj ainikien im ba: “Em̦m̦aan rein rej ri-karejeran Anij eo Eutiejtata im rej kwal̦o̦k ñan kom̦ ial̦ eo ñan lo̦mo̦o̦r.” 18 Elõñ raanin an kar kõm̦m̦ane men in. Ãliktata, Paul ear m̦õkl̦o̦k wõt im ear oktakl̦o̦k ñane im ba ñan jetõb ettoon eo: “Ij jiroñ eok ilo etan Jesus Christ bwe kwõn diwõjtok jãn jiroñ n̦e.” Innem jetõb eo ear diwõjl̦o̦k ilo iien eo wõt.

19 Ke irooj ro an jiroñ eo rar lo bwe ejako ial̦an kõm̦m̦an jããn eo aer, rar jibwe Paul im Sailas im iperl̦o̦k erro ñan jikin wia eo ñan ippãn ri-tõl ro. 20 Rar bõkl̦o̦k er ñan ippãn ri-tõl rein im ba: “El̦ap an l̦õm̦arein kõm̦m̦an poktak ilo jikin in ad. Erro ri-Ju, 21 im rej kwal̦o̦k kõn m̦anit ko emo̦ ad bũki ak l̦oori kõnke kõj ri-Rom.” 22 Innem jarlepju in armej ro rar kõnnaan ñan erro ilo illu, im ãlikin an ri-tõl ro kekõle nuknuk ko aerro, rar jiroñ ri-waj ro bwe ren deñõt erro kõn al̦al̦. 23 Ãlikin aer deñl̦o̦ke erro elõñ alen, rar likũt erro ilo kalbuuj im jiroñ ri-waj eo an im̦õn kalbuuj eo bwe en lukkuun waje er. 24 Ke ri-waj eo ear roñ men in, ear likũt erro ilo ruum̦ eo epentata diwõj jãne ilo im̦õn kalbuuj eo, im ear l̦ake neerro n̦a ikõtaan al̦al̦ ko rel̦l̦ap im reddo.

25 Bõtab ke ear lukwõn boñ, Paul im Sailas rar jar im nõbar Anij ilo aerro al, im ri-kalbuuj ro jet rar roñjake er. 26 Innem ilo jidimkij ear wal̦o̦k juon m̦akũtkũt lal̦ el̦ap, im ear em̦m̦akũtkũt pedpedin im̦õn kalbuuj eo. Bareinwõt, aolep kõjãm ko rar kajju pel̦l̦o̦k im jeen ko rar lukwõje aolep ri-kalbuuj ro kaki rar mejal̦. 27 Ke ri-waj eo ear ruj im lo bwe epel̦l̦o̦k kõjãm ko ilo im̦õn kalbuuj eo, ear kwal̦o̦k jãje eo an im ear itõn m̦an e make kõn an l̦õmn̦ak bwe ri-kalbuuj ro reko. 28 Bõtab Paul ear ikkũrl̦o̦k ñane im ba: “Kwõn jab m̦an eok make bwe kõm aolep e ije!” 29 Kõn men in, ear kajjitõk bwe ren bõkl̦o̦k kein an romrom im ear kaiur im del̦o̦ñl̦o̦k, im ear wũdiddid im buñpedo im̦aan mejãn Paul im Sailas. 30 Innem ear kadiwõj er im kajjitõk ippãer im ba: “Em̦m̦aan ran̦, ta eo ij aikuj kõm̦m̦ane bwe in maroñ bõk lo̦mo̦o̦r?” 31 Rar ba: “Kwõn tõmak ilo Irooj Jesus im kwõnaaj bõk lo̦mo̦o̦r, kwe im ro ilo m̦weo im̦õm̦.” 32 Innem rar kwal̦o̦k kõn naan eo an Jeova* ñane im aolep ro ilo m̦weo im̦õn. 33 Im ear bõk er ilo ejja awa eo wõt ilo boñõn eo im kwal̦ kinej ko aer. Innem e im aolep ro ilo m̦weo im̦õn rar kajju peptaij. 34 Ear bõktok er ñan m̦weo im̦õn im ear kõpooj juon tebõl̦ in m̦õñã ñan er, im ear lukkuun m̦õn̦õn̦õ bwe kiiõ ej tõmak ilo Anij, im aolep ro ilo m̦weo im̦õn rar bareinwõt m̦õn̦õn̦õ.

35 Ke ear raan, ri-tõl ro rar jilkinl̦o̦k jet ri-waj bwe ren ba: “Karõl̦o̦k em̦m̦aan ran̦e.” 36 Ri-waj eo an im̦õn kalbuuj eo ear kwal̦o̦k naan kein ñan Paul: “Ri-tõl ro rar ijjilõktok ennaan ñan karõl̦o̦k komiro. Kõn men in, komiro en diwõjl̦o̦k im ilo̦k ilo aenõm̦m̦an.” 37 Bõtab Paul ear ba ñane: “Kõm̦ro ri-Rom, bõtab rar deñl̦o̦ke kõm̦ro ilo̦bwilej meñe ejjel̦o̦k ruõm̦ro,* im rar kalbuuji kõm̦ro. Ak kiiõ rej itõn kadiwõjl̦o̦k kõm̦ro ilo ittino ke? Eban! Rej aikuj itok im make kadiwõjl̦o̦k kõm̦ro.” 38 Ri-waj ro rar kwal̦o̦k naan kein ñan ri-tõl ro, im ri-tõl rein rar lõl̦ño̦ñ ke rar roñ bwe em̦m̦aan rein rej ri-Rom. 39 Innem rar itok im jol̦o̦k aer bõd ippãerro, im ãlikin aer kar kadiwõjl̦o̦k erro, rar kajjitõk bwe ren ilo̦k jãn jikin eo. 40 Bõtab rar diwõjl̦o̦k jãn im̦õn kalbuuj eo im etal ñan m̦weo im̦õn Lidia, im ke rar iioone rũttõmak ro ijo, erro kar kõkajoor er. Ãlikin men in, erro kar etal.