1 Tessalonika
1 Jãn ña Paul, Silvenõs,* im Timote, ñan ro ilo eklejia eo ilo Tessalonika, ro rej juon wõt ippãn Anij, eo Jemãdwõj, im Irooj Jesus Christ:
Jouj eo el̦ap im aenõm̦m̦an en pãd ippemi.
2 Iien otemjej kõmij kam̦m̦oolol Anij ñe kõmij likũt kom̦ aolep ilo jar ko am 3 kõnke ejjab bõjrak ammim keememej kom̦ im̦aan mejãn ad Anij Jemãd kõn jerbal ko kom̦ar kõm̦m̦ani ilo tiljek im yokwe, im ami kijenmej kõn wõt kõjatdikdik eo ami ilo ad Irooj Jesus Christ. 4 Kom̦ ro jeim im jatim me Anij ej yokwe er, kõm jel̦ã bwe ej kããlõt kom̦ 5 kõnke ennaan eo em̦m̦an kõmij kwal̦o̦k kake ear jab iwõj ñan kom̦ ilo naan wõt, ak bareinwõt ikijjeen kajoor im jetõb kwõjarjar,* im bwe kõmar lukkuun tõmak bwe men eo kõmij kwal̦o̦k kake ñan kom̦ em̦ool, bwe kom̦ jel̦ã wãween am jerbal ippemi ej ñan ami bõk tokjãn. 6 Innem kom̦ar oktak im ri-kajjioñe kõm im Irooj ilo ami kar bõk naan eo ilo lañlõñ meñe kom̦ar iioon el̦ap eñtaan, aet, lañlõñ eo jãn jetõb kwõjarjar.* 7 Innem kom̦ar oktak im juon joñak ñan aolep rũttõmak ro ilo Masedonia im Akeia.
8 Ilo m̦ool, kom̦ar jab kajeedede wõt naan eo an Jeova* ilo Masedonia im Akeia, ak tõmak eo ami ilo Anij ear bareinwõt ajeededl̦o̦k ñan aolep jikin ko jet, joñan ejjel̦o̦k jabdewõt men en̦ kõmij aikuj in ba. 9 Ejjab bõjrak aer kwal̦o̦k kõn jinoin ammim kar iwõj ñan ippemi im kõn ami kar oktak ñan Anij im el̦l̦o̦k jãn ekjab ko ami bwe kom̦win ri-kõm̦akoko ñan Anij eo emour im em̦ool, 10 im bwe kom̦win kõttar Nejin jãn lañ, eo ear jerkak jãn mej, e in ej Jesus, eo ej lo̦mo̦o̦ren kõj jãn illu eo an Anij me ej itok.