Luk

5 Juon iien ke Jesus ear jutak iparijetin Reba Genesaret,* jarlepju in armej ro rar ko̦baje bwe ren roñjake naanin Anij. 2 Innem ear lo ruo wa rej ãr iparijetin reba eo, bõtab em̦õj an ri-eo̦ñõd ro to jãn wa ko im rej kwal̦i ok ko aer. 3 Im ear uwel̦o̦k ioon juon iaan wa ko, im wa eo ej waan Saimõn* im ear kajjitõk ippãn bwe en iuun metol̦o̦k jidik jãn iparijet. Innem ear jijet im jino katakin jarlepju eo jãn ioon wa eo. 4 Ãlikin an kõnono ñan jarlepju eo, ear ba ñan Saimõn im ba: “Jen wõnmetol̦o̦k ñan ijen̦ em̦wilal̦ im kom̦win doorlal̦l̦o̦k ok kan̦e ami.” 5 Ak Saimõn ear uwaak im ba: “Ri-Kaki, kõmar emmej aolepen boñ im eo̦ñõd ak ejjel̦o̦k kun̦aam. Bõtab kõnke kwõj ba men in, inaaj kõm̦m̦ane.” 6 Innem ke rar doorlal̦l̦o̦k ok ko aer, elukkuun lõñ ek rar ko̦jek. Joñan an lõñ, ok ko aer rar jino potak. 7 Kõn men in, rar jaal̦e ri-eo̦ñõd ro m̦õttaer ilo wa eo juon bwe ren itõn jipañ er. Innem rar itok im ektake ek ko, im joñan an obrak aolepen wa ko ruo, rar jino douj. 8 Ke Saimõn Piter ej lo men in, ear bukwelõlõ im̦aan Jesus im ba: “Irooj, ijekkar ñan pãd iturum̦ kõnke ña juon rijjerawiwi.” 9 Ear ba men in kõnke e im ro jet ippãn rar kanooj bwilõñ kõn joñan lõñ in ek ko rar ko̦jeki. 10 L̦õm̦aro nejin Zebedi etaer Jemes im Jon me rar eo̦ñõd ippãn Saimõn rar bar bwilõñ. Bõtab Jesus ear ba ñan Saimõn: “Kwõn jab mijak, bwe jen kiiõ im etal kwõnaaj ri-eo̦ñõd armej.” 11 Kõn men in, rar ãri wa ko n̦a ilo ãne im rar likũt men otemjej im l̦oore.

12 Juon iien Jesus ear bar pãd ilo juon iaan bukwõn ko im ear wõr juon em̦m̦aan ijo ear l̦ap an lõba! Ke em̦m̦aan in ear loe, ear kepaakel̦o̦k im buñpedo im akwel̦ap ñane im ba: “Irooj, el̦aññe kokõn̦aan, kwõmaroñ kõm̦m̦an bwe in erreo.” 13 Innem ear lel̦o̦k pein im uñũri em̦m̦aan eo im ba: “Ikõn̦aan! Kwõn erreo.” Im em̦õkaj an jako an em̦m̦aan eo lõba. 14 Innem ear jiroñ em̦m̦aan eo bwe en jab ba ñan jabdewõt, ak ear ba ñane: “Kwõn jãdel̦o̦k ñan ippãn bũrij en̦, innem lel̦o̦k am̦ menin katok ekkar ñan men ko Moses ear ba, bwe en kein am̦ kam̦ool ñan er bwe kwõrreo.” 15 Bõtab ear ajeededl̦o̦k wõt ennaan eo kõn Jesus, im eitok wõt bwe jarlepju in armej ro ren jibadektok bwe ren roñjake e im bwe en kõmour er jãn nañinmej ko aer. 16 Ak ekkã an etal ñan jet jikin bwe en make iaan ie im jar.

17 Juon raan, ear katakin armej ro ilowaan juon em̦ im kajoor eo an Jeova* ear pãd ippãn bwe en maroñ kõmour armej. Ilo tõre in, Parisi* ro im ri-kaki ro an Kien eo rar itok jãn Jerusalem im aolep bukwõn ko ilo Galili im Judia rar bar jijet ijo. 18 Innem jet em̦m̦aan rar kotaktok juon em̦m̦aan ejaje m̦akũtkũt ej babu ioon men eo kinien, im rar kajjioñ in itõn del̦o̦ñ im bõkl̦o̦k ñan ippãn Jesus. 19 Bõtab ke ear ejjel̦o̦k ial̦an aer kadel̦o̦ñe kõn wõt jarlepju eo, rar tallõñ iraan m̦weo. Innem rar doorlal̦l̦o̦k em̦m̦aan eo ioon men eo kinien ikijjeen wõt ijo rar rupe, im rar lelal̦l̦o̦k n̦a ibwiljin armej ro rej pãd iturin Jesus. 20 Ke ear lo joñan tõmak eo aer, ear jiroñl̦o̦k em̦m̦aan eo im ba: “Em̦õj jol̦o̦k jerawiwi ko am̦.” 21 Innem skraib* ro im Parisi ro rar kõnnaan ippãn doon im ba: “Wõn l̦ein bwe en kõnono n̦ae Anij? Ta ebar wõr emaroñ jol̦o̦k jerawiwi ijello̦kun Anij ke?” 22 Bõtab Jesus ear jel̦ã l̦õmn̦ak ko aer im ear ba: “Etke kom̦ij l̦õmn̦ak rot kan̦e? 23 Ta eo epidodol̦o̦k ñan ba, ‘Em̦õj jol̦o̦k jerawiwi ko am̦’ ke ak, ‘Kwõn jutak im etetal’? 24 Bõtab ñan kam̦ool ñan kom̦ bwe ewõr an Nejin armej* maroñ ioon lal̦ in ñan jol̦o̦k jerawiwi​—” ear ba ñan em̦m̦aan eo ejaje m̦akũtkũt: “Ij jiroñ eok bwe kwõn jutak im bõk men n̦e kiniem̦ im ilo̦k ñan m̦weo im̦õm̦.” 25 Im em̦m̦aan eo ear kajju jutak im̦aan mejãer im bõk men eo kinien im ro̦o̦l ñan m̦weo im̦õn ak ej nõbar Anij. 26 Armej ro otemjej rar lukkuun bwilõñ im l̦o̦kjenaer, innem rar jino nõbar Anij im ba: “Kõmar lo men ko rekanooj em̦m̦an rainin!”

27 Ãlikin men in, ear ilo̦k im ear loe juon ri-tõltõl eowõj etan Livai ej jijet ilo im̦õn tõltõl eowõj eo, im ear ba ñane: “Kwõn itok im l̦oor eõ.”* 28 Kõn men in, ear likũt men otemjej im jutak im l̦oore. 29 Innem Livai ear kõm̦m̦ane juon kõjota el̦ap ñane ilo m̦weo im̦õn, im elõñ armej rar kõjota* ippãer, ekoba elõñ ri-tõltõl eowõj. 30 Kõn men in, Parisi ro im ro jet uwaaer me rej skraib rar kõrraate ri-kal̦oor ro an im ba: “Etke kom̦ij m̦õñã im idaak ippãn ri-tõltõl eowõj im rijjerawiwi?” 31 Bõtab Jesus ear uwaak er im ba: “Ro rãjmour rejjab aikuji juon taktõ, ro renañinmej wõt. 32 Iar jab itok bwe in pukot ro rewãnõk,* ak iar itok bwe in rõjañ rijjerawiwi ro bwe ren ukel̦o̦k.”

33 Im rar ba ñane: “Ri-kal̦oor ro an Jon im bar ri-kal̦oor ro an Parisi ro rej ekkeini aer jitlo̦k im jar im akwel̦ap, bõtab ri-kal̦oor ran̦e am̦ rej m̦õñã im idaak.” 34 Jesus euwaake er im ba: “Kom̦ ban kõm̦m̦an bwe ro m̦õttan l̦eo ej kab m̦õj an m̦are ren jitlo̦k ñe l̦eo ej pãdwõt ippãer. 35 Bõtab juon iien naaj bõk l̦eo jãn er, innem rej kab naaj bũrom̦õj im jitlo̦k.”*

36 Ear bar kwal̦o̦k juon waanjoñak ñan er im ba: “Ejjel̦o̦k en̦ ej m̦wijiti jidik m̦õttan jãn juon nuknuk kããl im karpene juon nuknuk m̦or kake. Ñe enaaj kõm̦m̦ane men in, m̦õttan eo jãn nuknuk eo ekããl enaaj kõm̦m̦an an potak nuknuk eo em̦or. Bareinwõt, m̦õttan eo ekããl ejjab ekkar ñan nuknuk eo em̦or. 37 Im ebar ejjel̦o̦k en̦ ej teiñil̦o̦k nien wain ko* rem̦or kõn wain ko rekããl. El̦aññe enaaj kõm̦m̦ane men in, wain ko rekããl renaaj kõm̦m̦an an potak nien wain ko im jorrããn, im wain ko renaaj lutõk. 38 Wain ko rekããl rej aikuj pãd ilo nien wain ko rekããl. 39 Juon eo em̦õj an idaak wain ko eto aer pãd eban kõn̦aan idaak wain kããl kõnke ej ba, ‘Enno̦ wõt wain in eto an pãd.’”