1 Korint

8 Ak kiiõ, ikijjeen m̦õñã ko em̦õj ajil̦o̦k ñan ekjab ko: Jejel̦ã bwe ewõr jel̦ãl̦o̦kjen̦ ippãd aolep. Jel̦ãl̦o̦kjen̦ ej kõm̦m̦an bwe juon en utiej bõro, bõtab yokwe ej kalõk. 2 El̦aññe jabdewõt ej l̦õmn̦ak bwe ewõr an jel̦ã kõn juon men, ilo m̦ool ejjañin tõpar joñan eo en kar jel̦ã kake. 3 Bõtab el̦aññe jabdewõt ej yokwe Anij, innem Anij ejel̦ã kajjien armej in.

4 Ak kiiõ ikijjeen an juon kañi m̦õñã ko em̦õj ajil̦o̦k ñan ekjab ko, jejel̦ã bwe ejjel̦o̦k tokjãn ekjab ko ñan jidik, im ewõr juon wõt Anij im ebar ejjel̦o̦k ijello̦kun. 5 Meñe elõñ men ko armej rej n̦aetaer anij, ilañ ak ilal̦, im m̦ool bwe elõñ “anij” im elõñ “irooj,” 6 bõtab ñan kõj, ewõr juon wõt Anij. E eo ej Jemãdwõj ilañ, im e eo ear kõm̦anm̦an men otemjej, im jej mour ñane. Bareinwõt, ewõr juon wõt Irooj, Jesus Christ. Ikijjeen e, kar kõm̦anm̦an men otemjej, im jej mour kõn wõt e.

7 Ijoke ejjab aolep rejel̦ã men in. Bõtab jet armej, kõnke rekõn kabuñ ñan ekjab ko, ñe rej kañi m̦õñã ko em̦õj katok kaki ñan ekjab, rej l̦õmn̦ak bwe rej kabuñ ñan ekjab, im ettoon bõklõkõt ko aer kõn an m̦õjn̦o̦. 8 Bõtab m̦õñã eban kepaakl̦o̦k kõj ñan Anij. Ñe jejjab m̦õñã, jejjab nanal̦o̦k, bareinwõt ñe jej m̦õñã, jejjab em̦m̦anl̦o̦k. 9 Ijoke, kom̦win kanooj kõjparok bwe jim̦we im maroñ eo ami ñan kããlõt en jab kal̦õkatipi ro rem̦õjn̦o̦. 10 Ñe kwõj juon eo ewõr an jel̦ã im jabdewõt ej lo am̦ m̦õñã ilo juon im̦õn kabuñ ñan ekjab, ta men in eban kõm̦m̦an bwe juon eo em̦õjn̦o̦ bõklõkõt eo an en kiiõ peran in kañi m̦õñã ko em̦õj ajil̦o̦k ñan ekjab ko ke? 11 Kõn men in, jel̦ã eo am̦ ekõm̦m̦an bwe en jorrããn eo jeim̦ ak jatũm̦ me em̦õjn̦o̦, eo Christ ear mej kake. 12 Ñe kom̦ij jerawiwi n̦ae ro jeimi im jatimi ilo wãween in im kakinejnej bõklõkõt ko aer rem̦õjn̦o̦, kom̦ij jerawiwi n̦ae Christ. 13 Eñin unin el̦aññe m̦õñã ej kal̦õkatip eo jeiũ ak jatũ, innem iban bar m̦õñã kanniõk ñan jidik bwe in jab kal̦õkatip eo jeiũ ak jatũ.