Hibru
7 Melkizedek, kiiñ in Salem im bũrij an Anij eo Eutiejtata, ear iioon an Ebream jepl̦aak jãn ijo ear m̦an kiiñ ro, im ear kõjeraam̦m̦an Ebream. 2 Im Ebream ear lel̦o̦k* ñane juon m̦õttan joñoul jãn aolep menin rakim ko ippãn. M̦oktata kar ukokin etan armej in ej, “Kiiñ in Wãnõk” im bareinwõt kiiñ in Salem, mel̦el̦ein, “Kiiñ in Aenõm̦m̦an.” 3 Ejjab alikkar wõn jemãn im jinen im bwij ta eo ear itok jãne, ejjel̦o̦k jinoin raan ko an im jem̦l̦o̦kin mour eo an. Bõtab, kõnke kar kõm̦m̦an bwe en ãinwõt eo Nejin Anij, innem ej bũrij ñan indeeo.*
4 Elukkuun utiej em̦m̦aan in, joñan Ebream, eo ej juon jeban baam̦le, ear lel̦o̦k ñane juon m̦õttan joñoul jãn aolep menin rakim ko ippãn im rem̦m̦antata. 5 Em̦ool bwe ro nejin Livai im rar bõk jerbalin bũrij, kar aer eddo ekkar ñan Kien eo ñan bõk juon m̦õttan joñoul jãn armej ro, aet jãn ro jeier im jatier, meñe rein rar bareinwõt jãn bwijjin Ebream. 6 Bõtab armej in ear jab itok jãn menmenbwij in an rein, ear bõk juon m̦õttan joñoul jãn Ebream im kõjeraam̦m̦ane, eo im kallim̦ur ko rej ñane. 7 Kiiõ ejjel̦o̦k pere ñan jidik bwe eo eutiej ear kõjeraam̦m̦an eo ettã. 8 Ro rar bõk juon m̦õttan joñoul, rej jet ro remaroñ mej, bõtab ñan eo juon im ear bõk juon m̦õttan joñoul, Jeje ko rej kam̦ool bwe ej mour wõt. 9 Jemaroñ ba bwe ikijjeen Ebream, Livai, eo ekõn bõk juon m̦õttan joñoul, ear bareinwõt kõl̦l̦ã juon m̦õttan joñoul, 10 unin ej kõnke ej juon eo enaaj kar itok jãn bwijjin Ebream, eo jim̦m̦aan, im ejjañin kar l̦otak ilo iien eo Melkizedek ear iioone Ebream.
11 El̦aññe armej remaroñ weeppãn ikijjeen bũrij ro jãn bwijjin Livai (bwe eñin kar m̦õttan karõk eo ilo Kien eo kar lel̦o̦k ñan armej ro), innem etke ej menin aikuj bwe en bar wõr juon bũrij, eo em̦õj ba bwe ej ãinwõt Melkizedek im ejjab ãinwõt Aron? 12 Innem kõnke enaaj wõr oktakin ro rej bõk jerbalin bũrij, ekkar bwe Kien eo en bareinwõt oktak. 13 Bwe armej in men kein rej kõnono kake ej itok jãn bar juon bwij me ejjel̦o̦k juon jãne enañin kar jerbal ilo lokatok eo. 14 Elukkuun alikkar bwe ad Irooj ear itok jãn bwijjin Juda, ijoke Moses ear jab ba bwe ewõr bũrij enaaj kar itok jãn bwij in.
15 Men in ear lukkuun alikkarl̦o̦k ke ear wal̦o̦k bar juon bũrij ãinwõt kar Melkizedek, 16 im an erom bũrij ear jab pedped ioon kakien ko kõn bwij eo ej itok jãne, bõtab ej kõn kajoor eo an Eo im ear lel̦o̦k ñane juon mour eo ejjãmin wabanban. 17 Im em̦õj kar kwal̦o̦k men in kõn e im ba: “Kwe kwõj juon bũrij ãinwõt kar Melkizedek im kwõnaaj bũrij ñan indeeo.”
18 Kõn men in, kar jol̦o̦k kien eo m̦okta kõnke em̦õjn̦o̦ im ejako an jerbal. 19 Bwe Kien eo ear jab kõweeppãn men otemjej, bõtab kõjatdikdik eo em̦m̦anl̦o̦k im em̦õj letoke ear kajejjet men in, eo ej kõm̦m̦an ad epaakel̦o̦k Anij. 20 Bareinwõt, kõnke kar kõm̦m̦ane men in ikijjeen juon kallim̦ur 21 (em̦ool bwe ewõr em̦m̦aan ro rar bũrij meñe kar jab kõm̦m̦an juon naanin kallim̦ur kõn er, bõtab armej in ear erom bũrij ikijjeen juon naanin kallim̦ur kõn e, im ej jãn Eo ear ba: “Jeova* ear kwal̦o̦k naanin kallim̦ur im ejjãmin ukot an l̦õmn̦ak,* ‘Kwe kwõj juon bũrij ñan indeeo’”), 22 Jesus ear erom juon eo ej kapene* bujen eo em̦m̦anl̦o̦k. 23 Bareinwõt, elõñ rar aikuj in erom bũrij bwe ren pinej jenkwan ro im mej ear bõbrae aer wõnm̦aanl̦o̦k ilo jerbal in, 24 bõtab kõnke ej wõnm̦aanl̦o̦k im mour ñan indeeo, ejjel̦o̦k enaaj pinej jenkwan ilo jerbalin bũrij. 25 Kõn men in, ewõr an bareinwõt maroñ ñan lukkuun lo̦mo̦o̦ren ro rej kepaake Anij kõn e, kõnke ej mour ñan indeeo bwe en akwel̦ap kõn er.
26 Ekkar bwe en wõr juon ad bũrij l̦apl̦ap eo etiljek, ejjel̦o̦k n̦otaan, erreo, ejenolo̦k jãn rijjerawiwi ro, im em̦õj kautieje ilõñin lañ ko. 27 Eoktak jãn bũrij l̦apl̦ap ro jet, kõnke ejjab aikuj ajel̦o̦k menin katok ko aolep raan, m̦oktata kõn jerawiwi ko an, innem tokãlik kõn jerawiwi ko an armej ro jet. Unin ej kõnke ear ajel̦o̦k mour eo an make juon wõt alen. 28 Armej ro rar jerbalin bũrij l̦apl̦ap im ewõr aer m̦õjn̦o̦, Kien eo ear kããlõt er. Bõtab kallim̦ur eo kar kallim̦ur kake ãlikin Kien eo, ear kããlõt Nejin, eo em̦õj kõweeppãne ñan indeeo.