2 Korint

6 Ilo ammim jerbal ippãn Anij, kõmij bareinwõt rõjañ kom̦ bwe kom̦win jab bõk jouj eo el̦ap an Anij im kajejtokjãn. 2 Bwe ej ba: “Iar roñjake eok ilo iien eo em̦m̦an, im iar jipañ eok ilo raanin lo̦mo̦o̦r.” Roñjake m̦õk! Kiiõ ej iien eo elukkuun em̦m̦an. Roñjake m̦õk! Rainin ej raanin lo̦mo̦o̦r.

3 Kõmij kate kõm bwe kõmin jab kõm̦m̦an menin an jabdewõt l̦õkatip, kõnke en ejjel̦o̦k n̦otaan jerbal in ammim. 4 Bõtab kõmij kwal̦o̦k bwe kõm ri-jerbal ñan Anij ilo men otemjej: ilo am lukkuun kijenmej ium̦win elõñ mãlejjoñ ko, ilo apañ ko, ilo menin kaeñtaan ko, ilo am pãd ilo aikuj, ilo am iioon men ko reppen, 5 ilo aer m̦an kõm, ilo aer kalbuuji kõm, ilo aer kõm̦akokoik kõm, ilo am iioon jarlepju in armej ro rellãj, ilo am jab kiki elõñ boñ, im ilo an ejjel̦o̦k kijem m̦õñã. 6 Bareinwõt, ilo am mour ilo erreo, ilo jel̦ãl̦o̦kjen̦, ilo meanwõd, ilo jouj, ilo am kõtl̦o̦k bwe jetõb kwõjarjar* en tõl kõm, ilo am kwal̦o̦k yokwe eo ejjab etao, 7 ilo am kõnono ilo m̦ool, im ilo am atartar ioon kajoor eo an Anij. Kõmij jibwe kein tarin̦ae ko an wãnõk ituanmoon̦* im ituanmiiñ.* 8 Rej kautiej kõm im rej kajook kõm, rej kõnanaik kõm im rej nõbar kõm. Rej watõk kõm ri-riab bõtab kõm armej ro rej kwal̦o̦k m̦ool, 9 ro ejjel̦o̦k en̦ ejel̦ã kajjier bõtab Anij ejel̦ã kajjiem, ro reitõn mej* ak l̦ak lale kõmij mour wõt, ro em̦õj kajeik* er bõtab kar jab liaakel̦o̦k kõm ñan mej. 10 Rej watõk kõm ro rebũrom̦õj bõtab aolep iien kõmij m̦õn̦õn̦õ, ro rejeram̦õl bõtab kõmij kõm̦m̦an bwe elõñ ren m̦weiie, ro ejjel̦o̦k jabdewõt men ippãer bõtab ilo m̦ool ewõr ippem men otemjej.

11 Kõmar kõpel̦l̦o̦k lo̦ñiim bwe kõmin kõnono* ñan kom̦ ri-Korint, im kõmar lukkuun kõpel̦l̦o̦k bũruem. 12 Kõmij jab kiil bũruem jãn kom̦, ak kom̦ij kiil bũruomi jãn kõm. 13 Kõn men in, ij kõnnaan ñan kom̦ ãinwõt ajri ro nejũ, kom̦win bareinwõt lukkuun kõpel̦l̦o̦k bũruomi.*

14 Kom̦win jab kobaikl̦o̦k kom̦ ippãn ro rejjab tõmak.* Ta, wãnõk im nana remaroñ ke ippãn doon? Ak meram im marok remaroñ ke pãd ippãn doon? 15 Bareinwõt, Christ im Bilial* remaroñ ke rejetake doon? Ak ta eo juon rũttõmak* im juon eo ejjab rũttõmak rej juon wõt kake?* 16 Im tampel̦ eo an Anij im ekjab ko remaroñ ke rejetake doon? Bwe jej ãinwõt juon tampel̦ an Anij eo emour, im Anij ear ba: “Inaaj jokwe ibwiljier im etetal ibwiljier, im inaaj aer Anij im renaaj armej ro doõ.” 17 “‘Kõn men in, kom̦win diwõjtok jãn ibwiljier im kõjenolo̦k kom̦ make,’ Jeova* ej ba, ‘im bõjrak jãn ami jibwe men eo ettoon’”, “‘innem inaaj bõk kom̦.’” 18 “‘Im inaaj erom Jememi, im kom̦ naaj erom ro nejũ kõrã im em̦m̦aan,’ Jeova,* eo Eutiejtata, ej ba.”