Luk

7 Ke ear m̦õj an kõnnaan ñan armej ro, ear etal ñan Kaperneum. 2 Kiiõ ear wõr juon kapen in jarin tarin̦ae me ri-karejar* eo an ear lukkuun nañinmej im eitõn mej. Ri-karejar in elukkuun aorõk ippãn kapen in. 3 Ke kapen in ear roñ kõn Jesus, ear jilkinl̦o̦k jet iaan ri-tõl ro an ri-Ju bwe ren kajjitõk ippãn bwe en itok im kõmour ri-karejar eo an. 4 Innem rar kepaak Jesus im akwel̦ap ñane im ba: “Ej juon eo ekkar bwe kwõn katõprak kajjitõk en̦ an, 5 kõnke el̦ap an yokwe aelõñ in ad im ear kalõk im̦õn kabuñ en̦ am.” 6 Kõn men in, Jesus ear etal ippãerl̦o̦k. Bõtab ke ej epaakel̦o̦k m̦weo, kapen eo ear jilkinl̦o̦k jet m̦õttan ñan ippãn bwe ren ba: “Irooj, em̦m̦anl̦o̦k kwõn jab itok bwe ña juon eo ejjel̦o̦k tokjãn ñan am̦ jibadektok m̦ween̦ im̦õ. 7 Eñin unin iar jab iwõj ñan ippam̦. Bõtab kwõn kwal̦o̦k wõt juon naan im eo karejera enaaj mour. 8 Ña ij bar juon eo ej pãd ium̦win maroñ eo an ro reutiejl̦o̦k, im ewõr rũttarin̦ae rej pãd ium̦win maroñ e aõ. Ñe ij jiroñ juon im ba, ‘Etal!’ ej etal, im ñe ij jiroñ bar juon im ba, ‘Itok!’ ej itok. Im ñe ij ba ñan eo karejera* im ba, ‘Kõm̦m̦ane men in!’ ej kõm̦m̦ane.” 9 Ke Jesus ear roñ men kein, ear lukkuun bwilõñ, im ear reilo̦k ñan jarin armej ro rej l̦oore im ba: “Ij ba ñan kom̦, ijjañin kar lo juon ilo Israel joñan dein an l̦ap an tõmak.” 10 Ke ro kar jilkinl̦o̦k er ñan ippãn rar ro̦o̦l ñan m̦weo, ear em̦m̦an an ri-karejar eo mour.

11 Tokãlik Jesus ear etal ñan juon bukwõn etan Nein, im ri-kal̦oor ro an im juon jarlepju in armej rar bar etal ippãnl̦o̦k. 12 Ke ear tõparl̦o̦k jikin del̦o̦ñl̦o̦k eo ilo bukwõn eo, armej ro rej bõk juon likao emej bwe ren itõn kalibwini. Likao in ear make wõt nejin juon kõrã emej l̦eo pãleen, im elõñ armej in bukwõn eo rar etal ippãn kõrã eo l̦o̦k. 13 Ke Irooj ear lo kõrã eo, ear kanooj bũrom̦õj kake im ear ba ñane: “Kwõn bõjrak jãn am̦ jañ.” 14 Innem ear etal im jibwe men eo rej kotak ri-mej eo kake. Kõn men in, ro rej kotake rar bõjrak. Innem ear ba: “Likao en̦, ij jiroñ eok bwe kwõn jerkak!” 15 Innem likao eo ear mej ear bar mour im ear jerkak im jino kõnnaan, im Jesus ear ãñinl̦o̦k ñan ippãn jinen. 16 Armej ro rar l̦o̦kjenaer im rar nõbar Anij im ba: “Ewõr juon ri-kanaan ekajoor ippãd kiiõ,” im, “Anij ej kiiõ keememeje armej ro an.” 17 Im ennaan eo kõn Jesus ear ajeededl̦o̦k ñan aolepen bukwõn ko ilo jikin in im ilo bukwõn ko ilo Judia.

18 Ri-kal̦oor ro an Jon rar kõnnaanekl̦o̦k e kõn aolep men kein rar wal̦o̦k. 19 Kõn men in, Jon ear jiroñ ruo iaan ri-kal̦oor ro an bwe ren etal im kajjitõk ippãn Irooj im ba: “Kwe eo ke kõmij kõttare? Ke ta, kõmin kõttar bar juon armej?” 20 Ke rar tõpar Jesus, rar ba: “Jon ri-Peptaij ear jilkintok kõm ñan ippam̦ bwe kõmin kajjitõk, ‘Kwe eo ke kõmij kõttare? Ke ta, kõmin kõttar bar juon?’” 21 Innem ilo iien eo wõt, ear kõmour elõñ armej jãn nañinmej ko rel̦l̦ap im nañinmej ko reddik, ear kadiwõjl̦o̦k jetõb ko rettoon, im ear kõm̦m̦an bwe ro repilo ren bar lol̦o̦kjen̦. 22 Im ear uwaak er im ba: “Kom̦win jepl̦aak ñan ippãn Jon im kwal̦o̦k ñane kõn men ko kom̦ar roñ im loi. Ro rar pilo rej kiiõ lol̦o̦kjen̦, ro rar jaje etetal rej etetal, ro rar lõba rerreo kiiõ, ro rar jarroñroñ rej roñl̦o̦kjen̦, ro rar mej rebar mour, im ro rejeram̦õl rej roñjake ennaan eo em̦m̦an. 23 Em̦õn̦õn̦õ eo ej lukkuun lõke eõ im ejjab pere eõ.”*

24 Ke ri-kal̦oor ro an Jon rar ilo̦k, Jesus ear jino an kõnnaan ñan jarlepju in armej ro kõn Jon, im ba: “Ta eo kom̦ar ilen lale ke kom̦ar ilo̦k ñan ãne jem̦aden? Juon armej me ej ãinwõt juon menin eddek* epidodo an kõto uukto uuktak ke? 25 Ta eo kom̦ar ilen lale? Juon em̦m̦aan ej kõn̦ak nuknuk ko remeoeo* ke? Eban, ro rej kõn̦ak nuknuk ko rekanooj aiboojoj im em̦m̦an kõjeiier rej jokwe ilo m̦õko im̦õn kiiñ. 26 Kom̦win kwal̦o̦k ta eo kom̦ar etal in lale. Kom̦ar ilen lale juon ri-kanaan ke? Aet Jon ej juon ri-kanaan, bõtab eutiejl̦o̦k jãn ri-kanaan ro jet. 27 Eñin ej armej eo kar jeje kake im ba: ‘Ij jilkinl̦o̦k ri-keeañ eo aõ im̦aam̦,* im enaaj kõpooj ial̦ eo am̦.’ 28 Ij ba ñan kom̦ bwe iaan aolep armej ro im rar mour, ejjel̦o̦k juon iaaer eutiejl̦o̦k jãn Jon. Bõtab, eo ettãtata ilo Aelõñ eo an Anij* eutiejl̦o̦k jãne.” 29 (Ke aolep armej ro im ri-tõltõl eowõj ro rar roñ men in, rar kaalikkar an Anij wãnõk kõnke em̦õj an Jon kar peptaiji er. 30 Ak Parisi ro im ro retijem̦l̦o̦k kõn Kien eo rar kõjekdo̦o̦n naanin kakapilõk* ko an Anij ñan er kõnke rar jab peptaij ippãn Jon.)

31 Jesus ear wõnm̦aanl̦o̦k wõt im ba: “Inaaj keidi armej in epepen in ñan wõn? Rein rej ãinwõt wõn? 32 Rej ãinwõt ajri ro rej jijet ilo jikin wia ko im ikkũr ñan doon im ba: ‘Kõmar kõjañjañ al ñan kom̦, ak kom̦ar jab eb. Kõmar lukkuun jañ, ak kom̦ar jab jañ.’ 33 Ejja ãindeinl̦o̦k wõt, Jon ri-Peptaij ear jab m̦õñã pilawã ak idaak wain, ak kom̦ar ba: ‘Ejuk jetõb ettoon* ippãn l̦ein.’ 34 Im ke Nejin armej* ear m̦õñã im idaak, kom̦ar ba: ‘Lale l̦een̦! Elukkuun mattiia* im ekkadekdek.* Ej m̦õttãik ri-tõltõl eowõj ran̦ im rijjerawiwi ran̦!’ 35 Bõtab, kõm̦m̦an ko an juon armej rej kaalikkar bwe ej juon eo emãlõtlõt.”

36 Juon iaan Parisi ro el̦akkar akwel̦ap ñan Jesus bwe en etal im kõjota ippãn. Kõn men in, ear etal ñan m̦weo im̦õn Parisi eo im kõjota ie. 37 Ilo bukwõn in, ear wõr juon kõrã rijjerawiwi. Ke liin ear jel̦ã bwe Jesus ej kõjota* ilo m̦weo im̦õn Parisi in, ear bõkl̦o̦k juon bõkã* in weil̦ eñaj. 38 Innem ear bukwelõlõ iturin neen Jesus im jañ, im neen Jesus ear tutu kõn dãnnin kõmjaal̦al̦in mejãn, im ear kõmõrãiki kõn kool̦an bõran. Bareinwõt ear mejenmaik neen im kapiti neen kõn weil̦ eo eñaj. 39 Ke Parisi eo me ear kũrtok e ej lo men in, ear ba ilo bũruon im ba: “Ñe em̦m̦aan in en kar m̦oolin ri-kanaan, innem en kar jel̦ã wõn kõrã in ej jibwe neen im kain armej rot e, im bwe ej juon kõrã ejerawiwi.” 40 Bõtab Jesus ear ba ñan Parisi eo im ba: “Saimõn, ewõr men en̦ ikõn̦aan ba ñan kwe.” Innem eba: “Em̦m̦an ri-Kaki, etal wõt!”

41 “Ruo em̦m̦aan rar m̦uri ippãn bar juon em̦m̦aan. L̦eo juon ear m̦uriik 500 denarii,* im eo juon 50. 42 Ke ear ejjel̦o̦k jabdewõt kein aerro karo̦o̦ll̦o̦k m̦uri ko aerro, em̦m̦aan eo ear jol̦o̦k m̦uri ko aerro.* Kwõl̦ak lale wõn iaan l̦õm̦arein enaaj l̦apl̦o̦k an yokwe em̦m̦aan eo rar m̦uri ippãn?” 43 Saimõn ear uwaak im ba: “Bõlen l̦eo el̦apl̦o̦k m̦uri eo an.” Innem ear ba: “Ejim̦we am̦ uwaak.” 44 Innem ear oktakl̦o̦k ñan kõrã eo bõtab ear kõnnaan ñan Saimõn im ba: “Kwõj lo ke kõrã in? Iar del̦o̦ñtok m̦wiin im̦õm̦ ak kwaar jab letok dãn ñan kwal̦ neõ. Bõtab kõrã in ear katutuuk neõ kõn dãnnin kõmjaal̦al̦in mejãn im kõmõrãiki kõn kool̦an bõran. 45 Kwaar jab mejenmaik eõ ñan kwal̦o̦k karwainene. Bõtab kõrã in el̦akkar mejenmaik neõ jãn iien eo iar del̦o̦ñtok. 46 Kwaar jab kapiti bõra kõn weil̦, ak kõrã in ear kapit neõ kõn weil̦ ñaj. 47 Kõn men in, ij jiroñ eok bwe meñe elõñ* jerawiwi ko an kõrã in, em̦õj jol̦o̦k an bõd, eñin unin el̦ap yokwe ippãn. Bõtab jabdewõt eo edik aer kar jol̦o̦k jerawiwi ko an, edik yokwe ippãn.” 48 Innem ear ba ñan kõrã eo: “Em̦õj jol̦o̦k jerawiwi kan̦e am̦.” 49 Ro rar kõjota ippãn rar kõnnaan ñan doon im ba: “Wõn em̦m̦aan in ke ej jol̦o̦k jerawiwi?” 50 Innem ear ba ñan kõrã eo: “Am̦ tõmak ear lo̦mo̦o̦ren eok, kwõn ilo̦k ilo aenõm̦m̦an.”