2 Tessalonika

1 Jãn ña Paul, Silvenõs,* im Timote, ñan eklejia eo ilo Tessalonika im ej juon wõt ippãn Anij, eo Jemãdwõj, im Irooj Jesus Christ:

2 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.

3 Ej ammim eddo aolep iien ñan kam̦m̦oolol Anij kõn kom̦ ro jeim im jatim. Men in ekkar kõnke ami tõmak ej lukkuun eddekl̦o̦k wõt, im yokwe eo ami kajjojo ñan doon ej l̦apl̦o̦k. 4 Kõn men in, kõmij kwal̦o̦k ammim utiej bũruem kake kom̦ ibwiljin eklejia ko an Anij, kõn ami kwal̦o̦k wõt ami tõmak im ami kijenmej ilo aolep menin kaeñtaan ko im apañ ko* kom̦ij eñtaan* kaki. 5 Men in ej juon kein kam̦ool bwe wãween an Anij ekajet ewãnõk, im ej kõm̦m̦an bwe en watõk kom̦ ro rekkar ñan Aelõñ eo an Anij,* eo kom̦ij iioon eñtaan kake.

6 El̦aññe ãindein, innem ej juon men ejim̦we ñan an Anij ko̦kkure ro rej kaeñtaan kom̦. 7 Bõtab kom̦ ro kom̦ij iioon eñtaan, naaj karõl̦o̦k kom̦, ekoba kõm, ilo iien eo enaaj wal̦o̦k Irooj Jesus jãn lañ, ekoba enjel̦ ro an rekajoor 8 ilo juon urur in kijeek, ñe naaj bõktok idenon̦e ioon ro rejaje kõn Anij im ro rejjab pokake ennaan eo em̦m̦an kõn ad Irooj Jesus. 9 Irooj enaaj kajeik rein ilo an kajeepepl̦o̦k er ñan indeeo, im renaaj jako jãn im̦aan mejãn im jãn aiboojoj in kajoor eo an, 10 ilo iien eo enaaj itok bwe en bõk an aiboojoj ekoba ri-karejar ro an rekkwõjarjar. Im ilo iien en̦, aolep ro rej kwal̦o̦k aer tõmak ilo e renaaj bwilõñ kake e, im kõnke kom̦ar tõmak men ko kõmar kwal̦o̦k ñan kom̦, kom̦ naaj bareinwõt pãd ibwiljin rein.

11 M̦ae tõre en̦, kõm naaj jar wõt kake kom̦ iien otemjej bwe Anij en maroñ watõk kom̦ ro rekkar ñan kũr eo an, im en kajejjet aolep men ko rem̦m̦an ej buñbũruon kaki ikijjeen kajoor eo an, im katõprak aolep jerbal ko kom̦ij kõm̦m̦ani ikijjeen tõmak. 12 Unin ej kõnke etan Irooj Jesus en aiboojoj ikijjeemi im bwe kom̦win bõk aiboojoj ilo ami juon wõt ippãn, ekkar ñan jouj eo el̦ap an Anij im an Irooj Jesus Christ.