Luk

17 Innem ear ba ñan ri-kal̦oor ro an: “Enaaj wõr wõt men ko rej kõm̦m̦an an armej jerawiwi, ak jerata ñan eo enaaj kõm̦m̦ane men in ñan ro jet! 2 Enaaj kar em̦m̦anl̦o̦k ñe rej lukwõje juon dekein irir* ekilep ilo kõnwaan im jol̦o̦ke ilo lo̦meto jãn ñe armej in ekõm̦m̦an an juon iaan rein reddik jerawiwi. 3 Kom̦win kõjparok kom̦ make. El̦aññe juon jeim̦ ak jatũm̦ ej bõd n̦ae eok, kwõn kajim̦we. Innem ñe enaaj ukel̦o̦k, kwõn jol̦o̦k an bõd. 4 Jekdo̦o̦n ñe enaaj bõd n̦ae eok jimjuon alen ilo juon raan, im iwõj ñan ippam̦ jimjuon alen im ba, ‘Kwõn jol̦o̦k aõ bõd,’ ak kwõj aikuj jol̦o̦k an bõd.”

5 Innem rijjilõk ro rar ba ñan Irooj: “Kwõn jipañ kõm bwe en l̦apl̦o̦k ammim tõmak.” 6 Im Irooj eba: “El̦aññe joñan ami tõmak en kar ãinwõt juon ineen mustard,* innem kom̦ maroñ kar ba ñan wõjke mulberry in im ba, ‘Em̦m̦akũt jãn ijin, im etal im eddek ilo̦jet!’ innem enaaj kar pokake kom̦.

7 “Ñe juon am̦ ri-karejar* ej jepl̦aaktok jãn an kapidodo bwidej ak lale jiip ko ilo mel̦aaj, wõn iaami enaaj kar ba ñane, ‘Kwõn kaiur im itok im m̦õñã ilo tebõl̦ in’? 8 Ijello̦kun am̦ naaj ba men in, kwõnaaj kar ba, ‘Kwõn kõpooj kijõ m̦õñã in jota im kwõn kõn̦ak nuknukin kõmat eo am̦ im bõktok men ko ij aikuji m̦ae iien em̦õj aõ m̦õñã im idaak. Innem ñe em̦õj kwõj kab naaj m̦õñã im idaak.’ 9 Armej in eban kam̦m̦oolol ri-karejar* eo an kõnke ri-karejar eo ej baj kõm̦m̦ane wõt jerbal eo an. 10 Ilo ejja wãween in wõt, ñe em̦õj ami kõm̦m̦ani aolep jerbal ko kar liwaj ñan kom̦, kom̦win ba: ‘Kõm ri-karejar* bajjek. Kõmij baj kõm̦m̦ani wõt jerbal ko ammim.’”

11 Ke ear jibadekl̦o̦k Jerusalem, ear etal ikõtaan Sameria im Galili l̦o̦k. 12 Im ke ear tõparl̦o̦k juon bukwõn, joñoul em̦m̦aan ewõr aer nañinmej in lõba rar itok ñan ippãn, bõtab rar jutak ettol̦o̦k jãne. 13 Innem rar kõl̦l̦aaj ainikieer im ba: “Jesus, ri-Kaki, kwõn tũriam̦okake kõm!” 14 Ke ear lo er, ear ba ñan er: “Kom̦win ilo̦k im jãdel̦o̦k ñan ippãn bũrij ran̦.” Ke rej etal, rar erreo jãn nañinmej eo aer. 15 Bõtab ke juon iaaer ear lo bwe emour, ear bar jepl̦aaktok im ear kõl̦l̦aaj ainikien im nõbar Anij. 16 Innem ear buñpedo iturin neen Jesus im kam̦m̦oolole, em̦m̦aan in ej juon ri-Sameria. 17 Im Jesus ear ba: “Kar karreoik joñoul em̦m̦aan, ejjab ke? Innem ewi l̦õm̦aro ratimjuon? 18 Ta m̦ool ke aolepeer rar jab jepl̦aaktok im nõbar Anij ijello̦kun wõt em̦m̦aan in jãn bar juon aelõñ ke?” 19 Innem ear ba ñan em̦m̦aan eo: “Kwõn jutak im etal. Am̦ tõmak ear kõmour eok.”

20 Ke Parisi ro rar kajjitõk ippãn Jesus kõn ñããt eo Aelõñ eo an Anij* enaaj itok, ear uwaak im ba: “Aelõñ eo an Anij ejjab itok ilo juon wãween ealikkar ñan aolep, 21 im armej reban ba, ‘Eñiõ!’ ak ‘Eñuweo!’ Ij ba ñan kom̦ bwe Aelõñ eo an Anij epãd ibwiljimi.”

22 Innem ear ba ñan ri-kal̦oor ro an: “Juon iien kom̦ naaj kõn̦aan loe juon iaan raan ko an Nejin armej,* bõtab kom̦ ban loe. 23 Armej renaaj ba ñan kom̦, ‘Eñuweo!’ ak, ‘Eñiõ!’ Bõtab kom̦win jab etal ak kõpool̦ er. 24 Ãinwõt an ejjaromrom im meram jãn jabõn lañ ñan jabõn eo juon, enaaj ãindein Nejin armej ilo raan eo an. 25 Bõtab enaaj aikuj iioon elõñ eñtaan m̦okta im armej in epepen in renaaj kõjekdo̦o̦ne. 26 Men ko renaaj wal̦o̦k ilo raan ko an Nejin armej, renaaj ãinl̦o̦kwõt men ko rar wal̦o̦k ilo tõre ko an Noa. 27 Armej rar m̦ad wõt kõn aer m̦õñã im idaak im m̦are m̦ae raan eo Noa ear del̦o̦ñ ilowaan wa eo,* im Ibwijleplep eo ear itok im ko̦kkure er aolep. 28 Bareinwõt, enaaj ãinl̦o̦kwõt tõre ko an Lot. Armej ro rar m̦õñã im idaak, rar wia kab wiakake, im rar kallib im ekkal. 29 Bõtab ilo raan eo Lot ear ilo̦k jãn Sodom, ear wõtlo̦k kijeek im dekã ko rebwil jãn lañ im ko̦kkure er aolep. 30 Enaaj ãindeinl̦o̦k wõt ilo raan eo ñe Nejin armej enaaj kwal̦o̦k e make.

31 “Ilo raan en̦, jabdewõt eo ej pãd iraan m̦weo im̦õn ak men ko m̦weien rej pãd ilowaan m̦weo, en jab del̦o̦ñ ilowaan m̦weo im bũki men kein. Bareinwõt, jabdewõt eo ej pãd ilo jikin kallib, en jab ro̦o̦l im bũki men ko ear likũti wõt. 32 Keememej lio pãleen Lot. 33 Jabdewõt eo ej pukot kilen an kõjparok mour eo an, enaaj mej. Bõtab jabdewõt eo enaaj mej, ej lo̦mo̦o̦ren mour eo an. 34 Ij ba ñan kom̦ bwe ilo naaj boñõn en̦, ruo armej renaaj babu ilo juon peet, naaj bõk juon im kõjekdo̦o̦n eo juon. 35 Enaaj wõr ruo kõrã rej irir wiit ippãn doon, naaj bõk juon im kõjekdo̦o̦n eo juon.” 36 *⁠—— 37 Innem rar ba ñane: “Irooj, ia eo enaaj wal̦o̦k men in ie?” Im eba ñan er: “Ijo ewõr ãnbwinnin ri-mej ie, bao ikõl̦ ko renaaj kobatok ippãn doon.”