1 Jon

1 Kõmij jejewaj ñan kom̦ kõn eo ej bõktok naan eo ej letok mour, eo ear pãd jãn jinoin, eo kõmar roñ an kõnono, eo kõmar loe kõn mejãm, aet, kõmar lukkuun loe im uñũri kõn peim, 2 (aet, mour eo ear wal̦o̦k, im kõmar lo e im kõmij kam̦ool im kwal̦o̦k ñan kom̦ mour eo ej indeeo me ear pãd ippãn Jemãdwõj im kar kwal̦o̦ke ñan kõm), 3 eo kõmar loe im roñ an kõnono, kõmij bareinwõt kwal̦o̦k kake ñan kom̦, bwe kom̦win maroñ bareinwõt juon wõt* ippem. Ilo ad juon wõt ippãn doon, jej kobal̦o̦k ippãn Jemãdwõj im eo Nejin, Jesus Christ. 4 Kõmij jei men kein kõnke ad lañlõñ en likiio.

5 Eñin ej ennaan eo kõmar roñ jãne im kõmij kõjjel̦ãik kom̦ kake: Anij ej meram eo, im ejjel̦o̦k marok ilo e ñan jidik.* 6 El̦aññe jej ba, “Jej juon wõt ippãn,” ijoke jej wõnm̦aanl̦o̦k wõt im etetal ilo marok, eokwe jej riab im jejjab mour ekkar ñan m̦ool eo. 7 Bõtab, el̦aññe jej etetal ilo meram ãinwõt An pãd ilo meram, innem jej bõrokuk ippãn doon, im bõtõktõkin Jesus, eo ej Nejin, ej karreoik kõj jãn aolep jerawiwi.

8 El̦aññe jej ba, “Ejjel̦o̦k ad jerawiwi,” eokwe jej m̦on̦e kõj make im m̦ool ejjab pãd ilo kõj. 9 El̦aññe jej kwal̦o̦k jerawiwi ko ad, Anij enaaj jol̦o̦ki im karreoik kõj jãn aolep men ko rejjab wãnõk, kõnke etiljek im wãnõk. 10 El̦aññe jej ba, “Jejjañin kar jerawiwi,” eokwe jej ba bwe e ri-riab, im naan eo an ejjab pãd ilo kõj.