Mark
3 Juon iien Jesus ear bar del̦o̦ñl̦o̦k ilo juon im̦õn kabuñ, im juon em̦m̦aan emej rãjetin pein ej pãd ijo. 2 Innem Parisi ro rar kanooj lale wãween an Jesus m̦akũtkũt bwe ren lale enaaj ke kõmour em̦m̦aan eo ilo raanin Jabõt * kõnke ren kõm̦m̦an ruõn. 3 Im ear ba ñan em̦m̦aan eo emej rãjetin pein im ba: “Jutak im itok ñan ije iol̦ap.” 4 Innem Jesus ear ba ñan er: “Ta eo emãlim ñan kõm̦m̦ane ilo raanin Jabõt, men ko rem̦m̦an ke ak men ko renana? Emãlim ñan lo̦mo̦o̦ren juon armej ke ak m̦ane?” Bõtab rar jab uwaak ñan jidik. 5 Innem ear kalimjek er im ear illu ippãer, bõtab ear bar lukkuun bũrom̦õj kõn an pen bũrueer. Kõn men in, ear ba ñan em̦m̦aan eo: “Kwõn erl̦o̦ke peim̦.” Im ke ear erl̦o̦ke pein, pã eo ear oktak im bar em̦m̦an. 6 Innem Parisi ro rar diwõjl̦o̦k, im ilo iien eo wõt rar kweilo̦kl̦o̦k ippãn armej ro doon Herod. Rar pepe ippãn doon bwe ren m̦an Jesus.
7 Bõtab Jesus im ri-kal̦oor ro an rar ilo̦k ñan Lom̦al̦o in Galili, im elõñ jarlepju in armej jãn jikin ko ilo Galili im Judia rar l̦oorel̦o̦k. 8 Bareinwõt, elõñ jarlepju in armej rar itok ñan ippãn jãn Jerusalem, Aidumia, jikin ko iturearin Reba Jordan, im jãn jikin ko ipel̦aakin Tair im Saidon. Rar jibadeketok kõnke rar roñ kõn men ko wõj ear kõm̦m̦ani. 9 Innem ear jiroñ ri-kal̦oor ro an bwe ren kõpooje juon wa ñane bwe armej ro ren jab ko̦baje. 10 Kõnke ear kõmour elõñ ri-nañinmej, aolep ro me ewõr nañinmej ko rel̦l̦ap ippãer rar kepaake bwe ren uñũri. 11 Iien otemjej ñe jetõb ko rettoon rej lo e, rej buñpedo ñane im lam̦õj im ba: “Kwe Nejin Anij!” 12 Bõtab, ear lukkuun jiroñ er elõñ alen bwe ren jab kõnnaanek ro jet kõn e.
13 Innem ear wanlõñl̦o̦k ilo juon tol̦ im ear kũrl̦o̦k jet iaan ri-kal̦oor ro an, im rar ilo̦k ñan ippãn. 14 Im ear kããlõt 12 iaaer, im ear n̦aetaer rijjilõk. Em̦m̦aan rein rar itoitak ippãn im ekõn jilkinl̦o̦k er bwe ren kwal̦o̦k naan. 15 Ear bar lel̦o̦k ñan er maroñ bwe ren kadiwõjl̦o̦k jetõb ko rettoon.*
16 Eñin ej ãt ko etan em̦m̦aan ro 12 ear kããlõt er: Saimõn, eo Jesus ear n̦aetan Piter, 17 l̦õm̦aro nejin Zebedi etaer Jemes im Jon (Jesus ear n̦aetaerro Boanerjis, mel̦el̦ein “Nejin Jourur”), 18 im Andru, Pilip, Bartolomu, Matu, Tomas, Jemes nejin Alpiõs, Tadiõs, Saimõn, eo im el̦ap an kijejeto, 19 im Judas Iskariõt, eo ear ketake Jesus tokãlik.
Innem ke Jesus ear del̦o̦ñl̦o̦k ilo juon em̦, 20 ear bar itok juon jarlepju in armej ñan ippãn. Kõn men in, ekar ejjel̦o̦k iien aereañ ri-kal̦oor ro an m̦õñã. 21 Ke ro ilo baam̦le eo an rar roñ kõn men in, rar etal bwe ren ãñini, kõnke rar ba: “Em̦õj an jino jorrããn kõmãlij en̦ an.” 22 Bareinwõt, skraib ro rar itok jãn Jerusalem rar ba: “Beelzebub* n̦e ippãn. Ej kadiwõjl̦o̦k jetõb ko rettoon ikijjeen ri-tõl eo an jetõb ko rettoon.” 23 Kõn men in, ear kũrtok er ñan ippãn im kwal̦o̦k jet waanjoñak im ba: “Setan emaroñ ke kadiwõjl̦o̦k Setan? 24 Juon aelõñ enaaj jorrããn ñe armej ro ie rej jum̦aik doon, 25 im ñe ro ilo juon baam̦le rej jum̦aik doon, enaaj jorrããn baam̦le eo. 26 Bareinwõt el̦aññe Setan ej jum̦aik e make im ro doon rej jepel, enaaj jeepepl̦o̦k im jako. 27 Ejjel̦o̦k armej emaroñ del̦o̦ñe m̦weo im̦õn juon em̦m̦aan ekajoor im bũki men ko ilowaan m̦weo. Ej aikuj m̦okta lukwõje em̦m̦aan eo ekajoor innem emaroñ ko̦o̦ti men ko ilowaan m̦weo. 28 Ij jiroñ kom̦ bwe Anij enaaj jol̦o̦k bõd ko otemjej an armej. Enaaj jol̦o̦k aer bõd jekdo̦o̦n ñe enana men ko rej kõm̦m̦ani im jekdo̦o̦n ñe rej kõnono n̦ae. 29 Bõtab, jabdewõt eo ej kõnono n̦ae jetõb kwõjarjar,* enaaj wõr ruõn ñan indeeo im Anij ejjãmin jol̦o̦k an bõd.” 30 Unin an Jesus ba naan kein ej kõnke rar ba: “Euwe jetõb ettoon ippãn.”
31 Innem jinen Jesus im l̦õm̦aro jatin rar itok im jutak inabõjin m̦weo, im rar jilkinl̦o̦k juon bwe en kũrtok e. 32 Ilo tõre in, elõñ armej rej jijet iturin Jesus, im rar ba ñane: “Jinõm̦ im l̦õm̦aro jatũm̦ ran̦ inabõj rej kappukot eok.” 33 Bõtab ear ba: “Wõn eo jinõ, im wõn ro jatũ?” 34 Innem ear kalimjeke ro rej jijet im doululi, im ear ba: “Errein ej ro jinõ im ro jatũ! 35 Jabdewõt eo ej kõm̦anm̦an ankilaan Anij, armej in ej jinõ im jeiũ kab jatũ.”